ပူၼ်ႉမႃးမိူဝ်ႈဝၼ်းတီႈ 31/01/2016 ၼႆႉ သင်ၶတႆးၸိုဝ်ႈသဵင်ယႂ်ႇ ၸဝ်ႈသုၶမ်း (တၢင်ႉယၢၼ်း) တၵ်ၵသီလမႁႃထမ်မႃၸရိယ ၊ ၵမ်မၻ်ထႃၼႃၸရိယ M.A (Buddhism), M.A (Sri Lanka) ဢၼ်ပဵၼ်တူၼ်ၸဝ်ႈ ၽူႈပိုၼ်ၽႄႈသႃသၼႃမိူင်းသၼ်လွႆ လႆႈလုၵ်ႉမိူင်းတႆးမႃးႁေႃးထမ်းတရႃး (တြႃး) ပၼ်ပီႈၼွင်ႉတႆး ၸိူဝ်းတူၵ်းႁွတ်ႈထိုင်မိူင်းထႆး တီႈဝတ်ႉမႂ်ႇ သႃထုပရႃၻိတ်ႇ ၶဵတ်ႇယၢၼ်းၼႃးဝႃး ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး ။ မီးပီႈၼွင်ႉတႆး မႃးထွမ်ႇငိၼ်းၼမ်တႄႉတႄႉ ။

လၢတ်ႈလႆႈဝႃႈ ပီႈၼွင်ႉတႆးၼႆႉ ၵိူဝ်းလီၼပ်ႉထိုဝ်ယုမ်ႇယမ် ရတၼႃသၢမ်ၸဝ်ႈပုတ်ႉထၽရႃး (ၽြႃး) ၊ ထမ်းမတရႃး (တြႃး) ၊ သင်ၶၸဝ်ႈတႄႉတႄႉ ။ ယင်းလႆႈႁၼ်ဝႃႈ ပီႈၼွင်ႉတႆးၼႆႉ မိုတ်ႈသူင်ႁၵ်ႉလွင်ႈငမ်းယဵၼ် ၊ ၵမ်ႈၼမ်ပဵၼ်ၵူၼ်းၸႂ်လီလႄႈ ပဵၼ်ၵူၼ်းလီၸႂ် ၊ မီးလွင်ႈပိတိၸူမ်းသိူဝ်း လွင်ႈတူဝ်ၵဝ်ႇပဵၼ်ယူႇမီးယူႇ ၊ မီးလွင်ႈႁၢၼ်ႉၸႂ် ပဵင်းပေႃးၸႂ်ၼိူဝ် လွင်ႈလႆႈၵိူတ်ႇမႃး ပဵၼ်ၸၢဝ်းပုတ်ႉထ သႃသၼႃတႄႉတႄႉ ။ ႁူမ်ႈဝႃႈမႃးႁဵတ်းၵၢၼ်ယူႇတီႈမိူင်းၵႆၵေႃႈ ပေႃးဝႃႈမီးပၢင်ပွႆးထမ်း ႁေႃးတရႃးၼႆ ၸမ်ၵႆဢမ်ႇဝႃႈ ၸူဝ်းႁွင်ႉၵၼ်မႃးထွမ်ႇမႃးငိၼ်း မႃးလူႇမႃးတၢၼ်း မႃးဝႆႈမႃးသႃ ပိူဝ်ႈတႃႇပဵၼ်ၼႃးမုၼ်းတၢင်းလီတူဝ်ၵဝ်ႇ ၼၼ်ႉယဝ်ႉ ။


သင်ၶၸဝ်ႈၼႂ်းတႆး ဢၼယုၵ်ႉတူဝ်မႃးႁေႃးထမ်း တီႈဝတ်ႉမႂ်ႇၼႆႉ ဢမ်ႇၵွမ်ႉၵႃႈ ၸဝ်ႈသုၶမ်းၵူၺ်း ၊ ၵႃႈပူၼ်ႉမႃး မိူၼ်ၼင်ႇ တူၼ်ၶူးၸဝ်ႈတႃသႅင်ၵေႃႈ မိူဝ်ႈၽွင်းမၼ်းၸဝ်ႈ တိုၵ်ႉမီးမိူင်းၵူၼ်းယူႇၼၼ်ႉ ယၢမ်ႈယုၵ်ႉတူဝ်မႃးႁေႃးထမ်းတရႃး တီႈဝတ်ႉမႂ်ႇၼင်ႇၵဝ်ႇ ။ လိူဝ်ၼၼ်ႉ ယင်းမီးသင်ၶၸဝ်ႈမုၼ်ယႂ်ႇၼႂ်းတႆး မႃးႁေႃးထမ်းတီႈၼႆႈ လၢႆၸဝ်ႈလၢႆတူၼ် ။ မီးပၢင်ထမ်းတရႃးမိူဝ်ႈလႂ်ဢမ်ႇဝႃႈ မီးပီႈၼွင်ႉတႆး ဢွၼ်ၵၼ်မႃးထွမ်ႇငိၼ်း ၼပ်ႉႁူဝ်ပၢၵ်ႇ တႃႇသေႇ ။


ဝတ်ႉမႂ်ႇတႆး ၵုင်းထဵပ်ႈ (ဝဵင်းလူင်မိူင်းၵွၵ်ႇ) ၸိုင်ႈထႆးၼႆႉ ပီႈၼွင်ႉတႆးၼႂ်းမိူင်းတႆး / မိူင်းထႆး ဢိၵ်ႇတင်းသင်ၶၸဝ်ႈၶဝ်လၢႆၸဝ်ႈလၢႆတူၼ် လႆႈႁပ်ႉငိုၼ်းႁွမ်းတၢၼ်းမႃးလၢႆတီႈလၢႆတၢင်းလႄႈ ၵဵပ်းႁွမ်ၶွၼ်ႈတုမ်ၵၼ်သေသိုဝ်ႉဢဝ်တီႈလိၼ်ၽိုၼ်ၼႆႉမိူဝ်ႈ 2522 ၊ 2523 တႄႇၵေႃႇသၢင်ႈမႃးလႄႈ မီးၸုမ်းၶိူဝ်းတႆးသႃမၵ်းၶီး (ชมรมเครือไตยสามัคคี)  မိူင်းၵွၵ်ႇ ပတ်းပူလူလွမ်လုမ်းလႃးသိုပ်ႇၵေႃႇသၢင်ႈတေႃႇပေႃးပဵၼ်မႃးတိုၵ်း သၢမ်ၸၼ်ႉသေ သၢင်ႈထတ်ႈၸေးၻီးယိူင်ႈငၢႆးႁၢင်ႈၼႂ်းမိူင်းၵလႃး တီႈၽရႃးပဵၼ်ၸဝ်ႈၵိူတ်ႇ ယူႇၼိူဝ်ၸိၵ်းပဵၼ်ယွတ်ႈပၢႆ ပဵၼ်တီႈၸႂ်ယႂ်ႇၸႂ်ပိုင်ႈ တီႈၵိူဝ်းလီပီႈၼွင်ႉတႆး တႄႉတႄႉဝႃႈဝႃႈ ။ ယူႇတီႈၵိူတ်ႇမႃးပဵၼ်ၵူၼ်းၶိူဝ်းတႆး ၊ ပဵၼ်ၸၢဝ်းပုတ်ႉထသႃသၼႃၵေႃႉၼိုင်ႈသေ မီးလွင်ႈႁူမ်ၸူမ်းသိူဝ်းယိၼ်းလီၸွမ်း လႄႈယုၵ်ႉယွင်ႈ ဢဝ်ၵုၼ်းမုၼ် တၢင်ႇၸိၵ်းမွမ်ႈၸွမ်ႁူဝ် ယႂ်ႇၼမ်လူင်လၢင်တႄႉတႄႉဝႃႈဝႃႈ ။ ၵွပ်ႈဝႃႈ ဝတ်ႉမႂ်ႇၼႆႉ မီးၵုၼ်းမုၼ်ယႂ်ႇၼမ်ၼိူဝ်ၸိူဝ်ႉၶိူဝ်းတႆး ယႂ်ႇၼမ်လူင်လၢင် ၊ သင်ပဵၼ်ၾႃႉၵေႃႈ မုင်ႈတူၺ်းပေႃးဢမ်ႇႁၼ်ၶွပ်ႇ ၊ သင်ပဵၼ်ၼမ်ႉသမ်ႉမုတ်ႉတရႃႇလူင်ၵေႃႈ မုင်ႈတူၺ်းပေႃးဢမ်ႇႁၼ်ၾင်ႇ ။


လွင်ႈဝတ်ႉမႂ်ႇ ၵုင်းထဵပ်ႈ မီးၵုၼ်းမုၼ်ၼိူဝ်ၸိူဝ်ႉၶိူဝ်းတႆးၼၼ်ႉ မိူၼ်ၼင်ႇ ပဵၼ်တီႈသင်ၶၸဝ်ႈၸၢဝ်းတႆး ပိုင်ႈဢိင်ယူႇသဝ်းမႃးပီယၢဝ်းၶၢဝ်းႁိုင်။ ပဵၼ်ဢွင်ႈတီႈငဝ်ႈငုၼ်း / သုၼ်ၵၢင်သင်ၶတႆး ၵူႈတီႈၵူႈတၢင်း ပႃးၸဵမ်ၸိူဝ်းလုၵ်ႉမိူင်းတႆး မိူင်းမၢၼ်ႈ / ၼွၵ်ႈမိူင်း မႃးပိုင်ႈဢိင်လိုဝ်ႈသဝ်းၸူဝ်ႈၶၢဝ်း ၽွင်းယၢမ်းႁွတ်ႈၽႅဝ်ဝႆႉ တီႈမိူင်းၵွၵ်ႇ ၸိုင်ႈထႆး။ ပဵၼ်တီႈသင်ၶတႆး ၸိူဝ်းတေၵႂႃႇႁဵၼ်းလိၵ်ႈၼွၵ်ႈမိူင်းၸိူဝ်းၼႆႉ မႃးလိုဝ်ႈယူႇသဝ်း ႁၢင်ႈႁႅၼ်းတူဝ်ၸူဝ်ႈၶၢဝ်း ၊ ပဵၼ်တီႈသင်ၶၸဝ်ႈ ၸိူဝ်းမႃးႁဵၼ်းလိၵ်ႈလၢႆး လိၵ်ႈထမ်း ၶဝ်ႈၸၼ်ႉၸွမ်ၼႂ်းမိူင်းၵွၵ်ႇ ၸိူဝ်းၼႆႉ မႃးပိုင်ႈဢိင်ယူႇသဝ်း။ ပဵၼ်တီႈသင်ၶၸဝ်ႈ ၸိူဝ်းပၢႆးယူႇလီဢမ်ႇၶႅမ်ႉသေ လုၵ်ႉမိူင်းတႆး ၶဝ်ႈယူတ်းယႃတူဝ်ၼႂ်းမိူင်းထႆး ၸိူဝ်းၼႆႉမႃးလိုဝ်ႈမႃးသဝ်း ၸူဝ်ႈၵႅပ်ႉ - ၸိူဝ်းၼႆႉ ။


ၸွမ်းၼင်ႇၾိင်ႈငႄႈၾိင်ႈထုင်း ၸၢဝ်းပုတ်ႉထသႃသၼႃသေ ပီႈၼွင်ႉတႆးႁဝ်းၼႆႉ ထိုင်မႃးလိူၼ်သၢမ်ၵေႃႈ ပွႆးၶဝ်ႈယႃႇၵု ၵႂႃႇလူႇၵႂႃႇတၢၼ်း။ လိူၼ်ႁႃႈၵေႃႈ ပဵၼ်ပွႆးသွၼ်းၼမ်ႉ ၊ လိူၼ်ပႅတ်ႇမူၼ်း ပွႆးၶဝ်ႈဝႃႇသႃ ၊ လိူၼ်သိပ်းဢဵတ်းမူၼ်း ပွႆးဢွၵ်ႇဝႃႇ ၊ လိူၼ်သိပ်းသွင်မူၼ်း ပွႆးၵထိၼ် လူႇတၢၼ်းၽႃႈလိူင် (သၢင်ႇၵၢၼ်း) ၸိူဝ်းၼႆႉ မီးပီႈၼွင်ႉတႆး ၸိူဝ်းတူၵ်းႁွတ်ႈထိုင်မိူင်းၵွၵ်ႇ ဢွၼ်ၵၼ်မႃးၶဝ်ႈဝတ်ႉၶဝ်ႈဝႃး ပေႃးၵိုၼ်းလူင်ဝႆႉဢိုၵ်ႉဢိုၵ်ႉ တႃႇသေႇ ။ ႁဵတ်းႁႂ်ႈပီႈၼွင်ႉတႆး လႆႈမႃးႁူမ်ႈလူႇတၢၼ်း ႁူမ်ႈၼမ်ႉယၢတ်ႇၵၼ် ၊ လႆႈမႃးမိုတ်ႈၵိုဝ်းႁူႉၸၵ်းၵၼ် သၢင်ႈလွင်ႈၸမ်ၸႂ်ၵၼ် ၊ ပီႈၼွင်ႉၵၼ် ဢူၺ်းၵေႃႉၵၼ် ၽၢတ်ႇၵၼ်ႁိုင်ယဝ်ႉၵေႃႈ မီးတိုဝ်ႉတၢင်းၶိုၼ်းမႃးႁၼ်ၵၼ် တီႈဝတ်ႉမႂ်ႇ ၊ ပဵၼ်တီႈၼတ်ႉၵၼ် ၊ ၶိၼ်းၵၼ် မႃးထူပ်းၵၼ်ၸိူဝ်းၼႆႉ ။


ၼွၵ်ႈသေၼၼ်ႉ ၵူၼ်းၸိူဝ်းတူၵ်းၵၢၼ်တူၵ်းငၢၼ်း မၢင်မိူဝ်ႈမၢင်ပွၵ်ႈၵမ်ႈၽွင်ႈၵေႃႈ ယၢမ်ႈမႃးပိုင်ႈဢိင် လိုဝ်ႈသဝ်း တီႈဝတ်ႉမႂ်ႇ တေႃႇပေႃးလႆႈၵၢၼ်ၵေႃႈမီး ။ ပဵၼ်တီႈၵူၼ်းၼုမ်ႇၶွၼ်ႈတုမ်ၵၼ် တူင်ႉၼိုင်ၵၢၼ်လိၵ်ႈလၢႆး ၽႃသႃၵႂၢမ်းလၢတ်ႈ ၸိူဝ်းၼႆႉ ။


ပဵၼ်တီႈတူင်ႉၼိုင် တူင်ႇဝူင်းၵူၼ်း မိူၼ်ၼင်ႇၽူႈယႂ်ႇၵူၼ်းလူင်ၼႂ်းတႆး မႃးႁူပ်ႉထူပ်းၵၼ် ။ သင်ၶၸဝ်ႈၸၼ်ႉၽူႈၼမ်း မႃးႁူပ်ႉထူပ်း ဢုပ်ႇၵုမ်ၵၼ် ၵဵဝ်ႇလွင်ႈၼႃႈၵၢၼ်သႃသၼႃ ။ မိူဝ်ႈပီႈၼွင်ႉၸိူဝ်းၶိူဝ်းႁဝ်း ၼႂ်းၸိုင်ႈမိူင်းႁူမ်ႈတုမ်မျၢၼ်ႇမႃႇထူပ်းၽေး မိူၼ်ၼင်ႇၵူၼ်းမိူင်းတႆးႁဝ်း ထူပ်းၽေးသိုၵ်းလႄႈသင် ၊ ထူပ်းၽေးၼမ်ႉထူမ်ႈလႄႈသင် ၊ ထူပ်းၽေးၽႅၼ်ႇလိၼ်ဝႆ (ဢိင်ႇသၼ်ႇ) ၸိူဝ်းၼႆႉလႄႈသင် ၊ ပိူဝ်ႈတႃႇႁႃငိုၼ်းၵွင်ၵၢင်ၸွႆႈထႅမ်ၼၼ်ႉ မၢင်ပွၵ်ႈၸတ်းႁဵတ်းပၢင်ပွႆးႁွင်ႉၵႂၢမ်း ၊ မီးၽူႈႁွင်ႉၽဵင်းၵႂၢမ်းၸိုဝ်ႈသဵင်ယႂ်ႇၶဝ် မႃးလဝ်ႇမူၼ်ႈတူၼ်ႈၸႂ်ပၼ်ၵေႃႈမီးမႃး ။ ပေႃးထိုင်မႃး ၶၢဝ်းဢွၵ်ႇဝႃႇ ပဵၼ်ပွႆးတဵၼ်းၸိူဝ်းၼႆႉ ယၢမ်ႈမီးတၢင်းၵႃႈၼူၵ်ႉၵႃႈတူဝ်း ႁွင်ႉၵႂၢမ်းပၢၼ်ၵဝ်ႇ ၊ ၵႃႈလၢႆးမွၵ်ႇမိုဝ်း လၢႆးသႅၼ်ႉလၢႆးၸိူင်း ၸိူဝ်းၼႆႉလူးၵွၼ်ႇ ။


ပိူဝ်ႈတႃႇၼႃႈၵၢၼ်လိၵ်ႈလၢႆးတႆးၵေႃႈ ၵႃႈပူၼ်ႉမႃး ဢၼ်သင်ၶၸဝ်ႈၶဝ် ႁပ်ႉလူင်းၾွၼ်ႉယူႊၼီႊၶူတ်ႉတႆး ၼႂ်းၶိူင်ႈၾူၼ်ႊ / မိုဝ်းထိုဝ် ၊ ၼႂ်းၶိူင်ႈၶွမ်ႊၼူတ်ႊၿုၵ်ႊ ၸိူဝ်းၼႆႉၵေႃႈ ၸတ်းပၢင်လူင်းၾွၼ်ႊတႆး တီႈဝတ်ႉမႂ်ႇ ။ ဝတ်ႉထုငိုၼ်းတွင်း ဢၼ်ၽူႈမႃးလူင်းၾွၼ်ႈၶဝ် လူႇတၢၼ်းပၼ်ၼၼ်ႉၵေႃႈ လႆႈၵဵပ်းႁွမ်ၶွၼ်ႈတုမ်ၵၼ်သေ သူင်ႇမိူဝ်းၸွႆႈ ၵူၼ်းထူပ်းၽေး ၼႂ်းမိူင်းတႆး ။


ၸင်ႇဝႃႈတီႈဝတ်ႉမႂ်ႇၼႆႉ ၽႂ်ၶႂ်ႈၸွႆႈထႅမ်ၶူဝ်းၶွင်သင် ၊ ဢမ်ႇဝႃႈ ၽႃႈႁူမ်ႇၶူဝ်းၼွၼ်း ၊ ၶွင်ၵိၼ်တၢင်းယႅမ်ႉ ၊ ၶိူင်ႈၸႂ်ႉၶူဝ်းသွႆၸိူဝ်းၼႆႉၵေႃႈ ပဵၼ်ဢွင်ႈတီႈၵဵပ်းႁွမ်တွမ်တုမ်ပၼ် တီႈၼိုင်ႈ ။ မၢင်ပွၵ်ႈပေႃးပဵၼ်ပွႆးပဵၼ်လၢမ်းမႃး မီးမူႇၸုမ်းပီႈၼွင်ႉတႆး ၸတ်းၵၢၼ်တူင်ႉၼိုင် ၵႃႈၼူၵ်ႉၵႃႈတူဝ်း ၊ ၵႃႈလၢႆး ၊ ႁွင်ႉၽဵင်းၵႂၢမ်းတူၵ်းသူး ႁႃငိုၼ်းၵွင်ၵၢင် တႃႇၸွႆႈထႅမ်ၵႃႈၵိၼ်ၵႃႈယႅမ်ႉ လုၵ်ႈဢွၼ်ႇၸိူဝ်းၽၢၼ်ပေႃႈမႄႈ တီႈႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း ၸိူဝ်းၼႆႉၵေႃႈမီးမႃး ။ ၵွပ်ႈၼၼ် ဝတ်ႉမႂ်ႇၼႆႉ မီးၼမ်ႉတွၼ်းၽွၼ်းလီ ပိူဝ်ႈတႃႇတႆးတႄႉတႄႉ ။


လွင်ႈဝတ်ႉမႂ်ႇ မီးၵုၼ်းမုၼ်ၼိူဝ်ၸိူဝ်ႉၶိူဝ်းတႆးၼၼ်ႉ ဢမ်ႇၵွမ်ႉၵႃႈဢၼ်လၢတ်ႈၵႂႃႇၸိူဝ်းၼႆႉၵူၺ်း ၊ ယင်းတေမီးထႅင်ႈလၢႆၸိူဝ်ႉလၢႆပိူင် ဢၼ်ဢမ်ႇၶုၵ်းၶူၼ်ႉဝူၼ်ႉမႅၼ်ႈလႄႈ ဢမ်ႇလႆႈတူၵ်ႇလၢတ်ႈပႃး ၵေႃႈတေမီးထႅင်ႈတင်းၼမ် ။ ၶူင်းၵၢင်လူင်ၼႆႉ ၽူႈလႂ်ၽႂ်ၵေႃႈ ဢမ်ႇတဵမ်ထူၼ်ႈလႆႈၵူႈၸိူဝ်ႉၵူႈယိူင်ႈ ၊ ဢမ်ႇႁူႉၸွတ်ႇႁူႉၸေး ၊ ဢမ်ႇႁၼ်ၵူႈၸွၵ်ႉၵူႈၸဵင်ႇ ၊ ဢမ်ႇဝၵ်ႉတၢဝ်းယိုၼ်းထိုင်လႆႈၵူႈတီႈ ၊ တေႃႈၼင်ႇၸၢင်ႉမီးသီႇတိၼ်ၵေႃႈ ယင်းၸၢင်ႈပလၢတ်ႈ ၸွမ်းၼင်ႇၵႂၢမ်းမီးဝႆႉၼၼ်ႉယူႇ ။


လိုၼ်းသုတ်းၼႆႉ ၶႂ်ႈယွၼ်းၾၢၵ်ႇၵႂၢမ်းတွၼ်ႈထိုင် တီႈၸိူဝ်ႉၶိူဝ်းႁဝ်း ၵူႈၵေႃႉၵူႈၸဝ်ႈဝႃႈ ထွတ်ႈမျၢတ်ႈသီႇယိူင်ႈ ဢၼ်ပဵၼ်ၸိူဝ်ႉၸၢတ်ႈ ဝၢၼ်ႈမိူင်း ၽႃသႃ သႃသၼႃႇႁဝ်းၼႆႉ ၶႂ်ႈႁႂ်ႈၶိူဝ်းတႆးႁဝ်းယုၵ်ႉယွင်ႈတၢင်ႇသုင် ဢဝ်တၢင်ႇသီႈမွမ်ႈၸွမ်ႁူဝ်ဝႆႉယူႇတႃႇသေႇ ။ ၵုၼ်းမုၼ်ဢၼၼ်တရိယႁႃႈၸဝ်ႈ ဢၼ်ပဵၼ်ပုတ်ႉထ ထမ်သ သင်ၶ ၊ ပေႃႈမႄႈလႄႈၶူးဝႃးႁဝ်းၵေႃႈ ယႃႇပေလိုမ်းၵၼ်သေၵမ်း ။ ၸဝ်ႈသုၶမ်း မႃးပွၼ်ႈသွၼ်ႁေႃးထမ်းပွၵ်ႈၼႆႉၵေႃႈ ႁႂ်ႈပီႈၼွင်ႉႁဝ်းတင်းသဵင်ႈ ဢဝ်ႁူသႅင်ႁူၶမ်းထွမ်ႇမႅၼ်ႈသေ မေႃယိူင်ႈလူတိုဝ်းၵမ်ႁဵတ်းၸွမ်းလႄႈ ယူႇလူၺ်ႈသိလ်ထမ်းၵၼ်ၵူႈၵေႃႉ ၊ ထွမ်ႇငိၼ်းၵႂၢမ်းထမ်းၵႂႃႇယဝ်ႉ ယႃႇပေႁႂ်ႈပဵၼ်လၢႆးၶဝ်ႈႁူသၢႆႉ ဢွၵ်ႇႁူၶႂႃ မိူၼ်ၼင်ႇပိူၼ်ႈဢဝ်ၼမ်ႉထွၵ်ႇသၢႆးသေၵမ်း ။

ၸၢႆးၽွၼ်းလီ03/02/2016