တိူင်းသိုၵ်းလႃႈသဵဝ်ႈ ၸီႉသင်ႇႁႂ်ႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ထွၼ်တပ်ႉဢွၵ်ႇ ထုင်ႉလွႆၸေး လွႆလၢၼ်း ၊ ၸိူဝ်းယူႇၾၢႆႇတူၵ်းၶူင်း ဢၼ်တိတ်းဢိူမ်ႈၼႃႈလိၼ် တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၾၢႆႇဢွၵ်ႇၶူင်း ။

သိုၵ်းမၢၼ်ႈ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ) ၸီႉသင်ႇတီႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ႁႂ်ႈထွၼ်တပ်ႉဢွၵ်ႇ ထုင်ႉလွႆၸေး လွႆလၢၼ်း ၊ ၼႂ်းၸႄႈဝဵင်းတၢင်ႉယၢၼ်း ၸိုင်ႉတႆးပွတ်းႁွင်ႇ ။ ဝၼ်းတီႈ 22 လိူၼ်ဢေႊပရိူဝ်ႊလ် 2016 ၼႆႉ ဝႆႉပဵၼ်ဝၼ်းလိုၼ်းသုတ်း - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းႁွင်ႈၵၢၼ်ၾၢႆႇၶၢဝ်ႇ တပ်ႉသိုၵ်းၸိုင်ႈတႆး (SSPP/SSA) ၵေႃႉၼိုင်ႈ လၢတ်ႈဝႃႈ - တၢင်းပွတ်းတၢင်ႉယၢၼ်း လွႆၸေးလွႆလၢၼ်းၼႆႉ ပဵၼ်ပိုၼ်ႉတီႈၼႃႈလိၼ်ႁဝ်းၶႃႈ ယူႇသဝ်း ။ သိုၵ်းမၢၼ်ႈတိူင်းသိုၵ်းလႃႈသဵဝ်ႈသမ်ႉ ၸီႉသင်ႇမႃးၸႂ်ႉႁဝ်းထွၼ်ဢွၵ်ႇ။ ဝၼ်းတီႈ 22 ၼႆႉ ပဵၼ်ဝၼ်းလိုၼ်းသုတ်း - ဝႃႈၼႆ ။


ၼႃႈလိၼ်ပိုၼ်ႉတီႈၾၢႆႇတူၵ်းၶူင်း တၢင်းပွတ်းလွႆၸေးလွႆလၢၼ်းၼႆႉ ပဵၼ်ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်း ၸိုင်ႈတႆး ၵုမ်းၵမ်ဝႆႉ၊ မႄႈၼမ်ႉၶူင်းၶႅၼ်ႈဝႆႉၵၢင်သေ ၾၢႆႇဢွၵ်ႇၶူင်း ပဵၼ်ၼႃႈလိၼ်ဝႃႉ ။ ပေႃးဝႃႈ ၾၢႆႇသိုၵ်းမၢၼ်ႈၶဝ်ယိုတ်းလႆႈ လွႆၸေးလွႆလၢၼ်းယဝ်ႉ တင်ႈၶိူင်ႈၵွင်ႈလူင် ယိူင်းယိုဝ်းထိုင်လႆႈ ငဝ်ႈငုၼ်းဝႃႉ UWSA ဝဵင်းပၢင်သၢင်း ၊ ပၢင်ယၢင်း ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ပဵၼ်ၸုမ်းလူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ်ဝႆႉ တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်း ႁူမ်ႈတုမ် ။ ထုင်ႉလွႆၸေးလွႆလၢၼ်း ၸႄႈဝဵင်းတၢင်ႉယၢၼ်းၼႆႉ SSPP/SSA ပၵ်းယူႇမႃးၶၢဝ်းတၢင်းႁိုင် ။ တႃႇတေထွၼ်ဢွၵ်ႇပၼ် ၸွမ်းၼင်ႇၾၢႆႇသိုၵ်းမၢၼ်ႈၸီႉသင်ႇမႃးၼၼ်ႉ ယၢပ်ႇယူႇ ။


ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းႁွင်ႈၵၢၼ်ၾၢႆႇၶၢဝ်ႇ SSPP/SSA သိုပ်ႇလၢတ်ႈဝႃႈ - တၢင်းပွတ်းလွႆၸေး လွႆလၢၼ်း ၼႂ်းၸႄႈဝဵင်းတၢင်ႉယၢၼ်းၼႆႉ SSA ပၵ်းယူႇမႃးမီး 40-50 ပီမိူင်းယဝ်ႉ ၊ လွင်ႈၼႆႉ ၶႂ်ႈႁႂ်ႈၾၢႆႇသိုၵ်းမၢၼ်ႈၶဝ်ႁူႉပွင်ႇ ၊ ယႃႇပေမႃးၸႂ်ႉႁဝ်းထွႆ ၼႆၵေႃႈလၢတ်ႈၶဝ်ၵႂႃႇယူႇ ။ ပေႃးဝႃႈ SSPP/SSA ထွၼ်ဢွၵ်ႇထုင်ႉၼႆႉပၼ်ၶဝ်ၸိုင် တၢင်းတွၼ်ႈပွတ်းတႂ်ႈ တၢင်းမိူင်းသူႈၵေႃႈ တေလႆႈထွၼ်ပၼ် ။ ပေႃးဢဝ်ပၢႆးၵၢၼ်သိုၵ်းဝႃႈ သိုၵ်းမၢၼ်ႈၶဝ်ယူႇၾၢႆႇပေႉပုၼ်ႈယဝ်ႉ ။ ၵွပ်ႈၼၼ် ၸိူင်ႉၼင်ႇပၼ်ဢၼုၺၢတ်ႈ ႁႂ်ႈသိုၵ်းမၢၼ်ႈမႃးလွမ်ႉႁွပ်ႈဝၢၼ်ႈႁႆး ၵမ်းလဵဝ်ယဝ်ႉ ၊ ၵွပ်ႈၼႆလႄႈတႃႇတေထွၼ်ၼႆႉမၼ်းယၢပ်ႇ - ဝႃႈၼႆ ။


ထုင်ႉသၼ်လွႆၸေးလွႆလၢၼ်းၼႆႉ ပဵၼ်ပိုၼ်ႉတီႈၼႃႈလိၼ် သဵၼ်ႈတၢင်းတိတ်းတေႃႇၵပ်းသိုပ်ႇ ဝႃႉတင်းတႆး (SSPP/SSA) ။ သင်ၸိူဝ်ႉဝႃႈ SSPP/SSA ဢမ်ႇယွမ်းထွၼ်လႄႈၾၢႆႇတပ်ႉသိုၵ်းမၢၼ်ႈၶဝ် ႁၢင်ႈသိုၵ်းမႃးလေႃႇတိုၵ်းၵေႃႈ မိူၼ်ၵၼ်တင်းမႃးယွၵ်ႈမွၼ်ႇ တပ်ႉသိုၵ်းမိူင်းဝႃႉၽွမ်ႉႁူမ်ႈယဝ်ႉ - ၽူႈလဵပ်ႈႁဵၼ်း ၵၢၼ်မိူင်း ဢူးၵႃႇမၼိ လၢတ်ႈ ။


ပိုၼ်ႉတီႈၼႃႈလိၼ်တွၼ်ႈၼႆႉ ပူၼ်ႉမႃးမိူဝ်ႈပီ 2014 ၵေႃႈ ၾၢႆႇသိုၵ်းမၢၼ်ႈယၢမ်ႈၸႂ်ႉ SSPP/SSA ထွၼ်ဢွၵ်ႇ ။ ဢွၼ်ၼႃႈၼၼ်ႉ မိူဝ်ႈပီ 2011 ၵေႃႈ သိုၵ်းမၢၼ်ႈၸႂ်ႉထွၼ်ပွတ်းတွၼ်ႈၼႆႉလႄႈ သွင်ၾၢႆႇလႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း ။ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈၽေးသိုၵ်း ၵႂႃႇယူႇတီႈၼမ်ႉလဝ်း မိူင်းၵၢဝ် ဝဵင်းတၢင်ႉယၢၼ်းၸိူဝ်းၼႆႉ ။