ၵူၼ်းဝၢၼ်ႈၸၢင်ႉႁၢၼ် ဢိူင်ႇမိူင်းလင်း ဢမ်ႇယွမ်းပၼ်တီႈလိၼ် ဢၼ်ၵူၼ်းၶၢႆတင်းၸဝ်ႈငိုၼ်းတိုၼ်းၶဝ် လွမ်သိုဝ်ႉၶၢႆၵၼ် ၊ ယွၼ်ႉဝႃႈဢမ်ႇႁူႉႁၼ်ၸွမ်း လွင်ႈသိုဝ်ႉၶၢႆၵၼ်တၢင်းၼွၵ်ႈလႄႈ ၵူၼ်းၶၢႆတီႈလိၼ်ၵေႃႈ ဢမ်ႇၸႂ်ႈၵူၼ်းဝၢၼ်ႈၸၢင်ႉႁၢၼ် ။

ဝၢၼ်ႈၸၢင်ႉႁၢၼ်ၼႆႉ မီးၼႂ်းဢိူင်ႇမိူင်းလင်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ ၵဵဝ်ႇၵပ်းလွင်ႈၼႆႉ ၵႃႈပူၼ်ႉမႃး ယွၼ်ႉဝႃႈမီးၵူၼ်းဝၢၼ်ႈ ဢၼ်ဢမ်ႇၵိၼ်ဢမ်ႇထၢမ်း ၼႂ်းဝၢၼ်ႈၸၢင်ႉႁၢၼ် ၊ ပဵၼ်ၵူၼ်းပိုင်ႈ ႁဵတ်းၵိၼ်ၵၢၼ် တီႈဝၢၼ်ႈၸၢင်ႉႁၢၼ်ၵူၺ်းသေ လၵ်ႉလွမ်ၶၢႆတီႈလိၼ် ၼပ်ႉႁူဝ်သိပ်းတိုင်ႇ ပၼ်ၸဝ်ႈငိုၼ်းတိုၼ်းၶဝ် - ၼႆယဝ်ႉ ။


ၵူၼ်းဝၢၼ်ႈၸၢင်ႉႁၢၼ် ၵေႃႉၼိုင်ႈလၢတ်ႈဝႃႈ - မိူဝ်ႈၶဝ်သိုဝ်ႉၶၢႆၵၼ် ႁဝ်းၶႃႈဢမ်ႇလႆႈႁူႉၸွမ်းသင် ။ ဝၢႆးမႃး မိူဝ်ႈဝၼ်းတီႈ 18/09/2015 ၼၼ်ႉ ၵူၼ်းလူင်ဝၢၼ်ႈၸၢင်ႉႁၢၼ် ၸင်ႇႁွင်ႉထၢမ်လုင်းၵမ်ႇ ယူႇဝၢၼ်ႈသီႇသုင်ႇ ၵေႃႉဢၼ်ႁဵတ်းၶဵဝ်ၶၢႆပၼ်တီႈလိၼ် ၊ ၵေႃႉဢၼ်ၶၢႆတီႈလိၼ်ၼၼ်ႉ လႆႈႁူႉဝႃႈပဵၼ် လုင်းလႃႉၵျေႃႇ ပႃးၵဵင်း ။ ၵေႃႉလူင်းလၢႆးမိုဝ်းပၼ်သမ်ႉ ပဵၼ်ၽူႈၵွၼ်းဢိူင်ႇမိူင်းလင်း လုင်းဢွင်ႇၶိၼ်ႇ၊ ၵႃႈလူင်းလၢႆးမိုဝ်း ဢဝ် 50 သႅၼ် ။ ၵေႃႉသိုဝ်ႉပဵၼ် ပႃႈသႅင်ၶမ်း ၵူၼ်းၼႂ်းၸုမ်း ပႃႊတီႊသိူဝ်ၽိူၵ်ႇ ၊ ယူႇဝဵင်းလႃႈသဵဝ်ႈ- ၵူၼ်းဝၢၼ်ႈၸၢင်ႉႁၢၼ် ၵေႃႉၼိုင်ႈလၢတ်ႈ ။


လိူဝ်သေၼၼ်ႉ ပူၼ်ႉမႃးမိူဝ်ႈဝၼ်းတီႈ 20/09/2015 ၼၼ်ႉၵေႃႈ လႆႈႁွင်ႉဢဝ်ၵေႃႉပဵၼ်လုင်းထုၼ်းဢွင်ႇ ယူႇဝၢၼ်ႈၶူၵ်ႉၸၢၵ်ႈ တူင်ႇဝဵင်းသီႇပေႃႉ ဢိူင်ႇၵုင်းသႃႇ ၊ ၵေႃႉဢၼ်လၵ်ႉၶၢႆၼင်လိၼ် ပၢင်ၸလွပ်ႈ ဢၼ်မီးၼႂ်းပိုၼ်ႉတီႈ ဝၢၼ်ႈၸၢင်ႉႁၢၼ် ။ တီႈလိၼ်ၼႆႉၵေႃႈ ၶၢႆပၼ်ပႃႈသႅင်ၶမ်း ဢၼ်ပဵၼ်ၵူၼ်းၼႂ်းပႃႊတီႊသိူဝ်ၽိူၵ်ႇ ဝဵင်းလႃႈသဵဝ်ႈ ၵူၺ်းၼင်ႇၵဝ်ႇ ။ ၵေႃႉလူင်းလၢႆးမိုဝ်းပၼ်ၵေႃႈပဵၼ် ၽူႈၵွၼ်းဢိူင်ႇမိူင်းလင်း လုင်းဢွင်ႇၶိၼ်ႇၼင်ႇၵဝ်ႇ ၊ ၵႃႈလူင်းလၢႆးမိုဝ်း မၼ်းဢဝ် 20 သႅၼ် - ၼႆယဝ်ႉ ။


လွင်ႈၸိူဝ်းၼႆႉ ၵူၼ်းဝၢၼ်ႈၸၢင်ႉႁၢၼ် ဢမ်ႇလႆႈႁူႉႁၼ်ၸွမ်း၊ လွင်ႈငိုၼ်းၼႃႈဝၢၼ်ႈၵေႃႈ ၶဝ်ဢမ်ႇၸွႆႈထႅမ်သင် ။ ၵဵဝ်ႇၵပ်းလူၺ်ႈလွင်ႈ ၼင်လိၼ်ၸိူဝ်းၼႆႉသေ ၵူၼ်း ဝၢၼ်ႈၸၢင်ႉႁၢၼ်ၶဝ်ဢမ်ႇၶႂ်ႈလႆႈငိုၼ်းသင် ၊ ၶႂ်ႈလႆႈၶိုၼ်းၼင်လိၼ်ၸိူဝ်း ဢၼ်လၵ်ႉလွမ်ၶၢႆၵႂႃႇပၼ်ၵၼ် ၸိူဝ်းၼၼ်ႉၵူၺ်း - ၼႆယဝ်ႉ ။


ၵူၼ်းဝၢၼ်ႈလၢတ်ႈဝႃႈ - လွင်ႈၼင်လိၼ်ၸိူဝ်းၼႆႉ ပဵၼ်ဝႆႉၼင်လိၼ် ၼႂ်းပိုၼ်ႉတီႈဝၢၼ်ႈၸၢင်ႉႁၢၼ် ၊ ၵေႃႉၶၢႆဢမ်ႇၸႂ်ႈၵူၼ်း ဝၢၼ်ႈၸၢင်ႉႁၢၼ်သေၵေႃႉ ။ ၵေႃႉလူင်းလၢႆးမိုဝ်းၵေႃႈ ဢမ်ႇၸႂ်ႈၵူၼ်း ဝၢၼ်ႈၸၢင်ႉႁၢၼ် ။ ၵေႃႉၶၢႆၼင်လိၼ်တီႈပၢင်ၸလွပ်ႈသမ်ႉ ပဵၼ်လုင်းထုၼ်းဢွင်ႇ ယူႇဝၢၼ်ႈၶူၵ်ႉၸၢၵ်ႈ ဢိူင်ႇၵုင်းသႃႇ ။ ၵေႃႉၶၢႆၼင်လိၼ် တီႈၼမ်ႉမႆႈတွင်းသမ်ႉ ပဵၼ်လုင်းလႃႉၵျေႃႇ ပႃႈၵဵင်း - ဝႃႈၼႆ ။


ၼင်လိၼ်ၸိူဝ်းဢၼ်ၶဝ်ၶၢႆပၼ် ပႃႈသႅင်ၶမ်း လႃႈသဵဝ်ႈၼႆႉ ပဵၼ်ၼင်လိၼ်ဢၼ်တိတ်းၸပ်းဝႆႉ တၢင်းၵႃးလူင် သဵၼ်ႈတၢင်းမိူင်းႁူမ်ႈတုမ် ဢၼ်လုၵ်ႉတၢင်းမူႇၸေႈ-လႃႈသဵဝ်ႈ လူင်းၽႅဝ်ၼေႇပျီႇတေႃႇ - တႃႈၵုင်ႈ - ၼႆယဝ်ႉ ။


ၵဵဝ်ႇၵပ်းလွင်ႈၼင်လိၼ်ၸိူဝ်းၼႆႉ ၵူၼ်းဝၢၼ်ႈၸၢင်ႉႁၢၼ် ၶဝ်လၢတ်ႈဝႃႈ - ႁဝ်းၶႃႈဢမ်ႇၶႂ်ႈလႆႈငိုၼ်းတွင်းသင် ၊ ႁဝ်းၶႃႈၶႂ်ႈလႆႈၶိုၼ်းၼင်လိၼ်ၸိူဝ်းၼၼ်ႉၵူၺ်း ။ ယွၼ်ႉပိူဝ်ႈမိူဝ်ႈၶဝ်သိုဝ်ႉၶၢႆၵၼ်ၵေႃႈ ႁဝ်းၶႃႈဢမ်ႇလႆႈႁူႉၸွမ်းသင် ။ ဝၢႆးလင်ၶဝ်ၶၢႆယဝ်ႉ ႁဝ်းၶႃႈၸင်ႇလႆႈႁူႉၵူၺ်း ။ မိူဝ်ႈလဵဝ်ပိူၼ်ႈပေႃးမႃးတီႇယူႇယဝ်ႉ ၊ လွင်ႈၼႆႉ ၶႂ်ႈတုၵ်းယွၼ်းထိုင် ၸုမ်းပႃႊတီႊလႂ်ပႃႊတီႊၼိုင်ႈ ဢမ်ႇၼၼ် ၸုမ်းယိပ်းၵွင်ႈၵၢင်ႇလႂ်သေၸုမ်းၸုမ်း ႁႂ်ႈမႃးၵႄႈလိတ်ႈပၼ် ၊ ႁႂ်ႈလႆႈၶိုၼ်းတီႈလိၼ်သေၵမ်း - ဝႃႈၼႆ ။