ၸုမ်းတူင်ႉၼိုင်တူင်ႇဝူင်းၵူၼ်း လၢႆမူႇလၢႆၸုမ်းဢိၵ်ႇပႃးတၢင်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်း ၸိုင်ႈတႆး SSPP/SSA ၸွႆႈထႅမ်ၵူၼ်းၺႃးၽေးၾႆးမႆႈ ၸႄႈဝဵင်းၼမ်ႉသၼ်ႇ တႃႇလင်ႁိူၼ်း 297 လင် ။

ဝၼ်းတီႈ 06-09/02/2016 ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဝဵင်းတူၼ်ႈတီး ဢွၼ်ဢဝ် ၽူႈတၢင်တူဝ် လုၵ်ႈၸုမ်း 14 ၵေႃႉ ၵႂႃႇၸွႆႈထႅမ် ၶဝ်ႈသၢၼ် ၽႃႈႁူမ်ႇ ၶူဝ်းၼုင်ႈလႄႈ တၢင်းၵိၼ်တၢင်းယႅမ်ႉ ပၼ်ၵူၼ်းၺႃးၽေးၾႆးမႆႈ ၸႄႈဝဵင်းၼမ်ႉသၢၼ်ႇ ၸိုင်ႈတႆးပွတ်းႁွင်ႇ ။


ၸၢႆးသႅင်မိူင်း ၽူႈၼမ်းၼႂ်း ၸုမ်းၶႅၵ်ႇလီပၢင်ၸႃႉ ၼမ်ႉၶူင်း လၢတ်ႈဝႃႈ “ ၸုမ်းႁဝ်းၶႃႈ ၵႂႃႇၸွႆႈထႅမ် ၵူၼ်းၺႃးၽေးၾႆးမႆႈ တီႈၼမ်ႉသၼ်ႇ ပဵၼ်ၶဝ်ႈသၢၼ် 100 ထူင် ၊ ပပ်ႉတႅမ်ႈ 400 လူဝ် ၊ ၶဝ်ႈသွႆး 300 တိူၵ်ႈ ၊ ၽႃႈဝႆ 1000 ၽိုၼ် ၊ ၶူဝ်းၼုင် ၸၢႆး / ယိင်း 68 ထူင် ပဵၼ်ဢၼ်မႂ်ႇလၢႆလၢႆ၊ ၾႆးထၢတ်ႈ 5 တိူၵ်ႈ ၊ ထူင်တိၼ် / ထူင်မိုဝ်း မၢၵ်ႇႁူဝ် 2 ထူင် ၊  ငိုၼ်း ၼိုင်ႈလင်ႁိူၼ်းလႂ် ၵမ်ႉၸွႆႈ 1 မိုၼ်ႇပျႃး တႃႇ 297 လင်ႁိူၼ်း ၊  ယဝ်ႉၵေႃႉ ၵမ်ႉၸွႆႈတီႈၶွမ်ႊမတီႊ ၾၢႆႇလူလွမ် ၵူၼ်းပၢႆႈၽေးသမ်ႉ 10 သႅၼ်ပျႃး ႁူမ်ႈၵၼ်တင်းမူတ်း 130 သႅၼ်ပျႃး ” ဝႃႈၼႆ ။


ၼွၵ်ႈလိူဝ်ၼၼ်ႉ ၸုမ်းၵၢပ်းသၢၼ်လွင်ႈၼၢင်းယိင်းတႆး (SWAN) သမ်ႉ လႆႈသူင်ႇငိုၼ်းၵမ်ႉၸွႆႈငိုၼ်းထႆး 2 မိုၼ်ႇပၢႆ ပၼ်တီႈၸုမ်းၼၢင်းယိင်းတဢၢင်း (ပလွင်ႈ) ။


ယိင်းႁၢၼ်ၾႃႉ ၽူႈၶၢၼ်ပၢၵ်ႇ ၸုမ်းၵၢပ်းသၢၼ် လွင်ႈၼၢင်းယိင်းတႆး လၢတ်ႈဝႃႈ “ ဝၼ်းတီႈ 6 ၼႆႉ ယူႇတီႈၸုမ်းႁဝ်းသေ လႆႈၸွႆႈၵႂႃႇငိုၼ်းထႆး 25000 ဝၢတ်ႇ လႆႈသူင်ႇပၼ်တီႈၸုမ်း ၼၢင်းယိင်းတဢၢင်း (ပလွင်ႈ) ။ လိူဝ်ၼၼ်ႉ ယူႇတီႈ ၸုမ်းၼၢင်းယိင်းမိူင်းမၢၼ်ႈ WLB သမ်ႉၸွႆႈ ထႅင်ႈငိုၼ်း 3 မိုၼ်ႇဝၢတ်ႇ ၊ ၸုမ်းၼၢင်းယိင်းတဢၢင်း (ပလွင်ႈ) သမ်ႉ ၵဵပ်းငိုၼ်း လူႇလႆႈ 30 သႅၼ်ပျႃး သေသူင်ႇမိူဝ်း ၸူးၵူၼ်းၺႃးၽေးၾႆး တီႈၼမ်ႉသၼ်ႇ ” ဝႃႈၼႆ ။


ယူႇတီႈပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP / SSA  ၵေႃႈ ၼႂ်းဝၼ်းတီႈ 11 ၼႆႉ လႆႈၵႂႃႇၸွႆႈငိုၼ်းထႅင်ႈ ၵူၼ်းၺႃးၽေးၾႆး 300 သႅၼ်ပျႃး ။


ၶွမ်ႊမတီႊ ၾၢႆႇႁပ်ႉတၢင်းၸွႆႈထႅမ် ၵူၼ်းၺႃးၽေးၾႆးမႆႈ တီႈၼမ်ႉသၼ်ႇလၢတ်ႈဝႃႈ  “ တေႃႈလဵဝ် ယေးငိုၼ်း ၵၢမ်ႇပေႃးသ မႃးၸွႆႈထႅမ်ငိုၼ်း ၼိုင်ႈႁူဝ်ႁိူၼ်းလႂ် 5 သႅၼ်ပျႃး ၊ ၸွမ်ၸိုင်ႈတဵင်းၸဵင်ႇသမ်ႉ ၸွႆႈၼိုင်ႈႁိူၼ်း 2 သႅၼ်ပျႃး ၊ တေႃႈလဵဝ်ၼိုင်ႈႁိူၼ်းလႂ် လႆႈငိုၼ်းၵမ်ႉၸွႆႈ 12 သႅၼ်ပျႃး ငိုၼ်းတင်းမူတ်း ယူႇတီႈၶွမ်ႊမတီႊလႆႈႁပ်ႉဝႆႉ မီး 4 ႁဵင်သႅၼ်ပျႃး ပၢႆ ၊ ၶဝ်ႈသၢၼ် 3000 ထူင်ပၢႆ ၊ ပီႈၼွင်ႉၵူၼ်းၺႃးၽေး တုၵ်းယွၼ်းႁႂ်ႈႁဵတ်းသၢင်ႈႁိူၼ်းယေးၸဝ်ႈၵဝ်ႇၶိုၼ်း ” ဝႃႈၼႆ ။


ဝၼ်းတီႈ 5 လိူၼ် February ၾႆးမႆႈ ပွၵ်ႉ 2 ဢွင်ႇမင်ႇၵလႃႇ ၸႄႈဝဵင်းၼမ်ႉသၼ်ႇ ၸိုင်ႈတႆး ပွတ်းႁွင်ႇ မႆႈ လင်ႁိူၼ်း 297 လင်၊ ႁူဝ်ၵူၼ်း 1300 ၵေႃႉ ႁၢမ်းႁႅၵ်ႈတီႈယူႇ ။