ၸဝ်ႈၼႃႈတီႈၸၼ်ႉသုင်ၶွင် ဢမႄႊရီႊၶိူဝ်ႊ (US) ယဵမ်ႈမိူင်းႁူမ်ႈတုမ်မျၢၼ်ႇမႃႇ ပဵၼ်ပွၵ်ႈႁႅၵ်ႈသုတ်း ဝၢႆးလိူၵ်ႈတင်ႈပီ 2015 ။ ႁူပ်ႉထူပ်းၸွမ်ၸိုင်ႈတဵင်းၸဵင်ႇ ၽူႈၼမ်းၸၼ်ႉသုင် ၼႂ်းတပ်ႉသိုၵ်း ၊ တုၵ်းယွၼ်းႁႂ်ႈပွႆႇပၼ်ၵူၼ်း ၵၢၼ်မိူင်း ၸိူဝ်းတူၵ်းၶွၵ်ႈတင်းသဵင်ႈ ။

(သၢႆႉၵႂႃႇၶႂႃ) ၵေႃႉတီႈ 3 ဢႅၼ်ႊထူဝ်ႊၼီႊ ၵျေႊ ပလိင်ႊၶဵၼ်ႊ

မိူဝ်ႈဝၼ်းၸၼ်တီႈ 18/01/2016 ၼၼ်ႉ ဢႅၼ်ႊထူဝ်ႊၼီႊ ၵျေႊ ပလိင်ႊၶဵၼ်ႊ ၵႅမ်ၽူႈၵွၼ်းႁွင်ႈၵၢၼ်လူင် ၾၢႆႇၼွၵ်ႈမိူင်း ဢမႄႊရိၵႃႊ လႆႈႁူပ်ႉထူပ်းဢုပ်ႇဢူဝ်း ၸွမ်ၸိုင်ႈတဵင်းၸဵင်ႇ ၊ ၼၢင်းဢွင်ႇသၢၼ်းၸုၵျီႇ လႄႈ ၽူႈၼမ်းၸၼ်ႉသုင်ၼႂ်းတပ်ႉသိုၵ်းမၢၼ်ႈ တီႈၼေႇပျီႇတေႃႇ ။ ပလိင်ႊၶဵၼ်ႊ လႆႈႁူမ်ၸူမ်းၸွမ်း လွင်ႈဢၼ်လႆႈၸတ်းပၢင်လိူၵ်ႈတင်ႈတူဝ်ႈမိူင်း လႄႈ ယဝ်ႉတူဝ်ႈၵႂႃႇလီငၢမ်းၼၼ်ႉ - ၼႆယဝ်ႉ ။


ၵူၺ်းၵႃႈ ပလိင်ႊၶဵၼ်ႊ လႆႈတုၵ်းယွၼ်းတီႈ လူင်ပွင်ၸိုင်ႈတဵင်းၸဵင်ႇဝႃႈ ႁႂ်ႈပွႆႇပၼ်ၵူၼ်းၵၢၼ်မိူင်းၸိူဝ်း တူၵ်းၶွၵ်ႈ ဢၼ်ၵိုတ်းလိူဝ်ဝႆႉတင်းမူတ်း ၊ ဢွၼ်ၼႃႈလူင်ပွင်ၸိုင်ႈမႂ်ႇ ဢွင်ႇသၢၼ်းၸုၵျီႇ တေၶိုၼ်ႈမႃးၼႂ်းလိူၼ်ၼႃႈၼႆႉ ။


လွင်ႈၼိုင်ႈ ဢၼ်ပဵၼ်ၶိူင်ႈမၢႆၶွင်ၵၢၼ်ပူၵ်းပွင်ဝၢၼ်ႈမိူင်းၼၼ်ႉ ပဵၼ်ၵူၼ်းတူၵ်းၶွၵ်ႈၵၢၼ်မိူင်း 1,300 ၵေႃႉ ႁိုဝ် ၼမ်လိူဝ်ၼၼ်ႉ လႆႈႁပ်ႉၵၢၼ်ပွႆႇတူဝ်ပဵၼ်လွင်ႈလွတ်ႈလႅဝ်း ။ သင်ၸိူဝ်းဝႃႈပွႆႇပၼ်ၵူၼ်းတူၵ်းၶွၵ်ႈၵၢၼ်မိူင်း တင်းမူတ်းၸိုင် လႆႈဝႃႈပဵၼ်ၵၢၼ်ပူၵ်းပွင်ဢၼ်မီးၵႃႈၶၼ်ယႂ်ႇသုတ်းလႄႈ တဵမ်ထူၼ်ႈလီ ၼႂ်းၽွင်းၶၢဝ်းယၢမ်းတိုၵ်ႉဢူၼ်းပိၼ်ႇထၢႆႇဢမ်းၼၢၸ်ႈ (ဢႃႇၼႃႇ) ယူႇၼႆႉ ၊ လူင်ပွင်ၸိုင်ႈမႂ်ႇၶိုၼ်ႈမႃး ႁပ်ႉၼႃႈတီႈပုၼ်ႈၽွၼ်းၵေႃႈ တေဢမ်ႇမီးၽႂ်ယူႇၼႂ်းၶွၵ်ႈ - ပလိင်ႊၶဵၼ်ႊ လၢတ်ႈတီႈၽူႈသိုဝ်ႇၶၢဝ်ႇၶဝ် ဝၢႆးၵၢၼ်ႁူပ်ႉထူပ်းၵၼ်ၼင်ႇၼႆ ။ (ၶေႃႈမုလ်းၶၢဝ်ႇထႆး ၽူႈၸတ်းၵၢၼ်ဢွၼ်ႊလၢႆႊ )။