ၸုမ်းၵႅတ်ႇၶႄႁႄႉၵင်ႈမႄႈၼမ်ႉ Save the Salween Network ဢွၵ်ႇလိၵ်ႈပိုၼ်ၽၢဝ်ႇ သၢၼ်ၶတ်းၵၢၼ်ႁဵတ်းၾၢႆၼိူဝ်မႄႈၼမ်ႉၶူင်း ၊ ဢၼ်ၶွမ်ႊပၼီႊလႄႈလူင်ပွင်ၸိုင်ႈမၢၼ်ႈ လႆႈလူင်းလၢႆးမိုဝ်းဝႆႉ18 တီႈၼၼ်ႉၵေႃႈႁႂ်ႈယူၵ်ႉလိူၵ်ႈ ၵိုတ်းယင်ႉပႅတ်ႈဝႃႈၼႆ ။

ၸုမ်းၵႅတ်ႇၶႄႁႄႉၵင်ႈမႄႈၼမ်ႉ Save the Salween Network ဢွၵ်ႇၶေႃႈပိုၼ်ၽၢဝ်ႇ မိူဝ်ႈ ဝၼ်းတီႈ 22/02/2016 တုၵ်းယွၼ်းပႃး လူင်ပွင်ၸိုင်ႈမႂ်ႇ ႁႂ်ႈသႂ်ႇၸႂ်ဝႆႉၼၵ်းၼိူဝ်ၽေးသၽႃႇဝ ဢၼ်ပဵၼ်မႃးယွၼ်ႉသိင်ႇဝႅတ်ႉလွမ်ႉလုၵွႆ  ႁႂ်ႈတူၺ်းႁၼ်ပုၼ်ႈသုၼ်ႇလႆႈသုၼ်ႇပဵၼ်ၵူၼ်းၸၢဝ်းၶိူဝ်း - ၸဵမ်ၸိူဝ်းၼႆႉ ။


ၼၢင်းၶမ်းယိင်းၼွင်ႉ ၽူႈၶဝ်ႈၸုမ်း Save the Salween Network လၢတ်ႈဝႃႈ -“ ပီႈၼွင်ႉၵူၼ်းမိူင်း တႆးၵူႈၵေႃႉ ထုၵ်ႇလီႁူႉပွင်ႇ ၽွၼ်းလီ ၊ ၽွၼ်းၸႃႉ ယွၼ်ႉၵၢၼ်သၢင်ႈၾၢႆ လႄႈလူဝ်ႇၽွမ်ႉၵၼ်ၵႅတ်ႇ ၶႄႁႄႉၵင်မႄႈၼမ်ႉၼႂ်းမိူင်းႁဝ်း ၵႂႃႇၼင်ႇႁိုဝ်လုၵ်ႈလၢၼ်တေဢမ်ႇလႆႈယၢပ်ႇၸႂ် ”။


ၼႂ်းၶေႃႈပိုၼ်ၽၢဝ်ႇႁႄႉၵင်ႈမႄႈၼမ်ႉၶူင်းၼၼ်ႉပႃးဝႆႉ 7 ၶေႃႈ ။ ဢၼ်လမ်ႇလွင်ႈသုတ်းပႃးဝႆႉဝႃႈ ၽူႈၶူၼ်ႉၶႂႃႉလဵပ်ႈႁဵၼ်း ၾၢႆႇၽႅၼ်ႇလိၼ်ၶဝ်ပိုၼ်ၽၢဝ်ႇဝႆႉဝႃႈ - သၢႆလိၼ်တႅၵ်ႇ ဢမ်ႇၼၼ်ႁွႆးလိၼ် လိူၼ်ႈၼႆႉ မီးၸွမ်းသၢႆၼမ်ႉၶူင်းလႄႈပေႃးၵေႃႇသၢင်ႇၾၢႆၸိုင်တေပဵၼ်ၽေးယႂ်ႇလူင်တႃႇၵူၼ်းမိူင်းတႆး တင်းမိူင်းဝႃႈၼႆ ။


ၸုမ်းၵႅတ်ႇၶႄႁႄႉၵင်ႈမႄႈၼမ်ႉၼႆႉ လၢႆၸၢဝ်းၶိူဝ်း မိူၼ်ၼင်ႇတႆး ၊ ယၢင်း ၊ ယၢင်းလႅင် ၊ ပဢူဝ်း ၊ လႃးႁူႇ ၊ ႁူမ်ႈၵၼ်သေၶွတ်ႇၽွတ်ႈဝႆႉ ။ မီးယိူင်းဢၢၼ်းတႃႇတေၶႅတ်ႇၶႄႁႄႉၵင်ႈမႄႈၼမ်ႉႁႂ်ႈယိုၼ်းယၢဝ်း ။


ပေႃးထိုင်မႃးဝၼ်းတီႈ 14 /03/2016 ဝၼ်းသၢၼ်ၶတ်းၵၢၼ်ႁဵတ်းၾၢႆၼိူဝ်မႄႈၼမ်ႉလုမ်ႈၾႃႉၼႆႉ ၸုမ်းၵႅတ်ႇၶႄႁႄႉၵင်ႈမႄႈၼမ်ႉၶူင်း တေၵႂႃႇၸတ်းႁဵတ်းပၢင်လူႇတၢၼ်း ၵၢပ်ႈသွမ်းတိူင်ႇၵၢဝ်ႇ ပၼ်ႁႂ်ႈမႄႈၼမ်ႉလွတ်ႈၽေး တီႈၼႂ်းၸႄႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း ။