ပေႃးဝူၼ်ႉတူၺ်းၶိုၼ်းၸိုင် ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ တဵမ်မႃး 69 ပီ တေယင်ႈၶဝ်ႈၸူး 70 ပီယဝ်ႉ ။

ပေႃးဝႃႈ ဢဝ်ဢႃယု ၸူဝ်ႈပၢၼ် မၼ်းဝႃႈၼႆၸိုင် ပဵင်းၸူဝ်ႈပၢၼ် ၵူၼ်းၼိုင်ႈၸူဝ်ႈပၢၼ်ယဝ်ႉ ။ ၼႂ်းၶၢဝ်းတၢင်း 69 ပီ ပီႈၼွင်ႉၵူၼ်းမိူင်းတႆးႁဝ်း ဢမ်ႇတွၼ်ႉလႆႈယူႇသႃႇ ၵိၼ်ဝၢၼ် ၼွၼ်းလပ်းမႃးလီလီ သေပွၵ်ႈ ။ လႆႈႁွင်ႉ လႆႈႁႆႈ လႆႈပၢႆႈ ။ ထုၵ်ႇၵၼ်ႉၸၼ်လူလၢႆ တဵၵ်းတဵင်  ပေႉၵိၼ်မႃး  ပီယၢဝ်းၶၢဝ်းႁိုင် ၊ ၸွင်ႇမီးၽႂ် ႁပ်ႉႁူႉၸွမ်း ၊ ၸွင်ႇမီးၽႂ်ႁၼ်ထိုင်ၸွမ်း လွင်ႈပဵၼ်မႃး ၸိူဝ်းၼႆႉႁိုဝ် ?


ၶုၵ်းၶူၼ်ႉဝူၼ်ႉတူၺ်းလူး ၊ ႁဝ်းပီႈၼွင်ႉ ၸႃႉႁူမ်ႈၶီ လီႁူမ်ႈသိူဝ်း ယူႇႁူမ်ႈႁိူၼ်းလဵဝ်ၵၼ်မႃး  ပီယၢဝ်းၶၢဝ်းႁိုင် ။ ၵိၼ်ၶဝ်ႈမေႃႈလဵဝ်ၵၼ်မႃး ၸဵမ်လဵၵ်ႉတေႃႇယႂ်ႇ ။ ဢမ်ႇတွၼ်ႉၽိတ်းၽႅၵ်ႇ လႃႇ ဝႃႈၵၼ် ၊ ဢဝ်မၢၵ်ႇဢူၵ်းႁူဝ်ၸႂ် ႁၵ်ႉပီႈႁၵ်ႉၼွင်ႉသေ မီးတၢင်းယၢပ်ႇပၼ်ႁႃၵေႃႈ ဢုပ်ႇဢူဝ်း ၸွႆႈၵၼ်ၵႄႈလိတ်ႈ ၸွမ်းၵၼ်တႃႇသေႇ ။ ဢမ်ႇတွၼ်ႉပၼ်ႁႂ်ႈၼႃႈႁိူၼ်း သုၵ်ႉယုင်ႈ တႅၵ်ႈယၢႆႈ ။ မေႃယူႇႁူမ်ႈၵၼ် ၵိၼ်ၸွမ်းၵၼ်  မီးသင်ၵေႃႈ ဢမ်ႇထီႇဢမ်ႇၼဵဝ်တေႃႇၵၼ် ။ ယွၼ်ႉၽူႈဢွၼ်ႁူဝ် / ၸဝ်ႈၾႃႉ မိူင်းတႆးႁဝ်း မေႃဢုပ်ႉပိူင်ႇ သင်ႇသွၼ်ၶႃႈဝၢၼ်ႈၵူၼ်းမိူင်း - ႁဵတ်းႁႂ်ႈၵူၼ်းမိူင်းႁဝ်း မေႃႁၵ်ႉၵၼ် ၸွႆႈထႅမ်ၵၼ် ။


ထိုင်မႃးယၢမ်းလဵဝ် ႁဝ်းပီႈၼွင်ႉ ဢမ်ႇၸွႆႈၵၼ်ၵႄလိတ်ႈ ပၼ်ႁႃယဝ်ႉ ။ ၽႂ်ၵေႃႈဝႃႈၽႂ်ထုၵ်ႇ ဢမ်ႇယွမ်းတေႃႇၵၼ် ႁိမ်ၵၼ် ထဵင်ၵၼ် ၽိတ်းၵၼ် ။ ႁိူၼ်းလင်ၼႆႉ ၵဝ်ၵေႃႈၶႂ်ႈလႆႈ ။ ထႅင်ႈၵေႃႉၼိုင်ႈ ၵေႃႈဝႃႈ တေဢဝ် ၽႃမၼ်း ၊ ထႅင်ႈၵေႃႉၼိုင်ႈ ဝႃႈ တေၵွၵ်းဢဝ် ပႅၼ်ႈသိူဝ်ႇမၼ်း ၊ ထႅင်ႈၵေႃႉၼိုင်ႈၵေႃႈလၢတ်ႈဝႃႈ ၶႂ်ႈလႆႈ ၶႃးမုင်း ႁိမ်ၵၼ် ၽိတ်းၵၼ် ။ ၵေႃႉပဵၼ်ပီႈဢၢႆႈလူင်သမ်ႉတေၵႂႃႇယူႇတီႈလႂ် သင်ဝႃႈၼွင်ႉယိင်း / ၸၢႆးၶဝ် ၵွၵ်းဢဝ် ထၢၵ်ႇဢဝ် ၶုတ်းဢဝ်ႁိူၼ်းၼႆႉၵႂႃႇ ၵေႃႉဢိတ်း ၵေႃႉဢွတ်း ၸိုင်ႉ……………………. ။


ပေႃးမႃးတူၺ်းၼႂ်းမိူင်းတႆးၼႆႉ မီးဝႆႉယူႇသၢမ်ပွတ်း ၊ ပွတ်းဢွၵ်ႇၶူင်း ၊ ပွတ်းၸၢၼ်း လႄႈ ပွတ်းႁွင်ႇ ၼႂ်းသၢမ်ပွတ်းၼႆႉ ပီႈၼွင်ႉၵူၼ်းမိူင်း ယူႇႁူမ်ႈၵိုၵ်းၵၼ်မႃး ၸဵမ်ၵွၼ်ႇဢွၼ် ။ ဢမ်ႇတွၼ်ႉၸႅၵ်ႈယႃႉ တီႈလိၼ် ႁိမ်ၵၼ် ၽိတ်းၵၼ် သေပွၵ်ႈ ။


ထိုင်မႃးယၢမ်းလဵဝ် ၸိုင်ႈတႆး ပွတ်းဢွၵ်ႇၶူင်းၵေႃႈ ပီႈၼွင်ႉဝႃႉ ယွၼ်းဢဝ်ပဵၼ် ၸႄႈမိူင်းဝႃႉ ၊ တၢင်းပွတ်းၸၢၼ်းၵေႃႈ ပီႈၼွင်ႉပဢူဝ်း ယွၼ်းႁႂ်ႈလႆႈပဵၼ် ၸႄႈမိူင်းပဢူဝ်း ၊ တၢင်းပွတ်းႁွင်ႇသမ်ႉ ပီႈၼွင်ႉပလွင်ႈ (တဢၢင်း)  ဢဝ်ပဵၼ် ၸႄႈမိူင်းပလွင်ႈ (တဢၢင်း) ။ ဢၢႆႈၸၢႆးၶႃလၢႆးသမ်ႉပိင်းလူး တေၵႂႃႇယူႇတီႈလႂ်ယဝ်ႉ ။ ပီႈၼွင်ႉၸိူဝ်းၶိူဝ်း ဢၼ်ၵိုတ်းဝႆႉၼၼ်ႉလူး တေၵႂႃႇဝႆႉတီႈလႂ် တေၵႂႃႇပႅတ်ႈတီႈလႂ် တေႁႂ်ႈၶဝ်ႁဵတ်းပႄးသေ ၵႂႃႇယူႇၼႂ်းၼမ်ႉပၢင်လၢႆႇၼႄႇ ။ ၶႂ်ႈယွၼ်းထၢမ်တူၺ်း  တေမီးၵေႃႉလႂ်တွပ်ႇပၼ်လႆႈ ။


တေႃႈလဵဝ်ႁိူၼ်းႁဝ်းၵေႃႈ ၵွတ်းၾၢၼ် လင်ၶႃႈမုင်းႁိူၼ်းႁဝ်းပီႈၼွင်ႉၵေႃႈႁူဝ်ႈ ၽႃႁိူၼ်းႁဝ်းၵေႃႈပွင်ႇ သဝ်ႁိူၼ်းႁဝ်းၵေႃႈ မွတ်ႈၸီး ပူၵ်ႇၵိၼ် ။ ႁဝ်းသမ်ႉ ဢမ်ႇဢွၼ်ၵၼ် မႄးၵုမ်း ပူၵ်းၶိုၼ်း သၢင်ႈၶိုၼ်း ႁႂ်ႈႁဝ်းပီႈၼွင်ႉ ပေႃးတေလႆႈယူႇႁူမ်ႈၵၼ်ၵတ်းၵတ်းယဵၼ်ယဵၼ် ။ ႁႂ်ႈႁဝ်းပီႈၼွင်ႉပေႃးတေလႆႈၼွၼ်းလပ်းၾၼ်လီၼၼ်ႉ ႁဵတ်းသင်ႁဝ်းသမ်ႉ ဢမ်ႇဢွၼ် ၵၼ်ႁဵတ်းသၢင်ႈ လွင်ႈမႄးလီၼႂ်းႁိူၼ်းႁဝ်း ။


ပၢႆလိူဝ်ႁိူၼ်းပေႃးယွၵ်းလႅဝ် ပေႃးပဵၼ်ထၢၼ်ႇၼႆႉ ႁဝ်းသမ်ႉတိုၵ်ႉ ႁိမ်ၵၼ် ယိုဝ်းၵၼ် ဢမ်ႇမေႃယွၼ်ႇယၢၼ်း ၶဝ်ႈႁႃၵၼ် ၊ ဢမ်ႇမေႃ ဝႆႉၸႂ်ႁၵ်ႉပီႈဢွၵ်ႇၼွင်ႉ ပဵၼ်မိူၼ်မိူဝ်ႈၵူႈပွၵ်ႈသေ ဢုပ်ႇဢူဝ်းၵႄႈလိတ်ႈၵၼ် ။


ႁိူၼ်းၵေႃႈ ပဵၼ်ႁိူၼ်းႁဝ်း မိူင်းၵေႃႈ ပဵၼ်မိူင်းႁဝ်း ႁဵတ်းသင်ႁဝ်းဢမ်ႇဢွၼ်ၵၼ် ႁႃတၢင်းၵႄႈလိတ်ႈ ႁိူၼ်းႁဝ်းၼၼ်ႉ တေပၼ်ၶႅၵ်ႇမႃးယူႇသဝ်း ဢဝ်လၢႆသေယဝ်ႉၼႄႇ။ လွင်ႈဢၼ်ၼၼ်ႉ ႁဝ်းတၵ်းလႆႈပွင်ႇၸႂ်ယူႇ လွင်ႈၽွမ်ႉႁူမ်ႈၼႂ်းႁိူၼ်းႁဝ်း ဢၼ်ႁဝ်းၼႆႉ မၼ်းမီးတီႈလႂ်ယဝ်ႉ သင်ဝႃႈႁဝ်းပီႈၼွင်ႉ ဢမ်ႇၽွမ်ႉႁူမ်ႈၵၼ် ၵႄႈလိတ်ႈၼႂ်းႁိူၼ်းႁဝ်းၵႂႃႇၸိုင် တိုၼ်းဝႃႈ တၢင်းၼႃႈၼႆႉ တေသိုပ်ႇပဵၼ်ၸၢတ်ႈၶီႈၶႃႈၵႂႃႇ ဢမ်ႇႁၢၼ်ႉ…………………… ။