ၾိင်ႈထုင်းၸၢဝ်းၶိူဝ်းတႆး ဢၼ်ၵဵဝ်ႇၶွင်ႈပုတ်ႉထသႃသၼႃၼၼ်ႉ ပဵၼ်ပွႆးသၢင်ႇလွင်းပွႆးၼိုင်ႈ ။ ပၢၼ်မိူဝ်ႈလဵဝ်ၼႆႉ ပေႃးထိုင်ၶၢဝ်းႁႅင်ႈလိူၼ်သီႇလိူၼ်ႁႃႈမႃး ၵွပ်ႈပဵၼ်ၶၢဝ်းယၢမ်းတူဝ်ႈတၼ်းသေ ပီႈၼွင်ႉတႆးဢွၼ်ၵၼ် ႁဵတ်းၵၢၼ်တၢင်းလီ ဢဝ်လုၵ်ႈလၢၼ်ၶဝ်ႈႁၢပ်ႇၵိုတ်ႉၵၢၼ်သႃသၼႃ ႁဵတ်းသၢင်ႇလွင်း / ၸၢင်းလွင်း ။ ၵွပ်ႈၼၼ် ပီႈၼွင်ႉတႆး ဢမ်ႇဝႃႈယူႇမိူင်းထႆး မိူင်းတႆး ဢွၼ်ၵၼ်ႁဵတ်းပွႆးသၢင်ႇလွင်း ။

ပွႆးသၢင်ႇလွင်းဝတ်ႉၵူႈတဝ်ႈ ၸွမ်းၾိင်ႈထုင်းၸၢဝ်းၶိူဝ်းတႆး

ပွႆးသၢင်ႇလွင်း ၼႂ်းမိူင်းထႆးၼၼ်ႉ ၼႂ်းလိူၼ်မၢတ်ႊၶျ် (2016) ၼႆႉ လႆႈၸတ်းယဝ်ႉတူဝ်ႈၵႂႃႇယဝ်ႉ လၢႆတီႈလၢႆဝတ်ႉ လၢႆလၢႆၸႄႈဝဵင်း ။ ပွႆးသၢင်ႇလွင်းဝတ်ႉၵူႇတဝ်ႈ ဢိူင်ႇသီၽုမ်း မိူင်းၵဵင်းမႆႇ ဢၼ်ယၢမ်ႈၸတ်းယိင်ႈယႂ်ႇမႃးလၢႆလၢႆပီၼၼ်ႉၵေႃႈ ဝၼ်းတီႈ24/03/2016 ပဵၼ်ဝၼ်းထႃႁူဝ်သၢင်ႇလွင်း ။ ဝၼ်းတီႈ 25 (လိူၼ်သီႇလွင်ႈ 3 ၶမ်ႈ) ဢဝ်သၢင်ႇလွင်း ။ ဝၼ်းတီႈ 26 ဝၼ်းႁပ်ႉၶႅၵ်ႇ လဵင်ႉလူ ။ ဝၼ်းတီႈ 27 (လိူၼ်သီႇလွင်ႈ 5 ၶမ်ႈ) ဝၼ်းၼုင်ႈလိူင်ၶၢမ်ႇသၢင်ႇ လူႇတၢၼ်းယၢတ်ႇၼမ်ႉ ။


ပွႆးသၢင်ႇလွင်းဝတ်ႉၵူႇတဝ်ႈၼႆႉ လိူၵ်ႈဝၼ်းႁႂ်ႈမႅၼ်ႈဝၼ်းသဝ် ဝၼ်းဢႃးတိတ်ႉ ဝူင်ႈလိုၼ်းသုတ်း ၶွင်လိူၼ်မၢတ်ႊၶျ် ၵူႈပီ - ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၸၢႆးသႅင်ယ ယၢမ်ႈလၢတ်ႈၼင်ႇၼႆ ။ ၵူၺ်းၵႃႈ ပွႆးသၢင်ႇလွင်းဝတ်ႉပႃႇပဝ်ႈ ဢိူင်ႇသီၽုမ်း ၵဵင်းမႆႇ ၊ ပၵတိ ၸတ်းဝၼ်းတီႈ 4-6/04/2014 ၵူႈပီ ။ ပီ 2016 ၊ ပီပုတ်ႉထသႃသၼႃ 2559 ၼႆႉ ပီႈၼွင်ႉတႆးၼႂ်းမိူင်းတႆးၵေႃႈ ၸတ်းပၢင်ပွႆးသၢင်ႇလွင်း / ၸၢင်းလွင်း လၢႆတီႈလၢႆၸႄႈဝဵင်း ။


ပွႆးသၢင်ႇလွင်း ၼႂ်းမိူင်းထႆးၼႆႉ ဢၼ်ယၢမ်ႈၸတ်းယိင်ႈယႂ်ႇ ၵိုၼ်းၶိုၵ်ႉယႂ်ႇၵူႈပီၼၼ်ႉ ၼႂ်းၸႄႈတွၼ်ႈၵဵင်းမႆႇ မီးမိူင်းၼင်ႇၼႂ်းမိူင်းၵဵင်းမႆႇ ၊ ၸႄႈဝဵင်းမႄႈရိမ်း ၊ ၸႄႈဝဵင်းလွႆသၵဵတ်း ၊ ၸႄႈဝဵင်းႁၢင်ၻူင်း ၊ ၸႄႈဝဵင်းသၼ်သၢႆး ၊ ၸႄႈဝဵင်းသၼ်ပႃႇတွင်း ၊ ၸႄႈဝဵင်းမႄႈတႅင် ၊ ၸႄႈဝဵင်းမိူင်းၾၢင် ၊ ၸႄႈဝဵင်းမႄႈဢၢႆး ၊ ၸႄႈဝဵင်းဝဵင်းႁႅင် ၸိူဝ်းၼႆႉ ။ ၵူၺ်းၵႃႈ တီႈၼႂ်းၸႄႈဝဵင်းဝဵင်းႁႅင်ၼၼ်ႉၵေႃႈ ပွႆးသၢင်ႇလွင်းဝတ်ႉပဵင်းလူင် ဢိူင်ႇပဵင်းလူင် ၸတ်းဝၢႆးလိူၼ်ႁႃႈ သွၼ်းၼမ်ႉ မွၵ်ႈဝၼ်းတီႈ 20 ပၢႆၵူႈပီ ။ ၾၢႆႇၼိုင်ႈတၢင်းၼိုင်ႈ ၸႄႈဝဵင်းမႄႈႁွင်ႈသွၼ်ၵေႃႈ ၸတ်းပွႆးသၢင်ႇလွင်းၼင်ႇၵဝ်ႇ ။


ပွႆးသၢင်ႇလွင်းၼႆႉ ၸွမ်းၼင်ႇလႆႈႁူႉသိူၵ်ႈပိုၼ်းမၼ်းၽွင်ႈၼၼ်ႉ  ၵိူတ်ႇၶိုၼ်ႈမီးမႃးဝၢႆးပုတ်ႉထြၽႃးပဵၼ်ၸဝ်ႈ ၶဝ်ႈၼိပ်ႉပၢၼ်ႇၵႂႃႇ လႆႈမွၵ်ႈ 200 ပီပၢႆပၢႆ ။ ၽွင်းၼၼ်ႉ ၶုၼ်ႁေႃၶမ်း ဢသူဝ်ၵၽွင်းငမ်းဝၢၼ်ႈမိူင်း ၊ မၼ်းၸဝ်ႈၼပ်ႉထိုဝ်ၵိူဝ်းလီ ယုၵ်ႉယွင်ႈသႃသၼႃပုတ်ႉထလူင်လၢင်သေ ႁဵတ်းတၢၼ်းၼမ်ႉမေႃႇ 84,000 (ပႅတ်ႇမိုၼ်ႇသီႇႁဵင်) ၊ ၸေႇၻီႇၵွင်းမူး 84,000 ၊ လိူဝ်သေၼၼ်ႉ ပေႃးထိုင်လိူၼ် 12 မူၼ်းၵူႈပီၵေႃႈ တၢၼ်းၸီဝရသၢင်ႇၵၢၼ်း လဵင်ႉသွမ်းၸဝ်ႈရႁၼ်တႃဢၢၼ်ႇမိုၼ်ႇတူၼ်ၵူႈၼ်ႂ ။


ပဵၵ်ႉသမ်ႉလႆႈႁႅၼ်းတၢၼ်း / ႁဵတ်းတၢင်းလီတင်းၼမ်ၵေႃ မၼ်းၸဝ်ႈပႆႇၶဝ်ႈၼႂ်းသၢႆမၢႆ (သႃသၼႃတႃယၸ်ႉၸ) မိူၼ်ၼၢင်းဝိသႃၶႃ ၊ ၽူႈမၢၵ်ႈမီးသထေးလူင်ဢၼႃထပိၼ်ၶဝ် ။ မၼ်းၸဝ်ႈၸင်ႇဢဝ်လုၵ်ႈၸၢႆး ၸဝ်ႈမႁိၼ်တ ၶဝ်ႈထၢမ်း ၵၢၼ်သႃသၼႃပုတ်ႉထလႄႈ ၸွမ်းၼင်ႇၾိင်ႈထုင်းၶုၼ်မီးၼၼ်ႉ ၸင်ႇၼုင်ႈၶူဝ်းၸဝ်ႈၸၢႆးၵႅမ်မိူင်း ၶိုၼ်ႈၶီႇမႃႉ ၊ ၵႄႇမၢတ်ႈၽွင်းမိူင်း ၸိူင်ႉၼၢင်းၶဝ်ၵင်ႈၸွင်ႈၽိူၵ်ႇၸွင်ႈၶမ်းပၼ်သေ ၵူၼ်းဝၢၼ်ႈၵူၼ်းမိူင်း ၸင်ႇလွမ်ႉႁွပ်ႈၸွမ်းၶၢင်ႈ / ၼႃႈ / လင် ဢဝ်လဵပ်ႈႁေႃၸဵတ်းႁွပ်ႈ ၸင်ႇဢဝ်မိူဝ်းတီႈဝတ်ႉလူင် ဢသူဝ်ၵရႃမ ၊ ယဝ်ႉၼုင်ႈၽႃႈလိူင်သၢင်ႇၵၢၼ်းပဵၼ်ရႁၼ် ။


လုၵ်ႉတီႈၼၼ်ႈသေ ၸွမ်းၼင်ႇသႃသၼႃပုတ်ႉထၽႄႈတိူၼ်းထိုင်မိူင်းတႆးလႄႈ ၸၢဝ်းၶိူဝ်းတႆးၵိူဝ်းလီပုတ်ႉထ ၸင်ႇယိူင်ႈႁဵတ်းၸွမ်းမႃးပၢၼ်သိုပ်ႇပၢၼ် ထိုင်တီႈယဵၼ်းပဵၼ်ၾိင်ႈထုင်းတႆးမႃး ပၢၼ်သိုပ်ႇပၢၼ် တႄႇၸဵမ်ပၢၼ်ပူႇပၢၼ်မွၼ်ႇ တေႃႇယၢမ်းလဵဝ် ။ ၵူၺ်းၵႃႈ ဢၼ်ၵမ်ႈၽွင်ႈဝႃႈ ယိူင်ႈၸွမ်းဢဝ်မိူဝ်ႈ ၸဝ်ႈၸၢႆးသိတ်ႉထတ်ႉထ ဢွၵ်ႇပၢႆႈႁၢင်ႈႁေႃၶဝ်ႈထိူၼ်ႇယၢမ်း ၵၢင်ၶိုၼ်းၼႆၵေႃႈမီး ၊ ဢၼ်တႆးဝႃႈ ပေႃႈသၢၼ်ႈ / မႄႈသၢၼ်ႈ (ၵူၼ်းလုမ်းလႃးသၢင်ႇလွင်း) ၼၼ်ႉၵေႃႈ ဝႃႈပဵၼ်ဢမၢတ်ႈသၼ်ႇၼ (ဢၼ်ၵိူတ်ႇႁူမ်ႈၽၢၵ်ႈယၢမ်းလဵဝ်ၵၼ်တင်းပုတ်ႉထၸဝ်ႈ) ၸွမ်းၸဝ်ႈၵႂႃႇမိူဝ်ႈ ၶဝ်ႈထိူၼ်ႇ။ ၵွပ်ႈၸိုဝ်ႈဝႃႈ “ သၼ်ၼ ” ၼႆလႄႈ ဝၢႆးမႃးတႆးႁွင်ႉ ဝႃႈ “ ဢၢႆႈသၢၼ်ႈ ” ဝႃႈၼႆၵေႃႈမီး ။


ၼႂ်းၶၢဝ်းတၢင်း 11-12 ပီမႃးၼႆႉ ၵွပ်ႈပီႈၼွင်ႉတႆးလုၵ်ႉမိူင်းတႆး ၶဝ်ႈႁဵတ်းၵၢၼ် ၼႂ်းမိူင်းထႆးၼမ်မႃးလႄႈ ပွႆးသၢင်ႇလွင်းၼႂ်းထႆးၼမ်မႃး ။ သင်ၶၸဝ်ႈၵေႃႈပၼ်ႁႅင်းၵၢၼ်ပူၵ်းပွင် / ႁၵ်ႉသႃၾိင်ႈငႄႈပုတ်ႉထ ။ ၵွပ်ႈဝႃႈၾၢႆႇၼိုင်ႈၵေႃႈ ႁဵတ်းႁႂ်ႈတၢင်းဝတ်ႉဝႃး မီးၸိုဝ်ႈသဵင်လီ ၊ ၽူႈမႃးၶဝ်ႈႁူမ်ႈပွႆးသၢင်ႇလွင်းၵေႃႈ ၸူမ်းသူင်လူတၢၼ်း ႁဵတ်းႁႂ်ႈတၢင်းဝတ်ႉမီးငိုၼ်းၶဝ်ႈၼမ် ၊ ဢၼ်မီးၵၢၼ်သၢင်ႈဝတ်ႉဝႃး ၸလွပ်ႈသႃလႃး ၊ သိမ်ႇၸိူဝ်းၼႆႉၵေႃႈ ၸဵဝ်းယဝ်ႉၸဵဝ်းတူဝ်ႈ ။


ၾၢႆႇၼိုင်ႈတၢင်းၼိုင်ႈ လူင်ပွင်ၸိုင်ႈထႆးၵေႃႈ ယုၵ်ႉယွင်ႈပၼ်ႁႅင်း လွင်ႈႁၵ်ႉသႃၾိင်ႈထုင်းၶိူဝ်းၵူၼ်းၽ်ႂမၼ်း ၵူၺ်းပႆႇပေႃး ပၼ်ႁႅင်းပႃးလွင်ႈတွင်ႈတဵဝ်းဢႅဝ်ႇမိူင်း ။ ပွႆးသၢင်ႇလွင်းတႆးၼႆႉ ယုမ်ႇယမ်ဝႃႈ မီးပုၼ်ႈသူၼ်ႇၸုင်ၸ်ႂၵူၼ်းမိူင်းၼွၵ်ႈၶဝ်ႈမႃး ဢႅဝ်ႇမိူင်းထႆးလႆႈတင်းၼမ်သေ ၵမ်ႉၸွႆႈႁဵတ်းႁႂ်ႈၵၢၼ်မၢၵ်ႈမီး မိူင်းထႆး ၶိုၼ်ႈယႂ်ႇမႂ်ႇသုင် ။


ၸိူင်ႉႁိုဝ်ၵေႃႈယဝ်ႉ ၵၢၼ်ၸတ်းပွႆးသၢင်ႇလွင်းၼႆႉ ပိူဝ်ႈတႃႇပီႈၼွင်ႉတႆး ၸိူဝ်းမႃးယူႇသဝ်းႁဵတ်းၵၢၼ် ၼႂ်းမိူင်းထႆးယူႇၼႆႉ ၵွပ်ႈဝႃႈမၼ်းပဵၼ် ၵၢၼ်ၸႂ်ႉၸၢႆႇငိုၼ်းတွင်းၼမ် မိူၼ်ၼင်ႇၵႃႈလဵင်ႉလူၼႂ်းပၢင်ပွႆး ၵူႈလွင်ႈလွင်ႈ ။ ၸႂ်ႉႁႅင်းၵူၼ်း မိူၼ်ၼင်ႇၵူၼ်းတဵင်ႇသၢင်ႇလွင်း ၊ လႆႈမီးပေႃႈလဵင်ႉမၢဝ်ႇ မႄႈလဵင်ႉသၢဝ် ၊ လႆႈၸႂ်ႉၶၢဝ်းယၢမ်းလၢႆလၢႆဝၼ်း ဢမ်ႇလႆႈလပ်းၼွၼ်းလီလီ ႁဵတ်းႁႂ်ႈတုမ်ႉတိူဝ်ႉပၢႆးယူႇလီ ၊ မၢင်ၸိူဝ်းယွၼ်ႉပွႆးသၢင်ႇလွင်းသေ ပေႃးတူၵ်းၵၢၼ်တူၵ်းငၢၼ်းၸိူဝ်းၼႆႉ ပီႈၼွင်ႉတႆးတင်းသဵင်ႈ ထုၵ်ႇလီမီးသတိလီလီသေ ၶိုင်ပွင်ႁဵတ်းသၢင်ႈၵႂႃႇယူႇ ။