သင်ၶၸဝ်ႈ လႄႈၽူႈၵွၼ်းဢိူင်ႇဢိၵ်ႇတင်းပီႈၼွင်ႉၵူၼ်းဝၢၼ်ႈ ၼမ်ႉႁူးၼွႆႉ ၸေႈဝဵင်းသီႇပေႃႉ ႁူပ်ႉထူပ်းတူဝ်တႅၼ်းပႃႇတီႇမႂ်ႇသုင်ၸိုင်ႈတႆး (SSPP/SSA) ဢုပ်ႇဢူဝ်းတႃႇႁႃတၢင်း ၵႄႈလိတ်ႈပၼ်ႁႃပၢင်တိုၵ်း ၼႂ်းၸိုင်ႈတႆးပွတ်းႁွင်ႇ ။

ပၢင်ဢုပ်ႇၵုမ်ၸတ်းႁဵတ်း ဝၼ်းတီႈ 17-2-2016 တႄႇၼႂ်းၶၢဝ်းယၢမ်း 13:00 မူင်း ။ တီႈ ဝီႉႁၢၼ်ၼမ်ႉႁူးၼွႆႉ (တူၼ်ႈတီး) ၸေႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ ၸဝ်ႈသင်ၶ ၊ မိူင်းငေႃႉ ၊ၵျွၵ်ႉမႄး ၊ သီပေႃႉ ၊ လႄႈၸဝ်ႈၼင်ႈၵျွင်းဝိႁၢၼ်ၼမ်ႉႁူးၼွႆႉ ဢိၵ်ႇၽူႈၵွၼ်းဢိူင်ႇ တင်းၵူၼ်းၼုမ်ႇၵူၼ်းဝၢၼ်ႈၶဝ် မႃးၶဝ်ႈႁူမ်ႈမီးယူႇ 50ပၢႆ ။


ဢုပ်ႇၵုမ်ၵၼ်ဝႃႈ ယွၼ်ႉပၢင်တိုၵ်းၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼပ်ႉႁူဝ်ႁဵင် လႆႈပၢႆႈယၢၼ်ႁိူၼ်းယေး ။ တႃႇႁႂ်ႈပၢင်တိုၵ်းတၢင်းသွင်ၽၢႆႇ တေၸဵဝ်း ယဵၼ်ၼၼ်ႉ ႁႂ်ႈၾၢႆႇ (SSPP/SSA) ၸွႆႈၶဝ်ႈၵႄႈၵၢင်ငူပ်ႉငိပၼ်ဝႃႈၼႆ။ တေႁဵတ်းႁိုဝ်ၵႄႈလိတ်ႈပၼ်ႁႃၼႆ ဢုပ်ႇဢူဝ်းၵၼ်ပဵၼ်ပိူင်လူင် လွင်ႈဢုပ်ႇၵုမ်ၵၼ်ၼၼ်ႉ ပႃးတင်းဝႃႈ ႁႂ်ႈ (SSPP/SSA) လႄႈ (RCSS/SSA) ၸဵဝ်းႁူမ်ႈၵၼ်ဝႆးဝႆး ၸွႆႈၵႄႈလိတ်ႈ ပၼ်ႁႃပၢင်တိုၵ်းၽႂ်းၽႂ်း ၊ လွင်ႈၸွႆႈထႅမ်ပီႈၼွင်ႉပၢႆၽေးသိုၵ်း ၊ တုၵ်းယွၼ်း ႁႂ်ႈၵိုတ်းပၢင်တိုၵ်းၽႂ်းၽႂ်း ၸဵမ်ၸိူဝ်းၼႆႉ ။


ၸဝ်ႈႁၢၼ် ၸၢႆးသု ၽူႈၶၢၼ်ပၢၵ်ႇ ပႃႇတီႇမႂ်ႇသုင်ၸိုင်ႈတႆး (SSPP/SSA) ၵေႃႈလၢတ်ႈဝႃႈ - လွင်ႈပၢင်တိုၵ်းယိုဝ်းတႃႇတေၵိုတ်းၵႂႃႇၼႆႉ ယူႇတီႈ ပႃႇတီႇမႂ်ႇသုင်ၸိုင်ႈတႆး တေၶဝ်ႈၼႂ်းၵႄႈတၢင်းသွင်ၽၢႆႇသေၵေႃႈ  ဢုပ်ႇဢူဝ်းၵၼ် ၊ မိူဝ်ႈလဵဝ်ၼႆႉၵေႃႈ ပႃႇတီႇမႂ်ႇသုင်ၸိုင်ႈတႆး လႆႈသူင်ႇတူဝ်တႅၼ်း ၵႂႃႇဢုပ်ႇ ၵူၼ်းလူင်(RCSS/SSA)  ၼိူဝ်လွႆတႆးလႅင်း လႄႈ လႆႈသူင်ႇတူဝ်တႅၼ်း ၵႂႃႇဢုပ်ႇ ၵူၼ်းလူင်တပ်ႉသိုၵ်ႈတဢၢင်းၶဝ် ယဝ်ႉ ။ ႁဝ်းၶႃႈဢဝ်လၢႆးၵတ်းယဵၼ်သေတိုၵ်းသူၼ်း ၶဝ်ႈဢွၵ်ႇဢုပ်ႇၵုမ် ႁႂ်ႈၶဝ်ၸဝ်ႈတင်ႈသွင်ၽၢႆႇဢုပ်ႇဢူဝ်းၵၼ် ႁႂ်ႈမၼ်းၸဵဝ်ႈၵတ်းၸဵဝ်းယဵၼ် ၊ လူၺ်ႈလွင်ႈယွၼ်ႇယၢၼ်းတေႃႇၵၼ်။ ယူႇတီႈပႃႇတီႇမႂ်ႇသုင်ၸိုင်ႈတႆး လႆႈၵႂႃႇၸွႆႈထႅမ် ပွတ်း မိူင်းမိတ်ႈ ၊ မိူင်းလူင် ၊ ၵျွၵ်ႉမႄး ၊ ၵၢင်ႉၵၢင် ၵူၼ်းပၢႆႈၽေး ၸိူဝ်းၼႆႉယူႇ ။


တီႈပၢင်ၵုမ်ၵူၼ်းမိူင်းသီႇပေႃႉၼၼ်ႉ လိူဝ်သေတႃႇႁႂ်ႈပၢင်တိုၵ်းၵျွၵ်ႉမႄး တေၸဵဝ်းယဵၼ် ၊ ၵူၼ်းမိူင်းယင်းတူၵ်းယွၼ်းတႃႇတပ်ႉသိုၵ်းမိူင်းတႆး သွင်ဢၼ် ႁႂ်ႈၸဵဝ်းႁူမ်ႈၵၼ်ထႅင်ႈလူးၵွၼ်ႇ ဝႃႈၼႆ ။


ပၢင်တိုၵ်းၼႂ်းၵႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) လႄႈ တပ်ႉသိုၵ်းၸိုင်ႈတႆး (RCSS/SSA) ဢၼ်တႄႇပဵၼ်မိူဝ်ႈ ဝၼ်းတီႈ 27/11/2015 တီႈၼႂ်းဢိူင်ႇမိူင်းဝီး ၊ လၢမ်းမႃးထိုင် မိူင်းမိတ်ႈ ၊ မိူင်းလူင် ၊ ၵျွၵ်ႉမႄး ။ ထိုင်ဝၼ်းမိူဝ်ႈၼႆႉ  ၵူၼ်းပၢႆႈၽေးသိုၵ်း ဢမ်ႇယွမ်း 2,700 ။