ၽူႈတၢင်တူဝ်ငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး (SSPP) လူင်းပိုၼ်ႉတီႈ ႁူပ်ႉထူပ်းၸွႆႈထႅမ်ၵူၼ်းမိူင်း ထူပ်းၽေးသိုၵ်း ၼႂ်းၸႄႈဝဵင်းၵျွၵ်ႉမႄး ၊ ၸွႆႈထႅမ်ငိုၼ်းတွင်း ။ ႁဵတ်းပၢင်သပ်းလႅင်း တီႈၵူၼ်းမိူင်းလႄႈသင်ၶ ၵဵဝ်ႇၵပ်းလွင်ႈဝႆႉၼမ်ႉၸႂ်ၼိူဝ် ဢၼ်ပဵၼ်ပၢင်တိုၵ်း ဝူင်ႈၵၢင် RCSS/SSA လႄႈ PSLF/TNLA ။

ၽူႈတၢင်တူဝ် ငဝ်ႈငုၼ်းပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၸဝ်ႈႁၢၼ်ၸၢႆးသူႉ လူင်းပိုၼ်ႉတီႈ ႁူပ်ႉထူပ်းၸွႆႈထႅမ်ပေႃႈမႄႈၵူၼ်းမိူင်း ၸိူဝ်းထူပ်းၽေးသိုၵ်း ယွၼ်ႉပၢင်တိုၵ်းၼႂ်းဝူင်ႈၵၢင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း တႅဝ်းႁူမ်ႈပူတ်းပွႆႇမိူင်းပလွင်ႈ / တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) ပွတ်းထုင်ႉသၼ်လွႆတေႃႉသၢင်ႇ မင်းၵုင်း ၸႄႈဝဵင်းၵျွၵ်ႉမႄး ၼႂ်းၶၢဝ်းတၢင်း 4 ဝၼ်း ။ ၼွၵ်ႈသေၼၼ်ႉ ၸတ်းႁဵတ်းပႃးပၢင်ႁူပ်ႉထူပ်းသပ်းလႅင်းၼႄ သင်ၶၸဝ်ႈလႄႈ ၽူႈယႂ်ႇၵူၼ်းလူင် ၵဵဝ်ႇလူၺ်ႈလွင်ႈႁၼ်ထိုင် SSPP/SSA ၼိူဝ်ပၢင်တိုၵ်း ဢၼ်ပဵၼ်ဝႆႉယူႇယၢမ်းလဵဝ် - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 17/02/2016 ယၢမ်းတဵင်ႈဝၼ်း 12 မူင်းထိုင် 4 မူင်းဝၢႆးဝၼ်း ၊ ၸတ်းႁဵတ်းပၢင်ႁူပ်ႉထူပ်းပေႃႈမႄႈၵူၼ်းမိူင်း ၊ သင်ၶၸဝ်ႈလႄႈၽူႈယႂ်ႇၵူၼ်းလူင် ၼႂ်းၸႄႈဝဵင်းသီႇပေႃႉ တီႈဝတ်ႉႁူမ်ႈယဵၼ် တူၼ်ႈတီး ၊ ၼမ်ႉႁူးၼွႆႉတႂ်ႈ ဝဵင်းသီႇပေႃႉသေ သပ်းလႅင်းၸႅင်ႈၼႄလွင်ႈတၢင်း ၵိူတ်ႇပဵၼ်ပၢင်တိုၵ်း RCSS/SSA လႄႈ PSLF/TNLA ၊ လွင်ႈ SSPP/SSA ဝႆႉၼမ်ႉၸႂ်ၼိူဝ်ဢၼ်ပဵၼ်ပၢင်တိုၵ်း ဢိၵ်ႇပႃးလွင်ႈလႆႈတူင်ႉၼိုင် ႁူပ်ႉထူပ်းၸွႆႈထႅမ်ၵူၼ်းမိူင်း ၸိူဝ်းထူပ်းၽေးသိုၵ်းၼိူဝ်သၼ်လွႆ ဢိၵ်ႇၼႂ်းဝဵင်း ။ တၢမ်းၶမ်ႈ 6-8 မူင်း ႁွတ်ႈၽႅဝ်ပၼ်ႁႅင်း ၼိူဝ်ၸုမ်းသင်ၶလႄႈမေႃသွၼ် ၸိူဝ်းမီးယူႇတီႈပၢင်သွၼ်ႁူင်းႁဵၼ်းထမ်းမ ဝတ်ႉလူင်ပျွင်ႇၶွင်း ၸႄႈဝဵင်းၵျွၵ်ႉမႄးသေ သပ်းလႅင်းၼႄပႃး လွင်ႈပၢင်တိုၵ်း ၊ လွင်ႈတူင်ႉၼိုင်ၸွႆႈထႅမ်လႄႈ လွင်ႈ SSPP ဝႆႉၼမ်ႉၸႂ်ၼိူဝ် ဢၼ်ပဵၼ်ပၢင်တိုၵ်းယူႇယၢမ်းလဵဝ်ၸိူင်ႉႁိုဝ် ၸိူဝ်းၼၼ်ႉ ။


ၽူႈတၢင်တူဝ် ပႃႊတီႊမႂ်ႇသုင်ၸိုင်ႈတႆး ဢွၼ်ႁူဝ်ၸုမ်းၸိူဝ်း တႄႇသိုပ်ႇၶၢဝ်းတၢင်း မိူဝ်ႈဝၼ်းတီႈ 14/02/2016 ယၢမ်းၵၢင်ၼႂ်သေ ႁွတ်ႈၽႅဝ်ၸွႆႈထႅမ် တီႈႁူင်းလုမ်းလႃးပေႃႈထဝ်ႈမႄႈၵႄႇ 200 သႅၼ်ပျႃး ၊ ပုၼ်ႈတႃႇၵူၼ်းပၢႆႈၽေး ဢၼ်မႃးမီးဝႆႉယူႇတီႈ ၼႂ်းဝဵင်းၵျွၵ်းမႄးတင်းသဵင်ႈ ။ ဝၢႆးၼၼ်ႉ သိုပ်ႇၵႂႃႇဝႆႈသႃ ႁူပ်ႉထူပ်းဢုပ်ႇဢူဝ်းၸဝ်ႈသြႃႇ ၸႃၵရ ဝတ်ႉႁူဝ်ၼမ်ႉ ဢိၵ်ႇတင်း ၸၢႆးတၢၼ်းမွင်ႇ ၽူႈဢွၼ်ႁူဝ် ၸွႆႈထႅမ်တူၺ်းထိုင် ၵူၼ်းပၢႆႈၽေးသိုၵ်း ၼႂ်းဝဵင်းၵျွၵ်ႉမႄး ။ ထိုင်ယၢမ်းၶမ်ႈ ႁွတ်ႈၽႅဝ်တီႈဝၢၼ်ႈၵၢင်ႉၵၢင် ၊ ၸွႆႈထႅမ်ၵူၼ်းပၢႆႈၽေးသိုၵ်း ဢၼ်ပႆႇၸၢင်ႈပၢႆႈလူင်းၼႂ်းဝဵင်းသေ ၵိုတ်းဝႆႉတီႈၼၼ်ႈ10 သႅၼ် ၊ ႁူပ်ႉထူပ်းပၼ်ႁႅင်း သပ်းလႅင်းၼႄၵူၼ်းထူပ်းၽေးသိုၵ်းလႄႈ ၽူႈယႂ်ႇၵူၼ်းလူင် တီႈဝၢၼ်ႈၵၢင်ႉၵၢင် ႁႂ်ႈမေႃပိၼ်ႇပႆႇၸွႆႈထႅမ်ၵၼ်ၵႂႃႇယဝ်ႉသေ ယင်ႉလိုဝ်ႈတီႈဝၢၼ်ႈၵၢင်ႉၵၢင် ။


ဝၼ်းတီႈ 15/02/2016 ယၢမ်းၵၢင်ၼႂ် သိုပ်ႇၶၢဝ်းတၢ င်းၽႅဝ်မိူင်းလူင် ၊ ႁူပ်ႉထူပ်းၽူႈယႂ်ႇၵူၼ်းလူင် ထုင်ႉမိူင်းလူင်တင်ႈသဵင်ႈ ၊ သိုပ်ႇၸွႆႈထႅမ်ပီႈၼွင်ႉၸိူဝ်းပၢႆႈၽေးသိုၵ်းထႅင်ႈ 50 သႅၼ် ၊ ၸွႆႈထႅမ်လူႇတၢၼ်းပၼ်ပႃးၼႃႈႁိူၼ်း ၵူၼ်းၸိူဝ်းဢၼ်လႆႈလူႉသုမ်း ၽူႈၵွၼ်းၼႃႈႁိူၼ်း 7 ႁေႃႁိူၼ်း၊ ၼိုင်ႈႁေႃႁိူၼ်း 5 သႅၼ် ၊ ႁူမ်ႈ 35 သႅၼ် - ၼႆယဝ်ႉ ။


ၸုမ်းၽူႈတၢင်တူဝ်ငဝ်ႈငုၼ်း SSPP/SSA သိုပ်ႇၵႂႃႇလူႇတၢၼ်း ၸွႆႈထႅမ်ဝတ်ႉထုငိုၼ်းတွင်း တီႈၸဝ်ႈသြႃႇသူႇရိယ ဝတ်ႉဝၢၼ်ႈပၢတ်ႈ မိူင်းမိတ်ႈ 40 သႅၼ် ပိူဝ်ႈတႃႇၵူၼ်းမိူင်းၸိူဝ်းပၢႆႈၽေးသိုၵ်း ၸိူဝ်းမႃးပိုင်ႈဢိင်ယူႇသဝ်း ၼႂ်းမိူင်းမိတ်ႈတင်းသဵင်ႈ 97 ၵေႃႉ ။ ၵူၼ်းပၢႆႈၽေးသိုၵ်းတီႈၼႆႈၼႆႉ ယင်းတိုၵ်ႉလိူဝ်မႃးထႅင်ႈ ယွၼ်ႉပၢင်တိုၵ်းပႆႇယဵၼ် ။ ၸတ်းႁဵတ်းပႃး ပၢင်ႁူပ်ႉထူပ်းသင်ၶၸဝ်ႈ တီႈဝတ်ႉလွၵ်းလူင် ၸႄႈဝဵင်းမိူင်းမိတ်ႈ ။ ယၢမ်းၵၢင်ၶမ်ႈ မႃးႁွတ်ႈၽႅဝ်တီႈဝဵင်းမိူင်းၵုတ်ႈသေ ၸတ်းႁဵတ်းပၢင်ႁူပ်ႉထူပ်း ၽူႈယႂ်ႇၵူၼ်းလူင် လႄႈၸုမ်းၵေႃလိၵ်ႈလၢႆး ၼႂ်းဝဵင်းမိူင်းၵုတ်ႈ (တိူင်းတႃႈလိူဝ်ႇ) - ၼႆယဝ်ႉ ။


တၢမ်းၶမ်ႈ 6 တေႃႇ 8 မူင်း ႁွတ်ႈၽႅဝ်ပၼ်ႁႅင်း ၸုမ်းသင်ၶၸဝ်ႈလႄႈ မေႃသွၼ် ၸိူဝ်းမီးယူႇတီႈ ပၢင်သွၼ်ႁူင်းႁဵၼ်းထမ်းမ ဝတ်ႉလူင်ပျွင်ႇၶွင်း ၸႄႈဝဵင်းၵျွၵ်းမႄး ။ သပ်းလႅင်းၼႄပႃး လွင်ႈပၢင်တိုၵ်း ၊ လွင်ႈတူင်ႉၼိုင်ၸွႆႈထႅမ်လႄႈ လွင်ႈ SSPP ဝႆႉၼမ်ႉၸႂ်ၼိူဝ်ဢၼ်ပဵၼ်ပၢင်တိုၵ်းယူႇယၢမ်းလဵဝ် ၸိူင်ႉႁိုဝ် ၸိူဝ်းၼႆႉ - ၼႆယဝ်ႉ ။


ၵဵဝ်ႇၵပ်းလူၺ်ႈလွင်ႈပၢင်တိုၵ်းသွင်ၾၢႆႇၼႆႉ ၾၢႆႇ SSPP တိုၵ်ႉသိုပ်ႇၶတ်းၸႂ်ၶဝ်ႈႁႃဢုပ်ႇဢူဝ်းငူပ်ႉငီႉ တင်းသွင်ပႃႈသွင်ၾၢႆႇယူႇ ၊ မိူၼ်ၼင်ႇယူႇတီႈပဵၼ်ၽူႈၶဝ်ႈၸုမ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼင်ႇၵၼ်သေ ဢုပ်ႇဢူဝ်းၵၼ်တင်း RCSS ။ ယူႇတီႈပဵၼ်ၽူႈၶဝ်ႈၸုမ်း ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ၼင်ႇၵၼ်သေ ဢုပ်ႇဢူဝ်း TNLA တႃႇႁႂ်ႈၵူၼ်းမိူင်းလွတ်ႈၶဵၼ်သေ လႆႈယူႇၵတ်းယဵၼ်ၼၼ်ႉ - ၼႆယဝ်ႉ ။