လုမ်းၽွင်တၢင်မိူင်းမျၢၼ်ႇမႃႇ ၸတ်းႁဵတ်းဝၼ်း လွတ်ႈလႅဝ်းၵွၼ်းၶေႃ မိူင်းႁူမ်ႈတုမ် ၶွပ်ႈၶူပ်ႇတဵမ် 68 ပီ တီႈၵဵင်းမႆႇၸိုင်ႈထႆး ပွၵ်ႈဢွၼ်တၢင်းသုတ်း ။

ဝၼ်းတီႈ 04/01/2016 ၶၢဝ်းယၢမ်း 18.00-20.00 မူင်း လုမ်းၽွင်းတၢင် မိူင်းႁူမ်ႈတုမ် ၸတ်းႁဵတ်းပွႆးၶုၵ်းထူပ်းဝၼ်းလွတ်ႈလႅဝ်းၵွၼ်းၶေႃမိူင်းႁူမ်ႈတုမ်မျၢၼ်ႇမႃႇ ၶွပ်ႈၶူပ်ႇတဵမ် 68 ပီ တီႈႁူင်းႁႅမ်း (The Empress Hotel) ၵဵင်းမႆႇၸိုင်ႈထႆး ။


ဢူးၵွင်းသၢၼ်ႇလုၼ်ႇ ၽူႈၵွၼ်းလုမ်းၽွင်းတၢင်မိူင်းႁူမ်ႈတုမ် ၵၢဝ်ႇလၢတ်ႈဝႃႈ ငိၼ်းၸူမ်းၶွပ်ႈၸႂ် ၽူႈၵွၼ်းၸႄႈတွၼ်ႈၵဵင်းမႆႇ ဢၼ်ပဵၼ်တူဝ်တႅၼ်းလူင်ပွင်ၸိုင်ႈထႆး လႄႈၽွင်းတၢင်ၸိုင်ႈလၢႆၸိုင်ႈမိူင်း ဢိၵ်ႇတင်းၽူႈယႂ်ႇၵူၼ်းလူင်လၢႆၸဝ်ႈလၢႆၵူၼ်းဢၼ်လႆႈမႃး ၶဝ်ႈႁူမ်ႈ ၶွပ်ႈၶူပ်ႇ 68 ပီ ဝၼ်းလွတ်ႈလႅဝ်းမိူင်းႁူမ်ႈတုမ် မိူဝ်ႈၼႆႉ  လႆႈဝႃႈပဵၼ်လွင်ႈလီဢၼ်ၼိုင်ႈ တႃႇမိူင်းႁူမ်ႈတုမ်ႁဝ်းၶႃႈလႄႈမိူင်းထႆး တေသိုပ်ႇႁူမ်ႈမိုဝ်းႁဵတ်းပၢႆးမၢၵ်ႈမီးၵႃႉၶၢႆတေႃႇၵၼ် ။ လိူဝ်ၼၼ်ႉၵေႃႈ ၵူၼ်းမိူင်းႁူမ်ႈတုမ်မျၢၼ်ႇမႃႇလႄႈမိူင်းထႆး တေၸမ်ၸႂ်ၵၼ်မႃးထႅင်ႈၼမ်လိူဝ်ၵဝ်ႇ လႄႈမီးလွင်ႈလႅၵ်ႈလၢႆႈလွင်ႈၾိင်ႈငႄႈႁိတ်ႈႁွႆးတေႃႇၵၼ် ။


သိုပ်လၢတ်ႈထႅင်ႈဝႃႈ မိူင်းထႆးၵေႃႈပဵၼ်မိူင်းၼိုင်ႈဢၼ်ၵမ်ႉၸွႆႈမိူင်းႁူမ်ႈတုမ်မျၢၼ်ႇမႃႇ လွင်ႈပၢႆးမၢၵ်ႈမီးမိူၼ်ၼင်ႇႁူမ်ႈၵၼ်ႁဵတ်းသၢင်ႈတႃႈႁိူဝ်းၼမ်ႉလိုၵ်ႉတႃႈဝၢႆ (ထဝွႆႇ) ၸိူဝ်းၼႆႉ - ဝႃႈၼႆ ။


မိသ်ႉသတိူဝ်ႊပဝိၼ်းၶျၢမ်းၼိပရႃႊသျၢတ်ႉ ၽူႈၵွၼ်းၸႄႈတွၼ်ႈၵဵင်းမႆႇ ၵၢဝ်ႇလၢတ်ႈၶေႃႈၵႂၢမ်းဝႃႈ ငိၼ်းၸူမ်းၾၢႆႇလုမ်းၽွင်းတၢင်မိူင်းႁူမ်ႈတုမ်မျၢၼ်ႇမႃႇ ဢၼ်ပၼ်တိုဝ်ႉတၢင်းၶႃႈႁဝ်း မႃးၶဝ်ႈႁူမ်ႈ လႄႈၵၢဝ်ႇလၢတ်ႈၶေႃႈၵႂၢမ်း ပိုတ်ႇပၢင် ။ ၵူၼ်းမိူင်းထႆးလႄႈမိူင်းႁူမ်ႈတုမ်မျၢၼ်ႇမႃႇၵေႃႈ လႆႈၶဝ်ႈဢွၵ်ႇၵႂႃႇမႃးၵိူဝ်းလီၵၼ်ႁိုင်ယၢဝ်းၼၢၼ်းလၢႆပီမိူင်းယဝ်ႉ ။ ငိၼ်းၸူမ်းမိူင်းႁူမ်ႈတုမ်မျၢၼ်ႇမႃႇ  ဢၼ်လႆႈမႃးပိုတ်ႇလုမ်းၽွင်းတၢင်တီႈမိူင်းထႆးၼႆႉ ။


ၸိူဝ်းၼႆႉတေႁဵတ်းႁႂ်ႈ ၵူၼ်းတင်းသွင်မိူင်းတေမိုတ်ႈၵိုဝ်းၵၼ်ၸမ်ၸႂ်ၵၼ်ၵႂႃႇမိူဝ်းၼႃႈ ။ ယွၼ်ႉဝႃႈႁဝ်းၶႃႈ မီးၾိင်ႈငႄႈႁိတ်ႈႁွႆးတၢင်းယုမ်ႇယမ်မိူၼ်ၵၼ်ၼမ် ဝႃႈၼႆ ။


ဝၼ်းလွတ်ႈလႅဝ်းၵွၼ်းၶေႃမိူင်းႁူမ်ႈတုမ်မျၢၼ်ႇမႃႇပီၼႆႉ လႆႈၸတ်းႁဵတ်းတီႈ ၵူင်းသုၼ် ၼႂ်းဝဵင်းၵဵင်းမႆႇ ၵမ်းၼႆႉ ပဵၼ်ပွၵ်ႈဢွၼ်တၢင်းသုတ်းလႄႈဝွၵ်ႇၸိူၼ်း (ၽိတ်ႈမွၵ်ႇ) ထိုင် လုမ်းၽွင်းတၢင်ၼွၵ်ႈမိူင်း မိူၼ်ၼင်ႇ မိူင်းၶႄႇ ၊ ၵျပၼ်ႊ ၊ ၵူဝ်ႊလီႊယိူဝ်ႊ ၊ ၾရင်ႊသိတ်ႊ ၊ ဢင်ႊၵိတ်ႊ ၊ ၼေႃႊဝေႊ ၊ ဢိၼ်ႊၻီႊယိူဝ်ႊ ။ ၼွၵ်ႈလိူဝ်သေၼႆႉၵေႃႈ ယင်းလႆႈဝွၵ်ႇၸိူၼ်း ၸုမ်းၸိူဝ်းပီႈၼွင်ႉၵူၼ်းၶိူဝ်းၼႂ်းမိူင်းႁူမ်ႈတုမ်မျၢၼ်ႇမႃႇၶဝ်ႈႁူမ်ႈ တင်းမူတ်းမွၵ်ႈ 100  ပၢႆ ။


လုမ်းၽွင်းတၢင်မိူင်းႁူမ်ႈတုမ်မျၢၼ်ႇမႃႇ ဢၼ်မႃးပၵ်းၵူင်းသုၼ် (ၵိင်ႇၽႄလုမ်းၽွင်းတၢင်) မိူင်းႁူမ်ႈတုမ်မျၢၼ်ႇမႃႇ တီႈၵဵင်းမႆႇၸိုင်ႈထႆးၼႆႉ တိုၵ်ႉပိုတ်ႇပဵၼ်တၢင်းၵၢၼ်မႃး မွၵ်ႈ 6 လိူၼ်ပၢႆလႄႈတူဝ်ဢူးၵွင်းသၢၼ်ႇလုၼ်ႇ ပဵၼ်ၽူႈၵွၼ်းၵူင်းသုၼ် (ၵိင်ႇၽႄလုမ်းၽွင်းတၢင်) ၵဵင်းမႆႇၼႆႉ ။


ဝၢႆးပၢင်ၵုမ်လူင် ပၢင်လူင် 12/02/1947 ၽူႈၼမ်းမိူင်းသၼ်လွႆတင်းၽူႈၼမ်းမၢၼ်ႈ ၸွမ်သိုၵ်းဢွင်ႇသၢၼ်း လႆႈၸႂ်လူင်းလၢႆးမိုဝ်းႁဵတ်းလိၵ်ႈၵိၼ်ၵႅၼ်ႇၵၼ်တီႈပၢင်လူင်ယဝ်ႉ ပေႃးထိုင်မႃး 04/01/1948 ၵေႃႈ ဢိင်ႊၵလဵတ်ႊ ပူတ်းပွႆႇမွပ်ႈပၼ်လွတ်ႈလႅဝ်းၵွၼ်းၶေႃပၼ်ၸိုင်ႈမိူင်းႁူမ်ႈတုမ် ဢၼ်ႁူမ်ႈၵၼ်တင်း 8 ၸိုင်ႈမိူင်းသေတႄႇဢဝ်ၼၼ်ႉမႃးတေႃႇဝၼ်းမိူဝ်ႈၼႆႉလႆႈ 68 ပီတဵမ်ယဝ်ႉ ။