ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး (SSSNY) ဢွၵ်ႇလိၵ်ႈ ပၼ်တိုဝ်ႉတၢင်း ၵူၼ်းၼုမ်ႇ ၼႂ်းမိူင်းတႆး ယွၼ်းယိုၼ်ႈလဝ်ႈ ၶဝ်ႈႁဵၼ်းတီႈႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး ၸုပ်ႈၵၢၼ်ႁဵၼ်း ၵမ်းတီႈ 16 ပီ 2016 ၼီႈ ။

ဝၼ်းတီႈ 19 လိူၼ် January ပီ 2016 ၼႆႉႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈ  ၸိုင်ႈတႆး (SSSNY) ဢွၵ်ႇဝႅပ်ႊၾွမ်ႊ တႃႇယိုၼ်ႈယွၼ်း ၶဝ်ႈပဵၼ်လုၵ်ႈႁဵၼ်း ၸုပ်ႈ 16 ၊ လဝ်ႈယိုၼ်ႈလႆႈ တၢင်းၾၢႆႇ တႆး ၊ ၾၢႆႇမၢၼ်ႈ လႄႈၾၢႆႇဢိင်းၵလဵတ်ႈ ၊ တင်ႈတႄႇဝၼ်းတီႈ 19/1/2016 တေႃႇ 29/2/2016 ပဵၼ်ဝၼ်းလိုၼ်းသုတ်း ။


ၽူႈၵွၼ်းႁူင်းႁဵၼ်း  ၼၢင်းၸၢမ်တွင်း လၢတ်ႈဝႃႈ “ ယိူင်းဢၢၼ်းဢၼ်လႆႈပိုတ်ႇႁူင်းႁဵၼ်းၼႆႉ ယွၼ်ႉပိူဝ်ႈၶႂ်ႈပူၵ်းပွင်ၼမ်ႉၵတ်ႉၵူၼ်းၼုမ်ႇ ၊ ႁႂ်ႈၵူၼ်းၼုမ်ႇၵတ်ႉၶႅၼ်ႇ မီးၼမ်ႉၵတ်ႉတဵမ်ထူၼ်ႈသေ ၸွႆႈလႆႈၼႂ်းတူင်ႇဝူင်းၵူၼ်း ၊ ၼႂ်းဝၢၼ်ႈမိူင်းၸဝ်ႈၵဝ်ႇ ”  ဝႃႈၼႆ ။


ပၵ်းပိူင်တႃႇတေလႆႈၶဝ်ႈႁူင်းႁဵၼ်းၼႆႉ တေလႆႈပဵၼ်ၵူၼ်းၼုမ်ႇဢၼ်ၵိူတ်ႇ / ယူႇၼႂ်းမိူင်းတႆး ၊ ၽူႈတေလႆႈၶဝ်ႈႁဵၼ်း သႅၼ်းဢႃႇယု 18 -26 ပီ ၊ တေလႆႈမီးလိၵ်ႈ ဢၼ်မူႇၸုမ်းၵမ်ႉထႅမ် ဢမ်ႇၼၼ် ၽူႈယႂ်ႇၵူၼ်းလူင် ၵမ်ႉထႅမ်ၸွမ်း ။ ၶေႃႈမုလ်း ပိုၼ်းၸဝ်ႈၵဝ်ႇ ဢၼ်ၸိုဝ်ႈၸႂ်ႈ ၊ တၵ်းလႆႈမီးၽႅၼ်ၵၢၼ် ၸႅင်ႈလႅင်း တႃႇမိူဝ်းၼႃႈ ။ ၾၢႆႇႁူင်းႁဵၼ်း တေၶတ်းလိူၵ်ႈသၢင်ဢဝ်လုၵ်ႈႁဵၼ်း 32 ၵေႃႉ - ဝႃႈၼႆ ။


ၼၢင်းႁွမ် လုၵ်ႈႁဵၼ်းၵဝ်ႇ ၸုပ်ႈ 15 လၢတ်ႈဝႃႈ - “ ႁူင်းႁဵၼ်းဢၼ်ၼႆႉ ႁဵတ်းႁႂ်ႈၵူၼ်းၼုမ်ႇႁဝ်း ႁူပွင်ႇတႃလႅင်း လႄႈလႅၵ်ႈလၢႆႈပၼ် တၢင်းႁူႉတၢင်းႁၼ်ႁဝ်းတႄႉတႄႉ ။ ၵွပ်ႈၼၼ်လႄႈ ၶႂ်ႈတိုၵ်းသူၼ်းၵူၼ်းၼုမ်ႇႁဝ်းၶဝ်  ႁႂ်ႈဢွၼ်ၵၼ်ၶဝ်ႈတွပ်ႇလိၵ်ႈတူၺ်း ’’ - ဝႃႈၼႆ ။


ႁူင်းႁဵၼ်း SSSNY ၼႆႉ ဢမ်ႇၸႅၵ်ႇၽႄ  ၽႃသႃ ၊ သႃသၼႃ ၊ ၸိူဝ်ႉၶိူဝ်း ၊ ယိင်း / ၸၢႆး ၊ သီၽိဝ်လမ်ၶၢဝ် ။ ၾိုၵ်းသွၼ်ပၼ် ၵၢၼ်ပူၵ်းပွင် လွင်ႈၽဵင်ႇပဵင်းပဵၼ်ထမ်း ၊ တူင်ႇဝူင်းၵူၼ်း ၊ သုၼ်ႇလႆႈၵူၼ်း ၊ လွင်ႈၻီႊမွၵ်ႊၶရေႊသီႊ ၸဵမ်ၸိူဝ်းၼႆႉ ။


ၵၢၼ်ၾိုၵ်းသွၼ် ၼႂ်းႁူင်းႁဵၼ်း ၽႃသႃဢိင်းၵလဵတ်ႈပဵၼ်လၵ်းလႄႈ ၽူႈၶဝ်ႈတွပ်ႇတင်းသဵင်ႈ တၵ်းလႆႈႁၢင်ႈႁႅၼ်းတူဝ် ၵၢၼ်တႅမ်ႈ ၊ ၵၢၼ်လၢတ်ႈ ၊ ၵၢၼ်ထွမ်ႇ ၽႃသႃဢိင်းၵလဵတ်ႈ ။ ၼႂ်းၵၢၼ်ၶတ်းလိူၵ်ႈ ၽူႈတေလႆႈၶဝ်ႈႁူင်းႁဵၼ်းၼၼ်ႉ မီးတွၼ်ႈၵၼ် ထၢမ်တွပ်ႇ ၾၢႆႇတႆး / မၢၼ်ႈ လႄႈဢိင်းၵလဵတ်ႈ ။


သၢႆမၢႆၸိုဝ်ႈၽူႈတေလႆႈၶဝ်ႈႁူင်းႁဵၼ်း တေပိုၼ်ၽၢဝ်ႇ ၼႂ်းဝၼ်းတီႈ 2 May 2016 ၊ ဝၼ်းတႄႇၵၢၼ်ႁဵၼ်း / သွၼ် 5 June 2016 သေ တေပူတ်းပၢင် ၼႂ်းႁူဝ်လိူၼ် December 2016 ။ သင်ဝႃႈၶႂ်ႈႁူႉလၢႆးႁူဝ်ယွႆႈမၼ်းၸိုင် ၶဝ်ႈလဵပ်ႈႁဵၼ်းလႆႈတီႈ ဝႅပ်ႉသၢႆႉ www.sssny.org  လႆႈယူႇ ။


ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး (SSSNY) ၼႆႉ တႄႇမႃးမိူဝ်ႈ  လိူၼ် May ပီ 2001 ၊ ပိုတ်ႇႁပ်ႉလုၵ်ႈႁဵၼ်းမႃးၵူႈပီ လႄႈ လုၵ်ႈႁဵၼ်းၵဝ်ႇ ဢၼ်ယဝ်ႉႁူင်းႁဵၼ်းၵႂႃႇမီး  500 ပၢႆ ။ ၵမ်ႈၼမ် ပွၵ်ႈမိူဝ်းၸွႆႈထႅမ် ၵၢၼ်ၼႂ်းမူႇၸုမ်း ၊ ၼႂ်းတူင်ႇဝူင်းၼႃႈတီႈၽႂ်မၼ်းၶိုၼ်း ။