ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF) ၸတ်းႁဵတ်းပၢင်သွၼ်ႁႂ်ႈႁႅင်းၵၢၼ် မေႃၶဝ်ႈႁႃၵၼ် ယူႇပဵၼ်ၵေႃ ပဵၼ်ၸုမ်း ပိူဝ်ႈႁူမ်ႈၵၼ်သၢၼ်မိုဝ်း တုၵ်းယွၼ်းသုၼ်ႇၵူၼ်းႁဵတ်းၵၢၼ်ႁႂ်ႈလႆႈၽဵင်ႇပဵင်း လႄႈၸွႆႈထႅမ်တူဝ်ၸဝ်ႈၵဝ်ႇ ။

ဝၼ်းတီႈ 16 – 17 / 01 /2016 ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF) ၸတ်းႁဵတ်းပၢင် သွၼ်ပၼ်လုၵ်ႈၸုမ်း “ ၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း ” ၼင်ႇႁိုဝ်ႁႅင်းၵၢၼ်ပေႃးတေမေႃယူႇ မေႃၵိၼ်။မေႃႁူမ်ႈၵၼ်တုၵ်းယွၼ်းသုၼ်ႇလႆႈသုၼ်ႇပဵၼ်တူဝ်ၸဝ်ႈၵဝ်ႇ ။ မီးၸဝ်ႈၼႃႈတီႈ HRDF လႄႈၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်းၶဝ်ႈႁူမ်ႈ ႁိမ်း 30 ၵေႃႉ ၸတ်းႁဵတ်းၵႂႃႇတီႈႁူင်းႁႅမ်း ဝိၼ်ႊၽဵတ်ႊ ဝဵင်းၵဵင်းမႆႇ ၸိုင်ႈထႆး ။


ၸၢႆးပိူင်း ၸဝ်ႈၼႃႈတီႈ ၾၢႆႇမၢႆမီႈ ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF) လၢတ်ႈဝႃႈ - “ ႁႅင်းၵၢၼ်ယၢၼ်မိူင်းၵူႈၵေႃႉထုၵ်ႇလီယူႇႁူမ်ႈၵၼ် ပဵၼ်ၵေႃပဵၼ်ၸုမ်း ၼင်ႇႁိုဝ်တေလႆႈပိုင်ႈဢိင်ၵၼ် ၸွႆႈထႅမ်ၵၼ် ႁူမ်ႈၵၼ်တုၵ်းယွၼ်းသုၼ်ႇလႆႈႁဝ်း ပေႃးႁဝ်းပဵၼ်ၵေႃပဵၼ်ၸုမ်းၸိုင် ၸုမ်း ILO / UN ၸိူဝ်းၼႆႉပိူၼ်ႈၵေႃႈတေႁပ်ႉထွမ်ႇသဵင်ႁဝ်း မိူဝ်ႈလဵဝ်ၼႆႉမီးၸုမ်း NGO’s ယူႇသေတႃႉပိူၼ်ႈတေ ဢမ်ႇယူႇၸွမ်းႁဝ်းတႃႇသေႇ ၵွပ်ႈၼၼ်ႁဝ်းထုၵ်ႇလီမီးႁႅင်းၵမ်ႉထၢၼ်ႈၸွႆႈထႅမ်တူဝ်ၵဝ်ႇႁဝ်းၼၼ်ႉ လီလိူဝ်သေပိူၼ်ႈ ” ဝႃႈၼႆ ။


ၸၢႆးဢုမ်ႈၶိူဝ်း ႁူဝ်ပဝ်ႈၸုမ်းႁူမ်ႈတုမ်ႁႅင်းၵၢၼ်ယၢၼ်မိူင်း လၢတ်ႈဝႃႈ - “ တႄႇဢဝ်ဢၼ်ၶႃႈလႆႈ ၶဝ်ႈမႃးယူႇၼႂ်းၸုမ်းၼႆႉႁဵတ်းႁႂ်ႈၶႃႈ ႁူပွင်ႇ တႃလႅင်းမႃး ၊ ႁတ်းႁၢၼ်မႃး ၊ မီးတၢင်းႁူႉတၢင်းႁၼ်မႃး ။ လိူဝ်ၼၼ်ႉပေႃးႁဝ်းၶႃႈယူႇၵၼ်ပဵၼ်မူႇ ပဵၼ်ၸုမ်းၼႆႉႁဝ်းမီးဢႃႇၼႃႇ တႃႇတေတုၵ်းယွၼ်းသုၼ်ႇလႆႈသုၼ်ႇပဵၼ်ႁဝ်း ပိူၼ်ႈၵေႃႈဢမ်ႇႁတ်းမႃးထၢင်ႇလဵၵ်ႉပေႉၵိၼ်ႁဝ်း ႁဝ်းၵေႃႈတေဢမ်ႇတူၵ်းပဵၼ် ယိူဝ်ႇပိူၼ်ႈလႆႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ - “ ပေႃးႁဝ်းယူႇၵေႃႉလဵဝ်ဢမ်ႇၶဝ်ႈၼႂ်းမူႇၸုမ်းၼႆႉမၼ်းမိူၼ် ၼူၵ်ႉဢမ်ႇမီးၶူၼ် ၵူၼ်းဢမ်ႇမီးၵေႃႉ ၵႂႃႇတီႈလႂ်ၵေႃႈဢမ်ႇမီးလွင်ႈဢုၼ်ႇၸႂ် ဢမ်ႇလွတ်ႈၽေး တႃႇတေၶိုၼ်ႈယႂ်ႇမႂ်ႇ သုင်ၵေႃႈ ယၢပ်ႇ ” ၼႆယဝ်ႉ ။


ၸုမ်းၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း (HRDF) ၼႆႉႁဵတ်းၵၢၼ်ၾၢႆႇႁႅင်းၵၢၼ်မႃးမိူဝ်ႈ ပီ 2007 ၸွႆႈထႅမ်တုၵ်းယွၼ်းသုၼ်ႇလႆႈၵူၼ်းႁဵတ်းၵၢၼ် ၊ ၵူၼ်းၺႃးၽေးၵိုင်ႉၵၢင်ႉၼိူဝ်သဵၼ်ႈတၢင်း ၊ သုၼ်ႇလႆႈၵႃႈႁႅင်း ၸိူဝ်းၼႆႉ လိူဝ်ၼၼ်ႉၸုမ်း HRDF ၼႆႉယင်းသွၼ် ပၼ်ပႃးလိၵ်ႈ တႆး ၊ ထႆး ၊ ဢိင်းၵလဵတ်ႈ ၊ ၶွမ်ႊၽိဝ်ႊၻိူဝ်ႊ ၸိူဝ်းၼႆႉ ။