မိူင်းသဝိတ်ႊသိူဝ်ႊလႅၼ်ႊၼၼ်ႉ ၵၢၼ်ပၢႆးပၺ်ၺႃလုၵ်ႈဢွၼ်ႇ ဢဝ်ပေႃႈမႄႈတႅပ်းတတ်း။ ၸၢဝ်းၶိူဝ်းမီး 4 ၶိူဝ်းၵေႃႈ ၸႂ်ႉပဵၼ်လိၵ်ႈတၢင်းၵၢၼ်မူတ်း ၊ ဢမ်ႇမိူၼ်မိူင်းႁူမ်ႈတုမ်မၢၼ်ႈ ဢၼ်ဢဝ်လိၵ်ႈမၢၼ်ႈပဵၼ်ယႂ်ႇ ။ ၵဵဝ်ႇၵပ်းလွင်ႈၼႆႉ တၢင်းၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၽူႈၼမ်းၼႂ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၸဝ်ႈပိုၼ်ၶမ်း ဝႆႉၼင်ႇၼႆ ။

(သိုပ်ႇမႃးတွၼ်ႈ 1 ၊ ၶၢဝ်းတၢင်းလဵပ်ႈႁဵၼ်း မိူင်းသဝိတ်ႊသိူဝ်ႊလႅၼ်ႊ ဢၼ်မိူင်းႁဝ်း လီယိူင်ႈႁဵတ်းၸွမ်း)


ထၢမ် - တီႈမိူင်းသဝိတ်ႊသိူဝ်ႊလႅၼ်ႊၼႆႉ ပၢႆးပၺ်ၺႃ သမ်ႉမီးၵၢၼ်ပွင်ၵၢၼ်ၸိူင်ႉႁိုဝ်ၶႃႈ ?။


တွပ်ႇ - ပၢႆးပၺ်ၺႃၼႆႉ ၸွမ်းၼင်ႇလႆႈလဵပ်ႈႁဵၼ်းမႃး ၊ ဢၼ်ၶဝ်ၸူဝ်းၵႂႃႇလဵပ်ႈႁဵၼ်းတူၺ်း တီႈႁူင်းႁဵၼ်းၸိူဝ်းၼႆႉတႄႉ မၼ်းလႆႈဝႃႈၶဝ်ၸၼ်ႉသုင်တႄႉတႄႉယဝ်ႉ ။ ၵွပ်ႈပိူဝ်ႈၶဝ်ပၼ်တႅပ်းတတ်းႁင်းၵူၺ်း ။ မၢင်တီႈ ၸၼ်ႉဢိူင်ႇၵေႃႈ ၶဝ်ပၼ်တႅပ်းတတ်းႁင်းၵူၺ်းဝႃႈ လုၵ်ႈဢွၼ်ႇၼႆႉ တေသွၼ်ၸိူင်ႉႁိုဝ်၊ တၢင်းၼိူဝ်ဢမ်ႇလႆႈတႅပ်းတတ်းပၼ် ။ ယဝ်ႉတီႈဢိူင်ႇ ။


တူဝ်ယၢင်ႇ ၶဝ်မီးၶိူဝ်း 4 ၶိူဝ်း ၊ သီႇၶိူဝ်းၼႆႉ ၵျိူဝ်ႊမၼ်ႊ ၊ ၾရင်ႇသဵတ်ႇ၊ ဢီႊတလီႊ ၊ ရူဝ်ႊမၼ်ႊ ။ 4 ၶိူဝ်းၼႆႉ ပေႃးဝႃႈတီႈဢိူင်ႇၼၼ်ႉ ၶဝ်ဝႃႈႁဝ်းပဵၼ်ၵူၼ်းဢီႊတလီႊလူး၊ လုၵ်ႈႁဝ်းၵေႃႈလူဝ်ႇသွၼ်လိၵ်ႈဢီႊတလီႊၵူၺ်း ၼႆၵေႃႈ ၶဝ်ၵေႃႈႁဵတ်းပၼ်ႁူင်းႁဵၼ်းဢီႊတလီႊ ။ ႁူင်းႁဵၼ်းတႄႉ ပဵၼ်ႁူင်းႁဵၼ်းလင်လဵဝ်ၵူၺ်း ၊ ၵူၺ်းၵႃႈ ႁွင်ႈသွၼ်မၼ်း ပဵၼ်ႁွင်ႈသွၼ်ဢီႊတလီႊ ၊ ၾရင်ႇသဵတ်ႈ ၊ ၵျိူဝ်ႊမၼ်ႊ ၊ ရူဝ်ႊမၼ်ႊၸိူဝ်းၼႆႉ မီးႁင်းၽႂ်ႁင်းမၼ်း ။ ပေႃႈမႄႈၶႂ်ႈႁႂ်ႈလုၵ်ႈလၢင်းသွၼ်ႁဵၼ်းဢီႈသင်ၵေႃႈ မီးတီႈဢိူင်ႇတႅပ်းတတ်းၵူၺ်း ။


ဢမ်ႇမိူၼ်မိူင်းမၢၼ်ႈႁဝ်း (ၸိုင်ႈမိူင်းႁူမ်ႈတုမ်မၢၼ်ႈ) ၊ မိူင်းမၢၼ်ႈႁဝ်းတႄႉ တိုၼ်းတေလႆႈသွၼ်ႁဵၼ်း လိၵ်ႈမၢၼ်ႈၵူၺ်း၊ ပေႃးလိူဝ်သေလိၵ်ႈမၢၼ်ႈ ဢမ်ႇၶဝ်ႈၵၢၼ်လႆႈ။ တီႈၶဝ် (မိူင်းသဝိတ်ႊသိူဝ်ႊလႅၼ်ႊ) သမ်ႉ လိၵ်ႈၶဝ်တင်း 4 ၶိူဝ်းၼၼ်ႉ ၶဝ်ႈၵၢၼ်တင်းမူတ်း ။ ၵွပ်ႈၼႆ ၸၼ်ႉပၺ်ၺႃၶဝ်ၼႆႉ ပေႃးတူၺ်းၸိုင် ဢၼ်ႁဝ်းလႆႈႁူႉမႃးၼႆႉ မိူၼ်ၼင်ႇၸၼ်ႉတႅမ်ႇ / ၸၼ်ႉဢွၼ် / ၸၼ်ႉငဝ်ႈ ၸၼ်ႉၵၢင်ၸိူဝ်းၼႆႉ ဢၼ်ၸႂ်ႉၸေႈတႅမ်ႈ တေႃႇထိုင်ၶွမ်ႊၽိဝ်ႊတိူဝ်ႊၸိူဝ်းၼႆႉ ပေႃးမီးယဝ်ႉ ။ ၶဝ်မႃးသပ်းလႅင်းၼႄတႄႉ ပေႃးထိုင်ၸၼ်ႉၸွမ်ၼႆ ၸေႈဝႃႇ ပပ်ႉဝႃႇၸိူဝ်းၼႆႉ ဢမ်ႇၸႂ်ႉယဝ်ႉ၊ ၶဝ်ၸႂ်ႉၶွမ်ႊမူတ်းယဝ်ႉ ၊ ၸႂ်ႉၶိူင်ႈၸၢၵ်ႈ ဢီႊလဵၵ်ႊထရူဝ်ႊၼိၵ်ႊၵူၺ်း ၊ ၵွပ်ႈပိူဝ်ႈၼၼ် ၸၼ်ႉပၺ်ၺႃၶဝ်ၼႆႉ သုင်တႄႉတႄႉ ။ မိူင်းႁဝ်းၵေႃႈ ၶႂ်ႈႁႂ်ႈပဵၼ်ၸိူင်ႉၼၼ် ၊ ၵူၺ်းမၼ်းဢမ်ႇပဵၼ်လႆႈငၢႆႈငၢႆႈ ။ ဢမ်ႇႁူႉယဝ်ႉ ပေႃးထႅင်ႈ 20 ပီ 50 ပီတႄႉ ၸၢင်ႈပဵၼ်လႆႈယူႇႁိုဝ် ။


ထၢမ် - ပေႃးမႃးထွမ်ႇတူၺ်း မိူင်းသဝိတ်ႊသိူဝ်ႊလႅၼ်ႊၼၼ်ႉ လႆႈဝႃႈမီးလၢႆလၢႆၸၢဝ်းၶိူဝ်း ။ ၼႂ်းၽႃသႃႁဵၼ်းၼၼ်ႉၶႃႈလူး ၊ ပေႃးဝႃႈၵျိူဝ်ႊမၼ်ႊၼႆၵေႃႈ ႁဵၼ်းလိၵ်ႈၵျိူဝ်ႊမၼ်ႊၵူၺ်းၶႃႈႁႃႉ ၊ ႁဵၼ်းလိၵ်ႈတၢင်ႇၽႃသႃယူႇၶႃႈႁႃႉ ပေႃးၵႂႃႇၶိုၼ်ႈႁဵၼ်းၼႆႉ ?။


တွပ်ႇ - မိူၼ်ၸိူင်ႉၼင်ႇဝႃႈၼၼ်ႉယဝ်ႉ ။ မီးတီႈပေႃႈမႄႈၶဝ် ။ ၼႂ်းဢိူင်ႇၶဝ်ၼၼ်ႉ ပေႃးဝႃႈပဵၼ်ၵျိူဝ်ႊမၼ်ႊ ၊ ဢမ်ႇၼၼ်ၾရင်ႇသဵတ်ႈၼႆၵေႃႈ တေႃႇထိုင်ၸၼ်ႉ 3 တေလႆႈသွၼ်ႁဵၼ်းၽႃသႃၶဝ် ။ ၾရင်ႇသဵတ်ႈၵေႃႈ သွၼ်ႁဵၼ်းၾရင်ႇသဵတ်ႈ ၊ ၵျိူဝ်ႊမၼ်ႊၵေႃႈသွၼ်ႁဵၼ်းၽႃသႃၵျိူဝ်ႊမၼ်ႊ ၊ ဢီႊတလီႊၵေႃႈ သွၼ်ႁဵၼ်းၽႃသႃဢီႊတလီႊ ။ ပေႃးထိုင်ၶိုၼ်ႈၸၼ်ႉ 5 မႃးယဝ်ႉ ၶႂ်ႈၶိုၼ်ႈႁဵၼ်းၽႃသႃသင်ၵေႃႈ မီးတီႈပေႃႈမႄႈထႅင်ႈၵမ်းၼိုင်ႈ ။ မီး 4 ၶိူဝ်းၼႆႉ ၼိုင်ႈၶိူဝ်းႁႂ်ႈလႆႈဝႆႉ 2 ၽႃသႃ ။ ပေႃးပူၼ်ႉၸၼ်ႉ 3 ယဝ်ႉ ၶႂ်ႈႁဵၼ်းလိၵ်ႈၽႃသႃသင်ထႅင်ႈၵေႃႈ မီးတီႈပေႃႈမႄႈၶဝ်တႅပ်းတတ်း ၊ ၵွပ်ႈဝႃႈ ဢႃယုၶဝ်ပႆႇထိုင် 18 ။ ပေႃးဢႃယုၶဝ်ထိုင် 18 ယဝ်ႉတႄႉ ၶဝ်တေတႅပ်းတတ်းၵူၺ်းၶဝ် ၼႆယဝ်ႉ ။


(ၶႅၼ်းတေႃႈပႂ်ႉတိတ်းတၢမ်တွၼ်ႈ 3 မိူင်းသဝိတ်ႊသိူဝ်ႊလႅၼ်ႊ မီး 4 ၸၢဝ်းၶိူဝ်း၊ ႁဵတ်းႁိုဝ်ၽွင်းငမ်း လႄႈ ယူႇလူၺ်ႈၵၼ်ၵတ်းၵတ်းယဵၼ်ယဵၼ် ) ။