ၽွင်းတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ ပႃႊတီႊသိူဝ်ၽိူၵ်ႇ (SNDP) ၸၢႆးမွင်ႇတိၼ်ႇ ယွၼ်းထွၼ်တူဝ် ဢွၵ်ႇပႃႊတီႊ ၊ ၼႄၵၢင်ၸႂ် ၶႂ်ႈႁႂ်ႈတႆးႁူမ်ႈႁွမ်းၵၼ် ပဵၼ်ဢၼ်လဵဝ်။ ၵဵဝ်ႇၵပ်းလွင်ႈၼႆႉ တၢင်းၸုမ်းၶၢဝ်ႇ ၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ထၢမ် - ယိူင်းဢၢၼ်းၸိူင်ႉႁိုဝ်သေ ထွၼ်တူဝ်ဢွၵ်ႇပႃႊတီႊသိူဝ်ၽိူၵ်ႇၶႃႈ ?။


တွပ်ႇ - မိူဝ်ႈတႄႇတင်ႈပႃႊတီႊသိူဝ်ၽိူၵ်ႇမႃးၼၼ်ႉၵေႃႈ ယွၼ်ႉပိူဝ်ႈဝႃႈၸဝ်ႈၶုၼ်ထုၼ်းဢူးၶဝ် ၊ ၸၢႆးၺုၼ်ႉလုၼ်ႇၶဝ် ၸိူဝ်းဢၼ်ပဵၼ်ၽူႈယႂ်ႇၵူၼ်းလူင် ၽူႈၼမ်းတႆးႁဝ်းၼႂ်းပၢၼ်ႁူဝ်သိူဝ် ၊ မိူဝ်ႈပီ 1990 ပေႉဝႆႉၵၢၼ်လိူၵ်ႈတင်ႈ တီႈၼင်ႈ 23 တီႈၼၼ်ႉ ၶဝ်တိုၵ်ႉမီးယူႇၼႂ်းၶွၵ်ႈ ၊ ႁဝ်းၸင်ႇတႄႇတင်ႈပႃႊတီႊသိူဝ်ၽိူၵ်ႇမႃး ။


တႃႇတေတႄႇတင်ႈပႃႊတီႊသိူဝ်ၽိူၵ်ႇၼႆႉၵေႃႈ ပႃးၽူႈဢွၼ်ႁူဝ်ၼမ်းၼႃႈႁဝ်း မိူၼ်ၼင်ႇၸဝ်ႈၵၢႆႇၾႃႉၶဝ် ၊ ႁိုၼ်း ၵႃယၢင်းၶဝ်ၸိူဝ်းၼႆႉလႄႈ ၵူၼ်းလူင်တႆးထႅင်ႈလၢႆၵေႃႉလၢႆၸဝ်ႈ ။ ႁဝ်းထုၵ်ႇလီတႄႇတင်ႈပႃႊတီႊထႅင်ႈ ဢၼ်ၼိုင်ႈၼႄႇ ဢမ်ႇတႄႇၼႄႇၼႆ မိူဝ်ႈပီ 2010 မိူဝ်ႈပႆႇထိုင်ပၢင်လိူၵ်ႈတင်ႈ (ပွႆးလိူၵ်ႈၵဵပ်း) ၼၼ်ႉ ႁဝ်းဝႃႈသင်ဝႃႈပဵၼ်လႆႈ ပႃႊတီႊဢၼ်ၼိုင်ႈၼႆႉ တႄႇတင်ႈၵႂႃႇသေ ၊ သင်ဝႃႈလုင်းၶုၼ်ထုၼ်းဢူးၶဝ်ဢွၵ်ႇၶွၵ်ႈမႃး ႁႂ်ႈလႆႈပဵၼ်ဢၼ်လဵဝ်ၵၼ်ၼႆ ႁဝ်းၶႃႈလႆႈမီးၵႂၢမ်းမၼ်ႈၵၼ်ဝႆႉ ။ ၶႃႈႁဝ်းၼႆႉ ယူႇၼႂ်းသိူဝ်ၽိူၵ်ႇ ပႃးၼႂ်းၽူႈၵေႃႇတင်ႈသိူဝ်ၽိူၵ်ႇ 15 ၵေႃႉၼၼ်ႉသေဢမ်ႇၵႃး ၊ တႃႇမိူင်းတႆးပွတ်းၸၢၼ်း မိူင်းလူင်တူၼ်ႈတီးႁဝ်းၼႆႉ ၶႃႈႁဝ်းတင်းၸဝ်ႈယုမ်းပႅင်ႇ ပဵၼ်ၵေႃႉဢွၼ်ႁူဝ်တႄႇတင်ႈမႃး ၊ ႁပ်ႉတီႈတႃႈၵုင်ႈသေမႃးၽႅဝ်တူၼ်ႈတီး ၊ မႃးႁဵတ်းပၢင်ၵုမ်တီႈႁိူၼ်းၶႃႈႁဝ်း 2 ပွၵ်ႈ ။ ဢွၼ်ၵၼ်လႆႈၸႂ်သေ တႄႇတင်ႈပႃႊတီႊသိူဝ်ၽိူၵ်ႇမႃး ။


ၼႂ်းၵႄႈၼႆႉ တင်ႈတႄႇပႃႊတီႊသိူဝ်ၽိူၵ်ႇတင်ႈမႃး တေႃႇထိုင်ၶႃႈႁဝ်း ထွၼ်တူဝ်ဢွၵ်ႇမိူဝ်ႈဝႃးၼႆႉ (16/02/2016) ၶၢဝ်းတၢင်းၸမ် 6 ပီယဝ်ႉ။ ယဝ်ႉၵေႃႈ ပႃႊတီႊဢၼ်ၶႃႈၶဝ်ႈပွႆးလိူၵ်ႈၵဵပ်း တီႈၸႄႈဝဵင်းလၢႆးၶႃႈ မိူဝ်ႈပီ 2010 ၼၼ်ႉၵေႃႈ ဢွင်ႇပေႉယဝ်ႉသေ ပဵၼ်ၽွင်းတႅၼ်းလၢႆးၶႃႈ သၽႃးၵူၼ်းမိူင်း ၸႄႈဝဵင်းလၢႆးၶႃႈ ။ ပုၼ်ႈၽွၼ်းၶႃႈႁဝ်း ပဵၼ်ၽွင်းတႅၼ်းသၽႃး လၢႆးၶႃႈ 5 ပီၵေႃႈ ၶႃႈႁဝ်းႁၢမ်ႁၢပ်ႇပုၼ်ႈၽွၼ်းတဵမ်ထူၼ်ႈ ၊ ဢႃယုပၢၼ်ၽွင်းတႅၼ်းၵေႃႈ တဵမ်ယဝ်ႉသေဢမ်ႇၵႃး ၼႂ်းပႃႊတီႊသိူဝ်ၽိူၵ်ႇႁဝ်းၵေႃႈ ယွၼ်ႉပိူဝ်ႈဝႃႈ ဢၼ်ပၵ်းပိူင်ၼႂ်းပႃႊတီႊႁဝ်းမီးဝႆႉ ဢႃယုၶွမ်ႊမတီႊၽူႈဢွၼ်ႁူဝ် / ၶွမ်ႊမတီႊငဝ်ႈငုၼ်းၼႆႉ တေမိူၼ်ၵၼ်တင်းဢႃယုပၢၼ် သၽႃး ဝႃႈၼႆလႄႈ ၊ ဢႃယုပၢၼ်သၽႃးၼၼ်ႉ မၼ်းသုတ်းသဵင်ႈၵႂႃႇမိူဝ်ႈဝၼ်းတီႈ 31 လိူၼ်ၵျႅၼ်ႊၼိဝ်ႊရီႊၼၼ်ႉယဝ်ႉ ။ ယွၼ်ႉၼႆ ႁဝ်းၶႃႈၸိူဝ်းၶွမ်ႊမတီႊၽူႈဢွၼ်ႁူဝ် ငဝ်ႈငုၼ်းသိူဝ်ၽိူၵ်ႇၼႆႉၵေႃႈ မၼ်းသုတ်းယဝ်ႉ ၊ ပွင်ႇဝႃႈပုၼ်ႈၽွၼ်းၶႃႈႁဝ်းၵေႃႈ တဵမ်ထူၼ်ႈယဝ်ႉလႄႈ ၶႃႈႁဝ်းၵေႃႈ ဢမ်ႇၶႂ်ႈသိုပ်ႇႁဵတ်းထႅင်ႈယဝ်ႉ ။


ယွၼ်ႉသင် ဢမ်ႇၶႂ်ႈႁဵတ်းၼၼ်ႉ ၼႂ်းၵႄႈၼႆႉ ႁဝ်းၶႃႈလႆႈယူႇၼႂ်းပႃႊတီႊသိူဝ်ၽိူၵ်ႇသေ ၶႃႈတိုၵ်းသူၼ်း 2 ပႃႊတီႊ ႁႂ်ႈပဵၼ်ဢၼ်လဵဝ်ၵၼ် ၊ ၼႂ်းၶွမ်ႊမတီႊႁူပ်ႉထူပ်းၵၼ် ၾၢႆႇလႂ် 5 ၵေႃႉၼၼ်ႉၵေႃႈ ပႃးတင်းၶႃႈႁဝ်း ၊ ႁူပ်ႉထူပ်းၵၼ်ၼိုင်ႈပွၵ်ႈယဝ်ႉသေ သမ်ႉဢမ်ႇသိုပ်ႇဢုပ်ႇၵၼ်ထႅင်ႈၼႆႉ ၶႃႈၸႂ်လဵၵ်ႉၶေႃးၶူမ် တႃႇၵူၼ်းမိူင်းတႆး ၊ တႃႇၸိူဝ်ႉၶိူဝ်းတႆးႁဝ်း ၊ တႃႇဝၢၼ်ႈမိူင်းတႆးႁဝ်း ။ ၽူႈဢွၼ်ႁူဝ်ႁဝ်းတင်းသွင်ၸုမ်းၼႆႉ ၵဝ်ၼႄးမႂ်း - မႂ်းၼႄးၵဝ် ၊ ၶႃႈတိုၵ်းသူၼ်းႁႂ်ႈပဵၼ်ဢၼ်လဵဝ်ၵၼ်မႃး ၸဵမ်မိူဝ်ႈလႂ် ၊ ထိုင်တီႈၵူၼ်းလူင်ၽူႈဢွၼ်ႁူဝ်ၼႂ်းပႃႊတီႊသိူဝ်ၽိူၵ်ႇႁဝ်း ပေႃးႁၼ်ၽိတ်းႁၼ်ပိူင်ႈၼိူဝ်ၶႃႈ ၊ ဢၼ်တေပႅင်းၸင်းၶႃႈ ၵေႃႈတေၸၢင်ႈမီး ၊ ၶႃႈၵေႃႈယိူၼ်ႉယိူၼ်ႉယူႇမႃး ၊ ဝၼ်းၼိုင်ႈမႃး မၼ်းတေပဵၼ်ဢၼ်လဵဝ်ၵၼ်လႆႈယူႇယူဝ်ႉ ၊ မုင်ႈမွင်းမႃး မၼ်းၵေႃႈဢမ်ႇပဵၼ်မႃး ။


ၼႃႈပၢင်လိူၵ်ႈတင်ႈ (ပွႆးလိူၵ်ႈၵဵပ်း) 2015 ၼႆႉၵေႃႈ ၶႃႈႁဝ်းဝႃႈ - ႁဝ်းထုၵ်ႇလီဢုပ်ႇဢူဝ်းၵၼ် ႁႂ်ႈပဵၼ်ဢၼ်လဵဝ်ၵၼ် ႁဝ်းၸင်ႇၶဝ်ႈပၢင်လိူၵ်ႈတင်ႈပီ 2015 ၼႆ လၢတ်ႈၼႂ်းပၢင်ၵုမ် ။ တၢင်းၼွၵ်ႈမၼ်း ႁဝ်းၼင်ႇၵၼ်ၵေႃႈလၢတ်ႈၵၼ် ၊ လႃးလႃးဢမ်ႇပဵၼ်ဢၼ်လဵဝ်ၵၼ်လႆႈၵေႃႈ 2 ပႃႊတီႊၼႆႉ ႁဝ်းထုၵ်ႇလီၶဝ်ႈၸႄႈတွၼ်ႈဢၼ်လႂ် ၊ ၸႄႈဝဵင်းဢၼ်လႂ် ၊ သိူဝ်ၽိူၵ်ႇတေၶဝ်ႈတီႈလႂ် ၊ ႁူဝ်သိူဝ်တေၶဝ်ႈတီႈလႂ် ၊ ႁဝ်းထုၵ်ႇၸႅၵ်ႇၽႄၵၼ်သေၶဝ်ႈ ။ ၽွင်းတႅၼ်းႁဝ်းတင်း 2 ပႃႊတီႊၼႆႉ ဢွင်ႇပေႉပၢင်လိူၵ်ႈတင်ႈမႃး ႁဝ်းႁူမ်ႈၵၼ်ႁဵတ်းၵၢၼ် တႃႇဝၢၼ်ႈတႃႇမိူင်း တႃႇၸိူဝ်ႉတႃႇၶိူဝ်းႁဝ်း ၼႂ်းသၽႃးဢမ်ႇလီႁႃႉ ၶႃႈႁဝ်းတၢင်ႇလၢတ်ႈၸိူင်ႉၼႆ ။


ၽူႈဢွၼ်ႁူဝ်ၼႂ်းသိူဝ်ၽိူၵ်ႇသမ်ႉဝႃႈ ၶဝ်ၶဝ်ႈၵေႃႈႁဝ်းၶဝ်ႈဢိူဝ်ႈ ။ ၶႃႈဝႃႈ ပေႃးႁဝ်းႁဵတ်းၸိူင်ႉၼၼ် ငဝ်းလၢႆးမၼ်းဢမ်ႇလီ ၊ ၽွၼ်းလီမၼ်းတေဢမ်ႇမီး ၊ ၽွၼ်းႁၢႆႉမၼ်းတေၼမ် ။ ယဝ်ႉၵေႃႈ သမ်ႉတေဢမ်ႇဢွင်ႇပေႉလႆႈ မိူၼ်မိူဝ်ႈပီ 2010 ဢၼ်ၽွင်းတႅၼ်းႁဝ်းလႆႈမႃး 57 -58 ၵေႃႉၼၼ်ႉ ၊ မၼ်းတေယူပ်ႈယွမ်းသေၼၼ်ႉၵႂႃႇဢိူဝ်ႈ ၊ ၶႃႈယၢမ်ႈတၢင်ႇလၢတ်ႈမႃးၼင်ႇၼႆ ။ ၵူၺ်းၵႃႈ ၶဝ်ၸဝ်ႈၵေႃႈဢမ်ႇဢဝ် ။


ၼႆႉမၼ်းပဵၼ်ၵၢၼ်ၸိူဝ်ႉၶိူဝ်းလႄႈ ၵၢၼ်ဝၢၼ်ႈမိူင်းႁဝ်း ။ မိူၼ်ၼင်ႇၽူႈဢွၼ်ႁူဝ်ႁဝ်းၶဝ်ၸိူဝ်းၼႆႉ လီပွင်ႇၸႂ်ဝႃႈ သဵင်ၵူၼ်းမိူင်းၼႆႉ မၼ်းၶႂ်ႈပဵၼ်ၸိူင်ႉႁိုဝ် ။ လၢတ်ႈတီႈသိုဝ်ႈမၼ်း ႁဝ်းသမ်ႉၶႂ်ႈပဵၼ်မိူင်းၻီႊမူဝ်ႊၶရေႊၸီႊ ႁဝ်းသမ်ႉဢမ်ႇထွမ်ႇသဵင်ၵူၼ်းမိူင်းၼႆႉ မၼ်းဢမ်ႇလီပဵၼ် ။ ယွၼ်ႉၼႆလႄႈ ဢၼ်တိူဝ်ႉၸႂ်ၶႃႈႁဝ်းၼႆႉ ၸိူဝ်းၼႆႉၵေႃႈပႃး ၊ ဢၼ်ယွၼ်းထွၼ်တူဝ်ဢွၵ်ႇၼႆႉ ။


ဢွၼ်ၼႃႈပၢင်လိူၵ်ႈတင်ႈ 2 လိူၼ် ၊ ၶၢဝ်းယၢမ်းလူင်းသူၼ်းတုမ်ႁႃသဵင်ၼၼ်ႉ ၽူႈဢွၼ်ႁူဝ်ၼႂ်းပႃႊတီႊသိူဝ်ၽိူၵ်ႇ လႆႈၶၢၼ်ပၢၵ်ႇဢွၵ်ႇဝႆႉဝႃႈ - လူဝ်ႇလႆႈပဵၼ်လူင်ပွင်ၸိုင်ႈမိူင်းတႆး ၸိူဝ်းၼႆႉ ။ မိူဝ်ႈလဵဝ် ဝၢႆးပၢင်လိူၵ်ႈတင်ႈပီ 2015 မႃးယဝ်ႉ ၊ ႁဝ်းၵူၺ်းပေႉတီႈမိူင်းပၼ်ႇတီႈလဵဝ်ၵူၺ်း ၊ ၸၢႆးၼွင်ႉ ၽွင်းတႅၼ်းသၽႃးၸႄႈမိူင်း ၊ ယွၼ်ႉၼၼ် ၶႃႈဢၢႆတူဝ်ၶႃႈ ၊ ၶႃႈၵေႃႈမီးပုၼ်ႈၽွၼ်းၼႂ်းပႃႊတီႊသိူဝ်ၽိူၵ်ႇ ၊ ၶႃႈထွၼ်တူဝ်ဢွၵ်ႇႁတ်းႁတ်းႁၢၼ်ႁၢၼ် ႁင်းၵူၺ်းၶႃႈ ၊ ၽႂ်ၵေႃႈဢမ်ႇလႆႈမႃးတိုၵ်းသူၼ်းၶႃႈ ႁႂ်ႈဢွၵ်ႇ ။ ပုၼ်ႈၽွၼ်းၶႃႈ ၶႃႈႁၢပ်ႇႁၢမ်မႃးတဵမ်ထူၼ်ႈယဝ်ႉ ၶႃႈဢမ်ႇႁဵတ်းလႆႈယဝ်ႉၼႆသေ ထွၼ်တူဝ်ဢွၵ်ႇၵူၺ်း ။


ၵူၺ်းၵႃႈ ၵၢၼ်တႆး ၵၢၼ်ၸိူဝ်ႉၶိူဝ်းဝၢၼ်ႈမိူင်းၼႆႉတႄႉ ဢၼ်ၶႃႈမေႃ ၸၢင်ႈႁဵတ်းလႆႈယူႇၼၼ်ႉ ၶႃႈတေႁဵတ်းၵႂႃႇ ၊ တင်းၵူၼ်းၸိူဝ်းမီးၼမ်ႉၸႂ်မိူၼ်ၵၼ်ၼၼ်ႉ တေႁူမ်ႈႁွမ်းမိုဝ်းသေ ႁဵတ်းၵႂႃႇၵူၺ်း ။ မိူဝ်ႈလဵဝ်တႄႉ တၢင်းလႂ်ၵေႃႈတေပႆႇၵႂႃႇ ၊ တေႁဵတ်းၵၢၼ်ၼႂ်းတူင်ႇဝူင်းၵူၼ်းတႆးႁဝ်းၵူၺ်း ။


ထၢမ် - ဢၼ်ယွၼ်းထွၼ်တူဝ်ဢွၵ်ႇၼႆႉ ယူႇတီႈႁူဝ်ပဝ်ႈ လုင်းၸၢႆးဢၢႆႈပဝ်းၶႃႈလူး ၊ ၸွင်ႇတွပ်ႇလၢတ်ႈသင်မႃးၶႃႈ ?။


တွပ်ႇ - ပႆႇလၢတ်ႈသင်မႃးၶႃႈ ။ လိၵ်ႈၵေႃႈတိုၵ်ႉသူင်ႇမိူဝ်ႈဝႃး (16/02/2016) ၵူၺ်း ၊ ယူႇတီႈလုမ်းပႃႊတီႊငဝ်ႈငုၼ်းသိူဝ်ၽိူၵ်ႇႁဝ်းသေ ႁႂ်ႈၵူၼ်းလုမ်းၶဝ်ၵႂႃႇသူင်ႇ ။


ထၢမ် - ယူႇတီႈၸၢႆးမွင်ႇတိၼ်ႇ ၶႃႈလူး ၊ ၸွင်ႇမီးယိူင်းဢၢၼ်းဝႃႈ တေၶဝ်ႈၼႂ်းပႃႊတီႊသေဢၼ်ဢၼ်ၶႃႈႁႃႉ ?။


တွပ်ႇ - တေႃႈလဵဝ်တႄႉပႆႇမီး ။ မိူဝ်းၼႃႈမႃးတႄႉမိူၼ်ၼင်ႇဝႃႈ ။ ပႃႊတီႊသိူဝ်ၽိူၵ်ႇၵေႃႈယဝ်ႉ ၊ ပႃႊတီႊႁူဝ်သိူဝ်ၵေႃႈယဝ်ႉ ၸိုဝ်ႈသဵင်မၼ်းတႄႉ ပဵၼ်ၽိဝ်ၼင်မၼ်းၵူၺ်း ၊ လွၼ်ႉမွၼ်းမၼ်းတႄႉ ပဵၼ်ဢၼ်ႁဵတ်းတႃႇဝၢၼ်ႈမိူင်း တႃႇၸၢဝ်းၶိူဝ်းႁဝ်းၼၼ်ႉယဝ်ႉ ပဵၼ်ဢၼ်လမ်ႇလွင်ႈ ။ ၵွပ်ႈၼၼ် ၼမ်ႉၸႂ်ၵေႃႈမိူၼ်ၵၼ် ၊ တၢင်းႁဵတ်းတၢင်းသၢင်ႈၵေႃႈမိူၼ်ၵၼ် ၊ မေႃဢုပ်ႇဢူဝ်းၵၼ် ၊ မေႃဢဝ်ၶေႃႈၵႂၢမ်းၵၼ်တႄႉ ၶႃႈတေသိုပ်ႇႁဵတ်းယူႇၵူၺ်း ။


ထၢမ် - ယူႇတီႈၸၢႆးမွင်ႇတိၼ်ႇ လႆႈသူင်ႇလိၵ်ႈထိုင်ပၼ်တီႈ လုမ်းသိူဝ်ၽိူၵ်ႇၵူႈဝဵင်းဝဵင်းၼႆႉ တင်းမူတ်းမီးလၢႆဝဵင်းၶႃႈ ။


တွပ်ႇ - 38 ဝဵင်းၶႃႈ ။ ထူင်လိၵ်ႈၼႆႉ ႁဵတ်း 38 သွင်း ၊ မၢင်တီႈ မိူၼ်ၼင်ႇမိူင်းၶၢင်ၼႆႉ မျိတ်ႉၵျီးၼႃး ၊ ဝဵင်းမႂ်ႇ ၊ သိမ်ႇပူဝ်ႇ (ၾင်ႇထူဝ်ႇ) 3 ဝဵင်းၼႆႉ သူင်ႇၸွမ်းၵၼ်ထူင်လိၵ်ႈဢၼ်လဵဝ် ။ ဝၢၼ်ႈမေႃႇ ၊ ဝၢၼ်ႈၸႄႈ (မၢၼ်ႇၸီႇ) ၊ မိူင်းမွၵ်ႇ 3 ဝဵင်းၼႆႉ သူင်ႇလိၵ်ႈၸွမ်းထူင်လဵဝ်ၵၼ် ။ လူင်းသဵၼ်ႈမၢႆ (Register) သေ သူင်ႇၵႂႃႇၼႂ်း ႁွင်ႈၵၢၼ်သူင်ႇလိၵ်ႈ (ၸႃႇတၢႆႉ) ၊ ၵွပ်ႈၵူဝ်မၼ်း တူၵ်းႁူင်ႈတူၵ်းႁၢႆ ၊ ၵွပ်ႈဝႃႈလွင်ႈၼႆႉ မၼ်းလမ်ႇလွင်ႈပိူဝ်ႈတႃႇၶႃႈႁဝ်းလႄႈ တႃႇၸိူဝ်ႉၶိူဝ်းႁဝ်း ၊ ၵွပ်ႈၼၼ် ႁႂ်ႈလႆႈႁူႉၵၼ်ၵူႈၸႄႈဝဵင်း ။ မိူၼ်ၼင်ႇတၢင်းၵဵင်းတုင် ၊ တႃႈၶီႈလဵၵ်း ၊ မိူင်းယွင်း ၊ မိူင်းယၢင်း ၊ မိူင်းၽျၢၵ်ႈ ၊ မိူင်းၶၢၵ်ႇၸိူဝ်းၼႆႉၵေႃႈ လိၵ်ႈလၢႆလၢႆၽိုၼ် သႂ်ႇထူင်ၸွမ်းၵၼ် ။ မိူဝ်ႈဝႃးၼႆႉ သူင်ႇထူင်လိၵ်ႈ မီးယူႇ 38 ထူင် ။


ၼႂ်းဝဵင်းတွင်ႇၵျီး (တူၼ်ႈတီး) ၼႆႉ ၸိူဝ်းပဵၼ်ၽူႈပွင်ၵၢၼ်ငဝ်ႈငုၼ်းႁဝ်း ၸိူဝ်းၼႆႉၵေႃႈ တၢမ်တူဝ်ၶႃႈ ၵႂႃႇသူင်ႇႁွတ်ႈထိုင်တီႈႁိူၼ်းၵမ်းလဵဝ် ။ မၢင်ၸိူဝ်းတႄႉ ၶႂ်ႈႁၢမ်ႈၶႃႈယူႇ ။ ၵူၺ်းၵႃႈ ၶႃႈၵေႃႈဝႃႈၼႆႉတႄႉမၼ်း ပဵၼ်ၵၢင်ၸႂ်ၶႃႈ ၊ သူႁၢမ်ႈၵေႃႈဢမ်ႇၸၢင်ႈႁဵတ်းႁိုဝ် ၊ ၶႃႈဝူၼ်ႉမႃးႁိုင်ၼႅၼ်ႇယဝ်ႉ ၊ ၶႃႈႁဵတ်းလႆႈၵႃႈၼႆႉၵူၺ်းယဝ်ႉ လၢတ်ႈၵႂႃႇၸိူင်ႉၼႆ ။ ဢမ်ႇၸႂ်ႈဝႃႈ တေပေႃးၵၢၼ်တႆး ။ ပေႃးၵၢၼ်ပႃႊတီႊသိူဝ်ၽိူၵ်ႇ လႄႈ ယွၼ်းပေႃးပႃး ဢၼ်ပဵၼ်ဝႆႉ MD (ၽူႈၵုမ်းၵၢၼ်) ၼႂ်းၶွမ်ႊပၼီႊသိူဝ်ၽိူၵ်ႇ ။


လၵ်းထၢၼ်သၢၵ်ႈသေႇမၼ်းသၵ်းသၵ်းၼႆႉ မိူဝ်ႈပွႆးလိူၵ်ႈၵဵပ်း 2015 မိူၼ်ၸႄႈဝဵင်းၼမ်ႉၶမ်း မိူင်းတႆးပွတ်းႁွင်ႇၼႆႉ ၵူႈသိုပ်ႇသိုပ်ႇၵူႈပၢၼ်ပၢၼ် ထၢတ်ႈၸႂ်တႆးႁဝ်းႁႅင်းၵႃႈႁိုဝ် ။ တီႈၼႆႈၼႆႉ တႆးသွင်ပႃႊတီႊ ဢမ်ႇဢုပ်ႇဢူဝ်းငူပ်ႉငီႉၵၼ်လႆႈသေ ၶဝ်ႈပၢင်လိူၵ်ႈတင်ႈလႄႈ ၽွၼ်းႁၢႆႉမၼ်း ပႃႊတီႊသိူဝ်ၽိူၵ်ႇၵေႃႈဢမ်ႇလႆႈသေၵေႃႉ ၊ ပႃႊတီႊႁူဝ်သိူဝ်ၵေႃႈ ဢမ်ႇလႆႈသေၵေႃႉ ၊ ပႃႊတီႊတၢင်ႇဢၼ်လႆႈၵႂႃႇ ။ လွင်ႈၼႆႉ ၵၢင်ၸႂ်တႆးႁဝ်း မၼ်းမီးၸိူင်ႉႁိုဝ်ၼႆၵေႃႈ ႁဝ်းၶႃႈ ပႃးၸဵမ်တၢမ်တူဝ်ၶႃႈ လႆႈႁူႉယဝ်ႉသေ ၶႃႈၸင်ႇထွၼ်တူဝ်ဢွၵ်ႇ ။


တီႈၼမ်ႉၶမ်းၼႆႉ မိူဝ်ႈယၢမ်းၼၼ် ၶႃႈထွမ်ႇတူၺ်း ၶႂ်ႈမီးႁူဝ်ႁဵင် ၸမ်မိုၼ်ႇ ဢၼ်ဢမ်ႇမႃးပၼ်ၶႅပ်းၵၢင်ၸႂ် ၊ ဢမ်ႇမႃးပၼ်သဵင် ။ ပေႃးၼၼ် ႁဝ်းၵေႃႈဝူၼ်ႉလႆႈဝႃႈ မိူဝ်ႈၼႃႈမႃး 2020 မႃး ပေႃးႁဝ်းႁဵတ်းၼႆၵႂႃႇ ပႃႊတီႊတႆးႁဝ်းၸိူဝ်းၼႆႉ 2 - 3 ပႃႊတီႊ ။ ၵမ်ႈၽွင်ႈဝႃႈ တေႃႈပႃႊတီႊမၢၼ်ႈ ယင်းဢမ်ႇႁူမ်ႈႁွမ်းၵၼ် ။ ၶႃႈႁဝ်းဝႃႈ ငဝ်းလၢႆးႁဝ်းတင်းမၢၼ်ႈမၼ်းဢမ်ႇမိူၼ်ၵၼ် ၊ ပေႃးႁဝ်းမီးလၢႆပႃႊတီႊမၼ်းဢမ်ႇပေႉပိူၼ်ႈလႆႈ ။


ယွၼ်ႉၼႆ ၶႂ်ႈႁႂ်ႈႁူမ်ႈႁွမ်းၵၼ် ႁဵတ်းၵၢၼ်တႃႇၸိူဝ်ႉတႃႇၶိူဝ်း ၊ ၽႅၼ်ၵၢၼ်တႃႇမိူဝ်းၼႃႈ ပီ 2020 ပၢင်လိူၵ်ႈတင်ႈမႃး ႁႂ်ႈဢွင်ႇပေႉၼမ်ၼမ် ၊ ၶႂ်ႈတိုၵ်းသူၼ်းပေႃႈမႄႈပီႈၼွင်ႉၵူၼ်းမိူင်း ပႃးၸဵမ်ၽူႈဢွၼ်ႁူဝ်တင်း သွင်ၾၢႆႇ သၢမ်ၾၢႆႇ ၊ ပႃႊတီႊတႆးႁဝ်းၸိူဝ်းၼႆႉ ၶႂ်ႈႁႂ်ႈဢုပ်ႇဢူဝ်းၵၼ်သေ ႁူမ်ႈႁွမ်းၵၼ်ၵႂႃႇ ၊ ဢၼ်ထွၼ်တူဝ်ဢွၵ်ႇၼႆႉ ၶႃႈၶႂ်ႈၼႄၵၢင်ၸႂ်ၶႃႈႁဝ်းၼင်ႇၼႆ ။