ဝၼ်းတီႈ 22/02/2016 ၶၢဝ်းယၢမ်း 14:00-15:00 မူင်း ၸွမ်သိုၵ်းသိူဝ်ထႅၼ်ႈ ၵႂႃႇသူႇၸႂ်းပၼ်ႁႅင်းၵူၼ်းပၢႆႈၽေးသိုၵ်း တီႈပၢင်သဝ်း ဝတ်ႉႁူဝ်ၼမ်ႉ ဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ၼႆယဝ်ႉ ။

ဢိင်ၼိူဝ် ၶွင်ႊသီႊဢဝ်ၶိုၼ်းၸိုင်ႈတႆး RCSS/SSA တင်း သိုၵ်းလွႆ TNLA ပဵၼ်ပၢင်တိုၵ်းၵၼ်သေ ၵူၼ်းမိူင်းႁိမ်း 4000 လႆႈပၢႆႈယၢၼ်ႁိူၼ်းယေးတီႈယူႇ ။


ၸဝ်ႈသိူဝ်ထႅၼ်ႈ လၢတ်ႈဝႃႈ “ ၼင်ႇဢၼ်ပဵၼ်လႆႈၵႃႈႁိုဝ်ၼၼ်ႉ တေၶတ်းၸႂ် ႁႂ်ႈမၼ်းၵိုတ်း ပၢင်တိုၵ်းၵၼ် ၊ ႁဝ်းပဵၼ်ၸၢဝ်းၶိူဝ်းဢၼ်လဵဝ်ၵၼ် ဢမ်ႇထုၵ်ႇလီလႆႈပဵၼ်ၸိူဝ်းၼႆႉ ။ ယူႇတီႈ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA ၵေႃႈ တေၶပ်းၶိုင်ၸွႆႈထႅမ် ၼႂ်းၵႄႈၵၢင်မၼ်းသေ ၼင်ႇႁိုဝ် ပၢင်တိုၵ်းယဵၼ်ႁၢႆၵႂႃႇ တေၶတ်းၸႂ်ယူႇ ” ဝႃႈၼႆ ။


တေႃႈလဵဝ် ၸႄႈဝဵင်းၵျွၵ်ႉမႄးၼႆႉ တင်းမူတ်းပၢင်လိုဝ်ႈသဝ်း ၵူၼ်းပၢႆႈၽေးသိုၵ်း မီး 18 တီႈ ၼိုင်ႈတီႈလႂ် ယင်းတိုၵ်ႉမီးတၢင်းယၢပ်ႇၽိုတ်ႇ လွင်ႈယူႇ ၊ လွင်ႈၵိၼ် ဝႃႈၼႆ ။


ဝၼ်းတီႈ 22/02/2016 ၼၼ်ႉ ၸုမ်းတူင်ႇဝူင်းပီႈၼွင်ႉ ဝဵင်းတႃႈၶီႈလဵၵ်းလႄႈ မႄႈသၢႆႁူမ်ႈၵၼ်သေ ၵႂႃႇၸွႆႈထႅမ်ၵူၼ်း ၺႃးၽေးသိုၵ်း တီႈၵျွၵ်ႉမႄး မိူၼ် ၽႃႈႁူမ်ႈ၊ ၶူဝ်းၼုင်ႈဝႆ ၊ ၶဝ်ႈသွႆး ၊ ၶဝ်ႈသၢၼ် လႄႈ ငိုၼ်းမၢၼ်ႈ 45 သႅၼ်ပျႃး ၸဵမ်ၸိူဝ်းၼႆႉ ။