ၸုမ်းဢူၺ်းလီၶိူဝ်းၵူၼ်းၼႂ်းမိူင်းၽွမ်ႉႁူမ်ႈ (UNA) ဢွၵ်ႇၶေႃႈပိုၼ်ၽၢဝ်ႇ ဝၼ်းမိူင်းႁူမ်ႈတုမ် 69 ပီ၊ တိုၵ်းသူၼ်း ႁႂ်ႈၶွတ်ႇၽွတ်ႈလႆႈ လူင်ပွင်ၸိုင်ႈမႂ်ႇ ဢၼ်မီးသူၼ်ႇလႆႈၽဵင်ႇပဵင်း။ သၢၼ်ၶတ်း ပိူင်ပဵၼ်ႁုၵ်းႁၢႆႉ ဢၼ်ၵူၼ်းမိူင်း ထူပ်းၺႃးၽေးသိုၵ်း ၼႂ်းၸိုင်ႈတႆးပွတ်းႁွင်ႇ ။

ဝၼ်းမိူင်းႁူမ်ႈတုမ် ၶွပ်ႈၶူပ်ႇ 69 ပီ ၊ ဝၼ်းတီႈ 12/02/2016 ၼႆႉ ၸုမ်းဢူၺ်းလီၶိူဝ်းၵူၼ်းၼႂ်းမိူင်းၽွမ်ႉႁူမ်ႈ (UNA) ဢွၵ်ႇၶေႃႈပိုၼ်ၽၢဝ်ႇ 4 ၶေႃႈ ။ ၼႂ်းၶေႃႈပိုၼ်ၽၢဝ်ႇၼၼ်ႉ တိုၵ်းသူၼ်းပႃး လွင်ႈႁႂ်ႈၶွတ်ႇၽွတ်ႈလႆႈ လူင်ပွင်ၸိုင်ႈမႂ်ႇ ၵေႃႇတင်ႈလႆႈ ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် ၊ ၸတ်းၵၢၼ်ၶပ်းၶိုင်ပၼ်လႆႈ သူၼ်ႇလႆႈလွင်ႈၽဵင်ႇပဵင်း ၊ သူၼ်ႇလႆႈလွင်ႈတႅပ်းတတ်းတူဝ်ၵဝ်ႇႁင်းၶေႃ တွၼ်ႈတႃႇၸၢဝ်းၶိူဝ်း ။ ၼႂ်းလိၵ်ႈၶေႃႈပိုၼ်ၽၢဝ်ႇၼၼ်ႉ လၢတ်ႈဝႆႉၼင်ႇၼႆ ။


1. ပိူဝ်ႈတႃႇ ၶွတ်ႇၽွတ်ႈၵေႃႇတင်ႈလႆႈ ၸိုင်ႈမိူင်းႁူမ်ႈတုမ် ဢၼ်မီးသူၼ်ႇလႆႈၽဵင်ႇပဵင်း လွတ်ႈလႅဝ်း တွၼ်ႈတႃႇၼႂ်းၸိုင်ႈမိူင်းၼႆသေ ၸိူဝ်းပဵၼ်ၽူႈဢွၼ်ႁူဝ်မိူင်းမၢၼ်ႈလႄႈ ၸႄႈမိူင်းၶိူဝ်းၵူၼ်းၶဝ် လႆႈႁူမ်ႈၵၼ်သေလႆႈလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင်မႃး ၊ ယၢမ်းလဵဝ် ထူၼ်ႈထိုင်မႃး 69 ပီယဝ်ႉ ။


2. ဝၼ်းမိူဝ်ႈၼႆႉ ပဵၼ်ၶၢဝ်းယၢမ်း ဢၼ်ဢွၵ်ႇပူၼ်ႉလွတ်ႈလႆႈ ပႃးတႂ်ႈၵၢၼ်ၽွင်းငမ်း ၸဝ်ႈဢမ်းၼၢၸ်ႈ (ဢႃႇၼႃႇ) ၵုမ်းၵမ်သေ ၸိုင်ႈမိူင်းႁူမ်ႈတုမမျၢၼ်ႇမႃႇၼႆႉ ပဵၼ်ၶၢဝ်းယၢမ်းလႅၵ်ႈလၢႆႈ ယၢင်ႈၸူးသဵၼ်ႈတၢင်း ၻီႊမူဝ်ႊၶရေႊၸီႊ ။ ယွၼ်ႉၼၼ်လႄႈ မၼ်းပဵၼ်တိုဝ်ႉတၢင်း တွၼ်ႈတႃႇၵူၼ်းမိူင်း ၸိုင်ႈမိူင်းႁူမ်ႈတုမ်မျၢၼ်ႇမႃႇ လႆႈလူင်ပွင်ၸိုင်ႈမႂ်ႇ ဢၼ်ၶွတ်ႇၽွတ်ႈမႃး လူၺ်ႈဢဵၼ်ႁႅင်းၻီႊမူဝ်ႊၶရေႊၸီႊ။ ပဵၼ်တိုဝ်ႉတၢင်း ပိူဝ်ႈတႃႇသၢင်ႈၽွမ်ႉႁူမ်ႈၸိူဝ်ႉၸၢတ်ႈ ၊ သၢင်ႈလွင်ႈၸမ်ၸႂ်ၸိူဝ်ႉၸၢတ်ႈ ။ မၼ်းပဵၼ်တိုဝ်ႉတၢင်း တွၼ်ႈတႃႇသၢင်ႈလွင်ႈၽွမ်ႉႁူမ်ႈၶိူဝ်းၵူၼ်းၼႂ်းမိူင်းလႄႈ လွင်ႈငမ်းယဵၼ်ၸိူဝ်းၼႆႉ ။ ယွၼ်ႉပိူဝ်ႈၼၼ် UNA သေ လႆႈတိုၵ်းသူၼ်းဝႃႈ ႁႂ်ႈဢွၼ်ၵၼ်ၶွတ်ႇၽွတ်ႈလႆႈ လူင်ပွင်ၸိုင်ႈ ဢၼ်ၸၢင်ႈၶပ်းၶိုင်ပွင်ၵၢၼ်ႁင်းၶေႃ ၊ ဢၼ်ၵေႃႇသၢင်ႈလႆႈမိူင်းႁူမ်ႈတုမ် ၾႅတ်ႊၻရႄႊလ်သေ ၸတ်းပွင်ပၼ်လႆႈ တွၼ်ႈတႃႇၶိူဝ်းၵူၼ်းၼႂ်းမိူင်းႁႂ်ႈမီး သူၼ်ႇလႆႈတႅပ်းတတ်းႁင်းၶေႃ ၊ လွင်ႈၽဵင်ႇပဵင်းၸိူဝ်းၼႆႉ ။


4. ယွၼ်ႉၼႆလႄႈ ၽွင်းမိူဝ်ႈၶိူဝ်းၵူၼ်း လႄႈၵူၼ်းၼႂ်းမိူင်းႁူမ်ႈတုမ် ဢွၼ်ၵၼ်ၶတ်းၸႂ်ႁဵတ်း တွၼ်ႈတႃႇလွင်ႈ သူၼ်ႇလႆႈၽဵင်ႇပဵင်း ၊ လွင်ႈသူၼ်ႇလႆႈၻီႊမူဝ်ႊၶရေႊၸီႊယူႇၼၼ်ႉ ၼႂ်းၸိုင်ႈတႆးပွတ်းႁွင်ႇၵေႃႈ ပဵၼ်ပၢင်တိုၵ်းဝူင်ႈၵၢင် တပ်ႉသိုၵ်း TNLA လႄႈ RCSS/SSA ဝႆႉယူႇ ။ ယွၼ်ႉပိူဝ်ႈပၢင်တိုၵ်းၼၼ်ႉသေ ၵူၼ်းဝၢၼ်ႈၵူၼ်းမိူင်းၵေႃႈ ထုၵ်ႇပေႉၵိၼ်လူလၢႆ တီႉၺွပ်း ၊ ထုၵ်ႇပူၼ်ႉပႅၼ်သူၼ်ႇလႆႈၵူၼ်း ၊ ထုၵ်ႇၶႃႈႁႅမ်တၢႆ ၸိူဝ်းၼႆႉ ။ ၶူးမေႃသွၼ်တင်း လုၵ်ႈႁဵၼ်းၵေႃႈ လႆႈပဵၼ်ၵူၼ်းပၢႆႈၽေးသိုၵ်းသေ လႆႈပၢႆႈယၢၼ်ႁူင်းႁဵၼ်းလႄႈ ႁိူၼ်းယေးဝႆႉယူႇ ။


ၵွပ်ႈၼႆ ၸုမ်းဢူၺ်းလီၶိူဝ်းၵူၼ်းၽွမ်ႉႁူမ်ႈ (UNA) ဢွၵ်ႇၶေႃႈပိုၼ်ၽၢဝ်ႇၼႆႉ သၢၼ်ၶတ်းၵၢၼ်ႁုၵ်းႁၢႆႉလူင် ဢၼ်ၵိူတ်ႇၶိုၼ်ႈပဵၼ်ယူႇ ၼႂ်းၸိုင်ႈတႆးပွတ်းႁွင်ႇၼၼ်ႉ ယႂ်ႇယႂ်ႇၼမ်ၼမ် ။