ပၢင်တိုၵ်း ၼႂ်းၵႄႈ  ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ၶၢဝ်းတၢင်းႁိုဝ်သွင်လိူၼ်ပၢႆႈၼၼ်ႉ ယဵၼ် ၵႂႃႇယဝ်ႉသေတႃႉ ၵူၼ်းပၢႆႈၽေႈသိုၵ်း 1000 ပၢႆ တိုၵ်ႉၵိုတ်းၶၢင်ႉတီႈႁၢႆးပႃ ယင်းတိုၵ်ႉယၢပ်ႇၽိုတ်ႇတႃႇၵိၼ်တႃႇယူႇ ၶၢဝ်းတၢင်းပႆႇၸၢင်ႈပွၵ်ႈႁိူၼ်းၶိုၼ်း ။

ၼၢင်းၸိင်ႇ ၽူႈၸွႆႈထႅမ်ၵူၼ်းပၢႆႈၽေး တီႈမိူင်းသူႈ လၢတ်ႈဝႃႈ “ တေႃႈလဵဝ်သမ်ႉ တၢင်းၼႆႉ ပိူၼ်ႈဢမ်ႇပေႃးမႃးၼမ်ယဝ်ႉ ။ ၵူၼ်းပၢႆႈၽေးသိုၵ်း တီႈဝၢၼ်ႈသေႃႉ လႆႈပွၵ်ႈမိူဝ်းႁိူၼ်းၶိုၼ်း သေတႃႉၵေႃႈ တွၼ်ႈတႃႇၶဝ် ၸိူဝ်းယူႇဝႆႉတီႈႁၢႆးပႃၼႆႉသမ်ႉ ယင်းတိုၵ်ႉလႆႈႁႃ ၶဝ်ႈသၢၼ်လႄႈ ၶွင်ၵိၼ်ၶွင်ၸႂ်ႉ သူင်ႇပၼ်ၶဝ်ယူႇ ။ တေႃႇထိုင် ၶၢဝ်းၶဝ်ႈမႂ်ႇၶဝ်ပေႃးဢွၵ်ႇပုၼ်ႉယဝ်ႈ ” ဝႃႈၼႆ ။


ယၢမ်းလဵဝ်တီႈဝၢၼ်ႈႁၢႆးပႃၼႆႉ ဢမ်ႇမီးၸဝ်ႈတႃႇၼႃႉၸုမ်းလူင် ဢမ်ႇသူႈမီးယဝ်ႉ ။ ၵူၺ်းၵႃႈ ၸဝ်ႈၽူႈမီးၼမ်ႉၸႂ် သုၼ်ႇတူဝ်ၽႂ်မၼ်းၼင်ႇၵႃႈပဵၼ်လႆႈၼၼ်ႉတႄႉမီးယူႇ - ဝႃႈၼႆ ။


ၸၢႆးသႅင်မိူင်း ၽူႈၼမ်းၼႂ်း ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ၵေႃႈလၢတ်ႈဝႃႈ  ၵူၼ်းပၢႆႈၽေးသိုၵ်းသိူဝ် ၸဵမ်ၵေႃႉပွၵ်ႈႁိူၼ်းၸဵမ်ၵေႃႉပႆႇၸၢင်ႈပွၵ်ႈ ၵွပ်ႈပိူဝ်ႈၶဝ်ပႆႇၸင်ႈႁဵတ်းၵိၼ် ၽုၵ်ႇသွမ်ႈသင်လႄႈ တၵ်းလႆႈ ၸွႆႈၶဝ်ႈသၢၼ်တေႃႇထိုင် ၼႂ်းလိူၼ်ၵျူၼ်ႊ ပီၼႆႉ ။


“ တွၼ်ႈတႃႇႁိူၼ်းယေးတႄႉ ဢမ်ႇၸွႆႈလႆႈႁိူၼ်းပဵၼ်လင်ၵေႃႈ တေၸွႆႈထႅမ်  ၶႃး / လဵၵ်း ၸိူဝ်းၼႆႉ။ လိူဝ်သေၼၼ်ႉ တႃႇၶဝ်ၽုၵ်ႇသွမ်ႈႁႃၵိၼ်လဵင်ႉတွင်ႉၼၼ်ႉ တေၸွႆႈပၼ် ၶိူင်ႈၸႂ်ႉသွႆ မိူၼ်ၼင်ႇသဵမ် ၊ မိတ်ႈ  သင်သိင်ႇၸိူဝ်းၼႆႉ တေတူၺ်းတူၺ်းသေ ၸွႆႈထႅမ်ပၼ် ” ဝႃႈၼႆ ။


ၵူၼ်းပၢႆႈၽေးသိုၵ်းတီႈပၢင်သဝ်း ႁၢႆးပႃး ၵေႃႉၼိုင်ႈ လၢတ်ႈဝႃႈ “ ၽူႈယႂ်ႇၵူၼ်းလူင်ဝႃႈ ႁႂ်ႈႁဝ်းၶႃႈ ပွၵ်ႈမိူဝ်းၶိုၼ်းတီႈ ဝၢၼ်ႈ ၊ ႁဝ်းၶႃႈသမ်ႉ ဢမ်ႇႁတ်းပွၵ်ႈမိူဝ်းၶိုၼ်းဝၢၼ်ႈၽႂ်မၼ်း ယင်းတိုၵ်ႉမီးမၢၼ်ႈ ၊ ၵမ်ႈၽွင်ႈၵေႃႈၵူဝ်ၵႂႃႇယဵပ်ႇၺႃးမၢၵ်ႇမႅင်း ဢၼ်ႁၢင်ႈၵၢင်ဝႆႉ လႄႈ ၵမ်ႈၽွင်ႈၵေႃႈဝႃႈ ယွၼ်ႉဢမ်ႇလႆႈပၢတ်ႇၶဝ်ႈၼႃး ဢမ်ႇၸၢင်ႈမိူဝ်းႁႃၵိၼ်သင် ယူႇဝႆႉတီႈၼႆႈသေ ယင်းမီးပီႈၼွင်ႉမႃးလဵင်ႉယူႇ ” ဝႃႈၼႆ ။


မိူဝ်ႈဝၼ်းတီႈ 16/02/2016 ၼၼ်ႉၵေႃႈ ယူႇတီႈ ၸုမ်းဝူင်းၸိူင်းလႅဝ်း လႆႈၵႂႃႇၵမ်ႉၸွႆႈ ၶူဝ်းၸႂ်ႉ ၶွင်ၵိၼ်လႄႈ ငိုၼ်း 5,090,000 သႅၼ်ပျႃး (ႁႃႈသိပ်းသႅၼ်ပၢႆၵဝ်ႈမိုၼ်ႇပျႃး) တီႈဝၢၼ်ႈပႃမုင်း ၊ ဝၢၼ်ႈၵုင်းၼိမ်လႄႈ တႃႈသၢမ်ပူး  ။


သိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်းသိုၵ်းတႆး SSPP/SSA မိူဝ်ႈႁၢင်ပီ 2015 ။ ၶၢဝ်းတၢင်းႁိုင် 2 လိူၼ် ။ ၵူၼ်းပၢႆႈၽေးသိုၵ်း မီး မိုၼ်ႇပၢႆ ။ ၵမ်ႈၽွင်ႈပွၵ်ႈယူႇၶိုၼ်းတီႈဝၢၼ်ႈၽႂ်မိူင်းမၼ်းယဝ်ႉသေတႃႉ ၵိုတ်းတီႈႁၢႆးပႃၼႆႉ 1000 ပၢႆ ပၢႆႇၸၢင်ႈပွၵ်ႈယူႇႁိူၼ်းၶိုၼ်း ။


ၾၢႆႇတၢင်းၵျွၵ်ႉမႄးၵေႃႈ ယွၼ်ႉပိူဝ်ႈပၢင်တိုၵ်းၼႂ်းၵႄႈတပ်ႉသိုၵ်းတဢၢင်း TNLA တင်းသိုၵ်းတႆး RCSS/SSA ပဵၼ်ႁၢဝ်ႈႁႅင်းၼႂ်းႁူဝ်လိူၼ်ၾႅပ်ႉပိဝ်ႊရီႊၼႆႉသေ ထိုင်ဝၼ်းထိ 18 ၾႅပ်ႉပိဝ်ႊရီႊၼႆၼႆႉ ၵူၼ်းပၢႆႈၽေးသိုၵ်းမီးယူႇ 3,600 ပၢႆ။မီးၸုမ်းတူင်ႉ ၼိုင်ဝူင်ႇတႆး လၢႆလၢႆၸုမ်း ဢွၼ်ၵၼ်ၵႂႃႇၸွႆႈထႅမ်မိူၼ်ၼင်ႇ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ၸွႆႈထႅမ် ၶွင်ၵိၼ် ၶွင်ၸႂ်ႉလႄႈ ငိုၼ်း တင်းမူတ်း 15,350,000 ပျႃး ၊ ၶွမ်ႊပၼီႊ ၵရဵၵ်ႉႁေႃၶမ်း ၊  ၵေႃႁူမ်ႈ သၢင်ႈ ၵူၼ်းၼုမ်ႇတႆး ၸွႆႈထႅမ်ၶူဝ်းၸႂ်ႉၶူဝ်းၵိၼ် လႄႈ ငိုၼ်း တင်းမူတ်း 1,716,000 ပျႃး (သိပ်းၸဵတ်း သႅၼ်ပျႃးပၢႆ) ၊ ၸုမ်းၵူၼ်းၼုမ်ႇတႃႈၵုင်ႈလႄႈ မူႇၸႄႈ ၸွႆႈထႅမ်ၶူဝ်းၸႂ်ႉ ၶူဝ်းၵိၼ်လႄႈ ငိုၼ်း တင်း မူတ်း 1,500,000 (သိပ်းႁႃႈသႅၼ်ပျႃး) ၊ ၸုမ်းပၢႆးမွၼ်းတႆး ဝဵင်းမႄႈသၢႆ ၸိုင်ႈထႆး ၸွႆႈထႅမ်ၶူဝ်းၸႂ်ႉ ၶွင်ၵိၼ်လႄႈ ငိုၼ်း တင်းမူတ်း 23,000 ဝၢတ်ႇပၢႆ ၊  ၶွင်ႇသီႇဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး RCSS/SSA ၵေႃႈၵႂႃႇၸွႆႈထႅမ် ၊ ပႃႊတီႊမႂ်ႇသုင် ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA  ငိုၼ်းတင်း မူတ်း 300 သႅၼ်ပျႃး ၊ ႁူမ်ႈပႃးလူၺ်ႈ ထႅင်ႈလၢႆလၢႆၸုမ်း လႄႈသုၼ်ႇတူဝ် ၸိူဝ်းၼႆႉၵေႃႈၵႂႃႇၸွႆႈ ။