ပၢင်ၵုမ် ၸုမ်းသိုဝ်ႇၶၢဝ်ႇၸၢဝ်းၶိူဝ်း EMC (Ethnic Media Conference) ၸတ်းႁဵတ်း ပွၵ်ႈၵမ်းထူၼ်ႈ 4 ၊ တင်ႈတႄႇဝၼ်းတီႈ 14/02/2016 (ၶၢဝ်းတၢင်း 3 ဝၼ်း) တီႈဝဵင်းမျႃႉဢူး ၸႄႈမိူင်းရၶႅင်ႇ ။ တိုၵ်းသူၼ်း တီႈလူင်ပွင်ၸိုင်ႈ ဢွၵ်ႇမၢႆမီႈႁႄႉၵင်ႈ ၽူႈသိုဝ်ႇၶၢဝ်ႇၼၢင်းယိင်း ။

ၼၢင်းၽေႃးၵေႇ ၽူႈယႂ်ႇၵူၼ်းလူင်ၼႂ်း BNI တိုၵ်းသူၼ်းဝႃႈ - ၼႂ်းပၢၼ်လူင်ပွင်ၸိုင်ႈမႂ်ႇၼႆႉ ႁႂ်ႈမီးမၢႆမီႈ ဢၼ်ၵႅတ်ႇၶႄႁႄႉၵင်ႈပၼ် ၽူႈသိုဝ်ႇၶၢဝ်ႇၼၢင်းယိင်း ။


“ ၽူႈသိုဝ်ႇၶၢဝ်ႇၼၢင်းယိင်းၼႆႉ ပေႃးဝႃႈၵႂႃႇဢဝ်ၶၢဝ်ႇၼႆ ထုၵ်ႇပိူၼ်ႈၸႅၵ်ႇၸၼ်ႉထၢၼ်ႈ ထၢင်ႇလဵၵ်ႉလူမဝ် ၊ ၵွပ်ႈမၼ်းမီးၸိူင်ႉၼႆလႄႈ ပေႃးထိုင်ပၢၼ်လူင်ပွင်ၸိုင်ႈမႂ်ႇမႃးၵေႃႈ တေတုၵ်းယွၼ်းႁႂ်ႈဢွၵ်ႇပၵ်းပိူင်မၢႆမီႈ ၵႅတ်ႇၶႄႁႄႉၵင်ႈပၼ် ၽူႈသိုဝ်ႇၶၢဝ်ႇၼၢင်းယိင်း ။ ၵွပ်ႈဝႃႈၵႃႈပူၼ်ႉမႃး ၽူႈဢဝ်ၶၢဝ်ႇၼၢင်းယိင်း ဢၼ်ထုၵ်ႇၶႃႈတၢႆၸိူဝ်းၼႆႉၵေႃႈႁၼ်မႃးမီးမႃး ”- ၼၢင်းၽေႃးၵေႇ လၢတ်ႈ ။


ပၢင်ၵုမ် ၽူႈသိုဝ်ႇၶၢဝ်ႇၸၢဝ်းၶိူဝ်း EMC ၼႆႉ ၸတ်းႁဵတ်း 14-16/02/2016 ။ ဝၼ်းတီႈ 14 ဝၼ်းတႄႇပၢင်ၵုမ် မီးၼၢင်းၽေႃးၵေႇ မီးၽူႈထတ်းလိၵ်ႈၸုမ်းၶၢဝ်ႇယၢင်း ။ သၢႆးမၢႆႇ ၸုမ်းၶၢဝ်ႇၶၢင် ၊ တေႃႇမျၢတ်ႉၼူဝ်းတႃႇ ၽူႈထတ်းလိၵ်ႈၸုမ်းၶၢဝ်ႇရၶႅင်ႇ ၊ မိယေႇၸၼၢႆး ၽူႈသိုဝ်ႇၶၢဝ်ႇမွၼ်း ၶဝ် 4 ၵေႃႉၸိူဝ်းၼႆႉ လႆႈၵၢဝ်ႇလၢတ်ႈၵႂႃႇ ၸွမ်းႁူဝ်ၶေႃႈၽႂ်မၼ်း ၵဵဝ်ႇၵပ်းလွင်ႈၽူႈသိုဝ်ႇၶၢဝ်ႇ ၼၢင်းယိင်း ။


ၼၢင်းမိယေႇၸၼၢႆး ၽူႈသိုဝ်ႇၶၢဝ်ႇမွၼ်းလၢတ်ႈဝႃႈ - ၼႂ်းၸၢဝ်းၶိူဝ်းၼႆႉ ၽူႈသိုဝ်ႇၶၢဝ်ႇၼၢင်းယိင်းမီးဢေႇ ၊ မိူၼ်ၼင်ႇမိူင်းမွၼ်းၼႆႉ ယိင်ႈၶႅၼ်းမီးဢေႇယဝ်ႉ ။ ပေႃးၵႂႃႇဢဝ်ၶၢဝ်ႇၼႆ ၵူၼ်းၸၢႆးၶဝ်ဢမ်ႇပေႃးၶႂ်ႈႁွင်ႉၵႂႃႇၸွမ်း ၊ ၵွပ်ႈဝႃႈ ပေႃးပႃးၼၢင်းယိင်းၵႂႃႇၸွမ်း ၵူၼ်းၸၢႆးၶဝ်ဝႃႈ မၼ်းပဵၼ်ပုၼ်ႈၽွၼ်းၼၵ်းၼႃပႃးပၢၼ်ႈ ပုၼ်ႈတႃႇၶဝ်။ ၶဝ်ဢမ်ႇၶႂ်ႈႁွင်ႉ ။ ၵွပ်ႈထုၵ်ႇၸႅၵ်ႇၽႄဝႆႉလႄႈ ၽူႈသိုဝ်ႇၶၢဝ်ႇၼၢင်းယိင်းၼႆႉ ၼႃႈလဵၵ်ႉဝႆႉ ၊ မၼ်းယၢပ်ႇၽိုတ်ႇတႃႇတေၵႂႃႇႁႃၶၢဝ်ႇ - ဝႃႈၼႆ ။


ပၢင်ၵုမ် ဝၼ်းတီႈ 2 လႄႈ 3 ၼႆႉ တေမီးလွင်ႈဢုပ်ႇဢူဝ်းၵၼ် ၵဵဝ်ႇၵပ်းလွင်ႈ သိုဝ်ႇၶၢဝ်ႇလွတ်ႈလႅဝ်း ၼႂ်းပၢၼ်လူင်ပွင်ၸိုင်ႈမႂ်ႇၼႆႉ ထုၵ်ႇလီႁဵတ်းႁိုဝ် ၸိူဝ်းၼႆႉ ။ လိူဝ်သေၼၼ်ႉ တေဢုပ်ႇဢူဝ်းၵၼ်ၵႂႃႇ ၵဵဝ်ႇၵပ်းလွင်ႈငမ်းယဵၼ် ၊ လွင်ႈသိုဝ်ႇၶၢဝ်ႇၸၢဝ်းၶိူဝ်း ဝၼ်းမိူဝ်းၼႃႈၸိူဝ်းၼႆႉ ။ မိူဝ်ႈဝႃး (14/02/2016) ၼႆႉ ပိုတ်ႇပၢင်ၵုမ် ၵၢင်ၼႂ်ယၢမ်း 9 မူင်း ၊ ၵူၼ်းၶဝ်ႈႁူမ်ႈပၢင်ၵုမ်မီးမွၵ်ႈ 200 ၵေႃႉ - ၼႆယဝ်ႉ ။