ဢိင်ၼိူဝ် တပ်ႉသိုၵ်းၸိုင်ႈတႆး (RCSS/SSA) တင်း သိုၵ်းတဢၢင်း (TNLA) ပဵၼ်ပၢင်တိုၵ်းၵၼ်မႃးၶိူဝ်းယႂ်း ၊ ၶၢဝ်းတၢင်း 2 လိူၼ်ပၢႆ ။ လၢႆဝၼ်းမႃးၼႆႉ ၵူၼ်းမိူင်းၼႂ်းပိုၼ်ႉတီႈၼပ်ႉႁဵင် ထုၵ်ႇၸၢၵ်ႇၽေးသိုၵ်းသေ RCSS လႆႈဢွၵ်ႇလိၵ်ႈပိုၼ်ၽၢဝ်ႇ ၼင်ႇၼႆ ။

ၵဵဝ်ႇၵပ်းလွင်ႈၼႆႉ ဝၼ်းတီႈ 11/02/2016 ( မိူဝ်ႈဝႃး )  ၸုမ်းပွင်ၵၢၼ်လူင်ငဝ်ႈၸိုင်ႈ ၶွင်ႊသီႊဢဝ်ၶိုၼ်းၸိုင်ႈတႆး RCSS ဢွၵ်ႇလိၵ်ႈပိုၼ်ၽၢဝ်ႇ လွင်ႈပဵၼ်ပၢင်တိုၵ်း ဝူင်ႈၵၢင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း တႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) တင်းမူတ်း 7 ၶေႃႈ ။


ၼႂ်းၶေႃႈပိုၼ်ၽၢဝ်ႇလၢတ်ႈဝႃႈ - 1. တႄႇမိူဝ်ႈဝၼ်းတီႈ 27/11/2015 ထိုင်မႃးဝၼ်းတီႈ 10/02/2016 ၼႆႉ RCSS/SSA တင်း TNLA လႆႈပဵၼ်ပၢင်တိုၵ်းၵၼ်မႃးၶိူဝ်းၶိူဝ်းယႂ်းယႂ်း ။ ႁဵတ်းႁႂ်ႈၵူၼ်းသိုၵ်းတင်းသွင်ၾၢႆႇ ဢၼ်ပဵၼ်ၶိူဝ်းၵူၼ်းၼႂ်းမိူင်းတႆးၼင်ႇၵၼ် လူႉသုမ်းဝၢတ်ႇၸဵပ်းတၢႆၵၼ် တင်းၼမ် ၊ ႁဵတ်းႁႂ်ႈၵူၼ်းမိူင်း ၼႂ်းပိုၼ်ႉတီႈ လႆႈလူႉတၢႆဝၢတ်ႇၸဵပ်းလႄႈ ထုၵ်ႇၸၢၵ်ႇမၼ်းသေ လႆႈပၢႆႈၼီၽေးသိုၵ်း ၽေးပၢင်တိုၵ်း ။ လွင်ႈၼႆႉ ယူႇတီႈ RCSS/SSA ယိၼ်းမွင်ၸႂ်ၸွမ်း ။


2. ငိူၼ်ႈငဝ်ႈတႄႇပဵၼ်ပၢင်တိုၵ်းၼၼ်ႉ ယွၼ်ႉပိူဝ်ႈၾၢႆႇ TNLA  တႄႇပိုတ်ႇယိုဝ်းၸုမ်းသိုၵ်း (701) RCSS/SSA ၼႂ်းတွၼ်ႈလိၼ်မိူင်းဝုၺ်း ၸႄႈဝဵင်းၼမ်ႉၶမ်း၊ မိူဝ်ႈမႃးလဵပ်ႈႁဵၼ်းလွင်ႈ NCA တီႈငဝ်ႈၸိုင်ႈ လွႆတႆးလႅင်းသေ ပွၵ်ႈၶိုၼ်းမိူဝ်း ၼႂ်းၼႃႈလိၼ်ဢၼ်ပၵ်းသဝ်းတူင်ႉၼိုင် 701 ။


3. ဢၼ်ၸုမ်းသိုၵ်း TNLA ပႂ်ႉမူၵ်းငွႆးယိုဝ်း ၸုမ်းသိုၵ်း (701) RCSS/SSA ၼႂ်းဝၼ်းတီႈ 27/11/2015 ၼၼ်ႉ ႁဵတ်းႁႂ်ႈၾၢႆႇ RCSS/SSA တင်းဝၢတ်ႇတင်းတၢႆ တင်းလႆႈထုၵ်ႇတီႉမတ်ႉသေ ၶႃႈတၢႆတင်းမူတ်း ႁူမ်ႈ 11 ၵေႃႉ ။ ဝၢႆးပၢင်တိုၵ်းၼၼ်ႉယဝ်ႉ ၸုမ်းသိုၵ်း TNLA တီႉမတ်ႉၵႂႃႇၵူၼ်းမိူင်းဝုၺ်း 23 ၵေႃႉ၊ ၶိုၼ်းပွႆႇပၼ် 8 ၵေႃႉ ။ လိူဝ်ၼၼ်ႉ ထိုင်ယၢမ်းလဵဝ်ၵေႃႈ ပႆႇပွႆႇပၼ်ၶိုၼ်း ။


4. ဝၢႆးပဵၼ်ပၢင်တိုၵ်း တီႈဝၢၼ်ႈတေႃႉသၢင်ႇ ၸႄႈဝဵင်းၵျွၵ်ႉမႄး မိူဝ်ႈဝၼ်းတီႈ 07/02/2016 ၼႆႉယဝ်ႉၵေႃႈ ၸုမ်းသိုၵ်း TNLA ၽဝ်ႁိူၼ်းၵူၼ်းမိူင်း ဝၢၼ်ႈတေႃႉသၢင်ႇ ၊ ၵူၼ်းမိူင်းတင်းသင်ၶ ဝၢၼ်ႈၺွင်ႇမွင်း ၸႄႈဝဵင်းၵျွၵ်ႉမႄး လႆႈထုၵ်ႇၸုမ်းသိုၵ်း TNLA တီႉမတ်ႉၵႂႃႇ ။ လိုပ်ႈၵူၼ်းဝၢၼ်ႈၵူၼ်းမိူင်းသေၼႄးသႂ်ႇ RCSS/SSA ။


5. လၢတ်ႈမၢပ်ႇမႂ်ႁိၼႄးဢမ်ႇၸိုဝ်ႈဢမ်ႇၸႂ်ႈဝႃႈ RCSS/SSA ႁူမ်ႈၵၼ်တင်း တပ်ႉမတေႃႇ (တပ်ႉသိုၵ်းမၢၼ်ႈ) သေ တိုၵ်းယိုဝ်း TNLA ။


6. လၢႆးႁဵတ်းၸုမ်းသိုၵ်း TNLA ၸိူဝ်းၼင်ႇၵၢဝ်ႇလၢတ်ႈမႃးၼႆႉ RCSS/SSA ၼၵ်းၸႂ် ၵူဝ်ပဵၼ်လၢႆးႁဵတ်း ႁႂ်ႈၵိူတ်ႇပဵၼ်ပၼ်ႁႃ ၵူၼ်းၶိူဝ်းၼိုင်ႈတေႃႇၵူၼ်းၶိူဝ်းၼိုင်ႈ ။


7. ယူႇတီႈ RCSS/SSA ၶႂ်ႈတုၵ်းယွၼ်းႁႂ်ႈ TNLA ထတ်းသၢင်တူၺ်းၶိုၼ်း ငိူၼ်ႈငဝ်ႈတႄႇပဵၼ်ပၼ်ႁႃသေ ႁႃလၢႆးၵႄႈၶႆ ႁႂ်ႈပေႃးၵိူတ်ႇပဵၼ်ၽွၼ်းလီၶိုၼ်း တႃႇႁဝ်းၶိူဝ်းၵူၼ်းတင်းသွင်ၾၢႆႇသေၵမ်း - ၸင်ႇလႆႈပိုၼ်ၽၢဝ်ႇ မႃးထိုင် ၽူႈၵဵဝ်ႇၶွင်ႈ လႆႈႁပ်ႉႁူႉၵၼ်ၼင်ႇၼႆ - ၼႆယဝ်ႉ ။


ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ် လူင်းလၢႆးမိုဝ်းၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA)ဝႆႉ ။ ပၢင်ၵုမ်လူင်လွင်ႈငမ်းယဵၼ် ၸိုင်ႈမိူင်းႁူမ်ႈတုမ် ဢၼ်ၸတ်းတီႈ ဝဵင်းလူင်ၼေႇပျီႇတေႃႇ မိူဝ်ႈဝၼ်းတီႈ 12-16/01/2016 (ၶၢဝ်းတၢင်း 5 ဝၼ်း) ၼၼ်ႉၵေႃႈ ႁူဝ်ပဝ်ႈလူင် RCSS/SSA ၸွမ်သိုၵ်းယွတ်ႈသိုၵ်း ဢွၼ်ႁူဝ်ၸုမ်းၸိူဝ်းၵႂႃႇၶဝ်ႈႁူမ်ႈ ။


တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) ပဵၼ်ၸုမ်းဢၼ် ပႆႇဢုပ်ႇဢူဝ်းလူင်ပွင်ၸိုင်ႈ ၊ ပႆႇလူင်းလၢႆးမိုဝ်း NCA သေ တိုၵ်ႉတိုၵ်းယိုဝ်းၵၼ်တင်း သိုၵ်းလူင်ပွင်ၸိုင်ႈမၢၼ်ႈယူႇ ။ ပဵၼ်ၸုမ်းဢၼ်လူင်ပွင်ၸိုင်ႈမၢၼ်ႈ တိုၵ်ႉယိုၼ်ႈမိုဝ်းတုၵ်းယွၼ်း ႁႂ်ႈလူင်းလၢႆးမိုဝ်း NCA ဝႆႉ ။ ပိူင်လူင်မၼ်း ၼႂ်းဝၼ်းမိူင်းႁူမ်ႈတုမ် ၶွပ်ႈၶူပ်ႇ 69 ပီ (12/02/2016) ၼႆႉ ၸွမ်ၸိုင်ႈတဵင်းၸဵင်ႇ ႁဵတ်းလိၵ်ႈယိုၼ်ႈၸူး ပၢင်ပွႆးၶုၵ်းထူပ်း ဝၼ်းၸိုင်ႈမိူင်းႁူမ်ႈတုမ် ၊ ဢၼ်ၸတ်းတီႈလၢႆလၢႆၸႄႈဝဵင်း တူဝ်ႈၸိုင်ႈမိူင်း ၊ ဢမ်ႇဝႆႉၼၵ်း ဢမ်ႇတူၵ်ႇလၢတ်ႈပႃး လွင်ႈလိၵ်ႈႁူမ်ႈမၢႆပၢင်လူင် ။ ၵူၺ်းၵႃႈ တူၵ်ႇလၢတ်ႈလွင်ႈၸုမ်းယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်း ႁႂ်ႈမႃးလူင်းလၢႆးမိုဝ်း NCA ။