ဢိင်ၼိူဝ် တပ်ႉသိုၵ်းၸိုင်ႈတႆး (RCSS/SSA) တင်း သိုၵ်းတဢၢင်း (TNLA) ပဵၼ်ပၢင်တိုၵ်းၵၼ်မႃး ၶိူဝ်း ၶိူဝ်းယႂ်းယႂ်း ၊ ၶၢဝ်းတၢင်း 2 လိူၼ်ပၢႆ ။ ၵူၼ်းမိူင်းၼႂ်းပိုၼ်ႉတီႈၼပ်ႉႁဵင် ႁူပ်ႉတၢင်းယၢပ်ႇၽိုတ်ႇယွၼ်ႉ ၽေးသိုၵ်း ။  ၵဵဝ်ႇၵပ်းလွင်ႈၼႆႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႆႈ ပိုၼ်ၽၢဝ်ႇဝႃႈ ၼႆႉၸၢင်ႈပဵၼ်လွင်ႈ ယူပ်ႈယွမ်းတႃႇလွင်ႈၽွမ်ႉႁူမ်ႈၸၢဝ်းၶိူဝ်းလႄႈ လွင်ႈၸမ်ၸႂ် ၸိူဝ်ႉ ၸၢတ်ႈဝႃႈၼႆ ။

ၵဵဝ်ႇလူၺ်ႈငဝ်းလၢႆး ပၢင်တိုၵ်းလႄႈၵူၼ်းမိူင်းၼႆႉသေ ဝၼ်းတီႈ 12/02/2016 ( မိူဝ်ႈဝႃး ) ၸုမ်းပွင် ၵၢၼ် ငဝ်ႈငုၼ်းပႃႇတီႇ မႂ်ႇသုင် ၸိုင်ႈ တႆး ၊ တပ်ႉသိုၵ်းၸိုင်ႈတႆး SSPP/SSA ဢွၵ်ႇလိၵ်ႈပိုၼ်ၽၢဝ်ႇ ၽိုၼ် ၼိုင်ႈ ပႃး 4 ၶေႃႈ ။


ၼႂ်းၶေႃႈပိုၼ်ၽၢဝ်ႇလၢတ်ႈဝႃႈ - 1 ) တင်ႈတႄႇ မိူဝ်ႈဝၼ်းထီႉ 27-11-2015  တေႃႇထိုင်ဝၼ်းမိူဝ်ႈၼႆႉ   ၶွင်ႇသီႇ ဢဝ်ၶိုၼ်းၸိုင်ႈတႆး (RCSS/SSA) လႄႈတႅဝ်းႁူမ်ႈပူတ်းပွႆႇၸႄႈမိူင်းပလွင်ႈ လႆႈပဵၼ်ပၢင်တိုၵ်း ၵၼ် ဢမ်ႇထၢတ်ႇ ဢမ်ႇဝၢႆး ။  ၵေႃႉသိုၵ်းၵေႃႉႁၢၼ် တင်းသွင်ၾၢႆႇ  တူၵ်းသုမ်းမၢတ်ႇၸဵပ်းမႃးတင်းၼမ် ။ ၵူၼ်းမိူင်း ၼပ်ႉႁူဝ်ႁဵင် လႆႈပိုၼ်ႉပွႆႇပႅတ်ႈႁိူၼ်းယေး ပၢႆႈမႅပ်းသေႃႉသွၼ်ႈဝႆႉ ။ လွင်ႈၼႆႉ ပႃႇတီႇမႂ်ႇသုင် ၸိုင်ႈတႆး  (SSPP/SSA) ငိၼ်း ၸႂ်ဢမ်ႇလီ ပဵၼ်ဢၼ်မႆႈၸႂ်ၸွမ်းတႄႉ တႄႉ ။


2) ပႃႇတီႇမႂ်ႇသုင်ၸိုင်ႈတႆး (SSPP/SSA) ၼႆႉ  ယိပ်းၵမ်ဝႆႉမူႇပိူင် ဢၼ်ဝႃႈ တေဢဝ်လွၵ်းလၢႆး ၵၢၼ်ပၢႆး မိူင်းသေ ၵႄႈၶႆ ပၼ်ႁႃၵၢၼ်မိူင်း ။ လွၵ်းလၢႆးဢၼ်ၸႂ်ႉတိုဝ်းဢဵၼ်ႁႅင်း ၵွင်ႈၵၢင်ႇသေ ၵေႈၶႆပၼ်ႁႃၼၼ်ႉ တိုၼ်းဝႃႈ ဢမ်ႇၵမ်ႉထႅမ် ။ ယွၼ်ႉပိူဝ်ႈတၢင်းသွင်ၾၢႆႇ ယိပ်းၵွင်ႈသေၵႄႈၶႆပၼ်ႁႃၵၼ်မႃးလႄႈ ႁဵတ်းႁႂ်ႈ ၵူၼ်းမိူင်း တုၵ်ႉၶ ၊ ၸၢင်ႈတုမ်ႉတိူဝ်ႉပႃး လွင်ႈၽွမ်ႉႁူမ်ႈၸိူဝ်ႉၸၢတ်ႈလႄႈ လွင်ႈၸမ်ၸႂ်ၸၢဝ်းၶိူဝ်း ။

 
3) ယိူင်းၸူးတေႃႇလွင်ႈၽွမ်ႉႁူမ်ႈၶွတ်ႇလိူတ်ႈၸၢဝ်းၶိူဝ်းသေ ၼင်ႇႁိုဝ်လွင်ႈၶဵင်ႈၶႅင် ၼႂ်းၵႄႈၵၢင် သွင်ၾၢႆႇ  တေ လူတ်း ယွမ်းၼၼ်ႉ SSPP/SSA တိုၵ်းသူၼ်း RCSS/SSA လႄႈ PSLF/TNLA  ႁႂ်ႈပွႆႇၽူႈတၢင်တူဝ်ယူႇၵႄႈ ၵၢင်  ႁူပ်ႉဢုပ်ႇဢူဝ်း ၵၼ်ဝႆးဝႆး ။


4) ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး တုၵ်းယွၼ်းထိုင် တင်းသွင်ၾၢႆႇ ၼၵ်းၼၵ်းၼႃၼႃဝႃႈၼင်ႇႁိုဝ် လွင်ႈ ၶဵင်ႈ ၶႅင် တေဢမ်ႇသိုပ်ႇယႂ်ႇယိုတ်းၵႂၢင်ႈၶႂၢင် ၊ ၼင်ႇႁိုဝ်ၵူၼ်းမိူင်းပေႃး တေမီးလွင်ႈ ႁူမ်ႈလူမ်ႈၼၼ်ႉ ႁႂ်ႈဢဝ် လွၵ်းလၢႆးႁူပ်ႉ ထူပ်းငူပ်ႉငီႉဢုပ်ႇဢူဝ်းၵၼ် သေ ၵႄႈၶႆပၼ်ႁႃၵႂႃႇ ။


ပႃႇတီႇမႂ်ႇသုင်ၸိုင်ႈတႆး ၊ တပ်ႉသိုၵ်းၸိုင်ႈတႆးၼႆႉ ၵေႃႇတင်ႈမႃးမိူဝ်ႈပီ 1971 သေ လႆႈလူင်းလၢႆးမိုဝ်း ၵိုတ်းတိုၵ်း ၸၼ်ႉၸိုင်ႈမိူင်းႁူမ်ႈတုမ် ၸွမ်းၸုမ်းလူင်ပွင်ၸိုင်ႈၶဝ် မိူဝ်ႈပီ 2012 လိူၼ်  January ဝၼ်းထီႉ 28 ။


မိူဝ်ႈႁၢင်ပီ 2015 ပူၼ်ႉမႃးၼႆႉ ၺႃးသိုၵ်းမၢၼ်ႈႁႅၼ်းသိုၵ်းလေႃႇတိုၵ်းႁၢဝ်ႈႁႅင်း ။ ၵူၼ်းမိူင်းလႆႈပၢႆႈၽေး သိုၵ်း ၼပ်ႉႁူဝ်မိုၼ်ႇ။ ဝၢႆးလင်  SSPP ဢုပ်ႇဢူဝ်းၵၼ်တၢင်း တပ်ႉသိုၵ်းမၢၼ်ႈယဝ်ႉ ၵူၼ်းမိူင်းၸင်ႇၸၢင်ႈပွၵ်ႈၶိုၼ်း ႁိူၼ်းယေးတီႈယူႇ ။