ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 69 ပီ ၼႂ်းမိူင်းၼွၵ်ႈမိူင်း တေဢွၼ်ၵၼ်ၸတ်းႁဵတ်းၼမ်



ဝၼ်းၸိူဝ်ႉၸၢတ်ႈၸိုင်ႈတႆးပီၼႆႉ ပီႈၼွင်ႉႁႅင်းၵၢၼ်ယၢၼ်မိူင်းတႆး ၼႂ်းၸိုင်ႈထႆးလႄႈ ပီႈၼွင်ႉၵူၼ်းမိူင်း ၼႂ်းၸိုင်ႈတႆး လၢႆပွတ်းတွၼ်ႈ ဢွၼ်ၵၼ်ၶဝ်ႈႁူမ်ႈ ဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈၸိုင်ႈလွႆတႆးလႅင်း ၼမ်လိူဝ်ၵူႈပီ ။


ဝၼ်းတီႈ 7/2/16  ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ် 69 ပီတဵမ်ၼႆႉ ၶွင်ႊသီႊဢဝ်ၶိုၼ်းၸိုင်ႈတႆးလႄႈတပ်ႉသိုၵ်းၸိုင်ႈတႆး RCSS/SSA တေၸတ်းႁဵတ်းတီႈ ငဝ်ႈငုၼ်းလွႆတႆးလႅင်း မိူၼ်ၵူႈပီလႄႈ တၢင်းပႃႊတီႊမႂ်ႇသုင်ၸိုင်ႈတႆးလႄႈတပ်ႉသိုၵ်းၸိုင်ႈတႆး SSPP/SSA ၵေႃႈ တေၸတ်းႁဵတ်းတီႈငဝ်ႈငုၼ်းဝၢၼ်ႈႁၢႆးမိူၼ်ၵူႈပီ ။ လိူဝ်ၼၼ်ႉ တီႈဝဵင်းတူၼ်ႈတီး ၊ မူႇၸႄႈ ၊ ၼမ်ႉၶမ်း ၊ တႃႈၵုင်ႈ ၊ ပၢင်လူင် ဢိၵ်ႇတင်းၼွၵ်ႈမိူင်းၸိူင်ႉၼင်ႇ ၵျပၼ်ႊ ၊ ဢမႄႊရိၵႃႊလႄႈၵဵင်းမႆႇၵေႃႈ တေၸတ်းႁဵတ်းလၢႆတီႈ ။ သိင်ႊၵပူဝ်ႊတႄႉ တေဢမ်ႇၸတ်းႁဵတ်း ပၢင်ပွႆးယႂ်ႇလူင် တေၶွၼ်ႈႁႅင်းၵၢၼ် တီႈဝတ်ႉတႆးသေ တၢၼ်းၿဵလ်း (ၵၢပ်ႈသွမ်း) ၵူၺ်း ဝႃႈၼႆ ။


ၸၢႆးၶိတ်ႉ ၵႅမ်ႁူဝ်ပဝ်ႈ မူႉၸုမ်းၸၢဝ်းၶိူဝ်းတႆး လၢတ်ႈဝႃႈ ပီႈၼွင်ႉႁႅင်းၵၢၼ် ၼႂ်းမိူင်းထႆး ဢၼ်တေၶိုၼ်ႈလွႆတႆးလႅင်းၼႆႉ သၢႆမၢႆမီး 1101 ၵေႃႉ ရူတ်ႉဢၼ်တေၵႂႃႇသမ်ႉ 140 လမ်း တေၶိုၼ်ႈလွႆတႆးလႅင်းဝၼ်းတီႈ 6 ၵၢင်ၼႂ် ပွၵ်ႈၶိုၼ်း ဝၼ်းတီ 8 ၵၢင်ဝၼ်း ဝႃႈၼႆ ။


ၸဝ်ႈၸၢႆးလဵၵ်ႉ ၽူႈၵွၼ်းႁွင်ႈၵၢၼ် တီႈငဝ်ႈၸိုင်ႈလွႆတႆးလႅင်းလၢတ်ႈဝႃႈ ၼႂ်းပီၼႆႉ ပေႃႈမႄႈပီႈၼွင်ႉၵူၼ်းမိူင်း ဢၼ်တေမႃးၶဝ်ႈႁူမ်ႈ ပွႆးဝၼ်းၸိူဝ်ႉၸၢတ်ႈပီၼႆႉ လႅပ်ႈတေၼမ်လိူဝ်ၵူႈပီယူႇ ။  မိူဝ်ႈလဵဝ် ၵူၼ်းမိူင်း ႁဝ်းဢွၼ်ၵၼ်ၶိုၼ်ႈမႃး ၼိူဝ်လွႆတႆးလႅင်း ၼိုင်ႈဝၼ်းလႂ် 100 ပၢႆ  ၼႂ်းဝၼ်းတီႈ 5-6 တႄႉ တေၶိုၼ်ႈမႃးၼမ် ဝႃႈၼႆ ။


ဢၼ်လၢၵ်ႇလၢႆးၼႂ်းပီၼႆႉ ၵူၼ်းမႃးၶၢႆၶူဝ်းၶွင် ၼမ်လိူဝ်ၵူႈပီ မိူၼ် ႁၢၼ်ႉၶၢႆၶူဝ်းတႆး မိူဝ်ႈပီၵႆ မီး 3 ႁၢၼ်ႉ ပီၼႆႉ မီးပဵၼ် 10 ႁၢၼ်ႉပၢႆယဝ်ႉ ဢၼ်ပႆႇမႃးထိုင်ၵေႃႈ ယင်းတိုၵ်ႉမီးယူႇထႅင်ႈ ဝႃႈၼႆ ။ ၼွၵ်ႈလိူဝ်သေႁၢၼ်ႉၶၢႆၶူဝ်းယဝ်ႉ ႁၢၼ်ႉၶၢႆတၢင်းၵိၼ်တၢင်းယႅမ်ႉၵေႃႈ ၼမ်လိူဝ်ၵဝ်ႇမႃးထႅင်ႈ ဝႃႈၼႆ ။


တီႈၵဵင်းမႆႇ ၼႂ်းၸိုင်ႈထႆးၵေႃႈ ၵေႃလိၵ်ႈလၢႆးလႄႈ ၾိင်ႈငႄႈတႆးၵဵင်းမႆႇ ဢွၼ်ပီႈၼွင်ႉႁႅင်းၵၢၼ်တႆး ယၢၼ်မိူင်း တေတၢၼ်းၿဵလ်း (ၵၢပ်ႈသွမ်း) သင်ၶၸဝ်ႈ တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ တွၼ်ႈဝၢႆးဝၼ်းသမ်ႉ တေမီးပၢင်ဢုပ်ႇၶႆႈလွင်ႈပဵၼ်မႃး ဝၼ်းၸဝ်ႈၾႃႉလႄႈ ၽူႈၼမ်းတႆးၽွမ်ႉႁူမ်ႈၵၼ်ပဵၼ်ဢၼ်ၼိုင်ႈဢၼ်လဵဝ်ၵၼ် “ ဝၼ်းၸိူဝ်ႉၸၢတ်ႈၸိုင်ႈတႆး ”  ႁဵတ်းႁိုဝ်ပဵၼ်မႃး ၼႆယဝ်ႉ ။


ၼႂ်းပၢင်ဢုပ်ႇၶႆႈၼႆႉ တေမီးၽူႈလူင်ႉလႅၼ်ႇၵၢၼ်မိူင်း ၵၢၼ်ပိုၼ်း တေမႃးသပ်းလႅင်းလၢတ်ႈၼႄ  ၸဝ်ႈၶိုၼ်းသႂ် ၸႂ်ယဵၼ် ၊ ၶူးသွၼ် သၢႆလိူၼ်ၶမ်း ၊ ၶူးသွၼ်းမႂ်ႁွင်း ၊ မႄႈၶူးႁၢၼ်ၼူၼ်း ၊ ၸၢႆးသႅင်ယလႄႈ ၼၢင်းသီလႃး ၸဵမ်ၸိူဝ်းၼႆႉ ။


တၢင်းၼွၵ်ႈမိူင်း ဢၼ်တေၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး ၶၢဝ်ႉၶၢဝ်ႉမၼ်းတႄႉ မိူင်းထႆး ၊ မိူင်းဢႃမေႊရီႊၵႃႊ ၊ သိင်ႊၵပူဝ်ႊ ၊ မိူင်းၵျပၼ်ႊ ဢိၵ်ႇထႅင်ႈလၢႆလၢႆမိူင်း ။




 
© 2012 All Rights Reserved | Asean Celebrity | Fonts @ AtFonts | Free Templates