ဝၼ်းမိူင်းႁူမ်ႈတုမ် ၶွပ်ႈၶူပ်ႇ 69 ပီၼႆႉ ၸွမ်ၸိုင်ႈတဵင်းၸဵင်ႇ ႁဵတ်းလိၵ်ႈယိုၼ်ႈၸူး ပၢင်ပွႆးၶုၵ်းထူပ်း ဝၼ်းမိူင်းႁူမ်ႈတုမ် ၵူႈတီႈတူဝ်ႈၸိုင်ႈမိူင်း ။ ၵူၺ်းၵႃႈ ဢမ်ႇတူၵ်ႇလၢတ်ႈပႃး လွင်ႈလိၵ်ႈႁူမ်ႈမၢႆပၢင်လူင် ။

ၸွမ်ၸိုင်ႈတဵင်းၸဵင်

ၼႂ်းတိုဝ်ႉတၢင်း ဝၼ်းမိူင်းႁူမ်ႈတုမ် ၶွပ်ႈၶူပ်ႇ 69 ပီ ဝၼ်းတီႈ 12 ၾႅပ်ႊၿိဝ်ႊရီႊ 2016 ၼႆႉ ၸွမ်ၸိုင်ႈ တဵင်းၸဵင်ႇ လႆႈတႅမ်ႈလိၵ်ႈၸူးထိုင်ၵူႈၸႄႈဝဵင်း တူဝ်ႈၸိုင်ႈမိူင်း ၸိူဝ်းၸတ်းပၢင်ပွႆးၶုၵ်းထူပ်း ဝၼ်းၸိုင်ႈမိူင်းႁူမ်ႈတုမ် ။ တီႈၼႂ်းလိၵ်ႈၸွမ်ၸိုင်ႈၼၼ်ႉ ဢမ်ႇလၢတ်ႈပႃးလွင်ႈပၢင်လူင် ၊ လိၵ်ႈႁူမ်ႈမၢႆပၢင်လူင် ဢၼ်ပဵၼ်ၵဝ်ႉငဝ်ႈ လွင်ႈပဵၼ်မႃး ဝၼ်းၸိုင်ႈမိူင်းႁူမ်ႈတုမ် ။ တူၵ်ႇလၢတ်ႈလွင်ႈၸုမ်းယိပ်းၵွင်ႈၵၢင်ႇ ၸိူဝ်းပႆႇလူင်းလၢႆးမိုဝ်းတင်းလၢႆ ႁႂ်ႈမႃးလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ၵူၺ်း - ဝႃႈၼႆ ။


ဝၼ်းမိူင်းႁူမ်ႈတုမ်ၶွပ်ႈၶူပ်ႇ 69 ပီ (12/02/2016)ၼႆႉၼႂ်းၸိုင်ႈတႆး ၸတ်းႁဵတ်းလၢႆလၢႆတီႈ လၢႆလၢႆၸႄႈဝဵင်း မိူၼ်ၼင်ႇတီႈဝဵင်းလူင်တူၼ်ႈတီး ၊ မိူင်းပၼ်ႇ ၊ ပၢင်လူင် ၊ မူႇၸေႈ ၊ လၢင်းၶိူဝ်း ၊ တၢင်ႉယၢၼ်း ၊ ၵဵင်းတုင် - ၸိူဝ်းၼႆႉ ။


တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၼၼ်ႉ ၸတ်းတင်ႈတႄႇ 8 မူင်းထိုင် 8 မူင်းၶိုင်ႈ ၵၢင်ၼႂ် ။ လိူဝ်သေၵူၼ်းၶိူဝ်းတႆးယဝ်ႉ မီးၶိူဝ်းၵူၼ်း ၸိူဝ်းယူႇၼႂ်းၸႄႈတွၼ်ႈၵဵင်းတုင် မိူၼ်ၼင်ႇဢႃးၶႃႇ ၊ လႃႇႁူႇ ၊ လွႆ ၊ ဢႅၼ်ႇၸိူဝ်းၼႆႉ ၶဝ်ႈႁူမ်ႈတင်းမူတ်းမွၵ်ႈႁဵင်ပၢႆ။ ၽူႈၵွၼ်းၸႄႈဝဵင်းၵဵင်းတုင် ပဵၼ်ၽူႈဢၢၼ်ႇလိၵ်ႈၸွမ်ၸိုင်ႈ - ၸၢႆးဝုၼ်းတိပ်ႉ ပႃႊတီႊသိူဝ်ၽိူၵ်ႇ (SNDP) လၢတ်ႈ ။


ဝၼ်းၸိုင်ႈမိူင်းႁူမ်ႈတုမ် ၾႅပ်ႊၿိဝ်ႊရီႊ 12 ဝၼ်း ၊  ဢၼ်ပဵၼ်ဝၼ်းလူင်းလၢႆးမိုဝ်း လိၵ်ႈႁူမ်ႈမၢႆပၢင်လူင်သေ ၵေႃႇတင်ႈမိူင်းႁူမ်ႈတုမ်မျၢၼ်ႇမႃႇ မႃးတေႃႇထိုင်ယၢမ်းလဵဝ်ၼႆႉ ငိူၼ်ႈငဝ်ႈႁၢၵ်ႈႁူဝ်မၼ်း လုၵ်ႉမႃးတီႈ ၾႅပ်ႊၿိဝ်ႊရီႊ 7 ဝၼ်း (1947) ဢၼ်တတ်းမၵ်း ပဵၼ်ဝၼ်းၸိူဝ်ႉၸၢတ်ႈၸိုင်ႈတႆး မႃးႁၢၼ်ႉတေႃႇယၢမ်းလဵဝ် ။ ၾႅပ်ႉၿိဝ်ႊရီႊ 7 ဝၼ်း ပဵၼ်ၽၵ်းတူ သဵၼ်ႈတၢင်းယၢင်ႈၸူး ၾႅပ်ႉၿိဝ်ႊရီႊ 12 ဝၼ်း ။ လိၵ်ႈႁူမ်ႈမၢႆပၢင်လူင်ၼႆႉ မီးၽူႈၼမ်း ၾၢႆႇမိူင်းမၢၼ်ႈ ၸွမ်သိုၵ်းဢွင်ႇသၢၼ်း ၊ တူဝ်တႅၼ်းၸဝ်ႈၾႃႉ 7 ၵေႃႉ တင်း တူဝ်တႅၼ်းၵူၼ်းမိူင်း 7 ၵေႃႉ လူင်းလၢႆးမိုဝ်းၵၼ် ။