ႁူဝ်ပဝ်ႈပႃႊတီႊႁူဝ်သိူဝ် (SNLD) ၸဝ်ႈၶုၼ်ထုၼ်းဢူး တူၵ်ႇလၢတ်ႈဝႃႈ ပေႃးဝႃႈၸႅၵ်ႇမႅင်ႇၸႄႈမိူင်းမႂ်ႇ တွၼ်ႈတႃႇၸၢဝ်းၶိူဝ်းဢွၼ်ႇၸိုင် တေၸၢင်ႈႁဵတ်းႁႂ်ႈၸိုင်ႈမိူင်းႁူမ်ႈတုမ်လူင်ၼႆႉ တႅၵ်ႇယၢႆႈလူႉၵွႆၵႂႃႇ မိူၼ်ၼင်ႇ ၸိုင်ႈမိူင်းႁူမ်ႈတုမ် ယူႊၵူဝ်ႊသလႃႊဝီႊယိူဝ်ႊ ။

ႁၢင်ႈၽႅၼ်ႇတီႈ ပိုၼ်ႉတီႈၼႃႈလိၼ်ဢၼ်ဝႃႉၵုမ်းၵမ် ၼႂ်းၸိုင်ႈတႆး

ႁူဝ်ပဝ်ႈ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) တူၵ်ႇလၢတ်ႈဝႃႈ - တေႃႈလဵဝ်ၼႆႉ သင်ၸိူဝ်ႉဝႃႈ ဢမ်ႇဝူၼ်ႉသၢင်ႈလွင်ႈၸႄႈမိူင်း ၸိူဝ်းဢၼ်မီးဝႆႉယူႇသေ ဢမ်ႇၸတ်းသၢင်ႈႁၢင်ႈပွင် လွင်ႈသုၼ်ႇလႆႈ သုၼ်ႇပဵၼ်ၽဵင်ႇပဵင်း ၊ သမ်ႉၵႂႃႇဝူၼ်ႉႁဵတ်းသၢင်ႈလွင်ႈ ပုၼ်ႈပၢင်ႈၵူၼ်းၸၢဝ်းၶိူဝ်းဢွၼ်ႇ ဢၼ်တုၵ်းယွၼ်းၸႄႈမိူင်းမႂ်ႇၸိူဝ်းၼႆႉၵႂႃႇၸိုင် ဝၢၼ်ႈမိူင်း ၸိုင်ႈမိူင်းႁူမ်ႈတုမ်မၢၼ်ႈၼႆႉ ၸၢင်ႈမိူၼ်ၸိူင်ႉၼင်ႇမိူင်းႁူမ်ႈတုမ် ယူႊၵူဝ်ႊသလႃႊဝီႊယိူဝ်ႊ ဢၼ်တႅၵ်ႇယၢႆႈသေႁၢႆလၢႆၵႂႃႇၼိူဝ်လူၵ်ႈၼႆႉ - ဝႃႈၼႆ ။


ပၢင်ၵုမ်လူင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် ဢၼ်ၸတ်းႁဵတ်းတီႈၼေႇပျီႇတေႃႇ (12-16/01/2016) ၼၼ်ႉ ၸၢဝ်းၶိူဝ်းၼႂ်းမိူင်းတႆး ဝႃႉ ၊ တဢၢင်း ၊ ပဢူဝ်း ဢိၵ်ႇ တႆးလႅင် (ၼႂ်းမိူင်းၶၢင်) ၸိူဝ်းၼႆႉ ဢွၼ်ၵၼ်တုၵ်းယွၼ်းၵေႃႇတင်ႈ ၸႄႈမိူင်းမႂ်ႇႁင်းၵူၺ်းလႄႈ ၸဝ်ႈၶုၼ်ထုၼ်းဢူး ၸင်ႇတူၵ်ႇလၢတ်ႈၼင်ႇၼႆ ။


ၸဝ်ႈၶုၼ်ထုၼ်းဢူး လၢတ်ႈဝႃႈ - ပေႃးလၢတ်ႈတႅၵ်ႇလႅင်းတႄႉ ပေႃးတေဝူၼ်ႉမႅၼ်ႈလွင်ႈ တႃႇတေၵေႃႇတင်ႈပၼ်ၸႄႈမိူင်းမႂ်ႇထႅင်ႈၼႆၸိုင် ဝၢၼ်ႈမိူင်းႁဝ်းၼႆႉ တေၸၢင်ႈပဵၼ်ပၼ်ႁႃမိူၼ်ၸိူင်ႉၼင်ႇ ၶရႆႊမီႊယိူဝ်ႊ ၊ ယူႊၵူဝ်ႊသလႃႊဝီႊယိူဝ်ႊၸိူဝ်းၼႆႉ ။ ၵွပ်ႈၼၼ် ၸိုင်ႈမိူင်းႁူမ်ႈတုမ်မၢၼ်ႈၼႆႉၵေႃႈ တေၸၢင်ႈလူႉႁၢႆလၢႆၵႂႃႇမိူၼ်ၼင်ႇ ၸိုင်ႈမိူင်းႁူမ်ႈတုမ် ယူႊၵူဝ်ႊသလႃႊဝီႊယိူဝ်ႊၼၼ်ႉယဝ်ႉ - ဝႃႈၼႆ ။


ၸိုင်ႈမိူင်းႁူမ်ႈတုမ် ယူႊၵူဝ်ႊသလႃႊဝီႊယိူဝ်ႊၼႆႉ မိူဝ်ႈၵၢပ်ႈပၢၼ်ၽွင်းသိုၵ်းယဵၼ်ၼၼ်ႉ ပဵၼ်မိူင်းဢၼ်ဢွၼ်ႁူဝ်ၼမ်းၼႃႈ ၼႂ်းၵုၼ်ယူႊရွပ်ႊမိူင်းၼိုင်ႈ ။ ဝၢႆးၼႆႉမႃး ဢိင်ၼိူဝ်ၸၢဝ်းၶိူဝ်းဢွၼ်ႇၶဝ် ယိပ်းၵွင်ႈၵၢင်ႇလုၵ်ႉၽိုၼ်ႉ တုၵ်းယွၼ်းၸႄႈမိူင်းႁင်းၽႂ်မၼ်းသေ ထိုင်မႃးၸၼ်ႉၽၢတ်ႇဢွၵ်ႇမိူင်းႁူမ်ႈတုမ် ၊ ပဵၼ်မႃးမိူင်းပွတ်ႊသၼီႊယိူဝ်ႊ၊ ၶူဝ်ႊရူဝ်ႊဢေႊသျိူဝ်ႊ ၊ ၶူဝ်ႊသူဝ်ႊဝူဝ်ႊ ၊ သိူဝ်ႊၿီႊယိူဝ်ႊ ၊ မွၼ်ႊထီႊၼီႊၵရူဝ်ႊ ၸိူဝ်းၼႆႉ ၊ ႁဵတ်းႁႂ်ႈၸိုင်ႈမိူင်းယူႊၵူဝ်ႊသလႃႊဝီႊယိူဝ်ႊႁၢႆလၢႆၵႂႃႇ ။


ၸွမ်းၼင်ႇ ပိူင်ငဝ်ႈပိုင်းမိူင်း (လၵ်းမိူင်း) 2008 ဢၼ်ၸုမ်းသိုၵ်းမၢၼ်ႈ ဢွၼ်ႁူဝ်ၶဵၼ်ႇတႅမ်ႈႁပ်ႉႁွင်း / မၵ်းမၼ်ႈဝႆႉၼၼ်ႉ ၼႂ်းၸိုင်ႈတႆးၼႆႉ ႁပ်ႉႁွင်းပၼ်ၼႃႈလိၼ်ၽွင်းငမ်းတူဝ်ၵဝ်ႇဝႃႉၸိုင်ႈတႆးပွတ်းဢွၵ်ႇၶူင်း 6 ၸႄႈဝဵင်း ။ ၼႂ်းၼၼ်ႉ ၸႄႈဝဵင်းႁူဝ်ပၢင်ႇ ၊ ပၢင်ဝၢႆ ၊ ၼႃးၽၢၼ်း ၊ မိူင်းမႂ်ႇ ၊ မၢၵ်ႇမၢင် ၊ ပၢင်သၢင်း ၸိူဝ်းၼႆႉ ။


ၼႂ်းၸိုင်ႈတႆးပွတ်းၸၢၼ်း ႁပ်ႉႁွင်းမၵ်းမၼ်ႈဝႆႉပၼ် ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းၶိူဝ်းပဢူဝ်း မီး 3 ၸႄႈဝဵင်း ၊ ၸႄႈဝဵင်းသီႇသႅင်ႇ ၊ ႁူဝ်ပူင်း ၊ ပၢင်လွင်း ။ ၼႂ်းၸိုင်ႈတႆးပွတ်းႁွင်ႇ ႁပ်ႉႁွင်းမၵ်းမၼ်ႈပၼ် ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းၶိူဝ်းတဢၢင်း (ပလွင်ႈ) 2 ၸႄႈဝဵင်း ၊ ၸႄႈဝဵင်းၼမ်ႉသၼ်ႇ တင်းဝၢၼ်ႈတူင်ႈ ။


ၵဵဝ်ႇၵပ်းလွင်ႈၼႆႉ ၸဝ်ႈၶုၼ်ထုၼ်းဢူး ယင်းဢွၵ်ႇၵႂၢမ်းထၢမ်တူၵ်ႇလၢတ်ႈဝႃႈ - ၵွပ်ႈၼၼ်လႄႈ ပိူင်ငဝ်ႈပိုင်းမိူင်း 2008 ၼႆႉ ႁဝ်းၸင်ႇဢမ်ႇယွမ်းႁပ်ႉ ။ ပေႃးဝႃႈတူၺ်းပိူင် 2008 ၼႆႉ ဢၼ်ၶဵၼ်ႇတႅမ်ႈဝႆႉၼႆႉ မၼ်းမိူၼ်ၸိူင်ႉၼင်ႇ မီးယိူင်းဢၢၼ်းတႃႇယႃႉၵဝ်းၸႄႈမိူင်းမိူင်းတႆးဝႆႉ ။ လွင်ႈၼႆႉ တေပၼ်ၶဝ် ဢမ်ႇပၼ်ၶဝ်ဢၼ်ဝႃႈၼၼ်ႉ မိူဝ်ႈလဵဝ်ၼႆႉဢမ်ႇၸၢင်ႈဝႃႈ ၊ ယွၼ်ႉပိူဝ်ႈဝႃႈပၼ်ႁႃဢၼ်ၼႆႉ ပဵၼ်လူင်ပွင်ၸိုင်ႈသိုၵ်းသၢင်ႈၶိုၼ်ႈမႃးဝႆႉ ၊ လွင်ႈၸိူဝ်းၼႆႉ ႁဝ်းၶႃႈတေႁဵတ်းႁိုဝ်ၵႄႈလိတ်ႈ ။ ပေႃးတႅပ်းဢဝ်ၼႃႈလိၼ်ၼႂ်းမိူင်းမၢၼ်ႈၸႅၵ်ႇပၼ် ၸၢဝ်းၶိူဝ်းလူး ၊ ၸၢဝ်းၶိူဝ်းမၢၼ်ႈၶဝ်သမ်ႉတေဝႃႈႁိုဝ် - ဝႃႈၼႆ ။


ၼွၵ်ႈသေၼႃႈလိၼ်ၽွင်းငမ်းတူဝ်ၵဝ်ႇဝႃႉ ဢၼ်မီးဝႆႉယၢမ်းလဵဝ်ၼႆႉ ၼႂ်းပၢင်ၵုမ်လူင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်ၼၼ်ႉ တူဝ်တႅၼ်းပႃႊတီႊဝႃႉ သႆႇပဝ်းၼပ်း ယင်းတုၵ်းယွၼ်းပႃးၸိုင်ႈတႆးပွတ်းႁွင်ႇ မိူၼ်ၼင်ႇတၢင်ႉယၢၼ်း လႄႈ လႃႈသဵဝ်ႈ ။ ၸိုင်ႈတႆးပွတ်းဢွၵ်ႇၶူင်း တွၼ်ႈတၢင်းၸၢၼ်းၵေႃႈ တုၵ်းယွၼ်းပႃး ၵဵင်းတုင် တႃႈၶီႈလဵၵ်း မိူင်းသၢတ်ႇ မိူင်းတူၼ်ၸိူဝ်းၼႆႉ ၶဝ်ႈပႃးၼႂ်းၼႃႈလိၼ်ဝႃႉၽွင်းငမ်းတူဝ်ၵဝ်ႇသေ မၵ်းမၼ်ႈပဵၼ်ၸႄႈမိူင်းဝႃႉ ။


ၼႃႈလိၼ်ၽွင်းငမ်းတူဝ်ၵဝ်ႇဝႃႉ ဢၼ်တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၽွင်းငမ်းၵုမ်းၵမ်ဝႆႉၼႆႉ တၢင်းၵႂၢင်ႈမီး 17,000 လွၵ်းလၵ်း / ၵီႊလူဝ်ႊမီႊတိူဝ်ႊ ၊ ယႂ်ႇလိူဝ်တိူင်းတႃႈၵုင်ႈ ၊ တိူင်းတႃႈၵုင်ႈမီး (10,000) ၵီႊလူဝ်ႊမီႊတိူဝ်ႊ ။ ၼႂ်းၼႃႈလိၼ်ၽွင်းငမ်းတူဝ်ႇၵဝ်ႇဝႃႉ မီးႁူဝ်ၵူၼ်း (300,000+) သၢမ်သႅၼ်ပၢႆ ။ ၼႂ်းလုမ်းၼႂ်းၸႆးၸႂ်ႉလိၵ်ႈၶႄႇၵႂၢမ်းၶႄႇ ၊ ၸႂ်ႉငိုၼ်းၶႄႇ ၊ ၵၢၼ်ၵႃႉၶၢႆၵေႃႈတိတ်းတေႃႇၵၼ်တင်းမိူင်းၶႄႇ ၵမ်းသိုဝ်ႈ ။


ၽူႈၼမ်းၸၢဝ်းၶိူဝ်းဝႃႉတင်းလၢႆ တူၵ်ႇလၢတ်ႈဝႃႈ - ၵၢၼ်တုၵ်းယွၼ်းၵေႃႇတင်ႈၸႄႈမိူင်းမႂ်ႇ ႁင်းၵူၺ်းၼႆႉ ဢမ်ႇၵွမ်ႉၵႃႈလူင်ပွင်ၸိုင်ႈၼႆႉၵူၺ်း ၊ လူင်ပွင်ၸိုင်ႈမႂ်ႇၶိုၼ်ႈမႃးၵေႃႈ တေတုၵ်းယွၼ်းၵႂႃႇထႅင်ႈ ။ ဢၼ်တုၵ်းယွၼ်းၸႄႈမိူင်းၼႆႉ တုၵ်းယွၼ်းသုၼ်ႇလႆႈသုၼ်ႇပဵၼ် ဢၼ်ဝႃႉမီးဝႆႉၵူၺ်း ၊ ဢမ်ႇၸႂ်ႈယိူင်းဢၢၼ်းၶႂ်ႈယႃႉၵဝ်းမိူင်းႁူမ်ႈတုမ်တႅၵ်ႇ - ဝႃႈၼႆ ။