ႁႅင်းၵၢၼ်ၸၢဝ်းတႆး ၵူၼ်းဝၢၼ်ႈၼမ်ႉတွၼ် ၸႄႈဝဵင်းလၢင်းၶိူဝ်း ၵေႃႉၶဝ်ႈႁဵတ်းၵၢၼ် ၼႂ်းမိူင်းထႆး ၊ ထုၵ်ႇၶႃႈတၢႆတီႈၼိူဝ်သဵၼ်ႈတၢင်း သူမ်ၽူတ်း 700 ပီ ၼႂ်းဝဵင်းၵဵင်းမႆႇ ။

ပူၼ်ႉမႃးမိူဝ်ႈၶိုၼ်း ဝၼ်းတီႈ 01/01/2016 ၶၢဝ်းယၢမ်းမွၵ်ႈတဵင်ႈၶိုၼ်း ၊ ႁႅင်းၵၢၼ်ၸၢဝ်းတႆး ၸိုဝ်ႈၸၢႆးဢူး ( ၸိုဝ်ႈၼႂ်းမိူင်းထႆး ၸၢႆးၽႄး ) ၊ ဢႃယု 25 ပီ ၊ ၵူၼ်းဝၢၼ်ႈၼမ်ႉတွၼ် ဢိူင်ႇဝၢၼ်ႈတဵင်း ၸႄႈဝဵင်းလၢင်းၶိူဝ်း ၊ ၸိုဝ်ႈမႄႈၼၢင်းသူၺ်ႇယု လႆႈထုၵ်ႇၶႃႈႁႅမ်တၢႆ တီႈၼိူဝ်သဵၼ်ႈတၢင်းသူမ်ၽူတ်း 700 ပီ ၊ ၼႂ်းဝဵင်းၵဵင်းမႆႇ မိူင်းထႆး - ၼႆယဝ်ႉ ။


ၶၢပ်ႈတူဝ်ၸၢႆးဢူႉၼႆႉ လႆႈၼမ်းဢဝ်မႃးဝႆႉတီႈ ဝတ်ႉသၢႆးမုၼ်း (မၢၼ်ႈ) ၊ ၼိူဝ်သဵၼ်ႈတၢင်းပမ်းရုင်း ပုရီး ဢိူင်ႇၽရႃႉသိင် ဝဵင်းၵဵင်းမႆႇ မိူင်းထႆး ။ ၵူၺ်းၵႃႈ ဢမ်ႇမီးပီႈမီးၼွင်ႉမႃးၸွႆႈထႅမ်သင် ၊ တီႈပၢင်ၸႃပၼ (မႃႇသႃႇ) မၼ်းၸၢႆးၼၼ်ႉ ၵူၺ်းမီးဢူၺ်းၵေႃႉ ၸိူဝ်းပဵၼ်သႅၼ်းႁုၼ်ႈလဵဝ်ၵၼ်ၵမ်ႈၽွင်ႈ မႃးပႂ်ႉဝႆႉ မႃးၸွႆႈမႃးထႅမ်ၵူၺ်း၊ ဝၼ်းထီႉ 06/01/2016 ပူၼ်ႉၶၢပ်ႈတူဝ် - ႁွပ်ႇႁူဝ်ၶဝ်ႈႁဵဝ်ႈ - လႆႈႁူႉၼင်ႇၼႆ ။


သင်ဝႃႈပီႈၼွင်ႉၵေႃႉလႂ် ၸဝ်ႈၽူႈၵူၼ်းလီ ၽႂ်ၶႂ်ႈၸွႆႈထႅမ်ႁႅင်းငိုၼ်းတွင်းၸိုင် တိတ်းတေႃႇလႆႈတီႈ ၸၢႆးတႃး ၵေႃႉဢၼ်ပဵၼ်ဢူၺ်းၵေႃႉၵၼ်တင်း ၸၢႆးဢူႉ (ၵေႃႉသဵင်ႈၵႂႃႇ) လႄႈႁပ်ႉပဵၼ်ၸဝ်ႈတႃႇၼ ၸတ်းပၢင်ၸႃပၼ တီႈမၢႆၾူၼ်ႊ 097-9797113 - ၼႆယဝ်ႉ ။