ၸဝ်ႈၼႃႈတီႈပလိၵ်ႈထႆး တီႉၺွပ်းၸုမ်းၵႃႉၶၢႆယႃႈမဝ်းၵမ် ပႃးၸၢဝ်းတႆးၼိုင်ႈၵေႃႉ ယိုတ်းလႆႈယႃႈမႃႉ ၼပ်ႉသႅၼ်မဵတ်ႉတီႈလႅၼ်လိၼ် တႆး - ထႆး ။

ဝၼ်းတီႈ 02/02/2016 ၸဝ်ႈၼႃႈတီႈၾၢႆႇၵူတ်ႇထတ်းယႃႈမဝ်းၵမ် ႁူမ်ႈၵၼ်တင်းၸဝ်ႈၼႃႈတီႈ လၢႆၾၢႆႇတီႉၺွပ်း ၸုမ်းၵႃႉၶၢႆယႃႈ 3 ၵေႃႉ တီႈၸေႈဝဵင်းမႄႈသၢႆ ၸေႈတွၼ်ႈၵဵင်းႁၢႆး ၸိုင်ႈထႆး ပွတ်းႁွင်ႇ ။ ယိုတ်းလႆႈယႃႈမဝ်းၵမ် 500,000 မဵတ်ႉ ၊ ယႃႈဢႆႉသ် 31 .8 ၵီႊလူဝ်ႊၵရမ်ႊ၊ ရူတ်ႉ1 လမ်း လႄႈတင်းၾူၼ်း 7 ၶိူင်ႈ ။


ၵူၼ်းဢၼ်တီႉၺွပ်းလႆႈၼၼ်ႉပဵၼ်ၵူၼ်းထႆး 2 လႄႈၵူၼ်းတႆး 1 ၵေႃႉ ၼႆယဝ်ႉ ။ (1) ၸမ်ႊရတ်ႊ ၻဵၼ်ႊပီႊၶျႃႊ  ဢႃယု 54 ပီ ၊ (2) ရိူတ်ႊသၵ်ႊ ၽူႊရိပၼ်ႊယႃႊၼၼ်ႊ ဢႃယု 37 ပီ လႄႈ (3) ၸၢႆးၸၢႆး ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈထႆး လၢတ်ႈဝႃႈ - ၸုမ်းၵႃႉယႃႈမဝ်းၵမ်ၼႆႉ ပဵၼ်ၸုမ်းဢၼ် မီးၼႅင်ႈသၢၼ်ၵၼ်တင်း ၸုမ်းၶုၼ်သႃႇ ၊ ပဵၼ်ၸုမ်းၵႃႉယႃႈ ဢၼ်ယႂ်ႇလိူဝ်ပိူၼ်ႈသုတ်းသေ ပၵ်းယူႇတီႈမိူင်းမၢၼ်ႈ ဝႃႈၼႆ ။


သိုပ်ႇလၢတ်ႈထႅင်ႈဝႃႈ မိူဝ်ႈလဵဝ်ၸဝ်ႈၼႃႈယင်းတိုၵ်ႉသိုပ်ႇလမ်းႁႃထႅင်ႈၵူၼ်းၵႃႉယႃႈၸၢဝ်းတႆး 2 ၵေႃႉ ၽူဝ်မေး ဢၼ်ပိုတ်ႇလၢၼ်ႉၶမ်း လႄႈ ႁပ်ႉလႅၵ်ႈငိုၼ်း ယူႇတီႈ ဝဵင်းၵဵင်းႁၢႆး ၼႆယဝ်ႉ ။


လူင်ပွင်ၸိုင်ႈမၢၼ်ႈလႄႈထႆးဝႃႈ - ၶုၼ်သႃႇ တင်းၸၢႆးၼေႃႇၶမ်း ပဵၼ်ၶုၼ်ႁေႃၶမ်းယႃႈမဝ်းၵမ် ၵူၺ်းၵႃႈယၢမ်းလဵဝ် ၶုၼ်သႃႇ တင်း ၸၢႆးၼေႃႇၶမ်း ဢမ်ႇမီးယဝ်ႉသေတႃႉ ၸုမ်းပၵ်းတႃတူၺ်း ယႃႈမဝ်းၵမ်လုမ်ႈၽႃႉ UNODC ယင်းတိုၵ်ႉပိုၼ်ၽၢဝ်ႇဝႃႈၼႂ်းမိူင်းတႆး သူၼ်ယႃႈတိူဝ်းၼမ် မႃးလိူဝ်ၵဝ်ႇ၊  ၵၢၼ်ၵႃႉၶၢႆယႃႈမဝ်းၵမ်ၵေႃႈ ဢမ်ႇလူတ်းယွမ်းဝႃႈၼႆ ။


ၵူၼ်းၵႃႉယႃႈ ဢၼ်လုၵ်ႉလႅၼ်လိၼ် တႆး - ထႆး သေၶဝ်ႈၼႂ်းမိူင်းထႆးမီးယူႇၵူႈမိုဝ်ႉၵူႈဝၼ်း ၸဝ်ႈၼႃႈတီႈလၢတ်ႈၼင်ႇၼႆ ။ ၵူၼ်းၸိူဝ်းဢၼ်ၺႃးတီႉၺွပ်းဝႆႉၼၼ်ႉ ၸဝ်ႈၼႃႈတီႈထႆးၶဝ် တေတတ်းသိၼ်ၸွမ်းၼင်ႇ ပၵ်းပိူင်မၢႆမီႈထႆးၼၼ်ႉ ၼႆယဝ်ႉ ။


ၶေႃႈမုလ်းတီႈ Maesai News