ပႃႊတီႊသိူဝ်ၽိူၵ်ႇ ဢွၵ်ႇလိၵ်ႈပိုၼ်ၽၢဝ်ႇ 4 ၶေႃႈ ။ တိုၵ်းသူၼ်းဝႃႈ ဢၼ်ပဵၼ်ပၼ်ႁႃၵၢၼ်သိုၵ်းၵၢၼ်တိုၵ်း ၵၼ်ယူႇၼၼ်ႉ ႁႂ်ႈသွင်ၾၢႆႇႁႂ်ႈႁူပ်ႉထူပ်းဢုပ်ႇဢူဝ်းၵၼ် လူၺ်ႈလၢႆးၵတ်းယဵၼ် ။

ဝၼ်းတီႈ 17/02/2016 ၶွမ်ႊမတီႊၾၢႆႇၵုမ်းၵမ်ပၵ်းပိူင်မၢႆမီႈ ၶွင်ပႃႊတီႊသိူဝ်ၽိူၵ်ႇ (SNDP) သေ ဢွၵ်ႇလိၵ်ႈပိုၼ်ၽၢဝ်ႇၽိုၼ်ၼိုင်ႈ ၊ တင်းမူတ်း မီး 4 ၶေႃႈ ။ ၼႂ်းၼၼ်ႉ တိုၵ်းသူၼ်းဝႃႈ ယွၼ်ႉပိူဝ်ႈၵူၼ်းဝၢၼ်ႈၵူၼ်းမိူင်း ပၢႆႈၽေးၵၢၼ်သိုၵ်းသေ ၸၢင်ႈႁဵတ်းႁႂ်ႈပၼ်ႁႃၵၢၼ်မိူင်း ၵၢၼ်မၢၵ်ႈမီးယႂ်ႇၵႂၢင်ႈမႃး ။ ၵွပ်ႈၼၼ် သွင်ၾၢႆႇႁႂ်ႈႁူပ်ႉထူပ်းဢုပ်ႇဢူဝ်းၵိူဝ်းၵုမ်ၵၼ် လူၺ်ႈလၢႆးၵတ်းယဵၼ် ။ လိၵ်ႈပိုၼ်ၽၢဝ်ႇၼၼ်ႉ မီးၼင်ႇၼႆ ။


1. ပၢင်တိုၵ်းၼႂ်းၵႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (TNLA) လႄႈ တပ်ႉသိုၵ်းၸိုင်ႈတႆး (RCSS/SSA) ဢၼ်တႄႇပဵၼ်မိူဝ်ႈ ဝၼ်းတီႈ 27/11/2015 တီႈၼႂ်းဢိူင်ႇမိူင်းဝီးမႃးၼၼ်ႉ ယၢမ်းလဵဝ် လႆႈၽႄႈၵႂၢင်ႈၶႂၢင်မႃးထိုင်တၢင်း ဝဵင်းၼမ်ႉၶမ်း ဝဵင်းၵျွၵ်ႉမႄး ဝၢၼ်ႈတူင်ႈၸိူဝ်းၼႆႉယဝ်ႉ ။ ပၢင်တိုၵ်းၵေႃႈလၢမ်းၽႄႈမႃးတိၵ်းတိၵ်း ၊ ၸုမ်းယိပ်းၵွင်ႈၵၢင်ႇ တင်းသွင်ၾၢႆႇၵေႃႈ ပဵၼ်ၶိူဝ်းၵူၼ်းၼႂ်းမိူင်းတႆးၵူၺ်း ၊ ဢၼ်တူၵ်းသုမ်းလူႉတၢႆၵေႃႈ မီးမႃးၼမ်ယဝ်ႉ ။ ယွၼ်ႉပိူဝ်ႈပၢင်တိုၵ်းသေ ၵူၼ်းဝၢၼ်ႈၵူၼ်းမိူင်းၵေႃႈ ပဵၼ်ၵူၼ်းပၢႆႈၽေးသိုၵ်းသိူဝ်မႃးၼမ် ၊ မိူၼ်ၼင်ႇၶူဝ်းၶွင် ႁိူၼ်းယေး ဢၼ်မီးၵႃႈၶၼ်ၸိူဝ်းၼႆႉလႄႈသင် ၊ ဢၼ်ပဵၼ်သၢႆၸႂ်ၵူၼ်း ဢၼ်မီးၵႃႈၶၼ်ယႂ်ႇ ၸိူဝ်းၼႆႉၵေႃႈလႆႈလူႉသုမ်း ။ ဢၼ်လႆႈၸဵပ်းသႅပ်ႇလူႉတၢႆ ယွၼ်ႉပၢင်တိုၵ်းၵေႃႈမီးမႃးၼမ်ယဝ်ႉ ။


2. ၸုမ်းၶိူဝ်းၵူၼ်းၼႂ်းမိူင်းတႆး ၸိူဝ်းယိပ်းၵွင်ႈၵၢင်ႇတင်းသဵင်ႈ ဢၼ်တူင်ႉၼိုင်ယူႇၼႆႉၵေႃႈ ပဵၼ်လူၺ်ႈတၢင်းမုင်ႈမွင်း / ယိူင်းဢၢၼ်းၸဝ်ႈၵဝ်ႇ တႃႇတေၵေႃႇတင်ႈလႆႈမိူင်းႁူမ်ႈတုမ် ၾႅတ်ႊၻရႄႊလ် ၻီႊမူဝ်ႊၶရေႊၸီႊ ၊ တႃႇလႆႈသုၼ်ႇလႆႈလွင်ႈၽဵင်ႇပဵင်း လွင်ႈၵၢၼ်မိူင်းၸိူဝ်းၼႆႉ ပႃႊတီႊသိူဝ်ၽိူၵ်ႇယုမ်ႇယမ်ဝႆႉၼင်ႇၼႆ ။


3. ၼႂ်းၸိုင်ႈတႆးၼႆႉ ပေႃးတူၺ်းၼႂ်းပိုၼ်းၵေႃႈ ၸဵမ်မိူဝ်ႈလႂ်မႃး ၶိူဝ်းၵူၼ်းၼႂ်းၸိုင်ႈတႆး 26 ၶိူဝ်းၼႆႉ ယူႇသဝ်းႁူမ်ႈၵၼ်မႃးလူၺ်ႈႁၵ်ႉႁၵ်ႉႁွမ်ႁွမ်ၵၼ် ၊ ဢမ်ႇတွၼ်ႉမီးပၼ်ႁႃၵၼ်သေပွၵ်ႈ ။ မိူၼ်ၼင်ႇ ၵူၼ်းၶိူဝ်းတႆးတင်းတဢၢင်းၼႆႉ ပူၼ်ႉမႃးလၢႆႁူဝ်ႁဵင်ပီၵေႃႈ လႆႈယူႇသဝ်းႁူမ်ႈၸွမ်းၵၼ်မႃး ၵတ်းၵတ်းယဵၼ်ယဵၼ် ။ ပေႃးမႃးတူၺ်း ဢၼ်ၸႅၵ်ႇဝႆႉႁင်းၶေႃၶေႃဝႃႈ ဢၼ်ၼႆႉပဵၼ်ၼႃႈလိၼ်တႆး ဢၼ်ၼႆႉပဵၼ်ၼႃႈလိၼ်တဢၢင်းၼႆ တိုၼ်းဢမ်ႇမီး ။


4. (ၵ)ၵွပ်ႈပိူဝ်ႈၸိူင်ႉၼၼ်လႄႈ ၵူၼ်းၶိူဝ်းၼႂ်းၸိုင်ႈတႆး တင်းသဵင်ႈ ႁႂ်ႈၶတ်းၸႂ်ၼႄၼမ်ႉၼႄတူဝ် ၊ ဢၼ်တႃႇတေၵေႃႇတင်ႈလႆႈ မိူင်းႁူမ်ႈတုမ်ၾႅတ်ႊၻရႄႊလ် ဢၼ်မီးသုၼ်ႇလႆႈၽဵင်ႇပဵင်းလႄႈ ႁုၼ်ႈမုၼ်းမႂ်ႇသုင် ၵတ်းယဵၼ် ၊ ဢၼ်ပဵၼ်ၶေႃႈယိူင်းဢၢၼ်းၵၢၼ်မိူင်းလူင်ႁဝ်းၼၼ်ႉ ။


(ၶ) ၶိူဝ်းၵူၼ်းၼႂ်းမိူင်းတႆး ဢၼ်ႁဝ်းၶႃႈလႆႈယူႇသဝ်းႁူမ်ႈၵိုၵ်းၸွမ်းၵၼ်မႃး ပီယၢဝ်းၶၢဝ်းႁိုင်ၼၼ်ႉ ယႃႇပေႁဵတ်းႁႂ်ႈၶိူဝ်းၵူၼ်းႁဝ်း လႆႈၽိတ်းၽႅၵ်ႇတႅၵ်ႇယၢႆႈၵၼ် ၊ ၼႂ်းၵႄႈသွင်ၾၢႆႇၼႆႉ ယႃႇပေႁဵတ်းႁႂ်ႈမီး လွင်ႈပႅင်းၸင်းၵၼ် ၊ ၶႅၼ်းတေႃႈႁႂ်ႈမီးလွင်ႈႁူမ်ႈမိုဝ်းၵၼ်သေ ႁဵတ်းသၢင်ႈလွင်ႈႁၵ်ႉႁွမ်ၵၼ် ၵႂႃႇဝၼ်းတႃမိူဝ်းၼႃႈ ။


(င) ယွၼ်ႉပိူဝ်ႈပၢင်တိုၵ်းသိုၵ်းသိူဝ်လႄႈ ဢၼ်ၵူၼ်းဝၢၼ်ႈၵူၼ်းမိူင်းပၢႆႈၽေးသိုၵ်းၼႆႉ မိူဝ်းၼႃႈမႃး တေမီးပၼ်ႁႃၵၢၼ်မိူင်း ၵၢၼ်မၢၵ်ႈမီး ၵၢၼ်တူင်ႇဝူင်းၵူၼ်းမႃး ။ ယွၼ်ႉၼၼ် ၼင်ႇႁိုဝ်တေငိူင်ႉဝႄႈလႆႈပၼ်ႁႃၸိူဝ်းၼႆႉ ၶိူဝ်းၵူၼ်းၸုမ်းၸိူဝ်းယိပ်းၵွင်ႈၵၢင်ႇ ၊ ၽူႈမီးပုၼ်ႈၽွၼ်း ၵဵဝ်ႇလူၺ်ႈၼႃႈတီႈၽႂ်မၼ်း ဢၼ်ယိပ်းၵွင်ႈၵၢင်ႇသေ ၵႄႈလိတ်ႈပၼ်ႁႃယူႇၼၼ်ႉ ၶႅၼ်းတေႃႈၽႃႈဝၢင်းပႅတ်ႈၵွင်ႈၵၢင်ႇသေ မႃးႁူပ်ႉထူပ်းဢုပ်ႇဢူဝ်းၵၼ် လူၺ်ႈလၢႆးၵတ်းၵတ်းယဵၼ်ယဵၼ် ၊ ႁဝ်းၶႃႈယူႇတီႈၸုမ်းပႃႊတီႊသိူဝ်ၽိူၵ်ႇသေ လႆႈတိုၵ်းသူၼ်းမႃးၼၵ်းၼၵ်းၼႃၼႃယူႇယဝ်ႉ ။