ပၢင်ၵုမ်သၽႃးၵူၼ်းမိူင်း ၵမ်းပွၵ်ႈ 2 တႄႇၸတ်းႁဵတ်း ဝၼ်းဢင်းၵၢၼ်းၼႆႉ ပႃႊတီႊႁူဝ်သိူဝ် တေဢုပ်ႇဢူဝ်းတႃႇၶွတ်ႇၽွတ်ႈ ၶွမ်ႊမတီႊ 3 ဢၼ် ၼေႃႇၽူႈတႅၼ်းသၽႃးၵူၼ်းမိူင်းလၢတ်ႈ ။

ဝၼ်းတီႈ 16/02/2016 ၶၢဝ်းယၢမ်း 10 မူင်း ပၢင်ၵုမ်သၽႃးၵူၼ်းမိူင်း တႄႇၸတ်းဝၼ်းႁႅၵ်ႈ ၵမ်း 2 တီႈႁူင်းသၽႃးၵူၼ်းမိူင်း ၼေႇပျီႇတေႃႇ ။ တေဢုပ်ႇၵုမ်တႃႇၶွတ်ႇၽွတ်ႈ ၶွမ်ႊမတီႊ 3 ဢၼ် 1.  ၾၢႆႇၶွမ်ႊမတီႊၵပ်းသိုပ်ႇၼွၵ်ႈမိူင်း ၊ 2. ၾၢႆႇၶွမ်ႊမတီႊ ၸဝ်ႈႁႆႈၸဝ်ႈၼႃးလႄႈ ႁႅင်းၵၢၼ် ၊ 3. ၾၢႆႇၶွမ်ႊမတီႊ လွင်ႈငမ်းယဵၼ်ၼႂ်းၸၢဝ်းၶိူဝ်း ။


ၸၢႆးသႅင်မိူင်း ၽူႈတႅၼ်းသၽႃႈၵူၼ်းမိူင်း ပႃႊတီႊႁူဝ်သိူဝ် SNLD ၸႄႈဝဵင်းမိူင်းၵိုင်လၢတ်ႈဝႃႈ  “ ၵူၼ်းဢၼ်တေပႃး ၼႂ်းၶွမ်ႊမတီႊၸိူဝ်းၼႆႉ တေပဵၼ်ၽႂ်  တေလိူၵ်ႈၼႂ်းပၢင်ၵုမ်သၽႃးၵူၼ်းမိူင်း ဝၼ်းတီႈ 3 ၼၼ်ႉ တေပိုၼ်ၽၢဝ်ႇ ဝၼ်းတႃႇလိူၵ်ႈၸွမ်ၸိုင်ႈလႄႈ ၵႅမ်ၸွမ်ၸိုင်ႈ ”  ဝႃႈၼႆ ။


ၼႂ်းဝၼ်းတီႈ 17/03/2016 တေထိုင်မႃးၼႆႉ ၸုမ်းသၽႃးၵူၼ်းမိူင်း ၊ သၽႃးၸိူဝ်ႉၸၢတ်ႉလႄႈ ၽူႈတၢင်တူဝ်တပ်ႉသိုၵ်း တေလႆႈႁၢင်ႈႁႅၼ်းသဵၼ်ႈၸိုဝ်ႈဝႆႉ ၼိုင်ႈၸုမ်းၼိုင်ႈၵေႃႉ ၊ တႃႇ 3 ၵေႃႉ ၊ ၼႂ်း 3 ၵေႃႉၼၼ်ႉ တေၶတ်းလိူၵ်ႈၶိုၼ်ႈပဵၼ် ၵႅမ်ၸွမ်ၸိုင်ႈ ။ ဝၢႆးၼၼ်ႉ သၽႃးမိူင်းႁူမ်ႈတုမ် တေလိူၵ်ႈၸွမ်ၸိုင်ႈ ။


ပေႃးထိုင်မႃး ဝၼ်းတီႈ 18/03/2016 သမ်ႉ တေပိုၼ်ၽၢဝ်ႇ ၸိုဝ်ႈသဵင်ၸွမ်ၸိုင်ႈလႄႈ ၵႅမ်ၸွမ်ၸိုင်ႈ ပဵၼ်တၢင်းၵၢၼ် ။


ပၢင်ၵုမ်သၽႃးၵူၼ်းမိူင်းၼႆႉ ၼေႃႇၽူႈတႅၼ်း ဢၼ်လႆႈတီႈၼင်ႈ ၼႂ်းသၽႃး ပႃႊတီႊၼူၵ်ႉယုင်း 255 တီႈၼင်ႈ ၊ ပႃႊတီႊ သၢင်ႇသီႈ 30 တီႈၼင်ႈ ၊ ပႃႊတီႊၸိူဝ်ႉၸၢတ်ႈရၶႅင်ႇ 12 တီႈၼင်ႈ ၊ ပႃႊတီႊႁူဝ်သိူဝ် 12 တီႈၼင်ႈ ၊ သူၼ်ႇတူဝ် 1 တီႈၼင်ႈ ဢိၵ်ႇပႃးလူၺ်ႈ ပႃႊတီႊ ထႅင်ႈ 11 ဢၼ် ၊ ၾၢႆႇတပ်ႉသိုၵ်းသမ်ႉ 110 တီႈၼင်ႈ ႁူမ်ႈၵၼ်တင်းမူတ်း 433 တီႈၼင်ႈ ။