ၵေႃႁူမ်ႈသၢင်ႈၵူၼ်းၼုမ်ႇတႆး လၢႆၸႄႈဝဵင်း ႁူမ်ႈၵၼ်ၸတ်းႁဵတ်း ပၢင်ဢုပ်ႇၶႆႈ လိၵ်ႈလၢႆးပၢႆးႁၼ် ၼႂ်းဝၼ်းၸိူဝ်ႉၸၢတ်ႈၸိုင်ႈတႆး၊ မီးၵူၼ်းၼုမ်ႇမႃးၶဝ်ႈႁူမ်ႈ 600 ပၢႆ ။

ဝၼ်းတီႈ 08/02/2016 ၶၢဝ်းယၢမ်း 09:00-12:00 မူင်း ၸုမ်းၵူၼ်းၼုမ်ႇ ၵေႃႁူမ်ႈသၢင်ႈ ၵူၼ်းၼုမ်ႇတႆး (Tai Youth Network) ဢွၼ်ႁူဝ်ၸတ်းႁဵတ်းပၢင်ဢုပ်ႇၶႆႈ လိၵ်ႈလၢႆးပၢႆးႁၼ် တီႈဝတ်ႉၵၢင် /ၵျွင်းၵၢင် ၸႄႈဝဵင်းၼမ်ႉလၼ်ႈ ၸိုင်ႈတႆး ပွတ်းႁွင်ႇ။ မီးၽူႈလူင်ႉလႅၼ်ႇ ၸဝ်ႈပၢႆးပိုၼ်း ၊ ၵၢၼ်မိူင်း ၊ ပၢႆးႁၢင်ႈလူၼ်ႉ လၢႆလၢႆၸဝ်ႈ ၶဝ်ႈႁူမ်ႈ မွၵ်ႇလၢတ်ႈၶေႃႈၵႂၢမ်း ၊ ၼင်ႇႁိုဝ် ပေႃးတေပဵၼ်တီႈမၢႆတွင်း ၼႂ်းဝၼ်းၸိူဝ်ႉၸၢတ်ႈၸိုင်ႈတႆး - ၼႆယဝ်ႉ ။


မႄႈၶူးၶိူဝ်းသႅၼ် ၽူႈလူင်ႉလႅၼ်ႇ ၸဝ်ႈပၢႆးပိုၼ်း လၢတ်ႈဝႃႈ - တႃႇဝၢၼ်ႈမိူင်းႁဝ်း တေၸုၵ်းမၼ်ႈ ၊ မၼ်ႈၵိုမ်း ၊ တေလီၵႂႃႇမိူဝ်းၼႃႈၼၼ်ႉ ႁဝ်းယင်းထုၵ်ႇလႆႈမီး ၽူႈဢွၼ်ႁူဝ်လီထႅင်ႈၵွၼ်ႇ။ ထႅင်ႈပိူင်ၼိုင်ႈၵေႃႈ ယႃႇထဵင်ၵၼ် ၵွပ်ႈၵၢၼ်မိူင်း ဢၼ်ၸဝ်ႈၵဝ်ႇ ဢမ်ႇႁူႉၸွမ်း။ ယဝ်ႉၵေႃႈ တႃႇၶိုၼ်ႈယႂ်ႇၼၼ်ႉ ပုၼ်ႈၽွၼ်းမီးၼိူဝ် ၵူၼ်းၼုမ်ႇ ။ ဝၼ်းမိူဝ်ႈၼႆႉ ထုၵ်ႇလႆႈၽွမ်ႉၵၼ် ၸွႆႈၵၼ်ၵႅတ်ႇၶႄပႂ်ႉပႃး ၾိင်ႈထုင်း၊ ၸိူဝ်းၸၢတ်ႈႁဝ်း - ဝႃႈၼႆ ။


ၼၢင်းသႅင်လၢဝ် ၽူႈဢွၼ်ႁူဝ် ၵေႃႁူမ်ႈသၢင်ႈၵူၼ်းၼုမ်ႇတႆး ဝဵင်းၼမ်ႉလၼ်ႈ လၢတ်ႈဝႃႈ - ပၢင်ဢုပ်ႇၶႆႈၼႆႉ ႁဝ်းလႆႈၸတ်းႁဵတ်းၼႂ်းဝၼ်းတီႈ 8 ယွၼ်ႉဝႃႈ ဝၼ်းတီႈ 7 ၼၼ်ႉ ႁဝ်းၶႃႈၵူၼ်းၼုမ်ႇ သမ်ႉတေလႆႈၵႂႃႇၶိုၼ်ႈလွႆၸၢင်ႉ (ႁႆးပၼ်ႇ) ၸႄႈဝဵင်းၼမ်ႉလၼ်ႈ ၼႆလႄႈ ႁဝ်းၶႃႈၸင်ႇလႆႈၸတ်းႁဵတ်း လင်ဝၼ်းတီႈ 7 ၊ ဢၼ်ႁဝ်းၶႃႈၸတ်းႁဵတ်းပၢင်ဢုပ်ႇၶႆႈၼႆႉ ၼင်ႇႁိုဝ် ႁႂ်ႈပဵၼ်တီႈမၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆးႁဝ်း ၊ ႁႂ်ႈၵူၼ်းၼုမ်ႇႁဝ်းၽွမ်ႉႁူမ်ႈၵၼ် - ဝႃႈၼႆ ။


ပၢင်ဢုပ်ႇၶႆႈၼႆႉ မီးၽူႈဢုပ်ႇၶႆႈလၢတ်ႈၼႄ မိူၼ်ၼင်ႇ ၽူႈလူင်ႉလႅၼ်ႇတႅမ်ႈႁၢင်ႈလူၼ်ႉ လၢႆးသႂ်တႆး ၊ ၽူႈလူင်ႉလႅၼ်ႇပၢႆးပိုၼ်း မႄႈၶူးၶိူဝ်းသႅၼ်လႄႈ ၽူႈတႅမ်ႈႁၢင်ႈလူၼ်ႉ ၼႂ်းၸုမ်းၵူၼ်းၼုမ်ႇ ၸၢႆးၶိူဝ်းလၢဝ်ဢွၼ်ႇ ၸဵမ်ၸိူဝ်းၼႆႉ ။ ႁူဝ်ၶေႃႈ ပၢင်ဢုပ်ႇၶႆႈ လိၵ်ႈလၢႆးပၢႆးႁၼ် မီးလွင်ႈပၢႆးပိုၼ်း ၊ လွင်ႈတႅမ်ႈႁၢင်ႈလူၼ်ႉ ၊ လွင်ႈငဝ်းလၢႆးၵၢၼ်းမိူင်း ၊ လွင်ႈလိၵ်ႈလၢႆးပၢႆးႁၼ် ၼႆယဝ်ႉ ။


ၵူၼ်းၼုမ်ႇဢၼ်မႃးၶဝ်ႈႁူမ်ႈ ပၢင်ဢုပ်ႇၶႆႈ မီးၵူၼ်းၼုမ်ႇႁူဝ်ပၢင်ႇ ၊ ထုင်ႉမၢဝ်း ၊ ၸႄႈလၢၼ်ႉ ၊ ၵူတ်ႉၶၢႆ ၊ မိူင်းၸီး ၊ သႅၼ်ဝီ ၊ လႃႈသဵဝ်ႈ ၊ ၵျွၵ်းမႄး ၊ ဝၢၼ်ႈၸၢမ် ၊ ပၢင်လူင် ၊ ၼမ်ႉတူး ၊ မိူင်းယႆ ၊ တၢင်ႉယၢၼ်း ၊ မိူင်းၵိုင် ၊ မိူင်းၵၢဝ် ၊ မိူင်းပၢတ်ႇ ၊ ဝၢၼ်ႈႁႆး ၊ တူၼ်ႈတီး ၊ သီႇသႅင်ႇ ၊ ၵျွၵ်ႉၵူႇ ၊ မိူင်းပဵင်း ၊ ၵဵင်းတုင် ၊ ၼွင်ပူး ၊ ၼမ်ႉလၼ်ႈ ၊ ၼွင်ၵေႃႈ ၊ သႅင်ၵႅဝ်ႈ ၊ သီႇထွၵ်ႈ ၊ ၼႃးမၢၵ်ႇၶေႃ ၊ ဝၢၼ်ႈၸိင်း ၊ ဝၢၼ်ႈလီး ၊ မိူင်းၶိူဝ်း ၊ ပၢင်ၼဵဝ်ႉ ၸဵမ်ၸိူဝ်းၼႆႉ ။ မၢင်ဝဵင်းမႃးတူၵ်းလိုၼ်းသေ ဢမ်ႇလႆႈၶဝ်ႈပႃးၼႂ်းသဵၼ်ႈမၢႆၵေႃႈမီး ၊ ၵူၼ်းၼုမ်ႇမႃးၶဝ်ႈႁူမ်ႈ 600 ပၢႆ - ၼႆယဝ်ႉ ။