တပ်ႉသိုၵ်းၼုမ်ႇသိုၵ်းႁၢၼ်ႁဵတ်းၵၢၼ်ၵွၼ်းၶေႃ ဢၼ်ၸဝ်ႈၼွႆႉ (သေႃးယၼ်ႇတ) ဢွၼ်ႁူဝ်ၽူႈႁၵ်ႉၸၢတ်ႈ 31 ၵေႃႉ မီးၵွင်ႈ 7 လဝ်းၶဝ်ႈထိူၼ်ႇဝၢႆႇၶိုၼ်းလုၵ်ႉၾိုၼ်ႉသိုၵ်းမၢၼ်ႈၶႂၢၵ်ႈမိူင်း မိူဝ်ႈ 1958 ၊ ဝၢႆးၼၼ်ႉၵေႃႈ မီးၽူႈႁၵ်ႉၸၢတ်ႈ တင်းၼမ်တင်းလၢႆလင်ႇလႆၶဝ်ႈမႃးႁူမ်ႈ ပႃးတင်းပေႃႈထဝ်ႈၶုၼ်ႁၢၼ် ဝိယ ဢၼ်ၵိုတ်းယူႇပဵၼ်ၵေႃႉလိုၼ်းသုတ်းၼၼ်ႉ လႆႈသဵင်ႈၵမ်သုတ်းမုၼ်ၵႂႃႇ ဝၼ်းတီႈ 04/02/2016 ၼႂ်ၼႆႉ ၽွင်းယၢမ်း 09.00 မူင်း တီႈႁိူၼ်းမၼ်းၸဝ်ႈ မိူင်းၾၢင် ၸႄႈတွၼ်ႈၵဵင်းမႆႇ ၸိုင်ႈထႆး ။

ပေႃႈထဝ်ႈၶုၼ်ႁၢၼ်ဝိယ လႆႈၶဝ်ႈမႃးႁၢပ်ႇၵိုတ်ႉၵၢၼ်သိုၵ်းၼႂ်းတပ်ႉသိုၵ်းၼုမ်ႇသိုၵ်းႁၢၼ် မိူဝ်ႈ 1960 ။ ဝၢႆးၼၼ်ႉၵေႃႈ လူၺ်ႈၼမ်ႉၵတ်ႉတၢင်းၶႅၼ်ႇသေ ၸွမ်ႁၢၼ်ၸဝ်ႈၼွႆႉ လႆႈၶိုၼ်ႈၸၼ်ႉတၼ်းႁဵင်းပဵၼ်ၶုၼ်ႁၢၼ် တေႃႇပေႃးၵိုတ်းလိုဝ်ႈ ၵၢၼ် ။


ပိုၼ်းၵႅပ်ႈပေႃႈထဝ်ႈၶုၼ်ႁၢၼ်ဝိယ

ၸိုဝ်ႈ ဝိယ

ၵိူတ်ႈမိူဝ်ႈ        22/03/1929

တီႈ ဝၢၼ်ႈပႃႇသႃ ဝဵင်းၵဵင်းတွင်း ၸိုင်ႈတႆးပွတ်းၸၢၼ်း

မေးၼၢင်း မႄႈထဝ်ႈဢုၺ်ႉ မိူဝ်ႈလဵဝ် ဢႃယု 82

ၶဝ်ႈမႃးယူႇမိူင်းၾၢင် မိူဝ်ႈ 1958


ၵၢၼ်သိုၵ်း 1960 ၶဝ်ႈမႃးႁၢပ်ႇၵိုတ်ႉၵၢၼ်သိုၵ်းၼႂ်းတပ်ႉသိုၵ်း (ၼုမ်ႇသိုၵ်းႁၢၼ်ႁဵတ်းၵၢၼ်ၵွၼ်းၶေႃ - ဢၼ်ၸဝ်ႈၼွႆႉဢွၼ်ႁူဝ်)

တၼ်းႁဵင်း ၽူႈၸွႆႈၾၢႆႇၵၢၼ်ငိုၼ်းၼႂ်းတပ်ႉသိုၵ်းၼုမ်ႇသိုၵ်းႁၢၼ် ဢၼ်ပေႃႈထဝ်ႈ ၸဝ်ႈၵုၼ(ၵုင်ႇၼ) ၵုမ်းယိပ်း

သဵင်ႈၵမ် တီႈႁိူၼ်းမၼ်းၸဝ်ႈ မၢႆႁိူၼ်း 168 ဝၢၼ်ႈမွၼ်ႉပိၼ်ႇ  မူႇ 3 ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ လူၺ်ႈတၢင်းပဵၼ်ၵူၼ်းထဝ်ႈ ၽွင်းဢႃယု 87 ပီ

ပီႈၼွင်ႉ 8 ၵေႃႉ - ပဵၼ်ၵေႃႉတီႈ 2

1. ပေႃႈထဝ်ႈၼႃရတ (လူႉ) ၊ 2. ပေႃႈထဝ်ႈဝိယ ၊ 3. မႄႈထဝ်ႈပၢင်ႇ (လူႉ) ၊

4. မႄႈထဝ်ႈၺုၼ်ႉ (မီး) ၊ 5. မႄႈထဝ်ႈမူၼ်း (လူႉ) ၊ 6. ပေႃႈထဝ်ႈသူၺ်ႇ (လူႉ) ၊

7. ပေႃႈထဝ်ႈၼႃႇလိင်ႇ) ၊ 8. ပေႃႈထဝ်ႈထုၼ်းၵျေႃႇ (မီး)

လုၵ်ႈတဝ်ႈ 4 ၵေႃႉ

1. ၼၢင်းၼူၼ်း (မီး) ၊ 2. ၸၢႆးဢိုင်း (လူႉ) ၊ 3. ၼၢင်းပႄး (မီး) ၊ 4. ၼၢင်းၼွင်ႉ (မီး) ။


မိူဝ်ႈလဵဝ်ပီႈၼွင်ႉလုၵ်ႈလၢင်းၼၢင်းမေးဢဝ်ၶၢပ်ႈတူဝ်ႁႅၼ်းတၢၼ်းႁဵတ်းတၢင်းလီၵုသူလ်တီႈၸွမ်းၾိင်ႈပုတ်ႉထသႃသၼႃယူႇ တီႈႁိူၼ်းမၼ်းၸဝ်ႈ မၢႆႁိူၼ်း 168 ဝၢၼ်ႈမွၼ်ႉပိၼ်ႇ  မူႇ 3 ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ သေ တေပူၼ်ႉၶၢပ်ႈတူဝ်ၸုင်ႁူဝ်ၶဝ်ႈပႃႇႁဵဝ်ႈဝၢၼ်ႈမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်ငးမႆႇ ၸိုင်ႈထႆး ဝၼ်းတီႈ 09/02/2016 ။


ယိၼ်းမွင်သဝ်ႈငမ်းဝဝ်း ႁႂ်ႈၶႂၼ်ငဝ်းဝိၺၢၼ်ႇမုၼ် ပေႃႈထဝ်ႈၶုၼ်ႁၢၼ်ဝိယ ႁွတ်ႈထိုင်သုၶ်ၶတိတီႈၵတ်းယဵၼ် သေၵမ်း

ၸုမ်းၶၢဝ်ႇၽူႈတွႆႇႁွၵ်ႈ(S.H.A.N)