ႁူဝ်ပဝ်ႈသၽႃး ၵူၼ်းမိူင်း ႁပ်ႉႁွင်း ၵၢၼ်တႅင်ႇတင်ႈမၵ်းမၼ်ႈ ၵေႃၵမ်ၵၢၼ်ၾၢႆႇထတ်းထွင်ၼႂ်းသၽႃး 3 ၾၢႆႇၽူႈတႅၼ်းသၽႃး ၵူၼ်းမိူင်း ပႃႊတီႊႁူဝ်သိူဝ် လႆႈၶဝ်ႈပႃး 3 ၵေႃႉ ။

ပၢင်ၵုမ်သၽႃး ၵူၼ်းမိူင်း ၵမ်းထူၼ်ႈ (2) ပွၵ်ႈတီႈ (2) ဝၼ်းထူၼ်ႈ (6) ဝၼ်းတီႈ 17/02/2016 မိူဝ်ႈၶၢဝ်းယၢမ်း 10.00 မူင်း တီႈသၽႃးၵူၼ်းမိူင်း ၼေႇပျီႇတေႃႇ ၊ ႁူဝ်ပဝ်ႈသၽႃး ၵူၼ်းမိူင်း တႅင်ႇတင်ႈမၵ်းမၼ်ႈ ၵေႃၵမ်ၵၢၼ်ၾၢႆႇထတ်းထွင်ၼႂ်းသၽႃး 3 ၾၢႆႇ ။ ပဵၼ်ၵေႃၵမ်ၵၢၼ်ထတ်းထွင်ၾၢႆႇၵပ်းသိုပ်ႇၼွၵ်ႈမိူင်း ၊ ၵေႃၵၢမ်ၵၢၼ်ထတ်းထွင်ၾၢႆႇၸဝ်ႈႁႆႈၸဝ်ႈၼႃးလႄႈႁႅင်းၵၢၼ် ၊ ၵေႃၵၢမ်ၵၢၼ်ထတ်းထွင်ၾၢႆႇၶိုင်သၢင်ႈလွင်ႈငမ်းယဵၼ်ၼႂ်းမိူင်း ။


ၸၢႆးသႅင်မိူင်း ၽူႈတႅၼ်းသၽႃးၵူၼ်းမိူင်းပႃႊတီႊႁူဝ်သိူဝ် မိူင်းၵိုင်လၢတ်ႈဝႃႈ “ မိူဝ်ႈၼႆႉ လႆႈတႅင်ႇတင်ႈမၵ်းမၼ်ႈၵေႃၵၢမ်ၵၢၼ်ၾၢႆႇထတ်းထွင်ၼႂ်းၸၼ်ႉမိူင်းႁူမ်ႈတုမ် ။ ဢၼ်လႆႈတႅင်ႇတင်ႈၶွတ်ႇၽွတ်ႈ ၵေႃၵမ်ၵၢၼ်ၼႂ်းၾၢႆႇထတ်းထွင်ၼႆႉ ၼႂ်းသၽႃးၵူၼ်းမိူင်း ၵေႃႈလီ ၊ ၼႂ်းသၽႃးၸိူဝ်ႉၸၢတ်ႈၵေႃႈလီ ၸိူဝ်းၼႆႉ ႁွင်ႉဝႃႈ ၵေႃၵမ်ၵၢၼ်ၾၢႆႇထတ်းထွင် ၼႂ်းသၽႃးၸၼ်ႉၸိုင်ႈမိူင်းႁူမ်ႈတု မ်။ ၵွပ်ႈဝႃႈ မၼ်းၵဵဝ်ႇၵပ်းတၢင်းမိူင်း ” ဝႃႈၼႆ ။


ၵေႃၵမ်ၵၢၼ်ၾၢႆႇထတ်းထွင် ၸၼ်ႉၸိုင်ႈမိူင်းႁူမ်ႈတုမ် ဢၼ်လႆႈတႅင်ႇတင်ႈၶွတ်ႇၽွတ်ႈယဝ်ႉၵႂႃႇ 3 ၾၢႆႇၼႆႉ  ၽူႈတႅၼ်းသၽႃးပႃႊတီႊႁူဝ်သိူဝ် လႆႈၶဝ်ႈပႃး 3 ၵေႃႉ ။ 1. ၸၢႆးသႅင်မိူင်း ၶဝ်ႈပႃးဝႆႉ ၼႂ်းၵေႃၵမ်ၵၢၼ်ၾၢႆႇထတ်းထွင်  ၵၢၼ်ၵပ်းသိုပ်ႇၼွၵ်ႈမိူင်း ၊ 2. ၸၢႆးပႃႉတဵင်း ၶဝ်ႈပႃးၼႂ်းၵေႃၵမ်ၵၢၼ်ထတ်းထွင်ႁွင်ႈၵၢၼ်ၾၢႆႇၸဝ်ႈႁႆႈၸဝ်ႈၼႃးလႄႈႁႅင်းၵၢၼ် ၊ 3. ၼၢင်းၶမ်းဢေး ၶဝ်ႈပႃးၼႂ်းၵေႃၵမ်ၵၢၼၾၢႆႇထတ်းထွင်ၵၢၼ်ၾၢႆႇလွင်ႈငမ်းယဵၼ်ၶိူဝ်းၵူၼ်းၼႂ်းမိူင်း ။


ဢၼ်လႆႈတႅင်ႇတင်ႈၵေႃၵမ်ၵၢၼ်ၾၢႆႇလူလွမ်ထတ်းထွင် ၼႃႈၵၢၼ်လူင်ပွင်ၸိုင်ႈ ၼႂ်းသၽႃးၸၼ်ႉၸိုင်ႈမိူင်းႁူမ်ႈတုမ်ၼႆႉ တေလႆႈပၵ်းတႃလူလွမ်ထတ်းထွင် ပုၼ်ႈၽွၼ်းၼႃႈတီႈၵၢၼ်တႃငၢၼ်း ၾၢႆႇလူင်ပွင်ၸိုင်ႈ ။ မီးလွင်ႈလီၸႃႉၽိတ်းထုၵ်ႇၸိူင်ႉႁိုဝ်ၵေႃႈလီ သင်ဝႃႈႁဵတ်းဢမ်ႇထုၵ်ႇမႅၼ်ႈ ဢမ်ႇၸိုဝ်ႈၸႂ်ႈၸွမ်းလွၵ်းပိူင်ၸိုင် ၵိုင်ႇထုၵ်ႇႁဵၵ်ႈႁွင်ႉၽွင်းလူင် ဢၼ်ၵဵဝ်ႇၶွင်ႈမႃးထတ်းထၢမ်ၵေႃႈလႆႈ ဝႃႈၼႆ ။