ၵေႃၵပ်းသၢၼ်ၵူၼ်းၼုမ်ႇတႆး (SYN) ၸတ်းႁဵတ်းပွႆးလိုဝ်ႈပၢင်သွၼ် ပိုၼ်ႉထၢၼ် တႅမ်ႈလၢတ်ႈၵႂၢမ်းဢင်းၵိတ်ႉ ၸုပ်ႈတီႈ 4 တီႈဝိႁၢရ်တူၼ်ႈတီး ၼမ်ႉႁူးၼွႆႉတႂ်ႈ ၸႄႈဝဵင်းသီႇပေႃႉ ၊ မီးၽူႈၶဝ်ႈႁူမ်ႈပၼ်ႁႅင်းႁဵင်ပၢႆ ။

ပူၼ်ႉမႃးမိူဝ်ႈဝၼ်းတီႈ 10/02/2016 ၵေႃၵပ်းသၢၼ်ၵူၼ်းၼုမ်ႇတႆး (Shan Youth Network-SYN) ၸတ်းႁဵတ်းပၢင်ပွႆးလိုဝ်ႈပၢင်သွၼ် ပိုၼ်ႉထၢၼ် တႅမ်ႈလၢတ်ႈၵႂၢမ်းဢင်းၵိတ်ႉ (ဢိင်းၵလဵတ်ႈ) ၸုပ်ႈတီႈ 4 တီႈဝိႁၢရ်တူၼ်ႈတီး ၼမ်ႉႁူးၼွႆႉတႂ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ။ မီးၽူႈယႂ်ႇၵူၼ်းလူင်လၢႆလၢႆၵေႃႉ ဢိၵ်ႇတင်းၽူႈတၢင်တူဝ်လၢႆမူႇလၢႆၸုမ်း ၶိုၼ်ႈႁွတ်ႈၶဝ်ႈႁူမ်ႈမွၵ်ႇလၢတ်ႈၵႂၢမ်းလႄႈ လူဢၢၼ်ႇၼႄၽိုၼ်လိၵ်ႈ ယိုၼ်ႈထိုင် ဢၼ်လုၵ်ႉတီႈငဝ်ႈငုၼ်း ပႃႊတီႊမႂ်ႇသုင်ၸိုင်ႈတႆး ဢိၵ်ႇတင်း တပ်ႉငဝ်ႈသိုၵ်း မၢႆ 999 ယိုၼ်ႈႁွတ်ႈသူင်ႇထိုင်မႃး ။ မီးၽူႈၶိုၼ်ႈႁွတ်ႈၶဝ်ႈႁူမ်ႈပၼ်ႁႅင်း ဢိၵ်ႇလုၵ်ႈႁဵၼ်းမွၵ်ႈ 1,500 ၵေႃႉပၢႆ - ၼႆယဝ်ႉ ။


တီႈပၢင်ပွႆးလိုဝ်ႈပၢင်သွၼ်ၼၼ်ႉ မီးၽူႈယႂ်ႇၵူၼ်းလူင် မိူၼ်ၼင်ႇၸွမ်သိုၵ်းလူင်လွႆမၢဝ်း ႁူဝ်ပဝ်ႈတပ်ႉသိုၵ်းၵူၼ်းမိူင်း ၸိုင်ႈတႆး ၊ ၽူႈဢုပ်ႉပိူင်ႇၽွင်းငမ်းဝဵင်းသီႇပေႃႉ ဢူးမဵဝ်းတိၼ်ႉၸေႃႇ ၊ ၸဝ်ႈၶူးမေႃပိုၼ်းတႆး မႄႈၶူးၶိူဝ်းသႅၼ် ။ ၾၢႆႇပႃႊတီႊမႂ်ႇသုင်ၸိုင်ႈတႆး ၶိုၼ်ႈႁွတ်ႈၶဝ်ႈႁူမ်ႈ ၸဝ်ႈတၢၼ်းဢွင်ႇ လႄႈ ၸၢႆးပီး ၽူႈတၢင်တူဝ်တပ်ႉငဝ်ႈသိုၵ်းမၢႆ 999 လႄႈ ၽူႈယႂ်ႇၵူၼ်းလူင် ၼႂ်းတပ်ႉၸုမ်းမၢႆ 3 မိူင်းၶိူဝ်း ၸဝ်ႈသိုၵ်းၸၢႆးဢွၼ် ဢိၵ်ႇပႃးၽူႈယႂ်ႇၵူၼ်းလူင်လၢႆမူႇလၢႆၸုမ်း ၽူႈတၢင်တူဝ်ၸၢဝ်းၶိူဝ်း တဢၢင်း ၸိူဝ်းၼႆႉၶိုၼ်ႈႁွတ်ႈ ။


ၸွမ်သိုၵ်းလူင်လွႆမၢဝ်း မွၵ်ႇလၢတ်ႈဝႃႈ - “ၵၢၼ်ၸိူဝ်ႉၶိူဝ်းႁဝ်းၼႆႉ ႁႂ်ႈသိုပ်ႇႁဵတ်းသၢင်ႈၵႂႃႇ ၊ ၵူၼ်းၼုမ်ႇဝၼ်းမိူဝ်ႈၼႆႉ တေပဵၼ်ၽူႈဢွၼ်ႁူဝ်ဝၼ်းမိူဝ်းၼႃႈ ။ ၵွပ်ႈၼႆ ၶႂ်ႈသင်ႇထိုင်ၵူၼ်းၼုမ်ႇႁဝ်း ႁႂ်ႈသိုပ်ႇႁၢပ်ႇဢဝ်ပုၼ်ႈၽွၼ်းၵႂႃႇ ၊ ပုၼ်ႈတႃႇလွင်ႈၵမ်ႉထႅမ်လႄႈ ဢဵၼ်ႁႅင်းၾၢႆႇလင်ၼၼ်ႉ ႁဝ်းၶႃႈတေၸုၵ်းၾၢႆႇလင်သေ ၸွႆႈထႅမ်ၵႂႃႇ ၼင်ႇပွင်ပဵၼ်လႆႈၼၼ်ႉယူႇ ”- ဝႃႈၼႆ ။


ၸဝ်ႈၶူးမေႃပိုၼ်းတႆး မႄႈၶူးၶိူဝ်းသႅၼ် မွၵ်ႇလၢတ်ႈဝႃႈ - “ ၵဝ်ၶႃႈတႄႉမုင်ႈမွင်းၼိူဝ်ၵူၼ်းၼုမ်ႇ ဝၼ်းမိူဝ်ႈၼႆႉ တႄႉတႄႉဝႃႈဝႃႈ ။ ၵွပ်ႈၼႆ ၵူၼ်းၼုမ်ႇႁဝ်းယႃႇပေပႆတၢင်းၽိတ်းသေၵမ်း ။ ယွၼ်ႉၵွပ်ႈ ၽူႈဢွၼ်ႁူဝ်သွင်ၵေႃႉ ပၢႆးဝူၼ်ႉၶဝ်ဢမ်ႇမိူၼ်ၵၼ်သေ မႃးဢဝ်ႁဝ်းတႅၵ်ႇၵၼ်ၼၼ်ႉ ႁဝ်းယႃႇပေတႅၵ်ႇၵၼ် သေၵမ်း ။ သင်ဝႃႈသူၵူၼ်းၼုမ်ႇၸိူဝ်းၼႆႉ ပဵၼ်ၽူႈဢွၼ်ႁူဝ်မႃးၵေႃႈ ယႃႇပေႁဵတ်းႁႂ်ႈတႆးၽိတ်းၵၼ် ၼင်ႇဝၼ်းမိူဝ်ႈၼႆႉ ၊ ၶႂ်ႈယွၼ်းသင်ႇၸိူင်ႉၼႆၵူၺ်း ”- လၢတ်ႈၵႂႃႇၼင်ႇၼႆ ။


ၽူႈဢုပ်ႉပိူင်ႇၽွင်းငမ်း ဝဵင်းသီႇပေႃႉ ဢူးမဵဝ်းတိၼ်ႉၸေႃႇ လၢတ်ႈဝႃႈ - “ ၶႃႈႁဝ်းၵေႃႈ ၸဵမ်မိူဝ်ႈၸုပ်ႈ 3 မႃးၸွႆႈသွၼ် ပဵၼ်ပွၵ်ႈပဵၼ်လႂ်ယူႇ ၊ ပွၵ်ႈၵမ်း 4 တႄႉဢမ်ႇပဵၼ်မႃးသွၼ်သေတႃႉၵေႃႈ ပၢင်သွၼ်ၸိူင်ႉၼင်ႇၼႆၼႆႉ လီမီးၼမ်ၼမ် ။ တေႃႈၼင်ႇၼႂ်းလူင်ပွင်ၸိုင်ႈၵေႃႈ ပၢင်သွၼ်ၸိူင်ႉၼင်ႇၼႆၼႆႉ ယင်းပႆႇမီးတီႈလႂ် ”- လၢတ်ႈၵႂႃႇၼင်ႇၼႆ ။


ၽူႈတၢင်တူဝ်မေႃသွၼ်တင်းသဵင်ႈ မေႃသွၼ်ယိင်းႁွမ်ပႅင်း မွၵ်ႇလၢတ်ႈဝႃႈ - “ ႁဝ်းၶႃႈတႄႉ ဢမ်ႇမုင်ႈမွင်း တေလႆႈဢီႈသင် တီႈလုၵ်ႈႁဵၼ်းၶဝ် လိူဝ်သေဝႃႈၶႂ်ႈႁႂ်ႈလုၵ်ႈဢွၼ်ႇၵူၼ်းၼုမ်ႇတႆးႁဝ်း ႁတ်းလၢတ်ႈႁတ်းၸႃ တေႃႇၶႅၵ်ႇၼွၵ်ႈမိူင်း ႁတ်းႁတ်းႁၢၼ်ႁၢၼ် ၊ ၶႂ်ႈႁႂ်ႈၵူၼ်းၼုမ်ႇတႆးႁဝ်းပဵၼ်ၽူႈဢွၼ်ႁူဝ်လီၵႂႃႇဝၼ်းမိူဝ်းၼႃႈ ၊ ၶႂ်ႈတုၵ်းယွၼ်းၼင်ႇၼႆ ”- ဝႃႈၼႆ ။


ၵေႃၵပ်းသၢၼ်ၵူၼ်းၼုမ်ႇတႆး (SYN) ၼႆႉ ၸတ်းႁဵတ်းပၢင်သွၼ် ပိုၼ်ႉထၢၼ်တႅမ်ႈလၢတ်ႈၵႂၢမ်းဢင်းၵိတ်ႉမႃး ထူၼ်ႈထိုင်ၸုပ်ႈတီႈ 4 သေ ၸတ်းႁဵတ်းပၢင်လူင်းပၢင်သွၼ် ပွၵ်ႈၵမ်း 4 ယဝ်ႉတူဝ်ႈလီငၢမ်း ။ ပၢင်သွၼ်ပွၵ်ႈၵမ်း 5 တႄႉ တေပဵၼ်ၼႂ်းႁၢင်လိူၼ်ၵျုၼ်ႊ 2016 ၼႆႉ - ၽူႈၵွၼ်းႁူင်းႁဵၼ်း SYN မႄႈၶူးယိင်းသီႇတႃႇ လၢတ်ႈ ။