ၸဝ်ႈတူၼ်ၶူးသုၶမ်း (ၸဝ်ႈသုၶမိၼ်ႇတ) တၢင်ႉယၢၼ်း တေမႃးပွၼ်ႈထမ်းတြႃးပၼ်ပီႈၼွင်ႉတႆး ၸိူဝ်းႁဵတ်းၵၢၼ်ၼႂ်းမိူင်းထႆး တီႈဝဵင်းရႃႉယွင်း လႄႈ ဝဵင်းၽတ်းထယႃး ၸိုင်ႈထႆးပွတ်းၸၢၼ်း ။

ၸဝ်ႈသုၶမိၼ်ႉတ (ၸဝ်ႈသုၶမ်း) တၵ်ၵသီလမႁႃၸရိယ MA (Buddhism) လႄႈ MA (Sri Lan ka) မႁႃၵမ်မတ်ထႃၼႃၸရိယ ၊ ထမ်မၵထိၵ ၽူႈႁေႃးတြႃးပိုၼ်ၽႄႈသႃသၼႃ ထုင်ႉသၼ်လွႆ တေမႃးပွၼ်ႈထမ်း ပၼ်ပီႈၼွင်ႉႁႅင်းၵၢၼ်ယၢၼ်မိူင်း တီႈ ဝတ်ႉသူဝ်ၽူၼ်း မၢပ်ႊတႃႊၽုတ်ႊၼႂ်း ဝၼ်းတီႈ 06/03/2016 (ဝၼ်းတိတ်ႉ) ၶၢဝ်းယၢမ်း 09:00 – 10:30 ၊ ၵၢင်ၶမ်ႈသမ်ႉတေၵႂႃႇ ႁေႃးထမ်းတီႈ ဝတ်ႉၸိတ်ႇတႃႇၽဝၼ်း ဝဵင်းၽတ်းထယႃး ၶၢဝ်းယၢမ်းၵၢင်ၶမ်ႈ 06:00-08:00 ။


ပၢင်တြႃးၼႆႉယူႇတီႈ မုၵ်းၸုမ်းၸၢဝ်းၶိူဝ်းတႆး (ရႃႉယွင်း) ႁူမ်ႈၵၼ်တင်းပီႈၼွင်ႉတႆးၸိူဝ်းႁဵတ်း ၵၢၼ်ယူႇတီႈရႃႉယွင်းသေၸတ်းႁဵတ်း ။


ၸၢႆးသႅင်ၸၢႆး လၢတ်ႈဝႃႈ – “ ယိူင်းဢၢၼ်းဢၼ်လႆႈၸတ်းႁဵတ်းၼႆႉၼင်ႇႁိုဝ်ပီႈၼွင်ႉတႆးၸိူဝ်းၽၢတ်ႇ ယၢၼ်ႁိူၼ်းယေး ယူႇပဵၼ်မူႇၸုမ်းလႄႈသင် ယူႇၵေႃႉလဵဝ်လႄႈသင် ပေႃးတေလႆႈႁၵ်ႉႁွမ်ၵၼ် ၊ ပဵၼ်ဢၼ်ၼိုင်ႈဢၼ်လဵဝ်ၵၼ်၊ လႆႈထွမ်ႇတြႃးတႆးႁဝ်းၼႆၶႃႈဢေႃႈ ” ။


မိူဝ်ႈဝၼ်းတီႈ 30 လိူၼ်သႅပ်ႊထႅမ်ႊၿိူဝ်ႊ ၊ ဝၼ်းတီႈ 01 လိူၼ်ၼူဝ်ႊဝႅမ်ႊၿိူဝ်ႊ 2014 လႄႈဝၼ်းတီႈ 31 ၵျႅၼ်ႊၼႅဝ်ႊဝရီႊ2016 ပူၼ်ႉမႃးၼၼ်ႉၵေႃႈ ၸဝ်ႈတူၼ်ၶူးသုၶမ်း မႃးပွၼ်ႈထမ်းတြႃးတီႈမိူင်း ၵွၵ်ႇ ။ ပီႈၼွင်ႉတႆးမိူင်းၵွၵ်ႇလႄႈႁိမ်းႁွမ်း မႃးႁပ်ႉထွမ်ႇတြႃးမီးၼပ်ႉႁဵင် ။


ၸဝ်ႈတူၼ်ၶူးသုၶမ်းၼႆႉ ဝၢႆးသေၸဝ်ႈပွၼ်ႈထမ်းတြႃးတီႈၸိုင်ႈထႆးယဝ်ႉ တေသိုပ်ႇၶၢဝ်းတၢင်းထႅင်ႈ ဝၼ်းတီႈ 07/03/2016 တေၵႂႃႇတီႈ မိူင်းၶႅမ်ႊပေႃႊတီႊယိူဝ်ႊ ၊ ဝၼ်းတီႈ08/03/2016 ၵႂႃႇတီႈမိူင်း ၵြႃး ၊ ဝၼ်းတီႈ 09/03/2016 ပွၵ်ႈၶိုၼ်းတႃႈၵုင်ႈၼႆယဝ်ႉ ။