ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) ဢွၵ်ႇလိၵ်ႈပိုၼ်ၽၢဝ်ႇ တုၵ်းယွၼ်းႁႂ်ႈ KIO/KIA ပွႆႇပၼ်ၵူၼ်းမိူင်း ၸိူဝ်းတီႉၺွပ်းဝႆႉ ၽွင်းႁၢင်လိူၼ် ၻီႊသႅမ်ႊၿိူဝ်ႊ (2015) ။

ဢိင်ၼိူဝ် တပ်ႉသိုၵ်းၶၢင်လွတ်ႈလႅဝ်း (KIO/KIA) တီႉၺွပ်းၵူၼ်းမိူင်း ၼႂ်းၸႄႈဝဵင်းမူႇၸေႈ တင်းၼႂ်းၸႄႈဝဵင်း ၵူတ်ႉၶၢႆ ၵႂႃႇ 15 ၵေႃႉ ၊ မိူဝ်ႈဝၼ်းတီႈ 28-29/12/2015 ပူၼ်ႉမႃးၼၼ်ႉ ယူႇတီႈငဝ်ႈငုၼ်း ၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး (SNLD) မႆႈၸႂ်ၸွမ်းသေ လႆႈဢွၵ်ႇလိၵ်ႈပိုၼ်ၽၢဝ်ႇ မိူဝ်ႈဝၼ်းတီႈ 02/01/2016 တုၵ်းယွၼ်းႁႂ်ႈပွႆႇပၼ်ၶိုၼ်း ။


ၽူႈၶၢၼ်ပၢၵ်ႇ SNLD ၸၢႆးလဵၵ်ႉ လၢတ်ႈဝႃႈ - ဢၼ် KIO/KIA တီႉၺွပ်းၵႂႃႇ ၵူၼ်းၼုမ်ႇတႆး ၊ ၵူၼ်းၼုမ်ႇၸၢဝ်းၶိူဝ်းပလွင်ႈ ၸိူဝ်းပဵၼ်ၵူၼ်းယူႇၼႂ်းပိုၼ်ႉတီႈ ၸႄႈဝဵင်းမူႇၸေႈ ၸႄႈဝဵင်းၵူတ်ႉၶၢႆၸိူဝ်းၼႆႉ မၼ်းဢမ်ႇၵိုင်ႇလီပဵၼ်ယဝ်ႉ ။ လွင်ႈၼႆႉလႆႈမႆႈၸႂ်ၸွမ်း ။ ၵွပ်ႈၼၼ်လႄႈ ဢမ်ႇထုၵ်ႇလီမီးၶေႃႈၼွင်ႇ / ငိူၼ်ႈၶႆသင်သေ ထုၵ်ႇလီလႆႈပွႆႇပၼ်ၵမ်းသိုဝ်ႈ - ဝႃႈၼႆ ။


ၵဵဝ်ႇၵပ်းလွင်ႈၼႆႉ ပရၢင်ႇမၢႆႇ ၽူႈၵွၼ်းဢိူင်ႇၵျုႇပုမ်ႇ ၸႄႈဝဵင်းၵူတ်ႉၶၢႆ ဢၼ်ပဵၼ်ၵူၼ်း KIO/KIA ၼၼ်ႉလၢတ်ႈဝႃႈ - လွင်ႈၼႆႉ ဢမ်ႇလႆႈတီႉၶဝ်ၵႂႃႇ ၊ လႆႈႁူၺ်းသူၼ်းသေ လႆႈႁွင်ႉၶဝ်ၵႂႃႇၵူၺ်း - လႆႈငိၼ်းဝႃႈၸိူင်ႉၼႆ ။


ၸၢႆးမျၢတ်ႈဢွင်ႇ ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းမူႇၸႄႈ လၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ - ဢၼ်သိုၵ်းၶၢင် KIA တီႉၺွပ်းၵႂႃႇၼႆႉ ၵူၼ်းၼႃးသီႇမူႉ ၊ ၵူၼ်းဝၢၼ်ႈၵွင်းလႃ ၊ ၵူၼ်းဝၢၼ်ႈပဵင်းၸိူဝ်းၼႆႉ တင်းမူတ်း 5 ၵေႃႉ ၊ 3 ဝၢၼ်ႈၼႆႉ ပဵၼ်ၼႂ်းၸႄႈဝဵင်းၵူတ်ႉၶၢႆ ။ ၼႂ်းၸႄႈဝဵင်းမူႇၸေႈသမ်ႉ ဝၢၼ်ႈၵွင်းမူးတူင်ႈ ၊ ဝၢၼ်ႈတႃႈလူင် ၸိူဝ်းၼႆႉ 10 ၵေႃႉ ။


သိုပ်ႇလၢတ်ႈဝႃႈ - ဢၼ်တီႉၵႂႃႇတီႈမူႇၸေႈၼႆႉ ပဵၼ်ၾၢႆႇႁူဝ်ၼႃး ပွၵ်ႉၵွင်းမူးတူင်ႈ တီႉၵႂႃႇ 2 ၵေႃႉ ၊ ၵူၼ်းဝၢၼ်ႈတႃႈလူင် 8 ၵေႃႉ ၊ တီႉၵႂႃႇတီႈႁၢၼ်ႉၼိူဝ်ႉပိင်ႈ ။ တၢင်းၵူတ်ႉၶၢႆၼႆႉ ၵူၼ်းဝၢၼ်ႈၼႃးသီႇမူႉ ၊ ၵွင်းလႃၸိူဝ်းၼႆႉ ၵမ်ႈၼမ်တႄႉပဵၼ်ၸၢဝ်းၶိူဝ်းတဢၢင်း (ပလွင်ႈ) ။ မိူၼ်ၼင်ႇသၢဝ်ပလွင်ႈ ၼၢင်းဢၢမ်ၺူဝ်ႇ ၊ ၼၢင်းလူၺ်းဢႆႇ ။ ၵူၼ်းဝၢၼ်ႈပဵင်းၵေႃႈ လႆႈတီႉၵႂႃႇၵူၼ်းၸၢႆး 2 ၵေႃႉ ။ ဢၼ်တီႉၵႂႃႇၽူႈယိင်းၸိူဝ်းၼႆႉ ႁႂ်ႈဢဝ်ၵူၼ်းၸၢႆးၵႂႃႇလႅၵ်ႈၶိုၼ်း ၼိုင်ႈဢိူင်ႇ 7 ၵေႃႉ - ဝႃႈၼႆ ။


ၸွမ်းၼင်ႇလိၵ်ႈဢၼ်ၶဝ်တတ်းမၵ်းဝႆႉၼၼ်ႉ ၼႂ်းဝၢၼ်ႈ / ဢိူင်ႇ ၸႄႈဝဵင်းမူႇၸေႈလႄႈ ၸႄႈဝဵင်းၵူတ်ႉၶၢႆ ၊ ဢၼ် သိုၵ်းၶၢင် KIO/KIA တူင်ႉၼိုင်ထိုင်ၼၼ်ႉ တေၵဵပ်းသိုၵ်းႁႂ်ႈလႆႈၼိုင်ႈဝၢၼ်ႈ 7 ၵေႃႉ ။ တင်ႈတႄႇႁၢင်လိူၼ်ၻီႊသႅမ်ႊၿိူဝ်ႊ (2015)မႃးၼႆႉ သိုၵ်းၶၢင်တႅမ်ႈလိၵ်ႈ သူင်ႇမႃးၼင်ႇၼႆ - ၵူၼ်းၼုမ်ႇ ၸိုဝ်ႈမၢႆးၺီႇ ၵူၼ်းမူႇၸေႈလၢတ်ႈ ။


ၵဵဝ်ႇၵပ်းလွင်ႈဢၼ် သိုၵ်းၶၢင် KIA တီႉၺွပ်းၵူၼ်းၼႆႉသေ တၢင်းၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇတိတ်းတေႃႇ ၸဝ်ႈၼႃႈတီႈၶၢင် ဢူးလႃႈၼၢၼ်ႇယူႇ ၊ ၵူၺ်းၵႃႈဢမ်ႇႁပ်ႉၾူၼ်ႊ ။