လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆး ၸတ်းပၢင်လိူၵ်ႈတင်ႈႁူဝ်ပဝ်ႈလႄႈ ၽူႈပွင်ၵၢၼ်ၵေႃလုၵ်ႈ ႁဵၼ်းသင်ၶတႆး ၸၼ်ႉၸွမ် မိူင်းထႆး ပွၵ်ႈၵမ် 12 မီးၽူႈၶဝ်ႈလိူၵ်ႈတင်ႈပဵၼ်ႁူဝ်ပဝ်ႈ 6 ၸဝ်ႈ ၊ ၽူႈပွင် ၵၢၼ် 27 ၸဝ်ႈ ။

ဝၼ်းတီႈ 27/02/2016 လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆး Tai Sangha University Students Association  ၸတ်းပၢင်လိူၵ်ႈတင်ႈ ႁူဝ်ပဝ်ႈလႄႈၽူႈပွင်ၵၢၼ်မႂ်ႇ ပွၵ်ႈၵမ်း12 ။ ၽူႈၶဝ်ႈလိူၵ်ႈတင်ႈပဵၼ်ႁူဝ်ပဝ်ႈ မီး 6 ၸဝ်ႈ ၽူႈၶဝ်ႈလိူၵ်ႈတင်ႈပဵၼ်ၽူႈပွင်ၵၢၼ် 27 ၸဝ်ႈ ၊ သင်ၶၸဝ်ႈၶဝ်ႈႁူမ်ႈ 88 ၸဝ်ႈ ၸတ်းႁဵတ်းၵႂႃႇတီႈ ဝတ်ႉမႂ်ႇ မိူင်းၵွၵ်ႇ ၸိုင်ႈထႆး ။


ၸဝ်ႈၼုမ်ႇတႆး ၼၼ်တသႃမိ ထုၵ်ႇလိူၵ်ႈပဵၼ်ႁူဝ်ပဝ်ႈၸုမ်းသင်ၶႃႈတႆး မိူင်းၵွၵ်ႇ ပီ 2016 ။ မၼ်းၸဝ်ႈလၢတ်ႈဝႃႈ - “ ၵူၼ်းမိူင်းတႆးႁဝ်းၶဝ်ႁႂ်ႈဢွၼ်ၵၼ် ပၼ်ႁႅင်းလုၵ်ႈဢွၼ်ႇ ႁႃႁဵၼ်းဢဝ် ပၺ်ႇၺႃႇတၢင်းမေႃၼမ်ၼမ်ၵၢပ်ႈပၢၼ်ယၢမ်းလဵဝ်ၼႆႉပိူၼ်ႈဢဝ်လိၵ်ႈလၢႆးပၢႆးပၺ်ၺႃႇတၢင်းႁူႉ ၶေႉၶဵင်ႇၵၼ်ၵႂၢမ်းဢၼ်ဝႃႈ “ ဢမ်ႇမေႃလိၵ်ႈဢမ်ႇဢိုပ်းၶဝ်ႈ ” ဢၼ်ၵႆႉလႄႇဝႃႈ ႁင်းလုၵ်ႈဢွၼ်ႇမိူဝ်ႈပၢၼ်ၵူႈပွၵ်ႈၼၼ်ႉ ယွၼ်ႉပိူဝ်ႈတႆးႁဝ်းဢမ်ႇမေႃလိၵ်ႈလၢႆးပၢႆးပၺ်ႇၺႃႇလႄႈ ထိုင်မႃးၵၢပ်ႈပၢၼ်ယၢမ်းလဵဝ် တႆးႁဝ်းၸင်ႇလႆႈတူၵ်းလိုၼ်းပိူၼ်ႈသေ ဢမ်ႇၵႃးလႆႈမႃးပဵၼ်ၶႃႈလိပ်းပိူၼ်ႈယူႇ ၼႆႉယဝ်ႉ ”။


ၸဝ်ႈၸၢင်းဢၼ်ၶဝ်ႈလိူၵ်ႈတင်ႈပဵၼ်ႁူဝ်ပဝ်ႈ မီး 6 ၸဝ်ႈ 1. ၸဝ်ႈၶမ်းလႅင် ၶေႇမိၼ်ႇတ (ၵႃလိ) ၊ 2. ၸဝ်ႈလၢဝ်သႅင် ဝႃရိၼ်တ (မိူင်းၵိုင်) ၊ 3. ၸဝ်ႈလႅင်းၸႅင်ႈ (ၵႃလိ) ၊ 4. ၸဝ်ႈၼုမ်ႇတႆး ၼၼ်တသႃမိ (တၢင်ႉယၢၼ်း) ၊ 5. ၸဝ်ႈတႆးၼုမ်ႇ ပိၼ်ႇတေႃးလ (ၵုၼ်ႁဵင်) ၊ 6. ၸဝ်ႈၸၼ်တိမႃႇ (သီႇပေႃႉ) လိူၵ်ႈပႃးၽူႈပွင်ၵၢၼ်ထႅင်တင်းမူတ်းမီး 27 ၸဝ်ႈ ၼႆယဝ်ႉ ။


တႃႇတေပဵၼ်မႃးလုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆးၼႆႉ ၸဝ်ႈၶူးလူင် Prof. Dr ၶမ်းမၢႆ ထမ်မသႃမိလႆႈၼႄတၢင်းပၼ်ယၢမ်းလဵဝ် သင်ၶတႆးဢွၵ်ႇမိူင်းႁႃႁဵၼ်းလိၵ်ႈ မီးၸွတ်ႇၵႂႃႇၵူႈမိူင်း မိူၼ်ၼင်ႇမႃႊလေႊသီႊယိူဝ်ႊ ၊ ၵျႃႊပၢၼ်ႊ ၊ မိူင်းသီႇႁူဝ် ၊ မိူင်းဢိင်းၵလဵတ်ႈ ၊ မိူင်းဢမေႊရီႊၶိူဝ်ႊ ၊ သိင်ႊၶၿူဝ်ႊ ၊ ဢိၼ်ႊတီႊယိူဝ်ႊ ၊ ၵူဝ်ႊလီႊယိူဝ်ႊ ၸဵမ်ၸိူဝ်းၼႆႉ တီႈမိူင်းထႆးၼႆႉ တႄႇပီ 2004 မႃးထိုင်ယၢမ်းလဵဝ် လုၵ်ႈႁဵၼ်းတႆးဢၼ်ႁဵၼ်းယဝ်ႉၵႂႃႇမီး 2 ႁဵင်ပၢႆ ဢၼ်တိုၵ်ႉႁဵၼ်းယူႇယၢမ်းလဵဝ်မီး မွၵ်ႈ 150 ၸဝ်ႈပၢႆ ၼႆယဝ်ႉ ။