ပီႈၼွင်ႉတႆး ႁဵတ်းၵၢၼ်ၼႂ်းၸိုင်ႈထႆး ႁႃႁပ်ႉငိုၼ်း တႃႇၸွႆႈၵူၼ်းပၢႆႈၽေးသိုၵ်း ၊ ယွၼ်ႉပၢင်တိုၵ်းၼႂ်းၵႄႈ သိုၵ်းတဢၢင်းတင်းသိုၵ်းတႆး ယိုဝ်းၵၼ် ၼႂ်းၸိုင်ႈတႆးပွတ်းႁွင်ႇ ။

ၼႂ်းဝၼ်းတီႈ 14-15/02/2016 ၼႆႉ ၸၢႆးၵူဝ်ႇ လႄႈဢူၺ်းၵေႃႉဢူၺ်းသႄႈ ၵူၼ်းမိူင်းငေႃႉ ဝဵင်းၵျွၵ်ႉမႄး လႄႈ ဝဵင်းမိူင်းသူႈ ၼႂ်းဝဵင်းႁၢတ်ႇယႂ်ႇ ၸိုင်ႈထႆး ႁူမ်ႈၵၼ် ႁပ်ႉတုင်းၵဵပ်းငိုၼ်းတႃႇၵႂႃႇၸွႆႈထႅမ် ၵူၼ်းပၢႆႈၽေးသိုၵ်း ။


လိူဝ်သေၼၼ်ႉ ပီႈၼွင်ႉၵူၼ်းမိူင်းတႆး ၸိူဝ်းယူႇႁိမ်းႁွမ်းဝဵင်းႁၢတ်ႇယႂ်ႇၵေႃႈ ၵဵပ်းငိုၼ်းၵၼ်မႃးႁူမ်ႈၸွမ်း၊ တင်းမူတ်းလႆႈငိုၼ်းထႆးမိုၼ်ႇပၢႆ ။


ၸုမ်းၸၢႆးၵူဝ်ႇၶဝ် လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ - “ ႁဝ်းၶႃႈတႄႉဢမ်ႇၸႂ်ႈမူႇၸႂ်ႈၸုမ်းသင် ။ ပဵၼ်ႁႅင်းၵၢၼ်ၵူၼ်းတႆးမႃး ႁဵတ်းၵၢၼ်ႁႃၵိၼ်လဵင်ႉတွင်ႉ တီႈမိူင်းထႆးၼႆႉၵူၺ်း ။ ႁူႉဝႃႈပီႈၼွင်ႉၵူၼ်းမိူင်းႁဝ်း ထူပ်းၽေး ထူပ်းတၢင်းယၢပ်ႇၽိုတ်ႇၼႆလႄႈ မီးၸႂ်ၶႂ်ႈပဵၼ်တႆးၸွႆႈတႆးသေ ၸင်ႇလႆႈႁႃငိုၼ်းၸွႆႈမိူဝ်း ။ ၼမ်ဢေႇတႄႉဢမ်ႇဝႃႈ ၊ ၼမ်ႉၸႂ်ႁၵ်ႉၵူၼ်းမိူင်းလဵဝ်ၵၼ်ၵူၺ်း ”- ဝႃႈၼႆ ။


ၸုမ်းပီႈၼွင်ႉတႆးႁၢတ်ႇယႂ်ႇ လႆႈဢွၵ်ႇဢႅဝ်ႇႁႃႁပ်ႉတုင်းငိုၼ်းတွႆႈထႅမ်ပီႈၼွင်ႉထူပ်းၽေးသိုၵ်းၼႂ်းမိူင်းတႆး 2 ဝၼ်း ၼႂ်းဝၼ်းတီႈ 14-15/02/2016 ။ ၽူႈမႃးႁူမ်ႈႁွမ်းၸွႆႈ  လိူဝ်သေပီႈၼွင်ႉတႆးယဝ်ႉယင်းမီးပီႈၼွင်ႉတၢင်ႇၸိူဝ်ႉတၢင်ႇၶိူဝ်း ၸိူဝ်းမႃးႁဵတ်းၵၢၼ် ၸွမ်းၵၼ်ၵေႃႈ ၵမ်ႉႁွမ်းၸွႆႈထႅမ် ။


တင်ႈတႄႇႁၢင်ပီ 2015 မႃး ယွၼ်ႉပိူဝ်ႈပၢင်တိုၵ်း ၼႂ်းၵႄႈတပ်ႉသိုၵ်းၸိုင်ႈတႆး SSPP/SSA လႄႈတပ်ႉသိုၵ်း မၢၼ်ႈၼၼ်ႉ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းမိူင်းသူႈ မီးထိုင်မိုၼ်ႇ။ ႁူဝ်လိူၼ်ၾႅပ်ႊၿိဝ်ႊရီႊ (2016) ၼႆႉ မႃးၵေႃႈ ၼႂ်းပိူဝ်ႈပၢင်တိုၵ်း ဝူင်ႈၵၢင် တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) လႄႈမီးၵူၼ်းဝၢၼ်ႈလႆႈပၢႆႈၽေးသိုၵ်း တီႈဝဵင်းၵျွၵ်ႉမႄး မီး 2,000 ပၢႆ ။