ၸဝ်ႈၼႃႈတီႈထႆးတင်းမၢၼ်ႈ ႁူပ်ႉထူပ်းဢုပ်ႇဢူဝ်းၵၼ် တႃႇပိုတ်ႇလၢၼ်ႇလႅၼ်လိၼ် လႄႈ သၢင်ႈလွင်ႈမိုတ်ႈၵိုဝ်းၸမ်ၸႂ် ၵၼ်တီႈလၢၼ်ႇလၵ်းတႅင်ႇ ဢိူင်ႇပဵင်းလူင် ၸႄႈဝဵင်း ဝဵင်းႁဵင် ၸႄႈတွၼ်ႈၵဵင်းမႆႇ ။

ဝၼ်းတီႈ 21/02/2016 ၶၢဝ်းယၢမ်း 13:00-14:00 မူင်း ၽူႈၵွၼ်း ၸႄႈဝဵင်း ဝဵင်းႁႅင်ဢွၼ်ႁူဝ် ၽူႈမီးၸၼ်ႉၼႂ်းႁွင်ႈၵၢၼ် လူင်ပွင်ၸိုင်ႈၼႂ်းဝဵင်းႁႅင် လၢႆလၢႆႁွင်ႈၵၢၼ် ႁူပ်ႉထူပ်း ၽူႈၼမ်းၽႂ်မၢၼ်ႈ ဢၼ်မီးၽူႈၵွၼ်းတပ်ႉပိဝ်ႇႁႃႇ မိူင်းတေႃႉ / မိူင်းထႃး မိၼ်းသေႃႇလိၼ်း ဢွၼ်ႁူဝ် ၽူႈမီးၸၼ်ႉၼႂ်းတပ်ႉ လၢႆလၢႆၵေႃႉသေ ဢုပ်ႇဢူဝ်းၵၼ် တႃႇသၢင်ႈ လွင်ႈၸမ်ၸႂ်ၵၼ်တင်းသွင်မိူင်းလႄႈ တႃႇပိုတ်ႇလၢၼ်ႇၸွမ်း လႅၼ်လိၼ် မိူင်းမၢၼ်ႈလႄႈမိူင်းထႆး 4  တီႈ ၼႆယဝ်ႉ ။


မိၼ်းသေႃႇလိၼ်း “ ႁဝ်းၶႃႈတႄႉၶႂ်ႈပိုတ်ႇယူႇ ယွၼ်ႉဝႃႈ မၼ်းမီးၽွၼ်းလီ တႃႇၵူၼ်းမိူင်းႁဝ်းၶႃႈ တင်းသွင်ၾၢႆႇတႄႉတႄႉ ၼင်ႇႁိုဝ် မိူင်းႁဝ်းတင်းသွင်မိူင်းၵေႃႈ ပေႃးတေလႆႈမီးလွင်ႈ မိုတ်ႈၵိုဝ်းၸမ်ၸႂ်ၵၼ် တေၶိုၼ်ႈယႂ်ႇ မၼ်ႈၵိုမ်း။ ႁဝ်းၶႃႈ ဢၼ်မႃးပၵ်းတပ်ႉယူႇတီႈၼႆႈတႄႉ ၼင်ႇႁိုဝ် ပေႃးတေမီးလွင်ႈႁူမ်ႇလူမ်ႈလႄႈ ၵတ်းယဵၼ်ၼႂ်းမိူင်းႁဝ်းၵူၺ်း ၊ ပေႃးဝႃႈတႃႇတေပိုတ်ႇလၢၼ်ႇ ဢၼ်ဝႃႈၼၼ်ႉ ၶႃႈႁဝ်းၶဝ် ဢမ်ႇမီးၶႂၢင်ႉတႃႇတေပိုတ်ႇလႆႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ “ ၼင်ႇႁိုဝ် ပေႃးပဵၼ်တၢင်းၵၢၼ်  ပိုတ်ႇလၢၼ်ႇၵႂႃႇၸိုင် ယူႇတီႈ လုမ်းၽွင်းတၢင်မိူင်းမၢၼ်ႈ ဢၼ်ပၵ်းဝႆႉတီႈ ၵဵင်းမႆႇလႄႈသင် ၊ ၵမ်မၵၢၼ် ၾၢႆႇလႅၼ်လိၼ်ႁဝ်းၸိူဝ်းၼႆႉလႄႈသင် ၶဝ်ၸိူဝ်းၼႆႉ တေဢဝ်ၶေႃႈမုၼ်းၸိူဝ်းၼႆႉသေ တၢင်ႇၶိုၼ်ႈပၼ်တင်းၼိူဝ်ၵွၼ်ႇ ယူႇတီႈလူင်ပွင်ၸိုင်ႈ သင်ႇလူင်းမႃးၸိုင် ၸင်ႇတေပိုတ်ႇလၢၼ်ႇလႆႈ ” ။


ၾၢႆႇတၢင်းထႆးတႄႉ တၢင်ႇလၢတ်ႈၼႄလၢႆလၢႆလွင်ႈ မိူၼ်ၼင်ႇ ၵၢၼ်ပိုတ်ႇလၢၼ်ႇၼႆႉ  ၼင်ႇႁိုဝ် ၵူၼ်းမိူင်းတင်းသွင်မိူင်း ႁူမ်ႈၵၼ်သေ ႁႂ်ႈမီးၵၢၼ်လူႇ ၵၢၼ်တၢၼ်း ၵၢၼ်လဵၼ်ႈဢဵၼ်ႁႅင်း ၊ မီးၵၢၼ်ၵႃႉၶၢႆ ၵၼ်လဵၵ်ႉလဵၵ်ႉၼွႆႉၼွႆႉလႄႈ  ၼႄၾိင်ႈငႄႈၾိင်ႈထုင်း ။ ထႅင်ႈဢၼ်ၼိုင်ႈသမ်ႉ ၾၢႆႇသိုၵ်းၼင်ႇၵၼ် ႁႂ်ႈမီးတၢင်းႁူမ်ႈမိုဝ်းၵၼ်ယႃႇၽဝ်ၾႆး ၊ ပႃႇမႆႉ ပႃႇထိူၼ်ႇၵေႃႈႁႂ်ႈၸွႆႈၵၼ်တူၺ်း ၊ လွင်ႈယႃႈမဝ်းၵမ်လႄႈ လွင်ႈၵူၼ်းၶဝ်ႈ / ဢွၵ်ႇ ၸဵမ်ၸိူဝ်းၼႆႉ ၼႆသေ တင်းသွင်ၾၢႆႇႁႂ်ႈလႆႈႁူမ်ႈမိုဝ်းၵၼ်ႁဵတ်းၵၢၼ်ၵႂႃႇ ။


ဝၼ်းတီႈ 23/02/2016 ၼႆႉ ယူႇတီႈလုမ်းၽွင်းတၢင် မိူင်းထႆးလႄႈ လုမ်းၽွင်းတၢင် မိူင်းမၢၼ်ႈ ဢၼ်ပၵ်းဝႆႉတီႈၵဵင်းမႆႇ တေလူင်းပိုၼ်ႉတီႈ ထတ်းသၢင်တူၺ်း လၢၼ်ႇလႅၼ်လိၼ် 4  တီႈ ။


1. လၢၼ်ႇၶုၼ်ယူမ်း မႄႈႁွင်ႈသွၼ် ၊ 2.  လၢၼ်ႇလၵ်းတႅင်ႇ ၊ 3. လၢၼ်ႇၼွင်ဢုၵ်း / ပူင်ႇပႃႇၶႅမ်၊ 4. လၢၼ်ႇသျၢႆးပရႃႊၵၢၼ်ႊ ၸဵမ်ၸိူဝ်းၼႆႉ ။


လုင်းသိူဝ်လမ် ၽူႈၼမ်းပွၵ်ႉဝၢၼ်ႈလွႆပဵင်းလူင် လၢတ်ႈဝႃႈ “ ၼင်ႇႁိုဝ် ပေႃးတေပိုတ်ႇလၢၼ်ႇ ပဵၼ်တၢင်းၵၢၼ်ၼၼ်ႉ တႆးတင်းထႆးၼႆႉ ၾၢႆႇထႆး လႆႈၶတ်းၸႂ်မႃးလၢႆလၢႆၵမ်းယဝ်ႉ  မိူၼ်ၼင်ႇ ၵႂႃႇႁူမ်ႈလူႇတၢၼ်းၽြႃးဝႃႈ ၊ ႁူမ်ႈလူႇတၢၼ်း သွင်းၾႃႉပႃႇ တီႈမိူင်းတေႃႉမိူင်းထႃး ၸဵမ်ၸိူဝ်းၼၼ်ႉ တင်းၾၢႆႇထႆးၵေႃႈ ၵႂႃႇႁူမ်ႈမႃးတင်းၼမ်ယဝ်ႉ ” ဝႃႈၼႆ ။


မိူဝ်ႈပူၼ်ႉမႃး ယင်းယၢမ်ႈမီးၵၢတ်ႇႁူမ်ႈၵၼ် (ဢၼ်ႁွင်ႉဝႃႈၵၢတ်ႉၼတ်း) ၼိုင်ႈဝူင်ႈလႂ် ၼိုင်ႈပွၵ်ႈ ။  တီႈလၢၼ်ႇလၵ်းတႅင်ႇ ။ ၵူၺ်းၵႃႈ မီးလွင်ႈပၼ်ႁႃၼႆလႄႈ လႆႈဢိုတ်းၵႂႃႇ ။