မိူင်းသဝိတ်ႊသိူဝ်ႊလႅၼ်ႊ မီးလွင်ႈလၢၵ်ႇလၢႆးလႄႈ ဢၼ်မိူင်းႁဝ်း လီယိူင်ႈႁဵတ်းၸွမ်း မီးတင်းၼမ် ။ ပိူင်လူင်မၼ်း ပဵၼ်လွင်ႈသုၼ်ႇလႆႈၵၢၼ်မိူင်း လႄႈ လွင်ႈၶိူဝ်းၵူၼ်းလၢႆၶိူဝ်း ယူႇလူၺ်ႈၵၼ်ၵတ်းၵတ်း ယဵၼ်ယဵၼ် ။ ၵဵဝ်ႇၵပ်းလွင်ႈၼႆႉ တၢင်းၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၽူႈၼမ်းၼႂ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၸဝ်ႈပိုၼ်ၶမ်း ဝႆႉၼင်ႇၼႆ ။

ထၢမ် - တွၼ်ႈတႃႇတေၵႂႃႇထိုင်လႆႈ ၼႂ်းမိူင်းသဝိတ်ႊသိူဝ်ႊလႅၼ်ႊၼႆႉ လႆႈလတ်းၵႂႃႇတၢင်းမိူင်းလႂ် လၢႆလၢႆၶႃႈ ?။


တွပ်ႇ - ပေႃးဝႃႈႁၢင်ႈႁႅၼ်းယဝ်ႉၵေႃႈ လုၵ်ႉတီႈမိူင်းထႆးၵႂႃႇၵူၺ်း ။ လုၵ်ႉတီႈမိူင်းၵွၵ်ႇၵႂႃႇ ၊ ဝၼ်းတီႈ 15/01/2016 ၽႅဝ်ၵႂႃႇမိူင်းဢေႃႊသ်ထရီႊယိူဝ်ႊ တီႈမိူင်းဝဵၼ်ႊၼႃႊ ၵၢင်ၼႂ် ။ လုၵ်ႉတီႈမိူင်းဢေႃႊသ်ထရီႊယိူဝ်ႊ ၶိုၼ်းသိုပ်ႇ ၵႂႃႇလူင်းတီႈၵျိၼ်ႊၼီႊဝိူဝ်ႊ တီႈမိူင်းသဝိတ်ႊသိူဝ်ႊလႅၼ်ႊ ၊ လုၵ်ႉတီႈၼၼ်ႈ ၶီႇၵႃးရူတ်ႉၿတ်ႊသ် ၵႂႃႇတီႈၸႄႈမိူင်းၽီႊပူး ၊ ဢိူင်ႇမိူဝ်ႊထိူၼ်ႊသေ ၵႂႃႇလိုဝ်ႈတီႈၼၼ်ႈ ။


ထၢမ် - ၽိူဝ်ႇဝႃႈလႆႈႁွတ်ႈၵႂႃႇယဝ်ႉ ဢၼ်လႆႈၵႂႃႇႁၼ် ဢၼ်လၢၵ်ႇလၢႆး ဢၼ်လီဢၢမ်းမီးသင်ၶႃႈ ?။


တွပ်ႇ - ပေႃးၽႅဝ်ၵႂႃႇ တီႈမိူင်းသဝိတ်ႊသိူဝ်ႊလႅၼ်ႊယဝ်ႉၼႆၵေႃႈ ဢၼ်လီဢၢမ်းလၢၵ်ႇလၢႆးၼႆႉ မိူင်းၶဝ်ပဵၼ်မိူင်းလဵၵ်ႉလဵၵ်ႉ ၊ သဵၼ်ႈတၢင်းၵေႃႈလဵၵ်ႉလဵၵ်ႉ ၊ ဢမ်ႇၵႂၢင်ႈ ၊ ၵူၺ်းၵႃႈ ၵႃးၼမ် ။ ၵႃးၼႆႉတေလႆႈဝႃႈၶဝ်မီးပၵ်းပိူင်မၢႆမီႈလီ ၊ ယဝ်ႉၵေႃႈမူတ်းသႂ်ၼႃႇ ၊ ၵူၼ်းၵေႃႈဢမ်ႇသုၵ်ႉသုၵ်ႉ ၊ ရူတ်ႉၵႃးၵေႃႈဢမ်ႇသုၵ်ႉသၵ်ႉ ။ လွင်ႈဝႆႉလွင်ႈဝၢင်းယုၵ်းယၵ်းၸိူဝ်းၼႆႉၵေႃႈ ဢမ်ႇသုၵ်ႉသၵ်ႉ ၊ ၸိုၼ်ႈတႃလီ ။ မိူင်းပိူၼ်ႈၼႆႉ မူတ်းသႂ်တၢၼ်ႇၼႆႉၼေႃ ၼႂ်းၸႂ်ၼႆႉ ဢၢမ်းၵႂႃႇၸိူင်ႉၼႆ ။


ထၢမ် - ဢၼ်ၵူၼ်းမိူင်းတႆးႁဝ်းၶႃႈ ထုၵ်ႇလီယိူင်ႈႁဵတ်းၸွမ်းၼၼ်ႉ မီးသင်လၢႆလၢႆၶႃႈ ?။


တွပ်ႇ - ဢၼ်လီယိူင်ႈၸွမ်းၼႆႉ မၼ်းမီးလၢႆယိူင်ႈလၢႆယၢင်ႇယူႇ။ ၵူၺ်းၵႃႈ ပေႃးႁုပ်ႈသေလၢတ်ႈၼႄၵေႃႈ ဢၼ်လီယိူင်ႈၸွမ်းၼႆႉ ၸွမ်းၼင်ႇလႆႈႁူႉတီႈၶဝ်ၼႆႉ ပေႃးဝႃႈပဵၼ်ၵူၼ်းမိူင်းၶဝ် ၾိုၵ်းႁႂ်ႈပဵၼ်ၵူၼ်းမိူင်းလီ / ၵူၼ်းလီ ။ ပေႃးဢဝ်ၵႂၢမ်းမိူင်းႁဝ်းဝႃႈ ပဵၼ်လုၵ်ႈတႄႉမႄႈဝႃႈ ၊ တႃႇတေပူၼ်ႉပႅၼ်ပၵ်းပိူင်မၢႆမီႈဝၢၼ်ႈမိူင်း ဢၼ်ဝႃႈၼႆႉမၼ်းမီးဢေႇတႄႉတႄႉ ။ ဢၼ်ၶဝ်ၾိုၵ်းၼၼ်ႉ ၶဝ်တိုၼ်းၾိုၵ်းႁႂ်ႈမၼ်းပဵၼ်ၵူၼ်းလီၵူႈၵေႃႉ ၊ ၵူၺ်းၵႃႈ လႆႈမူတ်းမူတ်းႁႃႉၼႆတႄႉ ႁဝ်းၵေႃႈၵွပ်ႈဢမ်ႇလႆႈၵႂႃႇလဵပ်ႈႁဵၼ်းႁိုင်လႄႈ ပဵၼ်ႁိုဝ်ဢမ်ႇႁူႉ ။ ၵူၺ်းၵႃႈ ပေႃးဝႃႈလႆႈလဵပ်ႈႁဵၼ်း ဢၼ်ၶဝ်မႃးလၢတ်ႈမႃးၸႃသေ သမ်ႉႁၼ်ယူႇၼၼ်ႉ မၼ်းတိုၼ်းပဵၼ်ၸိူင်ႉၼင်ႇၶဝ်ဝႃႈတႄႉ ၊ ၶဝ်တိုၼ်းၾိုၵ်းႁႂ်ႈပဵၼ်ၵူၼ်းမိူင်းလီၼၼ်ႉယဝ်ႉ ။ ၾိုၵ်းႁႂ်ႈပဵၼ်ၵူၼ်း ၸွမ်းလၵ်းပိူင်၊ တီႈဢိူင်ႇၵေႃႈၸွမ်းလၵ်းပိူင်ဢိူင်ႇ ၊ ဢၼ်ၼႆႉယဝ်ႉ ဢၼ်ၵူၼ်းမိူင်းႁဝ်းလီဢဝ်မႃး ပဵၼ်ပိူင်သွၼ် တူဝ်ယၢင်ႇသေၾိုၵ်းႁႂ်ႈမၼ်းပဵၼ် ၊ ၼႆႉတႄႉလီယိူင်ႈတႄႉတႄႉ ။


ထၢမ် - ယူႇတီႈၸဝ်ႈပိုၼ်ၶမ်းသေ တီႈၼႂ်းမိူင်းသဝိတ်ႊသိူဝ်ႊလႅၼ်ႊၼႆႉ လႆႈၵႂႃႇလဵပ်ႈႁဵၼ်းသင်လၢႆလၢႆၶႃႈ ?။


တွပ်ႇ - ဢၼ်ႁဝ်းၵႂႃႇတႄႉ ၵွပ်ႈပိူဝ်ႈၵပ်းၵၢႆႇလူၺ်ႈၶၵ်ႉတွၼ်ႈ ငမ်းယဵၼ် ဢၼ်လူင်ပွင်ၸိုင်ႈတဵင်းၸဵင်ႇၶဝ် ဢွၼ်ႁူဝ်ႁဵတ်းမႃး ၸဵမ်မိူဝ်ႈပီ 2013 - 14 မႃးတၢင်းၼႆႉ ။ ႁဵတ်းမႃးယဝ်ႉသေ တႃႇဝၢၼ်ႈမိူင်းမိူင်းႁူမ်ႈတုမ် မိူင်းမၢၼ်ႈ ႁူမ်ႈတင်းၸႄႈမိူင်းၵူႈတီႈတီႈ ႁႂ်ႈပေႃးလႆႈမီးလွင်ႈၵတ်းယဵၼ်သေလႄႈ ႁႂ်ႈပေႃးမီးလွင်ႈႁၵ်ႉႁူမ် ၸူမ်းၵၼ်ၼၼ်ႉ ၶဝ်လႆႈမႃးႁွင်ႉလွင်ႈငမ်းယဵၼ်မႃး။ ၼင်ႇႁိုဝ်ပေႃးတေၸၢင်ႈယိူင်ႈလႆႈ တီႈမိူင်းသဝိတ်ႊသိူဝ်ႊလႅၼ်ႊၼၼ်ႉ လူင်ပွင်ၸိုင်ႈသဝိတ်ႊသိူဝ်ႊလႅၼ်ႊၵေႃႈ ဝၢင်းၽႅၼ်သေၽိတ်ႈမွၵ်ႇၵႂႃႇ လဵပ်ႈႁဵၼ်းတူၺ်း။ ၸုမ်းပိူၼ်ႈတႄႉယဝ်ႉၵႂႃႇ ၊ ၽိတ်ႈမွၵ်ႇပဵၼ်ၸုမ်းပဵၼ်ၸုမ်းသေၵႂႃႇ ၊ ၼႂ်းလိူၼ်ၵျႅၼ်ႊၼိဝ်ႊရီႊၼႆႉ သမ်ႉမႃးမႅၼ်ႈသႂ်ႇ RCSS လႆႈၵႂႃႇလဵပ်ႈႁဵၼ်း ။


လႆႈၵႂႃႇလဵပ်ႈႁဵၼ်းၼႆႉ လွင်ႈၾၢႆႇဢုပ်ႉပိူင်ႇၽွင်းငမ်းၶဝ် ၊ ၾၢႆႇပၢႆးယူႇလီ ၊ ၾၢႆႇပၢႆးပိုၼ်ႉႁူႉပၺ်ၺႃ ၊ ၾၢႆႇလွင်ႈၵၢၼ်ၵူၼ်း ၸဵမ်ၸိူဝ်းၼႆႉ ။ ၼင်ႇႁိုဝ်တေၸၢင်ႈဢဝ်မႃး ႁဵတ်းၼႄၵူၼ်းမိူင်းတႆးႁဝ်းလႆႈၼၼ်ႉၵေႃႈ ႁႂ်ႈပေႃးလႆႈၼႄ ။  ၵွပ်ႈပိူဝ်ႈ လူင်ပွင်ၸိုင်ႈ မိူင်းသဝိတ်ႊသိူဝ်ႊလႅၼ်ႊၶဝ်ၽိတ်ႈမွၵ်ႇမႃးလႄႈလႆႈၵႂႃႇ ။


ထၢမ် - ပေႃးႁဝ်းမႃးတူၺ်း ပိူင်ဢုပ်ႉပိူင်ႇၽွင်းငမ်း မိူင်းသဝိတ်ႊသိူဝ်ႊလႅၼ်ႊလႄႈ မိူင်းႁူမ်ႈတုမ်မၢၼ်ႈၼႆႉ ပိူင်ႈၵၼ်ဝႆႉၸိူင်ႉႁိုဝ်ၽွင်ႈၶႃႈ ?။


တွပ်ႇ - ၸွမ်းၼင်ႇႁဝ်းၵႂႃႇလဵပ်ႈႁဵၼ်းမႃးတႄႉ မၼ်းပိူင်ႈၵၼ်တႄႉတႄႉ ၊ လႆႈဝႃႈၽႃႇမိုဝ်းလင်မိုဝ်း။ တီႈၶဝ်ၼႆႉ ႁႂ်ႈသုၼ်ႇၵူၼ်း သုင်သေတၢင်ႇတီႈတႄႉတႄႉ ။ မိူၼ်ၼင်ႇမိူင်းႁူမ်ႈတုမ်မၢၼ်ႈၼႆႉ ပိူင်ဢုပ်ႉပိူင်ႇၽွင်းငမ်း မၼ်းယူႇတီႈမိူင်းႁူမ်ႈတုမ်တင်းမူတ်း ။ မိူၼ်ၸိူင်ႉၸႄႈမိူင်းၸိူဝ်းၼႆႉ လႆႈဢဝ်မိူင်းႁူမ်ႈတုမ်ဝႃႈ ၊ ၸႄႈတွၼ်ႈ ၸႄႈဝဵင်းၸိူဝ်းၼႆႉ လႆႈဢဝ်မိူင်းႁူမ်ႈတုမ်ဝႃႈ ၊ ၸၼ်ႉဢိူင်ႇၵူၺ်းၵေႃႈ လႆႈဢဝ်မိူင်းႁူမ်ႈတုမ်ဝႃႈမူတ်း ။


မိူၼ်ၸိူင်ႉၼင်ႇၶဝ် ( မိူင်းသဝိတ်ႊသိူဝ်ႊလႅၼ်ႊ ) လႆႈဢဝ်တၢင်းတႂ်ႈၶိုၼ်ႈ၊ လႆႈဢဝ်ဢိူင်ႇဝႃႈ ။ တႃႇတေပဵၼ်ၵူၼ်းမိူင်းၶဝ်လႆႈၼႆႉ မၼ်းယဝ်ႉတီႈဢိူင်ႇ ၊ မၼ်းဢမ်ႇယဝ်ႉတီႈၸႄႈမိူင်း ဢမ်ႇယဝ်ႉတီႈ မိူင်းႁူမ်ႈတုမ် ။ မၼ်းယဝ်ႉတီႈဝၢၼ်ႈၽႂ်ဝၢၼ်ႈမၼ်း ဢိူင်ႇၽႂ်ဢိူင်ႇမၼ်း၊ ၵူၼ်းတီႈတႂ်ႈမူတ်းမူတ်း ။


မိူၼ်ၼင်ႇပေႃးႁဝ်းယူႇဝၢၼ်ႈႁဝ်း ယူႇဢိူင်ႇႁဝ်းၼၼ်ႉ ၵူၼ်းတၢင်ႇတီႈ ၵူၼ်းၼွၵ်ႈမိူင်းၵေႃႈယဝ်ႉ တေမႃးယူႇမႃးသဝ်းၼၼ်ႉ ပေႃးဝႃႈတီႈဢိူင်ႇၼၼ်ႉႁပ်ႉယဝ်ႉၼႆၵေႃႈ တိုၼ်းလႆႈပဵၼ်ၵူၼ်းမိူင်းၶဝ် ။ ၵွပ်ႈၼႆ မၼ်းဢမ်ႇမိူၼ်မိူင်းႁဝ်း ၊ မိူင်းႁဝ်းၼႆႉ မၼ်းယဝ်ႉတီႈငဝ်ႈၸိုင်ႈ ယဝ်ႉတီႈမိူင်းႁူမ်ႈတုမ်မူတ်းမူတ်း ။ ၵွပ်ႈၼႆ မၼ်းၵႂႃႇၵၼ်ၾႃႉလႄႈလိၼ် ႁဝ်းႁၼ်ထိုင်ၸိူင်ႉၼၼ် ။


(ၶႅၼ်းတေႃႈပႂ်ႉတိတ်းတၢမ်တွၼ်ႈ သပ်းလႅင်းလွင်ႈပၢႆးပၺ်ၺႃ တီႈမိူင်းသဝိတ်ႊသိူဝ်ႊလႅၼ်ႊ)။