ၽူႈၼမ်းတႆး ၸဝ်ႈၶုၼ်ထုၼ်းဢူး လၢတ်ႈဝႃႈ - ၼႃႈလိၼ်ဢၼ်ပႃႊတီႊၵူၼ်ူးၶိူဝ်းပိုၼ်ႉမိူင်း ပေႉဝႆႉမိူဝ်ႈပၢင်လိူၵ်ႈတင်ႈ (2015) ၼၼ်ႉ ထုၵ်ႇလီပၼ်ၶိူဝ်းၵူၼ်းၼၼ်ႉ ၶိုၼ်းၵွၼ်းၵုမ်းၽွင်းငမ်း ။ ပေႃးဝႃႈဢမ်ႇပၼ်ၵူၼ်းၶိူဝ်းၽႂ်မၼ်း ၶိုၼ်ႈပဵၼ်တၼ်းႁဵင်း ၸွမ်ၽွင်းလူင်ၸႄႈမိူင်းၼႆၸိုင် ၸၢင်ႈမီးပၼ်ႁႃမႃးၵူႈလွင်ႈလွင်ႈ ၊ ပႃးၸဵမ်လွင်ႈ ငမ်းယဵၼ်လႄႈ လွင်ႈၶိူဝ်းၵူၼ်းယိပ်းၵွင်ႈၵၢင်ႇ - ဝႃႈၼႆ ။

“ တီႈမိူင်းတႆးၼႆႉ ႁဝ်းၶႃႈပီႈၼွင်ႉၵူၼ်းၶိူဝ်းတႆးလႄႈ ႁူမ်ႈတင်းၶိူဝ်းၵူၼ်းၸိူဝ်းဢၼ်ယူႇၼႂ်းမိူင်းတႆး ဢွၼ်ၵၼ်ပေႉၵၢၼ်လိူၵ်ႈတင်ႈ ။ တီႈမိူင်းရၶႅင်ႇၶဝ်ၵေႃႈ ပီႈၼွင်ႉၵူၼ်းၶိူဝ်းရၶႅင်ႇၶဝ် ၵၼ်ပေႉပၢင်လိူၵ်ႈတင်ႈ ။ ၵူၺ်းၵႃႈ ယွၼ်ႉပိူဝ်ႈပိူင်ငဝ်ႈပိုင်းမိူင်း လႄႈ ၸွမ်ၸိုင်ႈသမ်ႉတေလိူၵ်ႈ ၸွမ်ၽွင်းလူင်။ ၵွပ်ႈပိူဝ်ႈပဵၼ်မႃးၸိူင်ႉၼႆလႄႈ ပီႈၼွင်ႉၵူၼ်းမိူင်းတႆးလႄႈသင် ၊ ပီႈၼွင်ႉၵူၼ်းမိူင်းရၶႅင်ႇၶဝ်လႄႈသင် ၊ တႃႇၶဝ်တေလႆႈၶိုၼ်ႈပဵၼ် လူင်ပွင်ၸိုင်ႈၸႄႈမိူင်းၶဝ်ႁႃႉ တေဢမ်ႇလႆႈၶိုၼ်ႈၼၼ်ႉ တေႃႇထိုင်မိူဝ်ႈလဵဝ်ၼႆႉၵေႃႈ ၽႂ်ယင်းပႆႇႁူႉလႆႈ ။ ၵွပ်ႈၼၼ် သွင်ၸႄႈမိူင်း တႆးလႄႈရၶႅင်ႇၼႆႉ သင်ၸိူဝ်ႉဝႃႈလူင်ပွင်ၸိုင်ႈ ဢမ်ႇပၼ်ၵူၼ်းၶိူဝ်းၵိုၵ်းမိူင်းၼၼ်ႉ လႆႈပဵၼ်လူင်ပွင်ၸိုင်ႈ ၊ ဢမ်ႇပၼ်ၽွင်းငမ်းၶိုၼ်းဝၢၼ်ႈမိူင်းၽႂ်မၼ်းၼၼ်ႉၼႆတႄႉ မိူဝ်းၼႃႈမႃး တၵ်းတေမီးပၼ်ႁႃမႃးဢိတ်းဢီႈယူႇ ၊ ၵဝ်ၶႃႈႁၼ်ထိုင်ၼင်ႇၼႆ - ဝႃႈၼႆ ။


ပူၼ်ႉမႃး မိူဝ်ႈပၢင်လိူၵ်ႈတင်ႈပီ 2015 ၼၼ်ႉ တီႈမိူင်းရၶႅင်ႇလႄႈ မိူင်းတႆးၼႆႉ ရၶႅင်ႇလႄႈတႆး ပေႉပၢင်လိူၵ်ႈတင်ႈလႆႈတီႈၼင်ႈၼႂ်းသၽႃး ပႃႊတီႊလႂ် 40 တီႈၼင်ႈပၢႆၵမ်းလဵဝ်။ ယွၼ်ႉပိူဝ်ႈၼၼ်လႄႈ ပႃႊတီႊၸိူဝ်ႉၸၢတ်ႈရၶႅင်ႇၶဝ် ၵေႃႈလႆႈတၢင်ႇလိၵ်ႈဝႆႉတီႈ ပႃႊတီႊ NLD ဢၼ်ၼၢင်းဢွင်ႇသၢၼ်းၸုၵျီႇဢွၼ်ႁူဝ် ဝႃႈ - တီႈၼင်ႈၸွမ်ၽွင်းလူင်မိူင်းရၶႅင်ႇလႄႈ လူင်ပွင်ၸိုင်ႈမိူင်းရၶႅင်ႇၼႆႉ ႁႂ်ႈပၼ်ပႃႊတီႊရၶႅင်ႇယိပ်းၵုမ်း ။


ၵဵဝ်ႇၵပ်းလွင်ႈၸႄႈမိူင်းလႄႈ လူင်ပွင်ၸိုင်ႈၸႄႈမိူင်းၼၼ်ႉ သင်ၸိူဝ်ႉဝႃႈၾၢႆႇပႃႊတီႊ NLD ၶဝ် ဢမ်ႇမီးလွင်ႈဢုပ်ႇဢူဝ်းတုမ်ႉတွပ်ႇသင်မႃး ၸူးၶိုၼ်းတီႈပႃႊတီႊရၶႅင်ႇၸိုင် ပႃႊတီႊရၶႅင်ႇတေယူႇၾၢႆႇ သၢၼ်ၶတ်းလူင်ပွင်ၸိုင်ႈသေ တေသိုပ်ႇသၢၼ်ၶတ်းလူင်ပွင်ၸိုင်ႈ တေႃႇထိုင်ပေႃးလႆႈလွင်ႈၽွင်းငမ်းတူဝ်ၵဝ်ႇ ။ ပေႃးဝႃႈၵူဝ်ပဵၼ်ပၼ်ႁႃၸိူင်ႉၼႆၵေႃႈ ၸႄႈမိူင်းရၶႅင်ႇၼႆႉ ထုၵ်ႇလီပၼ်ၵူၼ်းၶိူဝ်းရၶႅင်ႇ ၽွင်းငမ်းၵုမ်းၵွၼ်းဝႆႉ - ပႃႊတီႊၸိူဝ်ႉၸၢတ်ႈရၶႅင်ႇၶဝ် ဢွၵ်ႇၶေႃႈပိုၼ်ၽၢဝ်ႇ ၼင်ႇၼႆ ။


ၵႃႈပူၼ်ႉမႃး မီးၶၢဝ်ႇဝႆႉဝႃႈတပ်ႉသိုၵ်းလႄႈပႃႊတီႊ NLD ၶဝ် ဢုပ်ႇၵုမ်ၵၼ် ၊ သွင်ၾၢႆႇမီးၶေႃႈလႆႈၸႂ် ၵၼ်ဝႆႉဝႃႈ - မိူင်းရၶႅင်ႇ မိူင်းတႆးလႄႈမိူင်းၶၢင် 3 ၸႄႈမိူင်းလႄႈတင်းတိူင်း 1 တိူင်း တၵ်းလႆႈပၼ်တပ်ႉသိုၵ်း (တပ်ႉမတေႃႇ) မၢၼ်ႈယိပ်းၵုမ်း ။ ၵူၺ်းၵေႃႈ တေႃႇထိုင်ယၢမ်းလဵဝ် ပႃႊတီႊ NLD ယင်းပႆႇမႃးဢုပ်ႇၵုမ်ၵၼ်တင်း ပႃႊတီႊႁူဝ်သိူဝ် SNLD ဢၼ်ပေႉပၢင်လိူၵ်ႈတင်ႈၼႂ်းမိူင်းတႆး ၊ ဢမ်ႇထၢမ်ၵၢင်ၸႂ် ပႃႊတီႊၼႂ်းမိူင်းတႆး ။ ၵူၺ်းၵႃႈ မိူဝ်ႈလဵဝ် ၾၢႆႇပႃႊတီႊ NLD သမ်ႉပိုၼ်ၽၢဝ်ႇဝႆႉဝႃႈ တီႈမိူင်းရၶႅင်ႇၼၼ်ႉ တေတႅင်ႇတင်ႈၵူၼ်းရၶႅင်ႇ ၶိုၼ်ႈပဵၼ်လူင်ပွင်ၸိုင်ႈယူႇ - ၼႆယဝ်ႉ ။


ၸဝ်ႈၶုၼ်ထုၼ်းဢူး လၢတ်ႈထႅင်ႈဝႃႈ - ၸွမ်ၽွင်းလူင်ၸႄႈမိူင်း လႄႈတိူင်းၼႆႉ ၸွမ်ၸိုင်ႈသမ်ႉတေလိူၵ်ႈၵဵပ်း / တႅင်ႇတင်ႈ ။ ၽွင်းလိူၵ်ႈသၢင်တႅင်ႇတင်ႈၼႆႉၵေႃႈ မၼ်းတေလိူၵ်ႈၵူၼ်းမၼ်းၶိုၼ်းၵူၺ်း ။ ပေႃးမႃးတူၺ်း ငဝ်းလၢႆးၵၢၼ်မိူင်း ဢၼ်ဢမ်ႇသုၵ်းဢမ်ႇလိပ်းယၢမ်းလဵဝ်ၼႆႉၸိုင် တေလႆႈႁၼ်ဝႃႈ သိူဝ်ဢေးလူၸင်ႇ ဝူဝ်းတေလႆႈလွတ်ႈတၢင်းတၢႆ ၊ မၼ်းပဵၼ်ၸိူင်ႉၼၼ်ဝႆႉ ။ ၵူၺ်းၵႃႈ ပေႃးဝႃႈၶဝ်ႁဵတ်းၸွမ်းၼင်ႇၵၢင်ၸႂ်ၶဝ် တိၵ်းတိၵ်းတႄႉ ၽွၼ်းပၢင်ႈမၼ်း တေမီးၸုမ်းယိပ်းၵွင်ႈၵၢင်ႇၶိုၼ်းၵူၺ်း ။ ၵွပ်ႈဝႃႈ ပေႃးဝႃႈလူင်ပွင်ၸိုင်ႈမႂ်ႇ ၶိုၼ်ႈမႃး ၶိူဝ်းၵူၼ်းမိူင်းၽႂ်မၼ်း ဢမ်ႇလႆႈႁဵတ်းလူင်ပွင်ၸိုင်ႈ ၊ ၼႂ်းၸႄႈမိူင်းလႄႈတိူင်း 14 ဢၼ် ၸိူဝ်းပေႉပၢင်လိူၵ်ႈတင်ႈဝႆႉ ၊ သမ်ႉတေမီးပႃႊတီႊဢၼ်လဵဝ်ၵူၺ်း ၶိုၼ်းမႃးၽွင်းငမ်းၼႆ မီးၼႂ်းပိူင်ငဝ်ႈပိုင်းမိူင်းဝႆႉၵေႃႈယဝ်ႉ ၊ ၵူၺ်းၵႃႈ ၶိူဝ်းၵူၼ်းၶဝ်ၼႆႉ ၸဵမ်မိူဝ်ႈလႂ်လႂ်ၵေႃႈ ပေႃးဢမ်ႇၶႂ်ႈယုမ်ႇမၢၼ်ႈယူႇယဝ်ႉ ၊ ပေႃးၶဝ်ႁၼ်ၸိူင်ႉၼၼ်ထႅင်ႈၵေႃႈ လွင်ႈၸႂ်ငမ်းငဝ်းၼိူဝ်ၶိူဝ်းၵူၼ်းမၢၼ်ႈၼႆႉ မၼ်းတေဢမ်ႇယႂ်ႇမႃးထႅင်ႈလိူဝ်ၵဝ်ႇႁိုဝ် ၊ ဢၼ်ၼႆႉပဵၼ်ဢၼ်ထုၵ်ႇလီဝူၼ်ႉ - ဝႃႈၼႆ ။


ဢၼ်ၶိူဝ်းၵူၼ်းတင်းလၢႆ ယိပ်းၵွင်ႈၵၢင်ႇလုၵ်ႉၽိုၼ်ႉမႃးသေ ပဵၼ်သိုၵ်းပဵၼ်သိူဝ်ယူႇၼႂ်းမိူင်း တေႃႈလဵဝ်ၼႆႉၵေႃႈ မၼ်းပဵၼ်တွၼ်ႈတႃႇသူၼ်ႇလႆႈဢၼ်ၼႆႉၵူၺ်း ၊ ၵွပ်ႈဝႃႈၶႂ်ႈၸုၵ်းၼိူဝ်ၶႅင်ႈၶႃတူဝ်ၵဝ်ႇ ၊ ၶႂ်ႈၸတ်းပွင်ၵမ်ၸႃတႃ တူဝ်ၵဝ်ႇၶိုၼ်း ။ ယွၼ်ႉပိူဝ်ႈၼႆလႄႈဢၼ်ႁဝ်းၶႃႈပႃႊတီႊၶိူဝ်းၵူၼ်း တုၵ်းယွၼ်းယူႇၼႆႉ ဢမ်ႇၸႂ်ႈယူႇလွၵ်ႇလွၵ်ႇလၢႆလၢႆသေ တုၵ်းယွၼ်းၸိူင်ႉၼႆ ဢမ်ႇၸႂ်ႈ ။ ႁဝ်းၵႂႃႇၸွမ်းၶေႃႈၵိၼ်ၵႅၼ်ႇပၢင်လူင်သေ ၵႂႃႇၸွမ်းလွင်ႈတၢင်းမၼ်းၵူၺ်း ။ ႁဝ်းၶႃႈလၢတ်ႈၼႆႉၵေႃႈ ႁႂ်ႈၶုၵ်းၸႂ်လႆႈ ၶေႃႈၵိၼ်ၵႅၼ်ႇ ၶေႃႈလႆႈၸႂ်ပၢင်လူင်ၼၼ်ႉယူႇတႃႇသေႇ ၊ ယႃႇပေလိုမ်း ။ ယွၼ်ႉပိူဝ်ႈဢမ်ႇႁဵတ်းၸွမ်း လိၵ်ႈႁူမ်ႈမၢႆပၢင်လူင်လႄႈ ၶိူဝ်းၵူၼ်းပိုၼ်ႉမိူင်းလႆႈယိပ်းၵွင်ႈၵၢင်ႇလုၵ်ႉၽိုၼ်ႉမႃး ပီယၢဝ်းၶၢဝ်းႁိုင်ယဝ်ႉ ၊ ဢၼ်ၼႆႉထုၵ်ႇလႆႈဝႆႉသတိတွင်းၵိုမ်းယူႇ တႃႇသေႇ - ၸဝ်ႈၶုၼ်ထုၼ်းဢူး လၢတ်ႈ ။


ပႃႊတီႊၼူၵ်ႉယုင်း NLD ဢၼ်ပေႉၵၢၼ်လိူၵ်ႈတင်ႈတူဝ်ႈမိူင်း (2015) ၼႆႉ ပႆႇလႆႈႁူပ်ႉထူပ်းဢုပ်ႇဢူဝ်းၵၼ် တင်း ပႃႊတီႊၶိူဝ်းၵူၼ်း ။ ၵူၺ်းၵႃႈ ဢၼ်ပဵၼ်ၸုမ်းဢူၺ်းလီၵဝ်ႇမၼ်း ပႃႊတီႊၸိူဝ်ႉၸၢတ်ႈရၶႅင်ႇတႄႉ လႆႈပၼ်တီႈယူႇၵႅမ်ႁူဝ်ပဝ်ႈ သၽႃးၸိူဝ်ႉၸၢတ်ႈ၊ လိူၵ်ႈဝႆႉဢူးဢေးတႃႇဢွင်ႇ ။


ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႃႈ - ပႃႊတီႊ NLD ၸွင်ႇယိုၼ်ႈယွၼ်းမႃးတီႈ ၸဝ်ႈၶုၼ်ထုၼ်းဢူး သေၸိူဝ်ႉသေပိူင်ႁႃႉၼၼ်ႉၼႆ ၸဝ်ႈၶုၼ်ထုၼ်းဢူး တွပ်ႇလၢတ်ႈဝႃႈ - လွင်ႈၸိူဝ်းၼႆႉ ယႃႇပေႁႂ်ႈၵဝ်ၶႃႈလႆႈ တွပ်ႇသေၵမ်း ၊ လွင်ႈၼႆႉ တေဢမ်ႇတွပ်ႇပၼ်ယဝ်ႉ ။ ၶဝ်လၢတ်ႈသင်ဝႆႉ ၶဝ်ႁဵတ်းသင်ၼၼ်ႉ ၵဝ်ၶႃႈဢမ်ႇပေႃးၶႂ်ႈလၢတ်ႈၼမ် ။ လွင်ႈတေႁူပ်ႉထူပ်းၵၼ်သေဢုပ်ႇၵၼ် လွင်ႈၼႃႈၵၢၼ်ဢၼ်တေႁဵတ်းသင်ၵႂႃႇ မိူဝ်းၼႃႈ ၸိူဝ်းၼၼ်ႉတႄႉ ယွၼ်ႉပိူဝ်ႈၶဝ်ပႆႇမႃးႁူပ်ႉထူပ်းႁဝ်းလႄႈ ႁဝ်းၵေႃႈပႆႇၸၢင်ႈလၢတ်ႈသင်။ တူၺ်းၶဝ်ၵေႃႈ လႅပ်ႈမီးတၢင်းယၢပ်ႇၽိုတ်ႇဝႆႉသေလွင်ႈလွင်ႈ။ ၵူၺ်းၵႃႈ လွင်ႈၸမ်ၸႂ်ၸိူဝ်ႉၸၢတ်ႈ / ၶိူဝ်းၵူၼ်းၸိူဝ်းၼႆႉ မၼ်းၼၢင်း (ဢွင်ႇသၢၼ်းၸုၵျီႇ) လႅပ်ႈဢမ်ႇလိုမ်းၼင်ႇၵဝ်ႇ ၊ ၵႆႉႁၼ်မၼ်းၼၢင်းလၢတ်ႈယူႇ - ၸဝ်ႈၶုၼ်ထုၼ်းဢူး လၢတ်ႈ ။


ဝၼ်းတီႈ 17 လိူၼ်မၢတ်ႊၶျ် 2016 ၼႆႉ ပႃႊတီႊ NLD တေပိုၼ်ၽၢဝ်ႇၸိုဝ်ႈ ၼေႃႇၸွမ်ၸိုင်ႈ ဢၼ်တေလိူၵ်ႈၸိုဝ်ႈၼေႃႇၸွမ်ၸိုင်ႈသေ လိူၵ်ႈၸွမ်ၸိုင်ႈ ။ ၸွမ်းၼင်ႇပိူင်ငဝ်ႈပိုင်းမိူင်းမီးဝႆႉၼၼ်ႉ ၸွမ်ၸိုင်ႈ ၶိုၼ်းတေလိူၵ်ႈၽွင်းလူင်ၸႄႈမိူင်း လႄႈတိူင်း ။