လူင်ပွင်ၸိုင်ႈမၢၼ်ႈပိုၼ်ၽၢဝ်ႇဝႃႈ တေႁူမ်ႈမိုဝ်းၵၼ်တင်း ၶွမ်ႊပၼီႊ ၊ ႁူမ်ႈၵၼ်တေၶႂၢၵ်ႈသဵၼ်ႈတၢင်း ဝဵင်းလိူဝ်ႇ - မူႇၸေႊ လုၵ်ႉတီႈ 2 သဵၼ်ႈ ႁႂ်ႈပဵၼ် 4 သဵၼ်ႈ ။ တေႁႂ်ႈယဝ်ႉတူဝ်ႈၼႂ်းၶၢဝ်းတၢင်း 5 ပီ ။

ၶွမ်ႊပၼီႊ ORIENTAL HIGHWAY CO.,LTD  ၶိူဝ်းၶၢႆႇၶွမ်ႊပၼီႊ Asia World တေႁပ်ႉမဝ် ၵေႃႇသၢင်ႈ ၶႂၢၵ်ႈသဵၼ်ႈတၢင်း ၊ တေဢဝ်ၶၢဝ်းယၢမ်း 5 ပီ (တေႃႇပေႃးထိုင် ပီ 2020 ) ။ တေၸႂ်ႉငိုၼ်းၻေႃႊလိူဝ်ႊ 1 လၢၼ်ႉပၢႆသေၵေႃႇသၢင်ႈၵႂႃႇ ဝႃႈၼႆ ။


ၸဝ်ႈၵႃး လႃႈသဵဝ်ႈ - မူႇၸေႊ လၢတ်ႈဝႃႈ - ပေႃးၶႂၢၵ်ႈသဵၼ်ႈတၢင်းတႄႉ  ၸဝ်ႈၵႃး ၸူမ်းၶႃႈဢေႃႈ ။ ၵူၺ်းၵႃႈ မၢင်တီႈ တေလႆႈတတ်းပႃးၼႃႈလိၼ်သူၼ်ၵူၼ်းဝၢၼ်ႈၵူၼ်းမိူင်း ။ တေမီးလွင်ႈတုမ်ႉတိူဝ်ႉ ၸဝ်ႈႁႆႈၸဝ်ႈၼႃး ။ တၢင်းၶဝ်ႈမူႇၸေႈမွၵ်ႈ 15 လၵ်းၼႆႉၵေႃႈ လႅပ်ႈတေလႆႈတတ်းပႃးၼႃႈႁိူၼ်းၵူၼ်းဝၢၼ်ႈ ။ ႁၼ်ပၵ်း တုင်းသီလႅင်ဝႆႉပႃးၼႂ်းဝၢင်းႁိူၼ်း။ ၼႆႉၵေႃႈ လီလႆႈပႂ်ႉတူၺ်းဝႃႈ ၸွင်ႇၵူၼ်းဝၢၼ်ႈ တေလႆႈၵႃႈသၢႆႈတႅၼ်းၶိုၼ်း - ဝႃႈၼႆ ။


သဵၼ်းတၢင်းဢၼ်တေၶႂၢၵ်ႈၼႆႉ  သဵၼ်ႈတၢင်း ဢႃႊသျႅၼ်ႊ ႁၢႆႊဝေႊ မၢႆ (AH 14) ၼႆၵေႃႈႁွင်ႉ ။  ၵမ်ႈၼမ်တႄႉႁူႉၸၵ်းဝႃႈ ပီႇထွင်ႇၸုလၢၼ်းမၵျီး (သဵၼ်ႈတၢင်းလူင်မိူင်းႁူမ်ႈတုမ်) ၊  တိတ်းတေႃႇၵပ်းသိုပ်ႇပၼ်  ဝဵင်းလိူဝ်ႇ ၊ ပၢင်ႇဢူႈ ၊ ၵျွၵ်ႉမႄး ၊ သီႇပေႃႉ ၊ လႃႈသဵဝ်ႈ ၊ သႅၼ်ဝီ ၊ ၵူတ်ႉၶၢႆ ၊ ၼမ်ႉၽၵ်းၵႃ ၊ မူႇၸေႊ ၸိူဝ်းၼႆႉ ။ ပဵၼ်သဵၼ်ႈတၢင်း ဢၼ်ၵပ်းသိုပ်ႇတိတ်းတေႃႇၵႃႉၶၢႆ ဝဵင်းလိူဝ်ႇ - ၶုၼ်းမိင် (မိူင်းၶႄႇ) ၵမ်းသိုဝ်ႈ ။


ၵူၺ်းၵႃႈ တၢင်းၵႂၢင်ႈသဵၼ်ႈတၢင်းမီး 12 ထတ်း ၵူၺ်းလႄႈ မီးတၢင်းၵႂႃႇသဵၼ်ႈၼိုင်ႈ တၢင်းမႃးသဵၼ်ႈၼိုင်ႈၵူၺ်း ။ ယၢမ်းလဵဝ်တႄႉ တေဢၢၼ်းၶႂၢၵ်ႈ ႁႂ်ႈပေႃးၵႂႃႇမႃးလႆႈတႃႇ သီႇလမ်း ။


ၸၢႆးလွႆၶမ်းပၢင်ႇ ၵူၼ်းၼုမ်ႇ ၽူႈတူင်ႉၼိုင်သုၼ်ႇလႆႈၸဝ်ႈႁႆႈၸဝ်ႈၼႃး ၵေႃႈလၢတ်ႈဝႃႈ - ၸဵမ်မိူဝ်ႈတေတႄႇႁဵတ်းတၢင်းၼၼ်ႉ ၾၢႆႇၸဝ်ႈၼႃႈတီႈလႄႈ ၶွမ်ႊပၼီႊ တၵ်းလႆႈပွင်ႇၶၢဝ်ႇထိုင် ၵူၼ်းလူင်ဝၢၼ်ႈ ၊ ၸဝ်ႈၼႃးလႄႈ ၵူၼ်းဝၢၼ်ႈ ။ ၵူၺ်းၵႃႈယၢမ်းလဵဝ်ၵေႃႈ ၾၢႆႇၸဝ်ႈၼႃးလႄႈၵူၼ်းၼႂ်းပိုၼ်ႉတီႈ ယင်းပႆႇယွၼ်းတၢင်းၸွႆႈထႅမ်မႃးၸိူင်ႉႁိုဝ်လႄႈ လိူဝ်သေပႂ်ႉထွမ်ႇတူၺ်း ယင်းပႆႇၸၢင်ႈႁဵတ်းသင် ဝႃႈၼႆ ။


ၼႂ်းမိူင်းမၢၼ်ႈ မီးသဵၼ်ႈတၢင်းလူင် ဢၼ်ၵပ်းသိုပ်ႇတင်းမိူင်းတိတ်းၸပ်း 4  ဢၼ် ။ တႃႇၵပ်းသိုပ်ႇၵႃႉၶၢႆတေႃႇၵၼ် ၵမ်းသိုဝ်ႈ ။ မီးၸိုဝ်ႈႁွင်ႉဝႃႈ Asian Highway ။   လုၵ်ႉတီႈမိူင်းမဵတ်ႉထိလႃႇ သုၼ်ၵၢင်မိူင်းမၢၼ်ႈ သေၵႂႃႇၸူးမိူင်းဢိၼ်ႊၻီႊယိူဝ်ႊသဵၼ်ႈၼိုင်ႈ ။ ၵႂႃႇမိူင်းၶႄႇ သွင်သဵၼ်ႈ ၊ ၵႂႃႇမိူင်းထႆး 2 သဵၼ်ႈ ။


1. ပဵၼ် သဵၼ်ႈတၢင်းလူင် ဢေႊသျိူဝ်ႊ (AH-1) လုၵ်ႉတီႈ မဵတ်ႉထိလႃႇ ၵႂႃႇ တႃႈၵုင်ႈ - တွင်ႇငူႇ - ၵႂႃႇၸူး ဝဵင်းမျႃႉဝတီႇ လႅၼ်လိၼ် ထႆး - မၢၼ်ႈ  တၢင်းယၢဝ်း မီး 1,665 ၵီႊလူဝ်ႊမီႊတိူဝ်ႊ ။


2. သဵၼ်ႈတၢင်းလူင် (AH-2) လုၵ်ႉတီႈ မဵတ်ႉထိလႃႇ တူၼ်ႈတီး - ၵဵင်းတုင် - တႃႈၶီႈလဵၵ်း လႅၼ်လိၼ် ထႆး-တႆး ။  တၢင်းယၢဝ်း မီး 870 ၵီႊလူဝ်ႊမီႊတိူဝ်ႊ ။


3. သဵၼ်ႈတၢင်းလူင် (AH-3) လုၵ်ႉတီႈ  လႅၼ်လိၼ်ၶႄႇ - တႆး မိူင်းလႃး - ၵဵင်းတုင် ၊ တၢင်းယၢဝ်းမီး 93 ၵီႊလူဝ်ႊမီႊတိူဝ်ႊ (ၶွႆႈၵၼ်တီႈၵဵင်းတုင် တႃႇၵႂႃႇမဵတ်ႉထိလႃႇ) ။


4. တၢင်းလူင် (AH-14) လုၵ်ႉမဵတ်ႉထိလႃႇ ၵႂႃႇဝဵင်းလိူဝ်ႇ - လႃႈသဵဝ်ႈ - မူႇၸေႈ  လႅၼ်လိၼ် ၶႄႇ - တႆး  တၢင်းယၢဝ်းမီး 283 လၵ်း ။