ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၽူႈတႅၼ်းသၽႃးၵူၼ်းမိူင်း ပႃႊတီႊႁူဝ်သိူဝ် SNLD ၸႄႈဝဵင်းၵျွၵ်ႉမႄး ယိုၼ်ႈယွၼ်းဢုပ်ႇလွင်ႈၵူၼ်းပၢႆႈၽေးသိုၵ်း ၼႂ်းၸႄႈဝဵင်းၵျွၵ်ႉမႄး ႁူဝ်ပဝ်ႈသၽႃးလႄႈ ၽူႈတႅၼ်းသၽႃး 400 ပၢႆ ၵမ်ႉထႅမ် ။

ဝၼ်းတီႈ 16/02/2016 ၶၢဝ်းယၢမ်း 10 မူင်း ပၢင်ၵုမ်သၽႃး ၵူၼ်းမိူင်း ပွၵ်ႈၵမ်း 2 ၼႂ်းႁူင်းႁေႃး သၽႃးၵူၼ်းမိူင်း တီႈၼေႇပျီႇတေႃႇ ။ ၸၢႆးထုၼ်းဢွင်ႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းၵျွၵ်ႉမႄး လႆႈယိုၼ်ႈတုၵ်းၼႂ်းသၽႃးၶႂ်ႈဢုပ်ႇလွင်ႈ ၵူၼ်းပၢႆႈၽေးသိုၵ်း၊ လုၵ်ႈႁဵၼ်းၵၢတ်ႇၵၢၼ်ႁဵၼ်း ၊ ၵူၼ်းဝၢၼ်ႈ လႄႈသင်ၶၸဝ်ႈ ထုၵ်ႇၸုမ်းယိပ်းၵွင်ႈၵၢင်တိၺွပ်းၵႂႃႇၵုမ်းၶၢင် / ၶႃႈႁႅမ်တၢႆ ၸိူဝ်းၼႆႉ ။


ႁူဝ်ပဝ်ႈသၽႃးလႄႈ ၽူႈတႅၼ်းသၽႃး ယွမ်းႁပ်ႉၵမ်ႉထႅမ်လႄႈ ဝၼ်းတီႈ 17 မိူဝ်ႈၼႆႉ  သိုပ်ႇဢုပ်ႇဢူဝ်းၼႂ်းသၽႃးၵူၼ်းမိူင်းၵႂႃႇ ။


ၸၢႆးထုၼ်းဢွင်ႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းၵျွၵ်ႉမႄး လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ “ ၵွပ်ႈပိူဝ်ႈဝႃႈ မၼ်းပဵၼ်သိုၵ်းႁၢဝ်ႉႁႅင်းပူၼ်ႉတီႈလႄႈႁဵတ်းႁႂ်ႈၵူၼ်းမိူင်း တူၵ်းတၢင်းယၢပ်ႇၽိုတ်ႇ ၶၢၼ်ၸႂ်ယွၼ်ႉၽေးသိုၵ်းလူင်ၼႆႉသေလႆႈပၢႆႈၽေးၸိူဝ်းၼႆႉ ဢမ်ႇထုၵ်ႇလီပဵၼ်။ လိူဝ်သေၼၼ်ႉ ယင်းၶႃႈႁႅမ်ဢဝ်တၢႆၵူၼ်းမိူင်း ၊ ၽဝ်ႁေႃႁိူၼ်းၵူၼ်းမိူင်းဢိၵ်ႇတင်း လုၵ်ႈႁဵၼ်းၶဝ်ၵေႃႈႁၢမ်းႁႅၵ်းၵၢၼ်သွၼ်ၵၢၼ်ႁဵၼ်း ။


သိုပ်ႇလၢတ်ႈထႅင်ႈဝႃႈ “ ၼင်ႇႁိုဝ် ၸုမ်းယိပ်းၵွင်ႈၵၢင် ပေႃးတေၵိုတ်းပၢင်တိုၵ်းၼၼ်ႉ တေယိုၼ်ႈလဝ်ႈၼႂ်းသၽႃးသေဢဝ်ဢုပ်ႇႁႃလိုဝ်းၵၼ်ၵႂႃႇ ” ဝႃႈၼႆ ။


ၵဵဝ်ႇၵပ်းလူၺ်း လွင်ႈၼႆႉသေ ၼၢင်းၶမ်းဢေး ၽူႈတႅၼ်းသၽႃးၵူၼ်းမိူင်း ၸႄႈဝဵင်းၼမ်ႉတူႈ ႁပ်ႉႁွင်းၵမ်ႉထႅမ်ၸွႆႈ ။ ၼွၵ်ႈလိူဝ်သေၼၼ်ႉ ၽူႈတႅၼ်းသၽႃး တင်းမူတ်း 412 ၵေႃႉၵေႃႈ ၵမ်ႉထႅမ်ႁၼ်လီၸွမ်း ၊ ဢမ်ႇမီးလွင်ႈသၢၼ်ၶတ်းသင် ။


ပၢင်ၵုမ်သၽႃးၵူၼ်းမိူင်း ပွၵ်ႈၵမ်း 2 ၼႆႉၽူႈတႅၼ်းပႃႊတီႊႁူဝ်သိူဝ် လႆႈယိုၼ်ႈလဝ်ႈၵၢဝ်ႇလွင်ႈပၢင်တိုၵ်း ၼႂ်းၸႄႈဝဵင်းၵျွၵ်ႉမႄး ပဵၼ်ၶေႃႈႁႅၵ်ႈ ၼႂ်းပၢင်ၵုမ်သၽႃးၵူၼ်းမိူင်း ။