ၸဝ်ႈၶူးတိုၼ်းတႆး ၵႅမ်ႁူဝ်ပဝ်ႈ ထေႇရဝၢတ်ႈ ၸိုင်ႈမိူင်းၶႄႇ ႁူဝ်ပဝ်ႈ သင်ၶတႆး ၼႂ်းမိူင်းၶႄႇ လႆႈႁပ်ႉၸုမ်ႈၶူး Ph.D  မိူင်းဢိၼ်းတီႊယိူဝ်ႊ ။

ဝၼ်းတီႈ 29/02/2016 တေမႃးၼႆႉ ၸဝ်ႈတူၼ်ၶူးတိုၼ်းတႆး ႁူဝ်ပဝ်ႈ ၸုမ်းသင်ၶတႆး ၸိုင်ႈမိူင်းၶႄႇ တေလႆႈယုၵ်ႉတူဝ်ယေႃးၶိင်းၵႂႃႇႁပ်ႉၸုမ်ႈၶူး ၻွၵ်ႊတိူဝ်ႊ Ph.D ယူႇတီႈၸၼ်ႉၸွမ်ၼယူႊတေႊလီႊ သေ ၼွပ်ႈယိုၼ်ႈ ၸုမ်ႈၶူး ယွင်ႈယေႃး ၽူႈတူင်ႉၼိုင်ၼႂ်းတူင်ႇဝူင်းသင်ၶၸဝ်ႈ ။


ၸဝ်ႈတိုၼ်းတႆး လၢတ်ႈဝႃႈ “ ဝၢႆးသေ လႆႈႁပ်ႉၸုမ်ႈၶူးယဝ်ႉ သမ်ႉမီးၶပ်ႉမၢႆ  ႁၢင်ႈႁႅၼ်းၵႂႃႇ ႁူပ်ႉထူပ်းတၢင်းပီႈၼွင်ႉတႆး ၼႂ်းမိူင်းထႆး  မိူင်းၵွၵ်ႇ (ၵုင်းထဵပ်ႈ) ၊ ၵဵင်းႁၢႆးလႄႈ ၵဵင်းမႆႇ ၸဵမ်ၸိူဝ်းၼႆႉ ။ တေမီးပၢင်ႁေႃးထမ်းလႄႈ ႁူပ်ႉထူပ်းပီႈၼွင်ႉတႆး တႃႇလႅၵ်ႈလၢႆးပၢႆးႁူႉ ပၢႆးႁၼ်ၵၼ် ” ဝႃႈၼႆ ။


ဝၼ်းတီႈ 23/02/2016 ၸဝ်ႈၶူးတိုၼ်းတႆး ဢိၵ်ႇသင်ၶ ၵမ်ႈၽွင်ႈ ႁူမ်ႈလူၺ်ႈ တၵႃႇသတ်းထ 38 ၵေႃႉ တေလုၵ်ႉတၢင်း မိူင်းသႄ (ၶုၺ်ႉမိၼ်ႉ) သေ ဢွၵ်ႇၶၢဝ်းတၢင်းၵႂႃႇ တီႈၼယူႊတေႊလီႊ တႃႇႁပ်ႉၸုမ်ႈၶူး Ph.D သမ်ႉတေယုၵ်ႉတူဝ်ၵႂႃႇ ဝႆႈသႃ ဢွင်ႇလိၼ်တီႈသိတ်ႉတထ လႆႈၺၢၼ်ႇသပ်ႉပေႇၺု ပဵၼ်ၽြႃး တီႈပုတ်ႉထၵႃႇယႃႇ မိူင်းဢိၼ်ႊတီႊယိူဝ်ႊ ၸဵမ်ၸိူဝ်းၼႆႉ ။


ၶပ်ႉမၢႆၶၢဝ်းတၢင်းမိူင်းထႆးသမ်ႉ ဝၼ်းတီႈ 09/03/2016 တေဢွၵ်ႇၶၢဝ်းတၢင်းၵႂႃႇ မိူင်းၵွၵ်ႇ (ၵုင်းထဵပ်ႈ) တေၵႂႃႇဝႆႈသႃ လဵပ်ႈႁဵၼ်းဝတ်ႉၽြႃးသႅင်ၶဵဝ် ၊ ဝဵင်းၵဝ်ႇဢယုၵ်ႉထယလႄႈ ၸၼ်ႉၸွမ်မႁႃၸုးလႃးလူင်းၵွၼ်း ၸိူဝ်းၼႆႉ ။


ဝၼ်းတီႈ 13/03/2016 သမ်ႉ ၸဝ်ႈသင်ၶတႆးလႄႈ ပီႈၼွင်ႉတႆး ဢၼ်ယူႇသဝ်းၼႂ်းမိူင်းၵွၵ်ႇ (ၵုင်းထဵပ်ႈ) ၶၢဝ်းယၢမ်း 13:00-14:00 မူင်း တေမီးပၢင်ႁေႃးထမ်း လွင်ႈၶိုၼ်ႈယႂ်ႇမႂ်ႇသုင်ၼႂ်းၸၢတ်ႈပၢၼ် ။ ႁူပ်ႉထူပ်း မိုတ်ႈၵိုတ်းၵၼ် တင်း ပီႈၼွင်ႉတႆး ၼႂ်းမိူင်းၵွၵ်ႇ (ၵုင်းထဵပ်ႈ) ၼႆယဝ်ႉ ။


ဝၼ်းတီႈ 14/03/2016 ၵၢင်ၼႂ်သမ်ႉ တေလုၵ်ႉမိူင်းၵွၵ်ႇ (ၵုင်းထဵပ်ႈ) ၵႂႃႇၵဵင်းႁၢႆး တေလဵပ်ႈႁဵၼ်းတီႈဝဵင်းၵဵင်းႁၢႆးထိုင် ဝၼ်းတီႈ 15 ။  ပေႃးဝၼ်းတီႈ 16 သမ်ႉ တေသိုပ်ႇၶၢဝ်းတၢင်း လုၵ်ႉၵဵင်းႁၢႆးမႃး  ၵဵင်းမႆႇ ႁူပ်ႉထူပ်းလႅၵ်ႈလၢႆႈတၢင်းႁူႉၵၼ်သေ တေပွၵ်ႈၶိုၼ်းၼႃႈလိၼ်ၽွင်းငမ်း တႆးတႂ်ႈၶူင်း ၼႂ်းဝၼ်းတီႈ 18/02/2016 ။