ဝၼ်းတီႈ 23/03/2016 ပဵၼ်ဝၼ်းလိူၼ်သီႇမူၼ်း ယၢမ်း ၵၢင်ၼႂ် 07:00-10:30 မူင်း ပေႃႈမႄႈပီႈၼွင်ႉၵူၼ်းမိူင်း ၵဵင်းတုင် ႁူမ်ႈၵၼ်လူႇတၢၼ်း လွင်းသွမ်း  တီႈဝတ်ႉထၢတ်ႈၸွမ်သီရီ  ဢိူင်ႇယၢင်းလေႃး ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း သင်ၶၸဝ်ႈ ၊ ၸဝ်ႈသၢင်ႇ(သႃမၼေ) လႄႈ ၸဝ်ႈၶၢဝ် တင်းမူတ်း မီး 620 တူၼ် ၼႆယဝ်ႉ ။

ၸဝ်ႈၸၢင်းၵုသႃလ ၽူႈပွင်ၵၢၼ် ၼႂ်းပွႆးလွင်းသွမ်း လၢတ်ႈဝႃႈ “ ပွႆးလွင်းသွမ်း ဝတ်ႉထၢတ်ႈၸွမ်သီရီၼႆႉ တႄႇဢဝ် ဝၼ်းတီႈ 18-23/03/2016 ၊ ဝၼ်းတီႈ 18-20 သမ်ႉ ပိုတ်ႇပၢင်ႁေႃးလွတ်ႈ ပထၢၼ်း ၊ ဝၼ်းတီႈ 20-22 သမ်ႉ ပၢင်ႁေႃးလိၵ်ႈ ၸဝ်ႈဝုၺ်ႇသၢၼ်ႇတရႃႇ ၊ ဝၼ်းတီႈ 23 သမ်ႉ လွင်းသွမ်း ၸွမ်းၵူႈၶူပ်ႇပဵၼ်ပီ ၊ ပီၼႆႉမိူၼ်ႁၢင်ႈဝႃႈ ၵိုၼ်းလိူဝ် ၵူႈပီပီ ၊ ၽူႈၵွၼ်းၸႄႈဝဵင်း ၵဵင်းတုင် ဢူးၵျေႃႇဢေး ၵေႃႈမႃးၶဝ်ႈႁူမ်ႈလူႇတၢၼ်းၸွမ်း ” ဝႃႈၼႆ ။


ပွႆးလွင်းသွမ်းတီႈထၢတ်ႈၸွမ်သီရီၼႆႉ လႆႈမွၵ်ႇပၢင်းသင်ၶၸဝ်ႈ ၼႂ်းၵဵင်းတုင် ၵူႈႁူဝ်ဝတ်ႉ ပႃးၸဵမ် ဝတ်ႉမၢၼ်ႈ ၸဵမ်သင်ၶ (ရႁၢၼ်း) ၊ ၸဝ်ႈသၢင်ႇ (သႃမၼေ) လႄႈ ၸဝ်ႈၶၢဝ် ၸဵမ်ၸိူဝ်းၼႆႉ မႃးၶဝ်ႈႁူမ်ႈ တုင်းသွမ်း ၼႆယဝ်ႉ ။


သင်ၶၸဝ်ႈဢၼ်မႃး တုင်းသွမ်းသမ်ႉ ၸဝ်ႈတူၼ်ၶူးလႄႈၸဝ်ႈၸၢင်း 100 တူၼ် ၊ ၸဝ်ႈသၢင်ႇ (သၢင်ႇမၼေႇ) 470 တူၼ် ၊ ၸဝ်ႈၶၢဝ် 50 ၸဝ်ႈ ႁူမ်ႈၵၼ်တင်းမူတ်း 620 တူၼ် ၼႆယဝ်ႉ ။


ၸွမ်းၼင်ႇႁိၵ်ႈႁွႆးတႆးသေ ပေႃးထိုင်မႃး လိူၼ်သီႇမူၼ်းၵူႈပီ ပီႈၼွင်ႉတႆးဢွၼ်ၵၼ် ႁဵတ်းပွႆး။  ႁူဝ်လိုင်း ၊ မူၺ်ႇတေႃႇမိူင်းၵိုင် ၊ မေႃႇၵျူဝ်ႇ (မေႃၵိူဝ်) ၊ ၵွင်းမူးၵၢတ်ႇၵူႇ တူၼ်ႈတီးလႄႈ ၼႂ်းမိူင်းတႆးထႅင်ႈလၢႆလၢႆၸႄႈဝဵင်းၵေႃႈ လႆႈၸတ်းႁဵတ်းပွႆးလွင်းသွမ်း ၼႂ်းဝၼ်းလိူၼ်သီႇမူၼ်း ၵူႈတီႈ ၼႆယဝ်ႉ ။


ၵမ်ႉၼမ်တႄႉ ႁွင်ႉၵၼ်ဝႃႈ ပွႆးၽြႃးၽီပၢင်း ဢမ်ႇၼၼ် ပွႆးၽြႃးမူၺ်ႇတေႃႇ ႁိုဝ် ပွႆးလိူၼ်သီႇမူၼ်း ၊ ပွႆးမူၺ်ႇတေႃႇ ။