ၽူႈၼမ်းတႆး ၸွမ်ႁၢၼ်သိူဝ်ထႅၼ်ႈ ဢွၼ်ႁူဝ်တူဝ်တႅၼ်း SSJAC ႁူပ်ႉထူပ်းၵၼ်တင်း ၸွမ်သိုၵ်းယွတ်ႈသိုၵ်း ႁူဝ်ပဝ်ႈ CSSU ၊ ဢုပ်ႇဢူဝ်းၵၼ် ပိူဝ်ႈတႃႇၵႄႈလိတ်ႈပၼ်ႁႃ ဢၼ်ပဵၼ်ဝူင်ႈၵၢင် တႆးတင်းတဢၢင်း ၼႂ်းၸိုင်ႈတႆးပွတ်းႁွင်ႇ ။

ၽူႈၼမ်းတႆး ႁူပ်ႉထူပ်းဢုပ်ႇဢူဝ်းၵၼ် ၼႂ်းၵဵင်းမႆႇ ပိူဝ်ႈတႃႇၵႄႈလိတ်ႈပၼ်ႁႃ တႆးတင်းတဢၢင်း ၼႂ်းၸိုင်ႈတႆးပွတ်းႁွင်ႇ

မိူဝ်ႈဝၼ်းတီႈ 14/02/2016 ယၢမ်းဝၢႆးဝၼ်း 2 မူင်း ၊ ၽူႈၼမ်းတႆး ၸွမ်ႁၢၼ်သိူဝ်ထႅၼ်ႈ ဢွၼ်ႁူဝ်လုၵ်ႈၸုမ်း / တူဝ်တႅၼ်းၵေႃႁူမ်ႈသၢင်ႈၸိုင်ႈတႆး (SSJAC) ႁူပ်ႉထူပ်းၵၼ်တင်း ၸွမ်သိုၵ်းယွတ်ႈသိုၵ်း ႁူဝ်ပဝ်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) တီႈၼႂ်းၵဵင်းမႆႇ မိူင်းထႆး။ ဢုပ်ႇဢူဝ်းၵၼ်လွင်ႈ ပိူဝ်ႈတႃႇၵႄႈလိတ်ႈပၼ်ႁႃ ဢၼ်ပဵၼ်ဝူင်ႈၵၢင် တႆးတင်းတဢၢင်း ၼႂ်းၸိုင်ႈတႆးပွတ်းႁွင်ႇ - ၼႆယဝ်ႉ ။


ပၢင်ႁူပ်ႉထူပ်းဢုပ်ႇဢူဝ်းပွၵ်ႈၵမ်းၼႆႉ ၸွမ်ႁၢၼ်သိူဝ်ထႅၼ်ႈဢွၼ်ႁူဝ် တူဝ်တႅၼ်း / လုၵ်ႈၸုမ်း (Shan State Joint Action Committee-SSJAC) တင်းမူတ်း 6 ၵေႃႉ ၊ ၼႂ်းၼၼ်ႉပႃးတင်း ၸၢႆးၼုတ်း ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် (SNLD) ။ ၾၢႆႇႁူဝ်ပဝ်ႈ ၶွင်ႊသီႊဢဝ်ၶိုၼ်းၸိုင်ႈတႆး (RCSS) လႄႈ ဢၼ်ပဵၼ်ႁူဝ်ပဝ်ႈလူင် (Committee for Shan State Unity-CSSU) ၸွမ်သိုၵ်းယွတ်ႈသိုၵ်း ဢွၼ်ႁူဝ်တူဝ်တႅၼ်း / လုၵ်ႈၸုမ်း 9 ၵေႃႉ - ၼႆယဝ်ႉ ။


ၽူႈၸတ်းၵၢၼ် တပ်ႉၽွမ်ႉႁူမ်ႈ UNFC ၸဝ်ႈၸၢႆးထူး လၢတ်ႈဝႃႈ - “ ဢၼ်လႆႈၸတ်းႁဵတ်းပၢင်ဢုပ်ႇဢူဝ်းၵၼ်ၼႆႉ တွၼ်ႈတႃႇတေမေးၶွတ်ႇၽွတ်ႈၸုမ်း CSSU ၵေႃႈပိူင်ၼိုင်ႈ ၊ သမ်ႉထႅင်ႈ ဢုပ်ႇဢူဝ်းၵၼ်လွင်ႈပၼ်ႁႃၼႂ်းၵႄႈ တပ်ႉသိုၵ်းတဢၢင်း TNLA လႄႈ RCSS/SSA ၵေႃႈပိူင်ၼိုင်ႈသေ ၾၢႆႇႁဝ်းၶႃႈတင်းသဵင်ႈၵေႃႈ တေဢွၼ်ၵၼ် သိုပ်ႇသၢၼ်မိုဝ်းၵၼ်ႁဵတ်းၵႂႃႇယူႇ ။ ယဝ်ႉၵေႃႈဢၼ်ပိူၼ်ႈဢွၼ်ၵၼ် လိုဝ်းလင်ၸွမ်းၼိူဝ် Social Media ဝႃႈSSPP/SSA ဢမ်ႇၸွႆႈသင်ၸွမ်းဢၼ်ဝႃႈၼၼ်ႉၵေႃႈ ၶႂ်ႈယွၼ်းသင်ႇလၢတ်ႈဝႃႈ ႁႂ်းဢွၼ်ၵၼ် ဝူၼ်ႉလိုၵ်ႉလိုၵ်ႉသေၵမ်း ၊ ယႃႇပေဢဝ် ၸႂ်ႁိပ်ႈၼႅတ်ႈသေတႅပ်းတတ်း ”- ဝႃႈၼႆ ။


ၵူၼ်းၼုမ်ႇၽူႈၶဝ်ႈပႃးၼႂ်းပၢင်ၵုမ် ၵေႃႉၼိုင်ႈလၢတ်ႈဝႃႈ - ဢၼ်မႃးႁူပ်ႉထူပ်းၵၼ်ၼႆႉ ႁဝ်းယူႇတီႈပဵၼ်လုၵ်ႈၸုမ်း CSSU သေ မႃးႁူပ်ႉထူပ်းၵူၺ်း ။ ဢမ်ႇၸႂ်ႈလုၵ်ႉတီႈပႃႊတီႊၽႂ် ပႃႊတီႊမၼ်းသုၼ်ႇတူဝ်သေမႃး ။ ပဵၼ်ၽူႈၶဝ်ႈပႃးၼႂ်း SSJAC ဢၼ်ပဵၼ်လုၵ်ႈၸုမ်း CSSU သေ မႃးႁူပ်ႉထူပ်းႁူဝ်ပဝ်ႈၵူၺ်း ။ ဢၼ်မႃးႁူပ်ႉဢုပ်ႇၵၼ်ၼႆႉၵေႃႈ ဢမ်ႇၸႂ်ႈဝႃႈဢုပ်ႇဢူဝ်းၵၼ် လွင်ႈပိူဝ်ႈတႃႇၵႄႈလိတ်ႈပၼ်ႁႃ ဝူင်ႈၵၢင်တႆးတင်းတဢၢင်းပိူင်လဵဝ်ၵူၺ်း ၊ မိူဝ်းၼႃႈမႃး တႃႇၵၢၼ်ၸိူဝ်ႉၸၢတ်ႈတႆး ၵၢၼ်မိူင်းတႆးၸိူဝ်းၼႆႉ ႁဝ်းတေႁဵတ်းႁိုဝ်ႁဵတ်းသၢင်ႈၵႂႃႇၸိူဝ်းၼႆႉၵေႃႈ လႆႈဢုပ်ႇၵုမ်ၵၼ်ပႃး - ဝႃႈၼႆ ။


ပိူင်လူင်မၼ်း ဢၼ်လႆႈဢုပ်ႇဢူဝ်းၵၼ်ၵႂႃႇတီႈ ပၢင်ၵုမ်မိူဝ်ႈဝၼ်းတီႈ 14 ၼႆႉမီး 3 လွင်ႈ - 1. တႃႇတေႁူမ်ႈမိုဝ်းၵၼ် ႁဵတ်းသၢင်ႈၵၢၼ်မိူင်းတႆး မိူဝ်းၼႃႈ ။ 2. တႃႇတေၸွႆႈၵူၼ်းပၢႆႈၽေးသိုၵ်း ဢၼ်မီးၼႂ်းၸိုင်ႈတႆးပွတ်းႁွင်ႇ ။ 3. တႃႇတေၵႄႈလိတ်ႈပၼ်ႁႃ ၼႂ်းၵႄႈၵၢင် တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) လႄႈ တပ်ႉသိုၵ်းၸိုင်ႈတႆး (RCSS/SSA) ႁႂ်ႈပၢင်တိုၵ်းၸဵဝ်းယဵၼ်ႁၢႆ - ၼႆယဝ်ႉ ။


ၾၢႆႇ RCSS ၵေႃႈလႆႈပိုၼ်ၽၢဝ်ႇဝႆႉဝႃႈ - တႃႇတေႁူပ်ႉထူပ်းဢုပ်ႇဢူဝ်းၵိူဝ်းၵုမ်ၵၼ် လူၺ်ႈလၢႆးၵတ်းၵတ်းယဵၼ်ယဵၼ် တင်းတပ်ႉသိုၵ်းတဢၢင်း TNLA ၼႆႉ ၾၢႆႇ RCSS တူဝ်ႈတၼ်းဝႆႉတႃႇသေႇ - ၼႆယူႇ ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)ၼႆႉ လႆႈၶွတ်ႇၽွတ်ႈမႃးမိူဝ်ႈ 15/10/2013 ။ မီးလုၵ်ႈၸုမ်းမိူၼ်ၼင်ႇ ၵေႃႁူမ်ႈသၢင်ႈၸိုင်ႈတႆး (SSJAC) ။ ၼႂ်း SSJAC မီးပႃး ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ၊ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၸိူဝ်းၼႆႉ ။ လုၵ်ႈၸုမ်း CSSU ၼႆႉ ပႃးတင်း ၻီႊမူဝ်ႊၶရႅတ်ႊတိၵ်ႊပႃႊတီႊ ၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) ။ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႄႈ ၸုမ်းတူင်ႇဝူင်းၵူၼ်း လၢႆလၢႆၸုမ်း ။ ယၢမ်းလဵဝ် RCSS/SSA ႁပ်ႉတၼ်းႁဵင်းပဵၼ်ႁူဝ်ပဝ်ႈ CSSU ဝႆႉ ။


ၵေႃႁူမ်ႈသၢင်ႈၸိုင်ႈတႆး (SSJAC) ၼႆႉ ၶွတ်ႇၽွတ်ႈၵေႃႇတင်ႈမႃးမိူဝ်ႈဝၼ်းတီႈ 06/06/1996 ။ ပႃႊတီႊႁူဝ်သိူဝ် SNLD ၊ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) 2 ၸုမ်းၵေႃႈ ပဵၼ်လုၵ်ႈၸုမ်း SSJAC ။ ပေႃးထိုင်မႃးလိူၼ်ၵျုၼ်ႊ 2016 ၼႆႉ မီးဢႃယုထူၼ်ႈတဵမ် 20 ပီ ။