ၸုမ်းသင်ၶၸဝ်ႈလႄႈ ၽူႈယႂ်ႇၵူၼ်းလူင် ၼႂ်းဝၢၼ်ႈၵုင်းသႃႇ မိူင်းဝၼ်း ဢွၼ်ႁူဝ်ၸတ်းႁဵတ်းပၢင်သွၼ်လိၵ်ႈလၢႆးတႆး လႄႈၾိင်ႈငႄႈပုတ်ႉထ ၵမ်းထူၼ်ႈ 4 ။

ဝၼ်းတီႈ 20/01/2016 - 28/02/2016 ၶၢဝ်းယၢမ်း 08.00-16.30 မူင်း သင်ၶၸဝ်ႈလႄႈ ၽူႈယႂ်ႇၵူၼ်းလူင် ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်သွၼ်လိၵ်ႈလၢႆးတႆးလႄႈ ၾိင်ႈငႄႈပုတ်ႉထ တီႈဝၢၼ်ႈၵုင်းသႃႇ မိူင်းဝၼ်း ဢိူင်ႇလွႆၸႄႈ 8 ဝၢၼ်ႈၸႄႈမိူင်းၶၢင် ။


ၶူးပူင်သွၼ် ၸဝ်ႈၶူးမၢဝ်းဝၼ်း ၽူႈၵွၼ်းပၢင်သွၼ် လၢတ်ႈဝႃႈ ၼိုင်ႈဝၼ်းၼႆႉ ႁဝ်းၶႃႈတေၶိုၼ်ႈႁဵၼ်း (3) ၶၢဝ်း ၊ ၶၢဝ်းယၢမ်း 08.00-10.00 မူင်း သွၼ်လိၵ်ႈတႆး ၊ ၶၢဝ်းယၢမ်း 13.00-15.00 မူင်း သွၼ်လိၵ်ႈတႆး ၊ ၶၢဝ်းယၢမ်း 15.30-16.30 မူင်း သွၼ်ပဝ်ႇပီၼမ်ႉတဝ်ႈ ၸဵမ်ၸိူဝ်းၼႆႉ ။


သိုပ်ႇလၢတ်ႈထႅင်ႈဝႃႈ ဢၼ်ႁဝ်းၶႃႈ လႆႈၸတ်းႁဵတ်းပၢင်သွၼ်မႃး ၼႆႉ ပဵၼ်ပွၵ်ႈၵမ်းတီႈ 4 ယဝ်ႉ ထႅင်ႈၾၢႆႇၼိုင်ႈၵေႃႈ ႁဝ်းၶႃႈ ဝၵ်ႉဢဝ်တိုဝ်းတၢင်း ၶၢဝ်းဢိုတ်းႁဵၼ်းလူင်ပွင်ၸိုင်ႈၶႄႇသေ သွၼ်ပၼ်လုၵ်ႈဢွၼ်ႇတႆးႁဝ်း ၊ သင်ဝႃႈ ဢမ်ႇမႅၼ်ႈၽွင်းဢိုတ်းႁဵၼ်းလူင်ပွင်ၸိုင်ႈၶႄႇၸိုင် လုၵ်ႈဢွၼ်ႇတႆးႁဝ်းသမ်ႉ တေလႆႈၵႂႃႇႁဵၼ်းလိၵ်ႈၶႄႇ ဝႃႈၼႆ ။


ၽႃသႃဢၼ်သွၼ်ပၼ်လုၵ်ႈႁဵၼ်းသမ်ႉ လုၵ်ႈႁဵၼ်းၸၼ်ႉဢွၼ်ႇ ၸႂ်ႉပပ်ႉႁဵၼ်းလိၵ်ႈတႆး လုမ်းပုတ်ႉထမိူင်းမၢဝ်း ႁဵတ်းဢွၵ်ႇ ၊ လုၵ်ႈႁဵၼ်းၸၼ်ႉငဝ်ႈ  ၸႂ်ႉပပ်ႉႁဵၼ်းလိၵ်ႈတႆး ငဝ်ႈငုၼ်းၵေႃလိၵ်ႈလၢႆးလႄႈၾိင်ႈငႄႈတႆး ႁဵတ်းဢွၵ်ႇ ၊ ၸၼ်ႉၾိင်ႈငႄႈပုတ်ႉထသမ်ႉ ၸႂ်ႉပပ်ႉႁဵၼ်းၾိင်ႈငႄႈပုတ်ႉထ ပုၼ်ႈတႃႇၵူၼ်းၵူႈၵေႃႉယိပ်းတိုဝ်း လုမ်းပုတ်ႉထ မိူင်းမၢဝ်း ႁဵတ်းဢွၵ်ႇ ၊ လၢႆးသွၼ်ပဝ်ႇပီႇၼမ်ႉတဝ်ႈသမ်ႉ တေပဵၼ်ၸုမ်းဢွၼ်ႇယိင်းတႆး မိူင်းသဵင်ၵွင် မႃးပူင်သွၼ်ပၼ် ဝႃႈၼႆ ။


ပၢင်သွၼ်လိၵ်ႈလၢႆးတႆးလႄႈ ၾိင်ႈငႄႈပုတ်ႉထၼႆႉ တင်းမူတ်း လုၵ်ႈႁဵၼ်းမီး 54 ၵေႃႉ ၊ ၶူႈပူင်သွၼ် တင်းမူတ်းမီး 9 ၵေႃႉ ၊ ၶူးသွၼ်ယိင်း 6 ၵေႃႉ ။ ၶူးသွၼ်သင်ၶၸဝ်ႈ 3 တူၼ် ။