ပိူင်ပၢင်လူင် ၸွမ်းသုၼ်ႇလႆႈၽဵင်ႇပဵင်း မၢၼ်ႈၼိုင်ႈပျႃး - တႆးၼိုင်ႈပျႃး ၊ ဢၼ်ၸွမ်သိုၵ်းဢွင်ႇသၢၼ်း ဢွၼ်ႁဵတ်းမႃးၼၼ်ႉ ပႃႊတီႊ NLD ဢၼ်ၵေႃႉပဵၼ်လုၵ်ႈယိင်းမၼ်း ၼၢင်းဢွင်ႇသၢၼ်းၸုၵျီႇဢွၼ်ႁူဝ် ဢမ်ႇပေႃးႁၼ်လီ ။

ၾၢႆႇပႃႊတီႊ ၻီႊမူဝ်ႊၶရေႊၸီႊၸိူဝ်ႉၸၢတ်ႈ (NLD) ၶဝ် တူၵ်ႇလၢတ်ႈတီႈၼႂ်း ပၢင်ၵုမ်လူင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် ဢၼ်ၸတ်းတီႈၼေႇပျီႇတေႃႇ (12-16/01/2016) ၼၼ်ႉဝႃႈ - ပေႃးတေဢဝ်ၼႃႈလိၼ်ပိုၼ်ႉတီႈ ဢၼ်ၸၢဝ်းၶိူဝ်းမၢၼ်ႈယူႇသဝ်းတင်းၼမ် (7 တိူင်း) မႃးႁုပ်ႈႁဵတ်းပဵၼ်ၸႄႈမိူင်းဢၼ်ၼိုင်ႈသေ ယူႇႁူမ်ႈၵိုၵ်း 7 ၸႄႈမိူင်း ၊ ၵေႃႇတင်ႈၸိုင်ႈမိူင်းႁူမ်ႈတုမ်လူၺ်ႈ 8 ၸႄႈမိူင်းဢၼ်ဝႃႈၼၼ်ႉ ဢမ်ႇပဵၼ်လႆႈ ။


ၵဵဝ်ႇၵပ်းလွင်ႈၼႆႉ ၸၢႆးထုၼ်းဢေး တူဝ်တႅၼ်းပႃႊတီႊႁူဝ်သိူဝ် (SNLD) ဢၼ်ၵႂႃႇၶဝ်ႈႁူမ်ႈပၢင်ၵုမ်ၼၼ်ႉ လၢတ်ႈဝႃႈ - ဢၼ်ႁဝ်းၶႃႈလႆႈလဵပ်ႈႁဵၼ်းႁၼ်တႄႉ ၼႂ်းပၢင်ၵုမ်လူင်ၼၼ်ႉ မိူဝ်ႈၸႅၵ်ႇၵူၼ်းပဵၼ်မူႇပဵၼ်ၸုမ်းသေ ဢုပ်ႇဢူဝ်းၵၼ်၊ ပိူဝ်ႈတႃႇၼမ်းဢဝ်မႃး ဢုပ်ႇဢူဝ်းတၢင်ႇလၢတ်ႈၶိုၼ်းၼႂ်းပၢင်ၵုမ်လူင်ၼၼ်ႉ လႆႈႁၼ်ဝႃႈ ဢူးၺၢၼ်ႇဝိၼ်း ဢၼ်ပဵၼ်ၽူႈယႂ်ႇၵူၼ်းလူင်ၼႂ်း NLD သေမႃးၶဝ်ႈႁူမ်ႈပၢင်ၵုမ်လွင်ႈငမ်းယဵၼ်ၼၼ်ႉ မၼ်းလၢတ်ႈၼႄၾၢင်ႁၢင်ႈဢွၵ်ႇမႃး ဢမ်ႇပေႃးထုၵ်ႇၸႂ် မႅၼ်ႈၸႂ်ၼိူဝ်ပိူင်ပၢင်လူင် - ဝႃႈၼႆ ။


ၸိုင်ႈမိူင်းႁူမ်ႈတုမ်မၢၼ်ႈၼႆႉ ၵိူတ်ႇဢွၵ်ႇမီးမႃး ယွၼ်ႉပၢင်ၵုမ်လူင် တီႈပၢင်လူင် ဢၼ်ၸဝ်ႈၾႃႉလႄႈၽူႈၼမ်းၸၢဝ်းၶိူဝ်း ႁူမ်ႈၵၼ်ၸတ်းႁဵတ်း မိူဝ်ႈပီ 1947 ။ ၸွမ်သိုၵ်းဢွင်ႇသၢၼ်း မႃးၶဝ်ႈႁူမ်ႈသူၼ်းတုမ် တႃႇဢဝ်လွတ်ႈလႅဝ်းၵွၼ်းၶေႃ ၵေႃႇတင်ႈမိူင်းႁူမ်ႈတုမ်ၸွမ်းၵၼ် ။ ထိုင်မႃးမိူဝ်ႈပီ 1961 ၽူႈၼမ်းၸၢဝ်းၶိူဝ်းတင်းလၢႆ ယၢမ်ႈတၢင်ႇလၢတ်ႈ တီႈပၢင်ၵုမ်လူင်တူၼ်ႈတီးဝႃႈ - ၵၢၼ်ၵေႃႇတင်ႈမိူင်းၼႆႉ တၵ်းလႆႈပဵၼ်ပိူင် 8 ၸႄႈမိူင်းၵူၺ်း ။


ပေႃးဝႃႈႁဵတ်းၸိူင်ႉၼၼ်ၸိုင် တူဝ်တႅၼ်းၼႂ်းသၽႃးၸိူဝ်ႉၸၢတ်ႈလႄႈ သၽႃးၵူၼ်းမိူင်းၼႆႉ တေလႆႈဝႆႉၽဵင်ႇပဵင်းၵၼ်။ လိူဝ်သေၼၼ်ႉ သၽႃးၸႄႈမိူင်းၵေႃႈ တေလႆႈဝႆႉႁင်းၽႂ်မၼ်းထႅင်ႈ။ ပေႃးဝႃႈဢဝ်လၢႆးၼႆႉ လူင်ပွင်ၸိုင်ႈၵၢင် (ငဝ်ႈငုၼ်း) တၵ်းလႆႈၸႅၵ်ႇဝၢၵ်ႈဢမ်းၼၢၸ်ႈ (ဢႃႇၼႃႇ) ပၼ် လူင်ပွင်ၸိုင်ႈၸႄႈမိူင်းသေ တၵ်းတေလႆႈမီး သုၼ်ႇလႆႈၽဵင်ႇပဵင်းတဵမ်တဵမ်ထူၼ်ႈထူၼ်ႈ ။ မိူၼ်ၼင်ႇ ၸွမ်သိုၵ်းဢွင်ႇသၢၼ်း ယၢမ်ႈတူၵ်ႇလၢတ်ႈမႃးဝႃႈ - မၢၼ်ႈၼိုင်ႈပျႃးၵေႃႈတႆးၼိုင်ႈပျႃး - ၽူႈမီးပုၼ်ႈၽွၼ်းၼႂ်း SNLD လၢတ်ႈ ။


ၵူၺ်းၵႃႈ ယၢမ်းလဵဝ်ၼႆႉ သၽႃးၸိူဝ်ႉၸၢတ်ႈတင်း သၽႃးၵူၼ်းမိူင်းၼႆႉ မီးၽူႈတႅၼ်းဢမ်ႇမိူၼ်ၵၼ် ။ သၽႃးၸိူဝ်ႉၸၢတ်ႈၼႆႉ ၽူႈတႅၼ်းဢေႇလိူဝ်သၽႃးၵူၼ်းမိူင်း ၊ ၵူၺ်းၵႃႈ ပေႃးဝႃႈသၽႃးၸိူဝ်ႉၸၢတ်ႈ ပၢၵ်ႈပႅတ်ႈၶေႃႈယိုၼ်ႈယွၼ်း ဢၼ်တၢင်ႇလၢတ်ႈမႃးၸိူဝ်းၼၼ်ႉၸိုင် သၽႃးၵူၼ်းမိူင်း ယွမ်းႁပ်ႉယူႇၵေႃႈဢမ်ႇလႆႈ ။ ပေႃးဝႃႈသၽႃးၸိူဝ်ႉၸၢတ်ႈပၢၵ်ႇပႅတ်ႈၵေႃႈ ဢမ်ႇၸၢင်ႈသိုပ်ႇႁဵတ်းထႅင်ႈ ။


မိူၼ်ၼင်ႇၼႂ်းပိုၼ်ႉတီႈ ဢၼ်ၸၢဝ်းၶိူဝ်းမၢၼ်ႈယူႇသဝ်းၼမ်ၼႆႉ ယွၼ်ႉပိူဝ်ႈၸႅၵ်ႇဝႆႉပဵၼ် 7 တိူင်းလႄႈ ပေႃးဝႃႈၸၢဝ်းၶိူဝ်း 1 ၸႄႈမိူင်းလႆႈ 1 ပျႃးၸိုင် ၸၢဝ်းၶိူဝ်းမၢၼ်ႈသမ်ႉပေႃးလႆႈ 7 ပျႃးယဝ်ႉ ။ တေလႆႈဝႃႈ လွင်ႈၼႆႉဢမ်ႇမီးလွင်ႈၽဵင်ႇပဵင်း - ၸၢဝ်းၶိူဝ်းတင်းလၢႆယၢမ်ႈလၢတ်ႈ ၼင်ႇၼႆ ။


ၼွၵ်ႈသေၼၼ်ႉ ၸွမ်ၽွင်းလူင်ၸႄႈမိူင်းမိူဝ်ႈလဵဝ် ဢၼ်ၶွတ်ႇၽွတ်ႈဝႆႉၸိူဝ်းၼႆႉၵေႃႈ ဢမ်ႇၸႂ်ႈၵူၼ်းမိူင်းလိူၵ်ႈတင်ႈ ၶိုၼ်ႈမႃး ။ မိူၼ်ၼင်ႇၵၢၼ်ၵဵပ်းၶွၼ်ႇ ၊ ၵၢၼ်ၶဵၼ်ႇတႅမ်ႈပၵ်းပိူင်မၢႆမီႈ ၊ လွင်ႈသုၼ်ႇလႆႈတတ်းတႅပ်းတူဝ်ၵဝ်ႇႁင်းၶေႃၸိူဝ်းၼႆႉ လူင်ပွင်ၸိုင်ႈၸႄႈမိူင်းမိူဝ်ႈလဵဝ် ဢမ်ႇမီးသုၼ်ႇလႆႈသင် ။


ၻွၵ်ႊတိူဝ်ႊယၢၼ်ႇမဵဝ်းတဵင်း ၽူႈလဵပ်ႈႁဵၼ်းၵၢၼ်မိူင်းမိူင်းမၢၼ်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ - ပေႃးဝႃႈလဵပ်ႈႁဵၼ်းတူၺ်း NLD ၸိုင် ၸဵမ်မိူဝ်ႈလႂ်ပူၼ်ႉမႃးယဝ်ႉ ပိူင် 8 ၸႄႈမိူင်းဢၼ်ဝႃႈၼႆႉ ၶဝ်ဢမ်ႇပေႃးႁၼ်လီ ။ ၵူၺ်းၵႃႈ မိူဝ်ႈလဵဝ်ၼႆႉ ၶဝ်လႆႈမႃး ဢမ်းၼၢၸ်ႈ (ဢႃႇၼႃႇ) ၼႂ်းၵၢၼ်ဝၢၼ်ႈၵၢၼ်မိူင်းသေ ၶဝ်တေဢိင်ၼိူဝ်လွင်ႈတၢင်းၸိူဝ်းၼႆႉသေ ၶဝ်တေတႅပ်းတတ်းသေလၢတ်ႈၵႂႃႇ - ဝႃႈၼႆ ။


ၽူႈလဵပ်ႈႁဵၼ်းၵၢၼ်မိူင်းၶဝ်တင်းလၢႆ ၾၢႆႇၸၢဝ်းၶိူဝ်းၵေႃႈလီ ၊ ၾၢႆႇမၢၼ်ႈၵေႃႈလီ ၊ ၸိူဝ်းဢၼ်ႁူႉၵၢၼ်မိူင်းၶဝ်ၵေႃႈ လၢတ်ႈဝႃႈ - ဢၼ်လႆႈပဵၼ်ပၢင်တိုၵ်းၵၼ်မႃး 60 ပီပၢႆသေ ႁဵတ်းႁႂ်ႈဝၢၼ်ႈမိူင်းတူၵ်းတႅမ်ႇၵွတ်းၽၢၼ်ၼႆႉ ပဵၼ်ၵွပ်ႈႁၵ်းယႃႉပႅတ်ႈၶေႃႈၵိၼ်ၵႅၼ်ႇပၢင်လူင် - ၼႆယဝ်ႉ ။


ယွၼ်ႉပိူဝ်ႈၸွမ်သိုၵ်းဢွင်ႇသၢၼ်းဝႃႈ ပေႃးမၢၼ်ႈလႆႈၼိုင်ႈပျႃးၵေႃႈ တႆးလႆႈၼိုင်ႈပျႃး ၊ ထုၵ်ႇလႆႈၽဵင်ႇပဵင်းၵၼ်ၼႆလႄႈ တႆး ၊ ၶၢင် ၊ ၶျၢင်း ၸိူဝ်းယူႇမိူင်းသၼ်လွႆ ၸင်ႇတူၵ်းလူင်း ဢဝ်လွတ်ႈလႅဝ်းၵွၼ်းၶေႃ ၸွမ်းမၢၼ်ႈ ဢၼ်ယူႇမိူင်းပဵင်းသေ ၸင်ႇလႆႈမိူင်းလွတ်ႈလႅဝ်းၵွၼ်းၶေႃမႃး ၊ ၸင်ႇပဵၼ်မႃးၸိုင်ႈမိူင်းႁူမ်ႈတုမ်ဢၼ်မႂ်ႇ ယူႇယၢမ်းလဵဝ် ။