ပႃႊတီႊႁူဝ်သိူဝ် SNLD ဢွၼ်ႁူဝ်ၸတ်းႁဵတ်း ပၢင်ၾိုၵ်းၾွၼ်ႉ တႃႇပူၵ်းပွင် ပၢႆးပၼ်ၺႃ တႃႇၵူၼ်းၼုမ်ႇ မိူင်းယႆ ၽူႈၶဝ်ႈႁူမ်ႈမီး 200 ပၢႆ ။

ဝၼ်းတီႈ 18/02/2016 ၶၢဝ်းယၢမ်း 17:00 မူင်းပၢႆ ပႃႊတီႊႁူဝ်သိူဝ် SNLD ဢွၼ်ႁူဝ်ၸတ်းႁဵတ်းပွႆးလူင်းပၢင်ၾိုၵ်းၾွၼ်ႉ လၢႆးပူင်သွၼ် လိၵ်ႈလၢႆး ပွၵ်ႈၵမ်းႁႅၵ်ႈ တီႈဝတ်ႉသႅင်မိူင်း ၸႄႈဝဵင်းမိူင်းယႆ ၸိုင်ႈတႆး ပွတ်းႁွင်ႇ ။ ၼင်ႇႁိုဝ် ၵူၼ်းၼုမ်ႇ ပေႃးတေမေႃၽႅၼ်ၵၢၼ် ပူၵ်းပွင်ပၼ် ပၢႆးပၺ်ၺႃ ၼႂ်းဝဵင်းမိူင်းယႆ ဝႃႈၼႆ ။


ၸၢႆးသိူဝ်ဢွၼ်ႇမိူင်း ၵႅမ်ၽူႈၼမ်းၼႂ်း ပႃႊတီႊႁူဝ်သိူဝ် ဝဵင်းမိူင်းယႆ လၢတ်ႈဝႃႈ “ ယိူင်းဢၢၼ်းတႄႉ တႃႇလုၵ်ႈဢွၼ်ႇတႆး ၼႂ်းမိူင်းယႆတေႁူႉလိၵ်ႈတႆး ၵူႈၵေႃႉ ၼင်ႇႁိုဝ် မေႃသွၼ်လိၵ်ႈတႆး ပေႃးတေၵုမ်ႇထူၼ်ႈ လိၵ်ႈလၢႆးတင်းႁူႉၼမ် ၊ ၼင်ႇႁိုဝ် မေႃသွၼ်ႁဝ်းၶႃႈ ပေႃးတေမီးၼမ်ႉၵတ်ႉမႃးထႅင်ႈ ” ဝႃႈၼႆ ။


ၸၢႆးၵျေႃႇလ မေႃသွၼ်ၵေႃႉဢၼ်မႃးၶိုၼ်ႈႁဵၼ်း လၢတ်ႈဝႃႈ “ ပၢင်သွၼ်ၼႆႉ လီတွၼ်ႈတႃႇ ႁဝ်းၵူႈဢၼ်ဢၼ်ၶႃႈ ။ ၸဵမ်ပိူင်သွၼ် ပိူင်ယူႇ ပိူင်ၵိၼ် ၼႂ်းၶၢဝ်းတၢင်း 15 ဝၼ်းၼႆႉ ႁဝ်းၶႃႈ လႆႈတၢင်းႁူႉတၢင်းႁၼ်ၼမ် ၊ မေႃဝူၼ်ႉမႄးတူဝ်ၸဝ်ႈၵဝ်ႇၶိုၼ်း ။ တၢင်းယၢပ်ႇၾိုတ်ႇတႄႉ ပဵၼ် ပၢႆးသၢႆႊ ယွၼ်ႉဝႃႈ ဢမ်ႇလႆႈႁဵၼ်းမႃး ၸဵမ်လဵၵ်ႉလႄႈ ပဵၼ်ဢၼ်ယၢပ်ႇၾိုတ်ႇဝႆႉယူႇ ” ဝႃႈၼႆ ။


ပၢင်ၾိုၵ်းၽွၼ်ႉၼႆႉ ၶူးပူင်သွၼ်လူင် မီးလုင်းၸၢႆးၾႃႈလႄႈၸုမ်းမေႃသွၼ် 5 ၵေႃႉ ဢွၼ်ႁူဝ်ၼမ်းၼႃႈ ပူင်သွၼ်ပၼ် ။ ၽႃသႃ ဢၼ်ပူင်သွၼ်ပၼ်သမ်ႉ ၽႃသႃလိၵ်ႈလၢႆးတႆး ၊ ပၢႆးသၢႆႊ ၊ ပၢႆးၼပ်ႉလႄႈ လွင်ႈၵိၼ်ယူႇ ၾိင်ႈယူႇသဝ်း ၸိူဝ်းၼႆႉ ။


ပၢင်ၾိုၵ်းၾွၼ်ႉၼႆႉ ၸတ်းႁဵတ်းမႃး ဝၼ်းတီႈ 03-18/02/2016 ၶၢဝ်းတၢင်း 15 ဝၼ်း ၶူးသွၼ် ဢၼ်မႃးၶိုၼ်ႈလဵပ်ႈႁဵၼ်းသမ်ႉ ပဵၼ်ၵူၼ်းၼုမ်ႇ ၼႂ်းဝဵင်းမိူင်းယႆ 28 ဢိူင်ႇ ႁူဝ်ၵူၼ်း 218 ၵေႃႉ ။