ၸုမ်းၸဵင်ၼုမ်ႇ ဢႅဝ်ႇၵဵပ်းယုၵ်းယၢၵ်း ႁဵတ်းလွင်ႈမူတ်းသႂ် တၢတ်ႇႁၢႆးပႃ ၊ တၢတ်ႇၵဵင်းတွင်း ယိူင်း ဢၢၼ်းပိူဝ်ႈႁႂ်ႈပဵၼ်တူဝ်ယၢင်ႇလီႁႂ်ႈၽူႈဢႅဝ်ႇယဵမ်ႈမီးတၢင်းယၢမ်ႈပႅတ်ႈယုၵ်းယၢၵ်းပဵၼ်တီႈပဵၼ်တၢင်း ။


ဝၼ်းတီႈ 14 -17 /04/2016 ၸုမ်းၸဵင်ၼုမ်ႇ လႃႈသဵဝ်ႈ ဢွၵ်ႇလဵပ်ႈႁဵၼ်းတၢင်းႁၢင်ႈလီမိူင်းတႆး သေဢွၼ်ၵၼ်ႁဵတ်းလွင်ႈမူတ်းသႂ်ပိုၼ်ႉတီႈဢႅဝ်ႇယဵမ်ႈဢၼ်မီးၸိုဝ်ႈသဵင်ႈမိူၼ်ၼင်ႇတၢတ်ႇလူင် ၵဵင်းတွင်း ၊ တၢတ်ႇႁၢႆးပႃ ၸဵမ်ၸိူဝ်းၼႆႉ ။

ယိူင်းဢၢၼ်းပိူဝ်ႈတႃႇႁႂ်ႈပဵၼ်တူဝ်ယၢင်ႇတွၼ်ႈတႃႇၽူႈဢႅဝ်ႇယဵမ်ႈၶဝ်ပေႃးတေမေႃဝႆႉၵႃႈၶၼ်သိင်ႇ ဝႅတ်ႉလွမ်ႉ၊ၸွႆႈၵၼ်ပႅတ်ႈယုၵ်းယၢၵ်းပဵၼ်တီႈပဵၼ်တၢင်း ၊ လႄႈႁႂ်ႈၵူၼ်းမိူင်းပေႃးတေႁၼ်ၵႃႈၶၼ်း မေႃဝႆႉၵႃႈၶၼ် ၶူဝ်းၶွင်ၾိင်ႈတိုၼ်း ၵိုၵ်းပိုၼ်း မိူင်းတႆး ၼႆယဝ်ႉ ။


ၸၢႆးဢၢႆႈသိူဝ် ႁူဝ်ၼႃႈၸုမ်းၸဵင်ၼုမ်ႇ လၢတ်ႈဝႃႈ - “ ပီႈၼွင်ႉၵူၼ်းမိူင်းတႆးႁဝ်း ပေႃးၵူၺ်းၵုမ်ႇၵႂႃႇ လဵပ်ႈႁဵၼ်းတီႈမိူင်းပိူၼ်ႈတိၵ်းတိၵ်းၵူၺ်းၵေႃႈ ႁဝ်းၵွႆးတေမေႃၶဝ်ႈၸႂ်လွင်ႈမိူင်းပိူၼ်ႈထၢင်ႇယႂ်ႇပိူၼ်ႈ ၵႂႃႇတိၵ်းတိၵ်းၵွႆး လွင်ႈဝႃႈဝၢၼ်ႈႁဝ်းမိူင်းႁဝ်းၵေႃႈ မီးတၢင်းႁၢင်းလီၸိူင်ႉပိူၼ်ႈလၢႆၸိူဝ်ႉလၢႆယၢင်ႇ ၼၼ်ႉႁဝ်းမေႃလိုမ်းႁၼ်ၵႂႃႇ ထၢင်ႇဝႃႈ ဝၢၼ်ႈႁဝ်းမိူင်းႁဝ်းၼႆႉ ဢမ်ႇမီးတီႈလီတွင်ႈတဵဝ်းသုတ်ႇလူမ်း ယဵၼ်သင်ၼႆၵူၺ်းၵွပ်ႈၼၼ် ၶႂ်ႈတိုၵ်းသူၼ်းထိုင်ပီႈၼွင်ႉတႆးႁဝ်း သင်ၺႃးဝၼ်းလိုဝ်ႈၵၢၼ်လႄႈ ၶႂ်ႈဢွၵ်ႇလႄႇတွင်ႈတဵဝ်းၼႆ ယႃႇပေလိုမ်းဢွၵ်ႇလႄႇတွင်ႈတဵဝ်းလဵပ်ႈႁဵၼ်း တၢင်း ႁၢင်ႈလီ လွႆလူင်မိူင်း ႁဝ်းလႄႈ ၵေးၼမ်ႉၼွင်ၼမ်ႉတူၵ်းတၢတ်ႇတီႈမိူင်းႁဝ်းသေၵမ်း ” ၼႆယဝ်ႉ ။


ၸုမ်းၸဵင်ၼုမ်ႇ ၼႆႉႁူဝ်ၼႃႈပဵၼ်ၸၢႆးဢၢႆႈသိူဝ် မီးလုၵ်ႈၸုမ်း 27 ၵေႃႉ တူင်ႉၼိုင်မိူၼ်ၼင်ႇႁပ်ႉသူင်ႇ ပၼ်ၽိုၼ်ၶၢဝ်တႆး ၊ ဢွၵ်ႇၽိုၼ်လိၵ်ႈၽၢၵ်ႇတွၼ်ႈ (မိူဝ်ႈပီမႂ်ႇလႂ်မိူဝ်ႈၵေႃႁူမ်ႈ သၢင်ႈၵူၼ်းၼုမ်ႇတႆး ၶိုၼ်းလွႆလႄႈပၢင်ႁူပ်ႉထူပ်းၵၼ် ၊ ႁူမ်ႈႁွမ်းတင်းၵေႃလိၵ်ႈလၢႆးလႄႈၾိင်ႈငႄႈတႆးဝဵင်းလႃႈသဵဝ်ႈၸတ်းၶိုင်ပၢင်သွၼ်လိၵ်ႈလၢႆးတႆး ၸိူဝ်းၼႆႉ ။ လွင်ႈႁူမ်ႈၵၼ်ဢွၵ်ႇၶၢဝ်းတၢင်း လဵပ်ႈႁဵၼ်း တၢင်းႁၢင်ႈလီ မိူင်းတႆးလႄႈႁဵတ်းလွင်ႈမူတ်း သႂ်တႄႉ ပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်းဝႃႈၼႆ ။


ၵဵဝ်ႇလူၺ်ႈလွင်ႈႁဵတ်းလွင်ႈမူတ်းသႂ်ၼႆႉသေၸုမ်းၵူၼ်းၼုမ်ႇမိူင်းသူႈၵေႃႈၵႆႉၵႆႉဢွၼ်ၵၼ်ဢွၵ်ႇၵဵပ်းယုၵ်းယၢၵ်ႈၼႂ်းဝဵင်းၸွမ်းၵၢတ်ႇ ၸွမ်းသၢႆၵေးၼမ်ႉပၢင် တၢတ်ႇႁၢႆးပႃၸိူဝ်းၼႆႉယူႇ - ဝႃႈၼႆ ။