ပၢင်ၵုမ်သၽႃးၸႄႈမိူင်း ၵမ်းတီႈ 2 ၊ ဝၼ်းထူၼ်ႈ 2 တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း မိူဝ်ႈၼႆႉ တေဢုပ်ႇဢူဝ်းၵၼ် ၵဵဝ်ႇၵပ်းလွင်ႈဢၼ်ပဵၼ်ပၢင်တိုၵ်း ဝူင်ႈၵၢင် RCSS/SSA တင်း PSLF/TNLA ။

ၽွင်းတႅၼ်းသၽႃးဝဵင်းၵျွၵ်ႉမႄး ဢူးထုၼ်းၺၢၼ်ႇ

ပၢင်ၵုမ်သၽႃးၸႄႈမိူင်း ၵမ်းတီႈ 2 ဢၼ်ၸတ်းႁဵတ်းတီႈဝဵင်းလူင်တူၼ်ႈတီး ၊ ဢၼ်တႄႇၸတ်းႁဵတ်းမႃး မိူဝ်ႈဝၼ်းတီႈ 25/02/2016 (မိူဝ်ႈဝႃး) ၼႆႉဝၼ်းတီႈ 26/02/2016 (မိူဝ်ႈၼႆႉ) တေဢုပ်ႇၵုမ်ၵၼ် ၸွမ်းၼင်ႇဢၼ် ၽွင်းတႅၼ်းသၽႃးၵျွၵ်ႉမႄး ဢူးထုၼ်းၺၢၼ်ႇ လႆႈတၢင်ႇလၢတ်ႈဝႆႉၼႂ်းပၢင်ၵုမ် တႃႇႁႂ်ႈဢဝ်ဢုပ်ႇဢူဝ်းၵၼ် ၵဵဝ်ႇလူၺ်ႈပၢင်တိုၵ်းဝူင်ႈၵၢင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႄႈ တႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA)- ၼႆယဝ်ႉ ။


ပိူဝ်ႈတႃႇဢုပ်ႇဢူဝ်းၵၼ်ၵဵဝ်ႇၵပ်းလွင်ႈၼႆႉ ၽွင်းတႅၼ်းသၽႃးၵျွၵ်ႉမႄး ဢူးထုၼ်းၺၢၼ်ႇ လႆႈတၢင်ႇလၢတ်ႈသေ ၼၢင်းၸၢၼ်းၸၢၼ်းဢေး ၽွင်းတႅၼ်းသၽႃးၸႄႈဝဵင်းသီႇပေႃႉ ၵေႃႈၵမ်ႉထႅမ် ၊ ၾၢႆႇသၽႃးၵေႃႈႁပ်ႉႁွင်း မၵ်းမၼ်ႈ ၊ ၸင်ႇတေၼမ်းဢဝ်ဢုပ်ႇဢူဝ်းၵၼ် ဝၼ်းသုၵ်းတီႈ 26/02/2016 မိူဝ်ႈၼႆႉ - ၼႆယဝ်ႉ ။


ၸၢႆးထုၼ်းၺၢၼ်ႇ လႆႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ - ပိုၼ်ႉတီႈဢၼ်ပဵၼ်ပၢင်တိုၵ်း သိုၵ်းသိူဝ်ၵၼ်ၼၼ်ႉ မီးတပ်ႉသိုၵ်းလူင်ပွင်ၸိုင်ႈ၊ တပ်ႉသိုၵ်းတႆး RCSS/SSA ၊ တပ်ႉသိုၵ်းတဢၢင်း TNLA ၊ တပ်ႉသိုၵ်းၶၢင် KIA ၸိူဝ်းၼႆႉတူင်ႉၼိုင်ဝႆႉယူႇ ။ ၵွပ်ႈၼၼ် တၢင်းၽိတ်းၼႆႉ ပဵၼ်ၸုမ်းလႂ်ၼႆၵေႃႈ ဢမ်ႇၶႂ်ႈလၢတ်ႈတႅတ်ႈတႅတ်ႈ တေႃးတေႃး ။ ၵူၺ်းၵႃႈ ပေႃးဝႃႈပဵၼ်ပၢင်တိုၵ်းသိုၵ်းသိူဝ်ၵၼ်မႃးၼႆၵေႃႈ ၶဝ်ၵေႃႈဢဝ်ၵူၼ်းမိူင်းႁဵတ်းႁူဝ်ႉလဵၵ်း (ၶမ်းတၢႆတၢင်) သေ ၶဝ်ပေႉၵိၼ်ၵူၼ်းမိူင်း ၊ ဢဝ်ၵူၼ်းမိူင်းတၢႆ ၊ ဢဝ်ၾႆးၽဝ်ႁိူၼ်းယေးၵူၼ်းမိူင်း ၊ ၸူၼ်ႁိမ်ဢဝ်ၶူဝ်းၶွင်ၵူၼ်းမိူင်း ။ လွင်ႈၸိူဝ်းၼႆႉ မၼ်းဢမ်ႇၶူပ်းမႅၼ်ႈၵၼ်တင်း ပိူင်ပိုင်းမၢႆမီႈဝၢၼ်ႈမိူင်း ၊ ယွၼ်ႉပိူဝ်ႈၼႆလႄႈ ႁဝ်းၶႃႈယူႇတီႈၸုမ်း သၽႃးၸႄႈမိူင်းတႆးသေ ဢွၼ်ၵၼ်သၢၼ်ၶတ်း၊ ၶႃႈႁဝ်းၵေႃႈလႆႈဢဝ်လွင်ႈၼႆႉ တၢင်ႇလၢတ်ႈၼႄၼႂ်းသၽႃး ႁႂ်ႈလႆႈဢုပ်ႇဢူဝ်းၵၼ် - ၼႆယဝ်ႉ ။


ယၢမ်းလဵဝ် တီႈၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ မီးဝႆႉပၢင်သဝ်းၵူၼ်းပၢႆႈၽေး 19 တီႈ ။ (မိူဝ်ႈၼႆႉမီး 20 တီႈ) ၊ ဝၢၼ်ႈဢၼ်တုမ်ႉတိူဝ်ႉယွၼ်ႉၽေးသိုၵ်း မီး 50 ဝၢၼ်ႈပၢႆ ၊ ၵူၼ်းပၢႆႈၽေးသိုၵ်းမီး 4 ႁဵင်ပၢႆ ။ ဢိူင်ႇဢၼ်မီးလွင်ႈတုမ်ႉတိူဝ်ႉၼမ်သုတ်း ပဵၼ်ဢိူင်ႇမင်းၵုင်း ၊ ဢိူင်ႇတေႃႉသၢင်ႇ ၊ ဢိူင်ႇၺွင်ႇမွင်း ၊ ဢိူင်ႇပၢင်ၸၢမ် ၸိူဝ်းၼႆႉ ။ လွင်ႈၼႆႉ ဢူးထုၼ်းၺၢၼ်ႇ လႆႈတၢင်ႇလၢတ်ႈတိုၵ်းသူၼ်းဝႆႉ တီႈၸုမ်းလူင်ပွင်ၸိုင်ႈမိူင်းတႆးဝႃႈ ႁႂ်ႈၵႂႃႇၸွႆႈထႅမ်ပၼ်တဵမ်တဵမ်ထူၼ်ႈထူၼ်ႈ - ၼႆယဝ်ႉ ။