ယွၼ်ႉပိူဝ်ႈ ၸုမ်းၶွင်ႇသီႇဢဝ်ၶိုၼ်းတပ်ႉသိုၵ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA တင်း တပ်ႉသိုၵ်းပူတ်ႉပွတ်ႇၸိူဝ်ႉၸၢတ်ႈတဢၢင်း TNLA ဢၼ်လႆႈပဵၼ်ပၢင်တိုၵ်း ၵၼ် ႁၢဝ်ႈႁႅင်း သေႁဵတ်းႁႂ်ႈၵူၼ်းမိူင်းၼပ်ႉႁူဝ်ႁဵင် လႆႈပၢႆႈၽေးသိုၵ်း ၸႄႈဝဵင်းၵျွၵ်ႈမႄး ၸိုင်ႈတႆးပွတ်းႁွင်ႇ ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 11/02/2016 (မိူဝ်ႈၼႆႉ) ၸုမ်းတူင်ႉၼိုင်တူင်ႇဝူင်းၵူၼ်း လၢႆၸုမ်းၼႂ်းၸႄႈဝဵင်းၵျွၵ်ႉမႄး ႁူမ်းပႃး - 1 ၸုမ်းပႃႊတီႊသိူဝ်ၽိူၵ်ႇ (SNDP) ၊ 2 ၸုမ်းၵေႃလိၵ်ႈလၢႆးလႄႈ ၾိင်ႈငႄႈတႆး (SCL) ၵျွၵ်ႉမႄး ၊ 3 ၸုမ်းၵူၼ်းၼုမ်ႇတႆး (TYO) ၵျွၵ်ႉမႄး ၊ 4 ၸုမ်းၸဝ်ႈႁႆႈၸဝ်ႈၼႃး (AFFM) ၵျွၵ်ႉမႄး ၊ 5 ၸုမ်းၵူၼ်းၼုမ်ႇတႆး ပၢႆးပၺ်ၺႃ (TKO) ၵျွၵ်ႉမႄး ၊ 6 ၸုမ်း ၵူၼ်းၼုမ်ႇတႆး ၶွမ်ႊပိဝ်ႊတိူဝ်ႊ (S.A.C.T) ၵျွၵ်ႉမႄး ၊ 7 ၸုမ်းဝူင်းမႅတ်ႉတ ၵျွၵ်းမႄး ။ ၵူၼ်းၶဝ်ႈႁူမ်ႈပၢင်ဢုပ်ႇဢူဝ်းမီး 70 ၵေႃႉပၢႆ ။


ၸဝ်ႈတူၼ်ႈၶူး ၵလႅၼ်ၼဝံသ ၶူးသွၼ်ဝတ်ႉထမ်းယွတ်ႈ ၵျွၵ်ႉမႄးလၢတ်ႈဝႃႈ - ႁဝ်းၸဝ်ႈၸင်ႇႁွင်ႉ ၵူႈၸုမ်းၸုမ်း ၼႂ်းတူင်ႇဝဵင်းၵျွၵ်ႉမႄး ၶိုၼ်းမႃးဢုပ်ႇဢူဝ်းၵၼ် ႁဝ်းဢမ်ႇၶႂ်ႈႁႂ်ႈဢွၵ်ႇ ၸုမ်းဢွၵ်ႇယဝ်ႉ ၸုမ်းသမ်ႉဢွၵ်ႇ ဢမ်ႇၶႃႈပဵၼ်ၸိုင်ႉၼၼ် ၶႂ်ႈႁႂ်ႈႁူမ်ႈႁွမ်းၵၼ်မူတ်းမူတ်းသေ ဢွၵ်ႇႁူမ်ႈၵၼ်  ဝႃႈၼႆ ။


ဝၢႆးသေပၢင်ၵုမ်ယဝ်ႉၸင်ႇလႆႈဢွၵ်ႇၶေႃႈ ပိုၼ်ၽၢဝ်ႇ 3 ၶေႃႈ -


1. တပ်ႉသိုၵ်းတဢၢင်း PSLF/TNLA ဢဝ်ၵူၼ်းမိူင်းႁဵတ်းၸၢၵ်ႇ  ၼႂ်းပၢင်တိုၵ်း သိုၵ်းသိူဝ် ဢဝ်ႁိူၼ်းယေးတီႈယူႇ ပိုတ်ႇပၢင်တိုၵ်း ၼႂ်းဝၢၼ်ႈၵူၼ်းယူႇၸိူဝ်းၼႆႉ ၸုမ်းတူင်ႉၼိုင်တူင်ႇဝူင်းၵူၼ်း လႄႈ ၸုမ်းသင်ၶၸဝ်ႈၸိုင်ႈတႆး ဝဵင်းၵျွၵ်ႉမႄး သၢၼ်ၶတ်း တႄႉတႄႉဝႃႈဝႃႈ ။


2. ၶႂ်ႈတိုၵ်းသူၼ်းဝႃႈ ယႃႇပေတိၺွပ်းၵူၼ်းမိူင်းလႄႈ သင်ၶၸဝ်ႈ ပေႃႉထုပ်ႉ ၶၢႆႁႅမ်တိၵ်းတိၵ်း ။


3. တိုၵ်းသူၼ်းဝႃႈ ၾၢႆႇလႂ်သေဢမ်ႇဝႃႈ ယႃႇပေဢွၵ်ႇၶၢဝ်ႇပိုၼ်ၽေႈ တၢင်းႁၼ်ထိုင်ဝႃႇတ ႁဵတ်းႁႂ်ႈၸၢဝ်းၶိူဝ်း ၼင်ႇၵၼ် တေမီးပၼ်ႁႃၵၼ်ၸိူဝ်းၼႆႉ ၸၢဝ်းၶိူဝ်းၼင်ႇၵၼ် ယႃႇပေႁဵတ်းလႃးလႃး ။


တင်ႈတႄႇဝၼ်းတီႈ 10/2/2016 တေႃႇထိုင်မိူဝ်ႈၼႆႉ ၵူၼ်းပၢႆးၽေးဢၼ်ႁွတ်ႈထိုင်ဝဵင်းၵျွၵ်ႉမႄးမီးၸမ် 2000 ၵေႃႉယဝ်ႉ ။ ၵူၼ်းပၢႆးၸိူဝ်းၼႆႉယူႇဝႆႉတီႈႁူင်းလုမ်းလႃးၵူၼ်းထဝ်ႈ လႄႈ တီႈဝတ်ႉၼမ်ႉသလိၼ်း ၊ သီႇႁူဝ်ႇ ၊ ၵျွင်းႁူဝ်ၼမ်ႉ ၊ ဢွင်ႇသူႉပၢၼ်ႇ ၸဵမ်ၸိူဝ်းၼႆႉ ၼႆယဝ်ႉ ။